Məfaʼə 3 - Əka yi Fîə

Pita a Tsóʼə Kɔ́ŋə́sê Yitsə̌

¹ A nə ńdáʼ ḿbə́ alě tsə́ Pita pó Jɔn tə́ ńkɔ́ʼə ńgɛnə̂ Tə́kɔʼndɛ̂sê nə́ anuə pəmə́nu pɛ́n teelə́ nə́ ənumnə páʼ a nə ḿbə́ nə́ ndɛlə́ achaʼtə́sê.

² Ŋwu tsə̌ a nə ńchî ə́wɨ́ ə́fɛ́d páʼ pə́ nə ḿbî nə́ yí a pə́ kɔ́ŋə́sê, pə́ zá ńtwáamə yí əlě ətsəm ńgyǐəə ńnáakə a ntsǒnkáʼ yi pɔ́ nə́ á Tə́kɔʼndɛ̂sê páʼ pə́ nə̈ fóŋ nə́ ńgə́ “Biyutiful Géd.” Pə́ nə̈ ńgyǐəə ńnáakə yí ə́wɨ́ lə́ ńgə́ a tə́ ńdɔ́ əpúmə á mbô pɨ pó nə̈ ńkwú nə́ á Tə́kɔʼndɛ̂sê.

³ Ndzaŋə a nə ńjɨ́ nə́ Pita pó Jɔn pó tə́ ńdoonə̂ á mə́ kwú nə́ lə́, a póʼmbô nə́ pó ńgə́ pó fɛ̂ nkáb nə́ yə́.

⁴ Pita tə́g əmə́g ńnáŋə yí ńtíʼ ə́sóŋ ńgə́, “Náŋə áwə́gə́!”

⁵ A tíʼ ńnáŋə ághɔ́b ńkwaŋ ńgə́ pó yǐ fɛ̂ ajú nə́ yə́.

⁶ Pita a tíʼ ə́sóŋ ńgə́, “Maŋ kě seleba kɨ gôlə túg pô, lə́ maŋ yǐ fɛ̂ ajú páʼ maŋ túg nə́ á mbô gho. Nə́ əlɛ́n Yeso klisto Mɔ́ Nazalɛd, maŋ sóŋ ńgə́ lǒo əsê ńnyinə̂.”

⁷ A tíʼ ńgwaamə̂ apô ají yə tɨ ńkwáalə yə́ a lǒo əsê. Tsɔʼə əghâ yi wɨ́, məko mí pópə mələʼtə́ mə́ məko mí mə́ tyantə̂;

⁸ A lî ńkɔ́ʼə atǐ ńtɨ́ nə́ məko mí ńchúʼə á mə́ nyi nə́. Pó po tíʼ ńgɛnə̂ á mə́m Tə́kɔʼndɛ̂sê, a nyinə̂ ńdîə ńkɔ́ʼə atǐ ńgóʼkə Əsê.

⁹ Əghâ ándó ŋwu ntsəmə a nə ńjɨ́ nə yí a tə́ ńnyinə̂ ńtûə ńgóʼkə Əsê lə̂,

¹⁰ pó leŋə̂ yə́ a pə́ lə́ tsɔʼə ŋwu wə̂ páʼ a nə̈ ńnáanə nə́ a ntsǒnkáʼ Tə́kɔʼndɛ̂sê yi pɔ́ nə́ páʼ pə́ fóŋ nə́ nə́ “Biyutiful Géd” ńdɔ́ nkáb lə́. Anuə á nə ńdaŋ nə́ á mbɨ ŋwu wə̂ á nə ńkɨʼnə̂ ághɔ́b ńkə́ ńtsɛɛlə̂ ághóobə́.

Anu Páʼ Pita a kə Sóŋ nə́ á Tə́kɔʼndɛ̂sê

¹¹ Ndzaŋ ŋwu wə́ a nə ńtsə́ŋnə nə́ á ndzəm Pita pó Jɔn lə̂, anu yəwə́ a kɨʼnə̂ ŋwu ntsəm pó tíʼ ńkə́ ńgyǐ ńtégə ághóobə́ aliʼ pó nə ńchî nə́ ə́wɨ́ pə́ fóŋə nə́, alaakə Solomun lə́.

¹² Pita a jɨ́ pɨ pə̂ ńtíʼ sóŋ nə́ pó ńgə́, “Pɨ pə́ Islɛl, lə́ ghɛlə̂ akə̂ anu zəənə́ a kɨʼnə̂ áwə́ənə́? Lə́ ghɛlə̂ akə̂ nə náŋə áwə́gə́ pə́ ándó pəg ghɛd lə́ nə́ mətɨ mə́g kɨ məntɨ́ mə́g mə́ ŋwaʼ lə́ ŋwaʼ nə́ á mbi Əsê tə́shúnə́?

¹³ Əsê Ablaam, pó yi Azig, nə́ yi Jekɔb, Əsê pətǎ pɛn ə́ fɛ̂ nəgháʼə á mbô mɔ́ əyǐ Yeso. Pɨ nə fɛ̂ yí ńgə́ pə́ jwítə yə́, ńkǐəə yə́ á mbi Payilɛd páʼ Payilɛlə a nə ḿbǎ nə́ tə ə́sóŋ ńgə́ pə́ mɛdtə̂ yə́ a ghɛn lə́.

