Məfaʼə 6 - Əka yi Fîə

Pə́ Tsɔ́ʼ Pɨ Pɛ́n Asaambɛ̂ Ńgə́ pó tə́ Ńkwáatə

¹ Nə́ ndɛd jɨ́d zə̂, ndzaŋ ngaŋə́zoŋə́ndzəm Yeso kə̈ peg nə́ ndɛn əghɔ́b ńgɛnə̂ nə́ mbi lə́, azɔŋə a tíʼ ə́fɛ́lə á tətɨ Pəjus páʼ pó nə̈ ńtsáb nə́ atséebə Glik pópə Pəjus páʼ pó nə̈ ńchî a Jɛlusalɛmə. Lə́ kə pə́ ńgə́ Pi páʼ pó nə̈ ńtsáb nə́ Glik lə́ pó nə ńgə́ Pi pó chî nə́ Jɛlusalɛm pə́ nə̈ ḿmyaʼə̂ pəpɔ́b pəkog á əlě ətsəm pó ghab nə́ məjîə.

² Məntú mə́ Yeso mə̂ ntsɔb pɛ̌ mə́ tíʼ fóŋə apuʼə ngaŋə́zoŋə́ndzəm Yeso zə̂ tsɔʼə ətsəm ə́sóŋ nə́ pó ńgə́, “A kě pɔŋə̂ á mbô pɛnə̂ á mə́ mɛdtə̂ nə́ á mə́ tə́ nə́ sóŋə anǔəsê tə́ náŋə anu té məjî pô.

³ Pəlim, tsɔ́ʼ nə́ pɨ pɛ́n asaambɛ̂ á mə́m pɨ páʼ nə́ jî nə́ ńgə́ pó túgə mbɔ́ yi əshîʼnə, ńdwɛ́nkə nə́ Ajwǐəsê ńkə́ ńtúgə ajíənuə, ńjî ńgə́ pəg mɛdtə̂ afaʼə agheebə məjî zəənə́ á mbô pó,

⁴ ńtíʼ ńnéŋ ntɨ́ əwə́gə́ á mə́ chaʼtə̂ nə́ Əsê ə́ kə́ sóŋə anǔəsê.”

⁵ Anu jɨ pó nə ə́sóŋ nə́ lə́, á nə ḿbɔŋə̂ ŋwu ntsəmə á mə́m nkyeetə. Pó tíʼ ńtsɔ́ʼə Stifən páʼ a nə ńdwɛ́nkə nə́ nə́ mbimə́ pó Ajwǐəsê. Ńkə́ ńtsɔ́ʼə Filib pó Plokɔlɔs nə́ Nikano ḿbɨ ḿbə́ nə́ Timɔn pó Pamɛna ḿbéenə Nikolas páʼ a nə ḿbə́ nə́ Təjǐsê ə́fɛ́lə Antiok pə́ yǐ ńtíʼ ə́sɛdkə̂ yə́ a tíʼ ḿbə́ ŋwu Jusə.

⁶ Pó tíʼ ńdɔgə̂ ághɔ́b ńgyǐ nə́ pó á mbô məntú mə́ Yeso mə̂ pó tíʼ ńnoŋkə̂ mbô móobə́ á atû pó ńchaʼtə́sê nə́ pó.

⁷ Atséebə Əsê a tíʼ ńgɛn nə́ mbiə á mə́ kwú nə́ a mətôglə pɨ pipə nɨ́ nə́. Ndɛn ngaŋə́zoŋə́ndzəm Yeso á Jɛlusalɛm ə́ tíʼə ńkwíŋə tsɔʼə nə́ mətɨ mətəənə. Ngaŋə́pêsê yi nɨ́ nə́ ə́ pí ńdzoŋ ndzəm Yeso.

Pə́ Waamə̂ Stifənə

⁸ Apɔŋə́ntə́əmə Əsê pó mətɨ mə́ Əsê mə́ nə́ ńdwɛ́nkə á mbɨ Stifən a tíʼə ńgɛlə̂ pətə́kɔʼ pə́ mənu mimə yɛ́d nə́ yɛ́d nə́ pópə əkyeʼmə́nuə á mə́m pəənə.

⁹ Pɨ pətsə́ pó nə ńchwáakə á mə́ kǐ nə́ anu páʼ Stifənə a nə̈ sóŋ nə́ ńkə́ ńgɛlə̂. Lə́ nə́ ḿbə́ pɨ pə́ ndɛ̂sê Pəjusə páʼ pə́ nə̈ fóŋ nə́ ághɔ́b ńgə́ (pɨ pə fɛ́d nə́ á mə́mə apoʼə). Pó nə ə́fɛ́lə á Silien pó Alekzanda. Pó pətsə́ Pəjus páʼ pó nə fɛ́d nə́ á Silisya pó Esya pó chúʼə á mə́ zɔŋ nə́ pópə Stifənə.

¹⁰ Lə́ Ajwǐəsê a pə́ ə́fɛ̂ ajíənuə á mbô Stifən nə́ əsêndú ńgə́ mbɔʼ a tsáb, ŋwu tsə̌ a kě pɨ ḿbəŋ pô.

¹¹ Pó tíʼ ḿbánə ńtóotə pɨ pətsə́ ńgə́ pó sóŋ ńgə́, “Pəg nə ńdzóʼ ndzaŋ páʼ ä tsáb nə́ atséebə atság ńdzɔmtə̂ Mosisə pó Əsê.”

¹² Pó tíʼ ńgɛd məndě mə́ pɨ mə́ záŋnə, ḿbá mətû mə́ aláʼ ḿbɨ ḿbə́ nə́ ngaŋə́zéʼkə pənoŋkə, pó tíʼ ńgɛn ńdzǎ Stifən ńgyǐ nə́ yə́ á mbi ngaŋə́sáʼə́məsáʼə.

¹³ Ńtíʼ ńdɔg pɨ pətsə́ ńkwú nə́ pó ńgə́ pó tsɨd ntsəələ atû yí ńgə́, “Ŋwu nə́ a zá ńtséebə təpɔŋ ńté Tə́kɔʼndɛ̂sê pó məntəgə́ mə́ Mosisə.

¹⁴ Pəg nə ńdzóʼə a sóŋ ńgə́ Yeso Mɔ́ Nazalɛd ghɛn a yǐ shaʼtə̂ Tə́kɔʼndɛ̂sê ghɛn ə́ pɨ kə́ kwúblə pənoŋkə páʼ Mosisə a nə ə́fɛ̂ nə́ nə́ pɛnə̂.”

¹⁵ Ŋwu ntsəm páʼ a nə ńnáanə nə́ á aliʼə́sáʼə́məsáʼ a tíʼ ńtə́g əmə́g nə́ Stifən ńtíʼ ńjɨ́ ńgə́ əshî əyí ə́ nə ńchîə pə́ ándó əshî ntseŋndɛ̂sê.