¹⁴ Pɨ nə ńkǐəə áwə́ənə́ ŋwu páʼ a ŋwaʼ nə́ ńkə́ ńtɨ́ ndə̌ŋdəŋ ə́sóŋ ńgə́ pə́ mɛdtə̂ pə́ njwítə á mbô pəənə́.

¹⁵ Pɨ nə ńjwítə ŋwu páʼ ä fɛ̂ nə́ nchîmbîə á mbô pəənə́, lə́ Əsê a pə́ ńjúmkə yə́ á nəwûə. Pəg nə ńjɨ́ ndɛn mənu ghɛn ətsəmə.

¹⁶ Lə́ nə ńgɛd mətɨ mə́ chî nə́ nə́ əlɛ́n Yeso kɔ́ŋə́sê nə́ a tyantə̂. Ŋwu nə́ páʼ nə̈ jɨ́ nə́ yí ńkə́ ńjîə yí lə́, pə tsóʼə yí lə́ ńté ńgə́ a néŋ ńtɨ́ əyí nə́ əlɛ́n Yeso. Lə́ mbimə́ á mə́m Yeso páʼ ə́ ghɛd nə́ a yáŋə, ndzaŋ pɨ pətsəm ə́ jɨ́ nə́ lɛ̌.”

¹⁷ Əghâ nə́ nə́ pəlimə́ mə, maŋ jî ńgə́ anu pɨ̌pə mətû mɨ́ ə́ nə ńgɛd nə́ nə́ Yeso lə́, pɨ nə ńgɛd lə́ təjîə.

¹⁸ Əsê a nə ńkyaʼ ńdaŋə̂ á mbô məntú mí mətsəmə á ngoʼ pəchə́ ńgə́. Yi páʼ Əsê a Tsəʼ nə́ a yǒ jɨ́ ngə́ʼə. Á pɛn ńkə́ ńdɔgə̂ aliʼ.

¹⁹ Tíʼ nə́ ńkwúblə ḿbəənə̂ á mbô Əsê ńjî ńgə́ Əsê a ləgnə̂ təpɔŋ əwəənə́,

²⁰ ńjî ńgə́ Mmaʼmbî a ghɛd məntɨ́ mɨ́ mə́ féŋtə, a túmə Yi páʼ Əsê a tsɔ́ʼ nə́ ńtsəʼə̂ á mbô pəənə́, yí páʼ a pə́ nə́ Yeso lə̂.

²¹ A yǐ ńchîə á nəpó tə ńkoʼ nə́ ndɛd páʼ Əsê a yǒ nə́ ghɛlə̂ ajúmə atsəmə a pə́ yə fîə. Ndzaŋ páʼ Əsê a nə ńdaʼnə̂ nə́ ə́fɛ́lə a ngoʼ pəchə́ ńdaŋə̂ á mbô məntú mí mimə ŋwaʼ nə́.

²² Ńté ńgə́ Mosisə a nə sóŋ ńgə́, Mmaʼmbî páʼ a pə́ nə́ Əsê əzəənə́ a yǒ túmə ntûsê á mbô pɨ tsɔʼə ndzaŋ páʼ a nə ńtú nə́ mə lə̂, páʼ a yǐ nə́ fɛ́d tsɔʼə á mə́m pɨ pəənə́. Nə́ yǐ shib jwə́ʼtə anuə atsəm páʼ ä sóŋ nə́ á mbô pəənə́.

²³ Ŋwu ntsəm páʼ a kě nə́ á mbô yí jwə́ʼtə pô, pə́ yǒ fógə yə́ á mə́m pɨ pə́ Əsê jwítə yə́.

²⁴ Məntú mə́ Əsê mətsəm ńchúʼ nə́ Samuɛl ḿbéenə mi páʼ mə́ zoŋ nə́ á ndzəm yí páʼ pó kə túg nə́ məŋkɨ, pó kə̈ sóŋə anu ńté əlě mbî pəənə́.

²⁵ Məndaʼnə mə́ Əsê páʼ mə́ nə ńdaŋ nə́ á mbô məntú mí mə́ chî lə́ á mbô pəənə́. Pɨ lə́ pɔ́ pə́ məntúmə́sê, á pə́ ńgə́, Əka páʼ Əsê a nə ńgwad nə́ pópə Pətǎ pɨ lə́, ə́ kə́ ńchîə á mbô pəənə́. A kə sóŋə á mbô Ablaam ńgə́, Maŋ yǐ ghɛlə̂ á pɔŋə̂ á mbô ŋwu ntsəm á ndu ndəsê ə́ laŋ nə́ ngwud əzo.

²⁶ Ńdaŋ ə́lɨ́d Əsê a tsɔ́ʼə ngaŋə afaʼ əyǐ ḿbeg ńtúmə á mbô pɨ ńgə́ á ghɛd á pɔŋə̂ á mbô pɨ ńgɛd pɨ fɛ́lə á mə́m mənu mə́ afanə mə́ənə́.