Məfaʼə 25 - Əka yi Fîə

Pɔlə a Sóŋ Ńgə́ pə́ Tsɛɛkə̂ Əsáʼ Əyə́ á Mbô Əfo Lomə

¹ Ndzaŋə ándó Fɛstusə a kə lɔg nə́ aliʼə́ yə́ á mboʼə aláʼ wɨ́d wə́ ándó gɔbnɔ lə́, əlěmbî teelə́ laŋ á lǒo Sisalya ńkɔ́ʼ ńgɛnə̂ á Jelusalɛm.

² Pətə́kɔʼ pə́ ngaŋə́pêsê pópə mətû mə́ láʼ mə́ Pəjus mətsə́ mə́ ghɛnə̂ á mbô yí ə́wə́, ńchúʼə á mə́ néŋ nə́ mənuə á tû Pɔlə. Pó tíʼ ḿbóʼmbô nə́ Fɛstus ə́sóŋə ńgə́,

³ a kwáalə ághóobə́ á mə́ ghɛd nə́ Pɔlə a ghɛnə̂ Jɛlusalɛm, ńté ńgə́ pó nə ńgɛlə̂ á ndzəmə á ndzəm ńgə́ pɨ pó yǐ ḿbántə á alaŋə́ ndú ńgwaamə̂ Pɔlə ńjwítə.

⁴ Fɛstusə a kwěe ághɔ́b ńgə́, “Pə́ nə́ fwɔnə̂ Pɔlə á Sisalya pə́ tə́ ḿbyáabə yə́. Maŋ nə́ nkɔ̌ʼmbəəmə mə maŋ tə́ ńkwaŋə̂ á mə́ ghɛn nə́ ə́wɨ́ nə́ mɔ́ akəmə ndɛlə́.

⁵ Lə́ələ́ pə́ ńgə́ nə́ ghɛd mətû mə́ aláʼ mi mətsə́ mə́ zoŋə̂ á mə á Sisalya, ńjî ńgə́ mbɔʼ Pɔlə á nə ńgɛlə̂ anuə təpɔŋ yətsə́ nə sóŋə á mbi maŋ ə́wə́.”

⁶ Ndzaŋə ándó Fɛstusə a nə ńchî nə́ pó po nə́ əlěmbî nəfeemə́ kɨ nəghə́m lə́ ńtíʼ ńtsó ńgɛnə̂ á mə́m tɔ̂ŋ Sisalya. Mbî fóg a lɔgə̂ aliʼə́ ajíə ándó əsáʼməsáʼə, ńtíʼ ə́sóŋ ńgə́ pə́ yǐ nə́ Pɔlə.

⁷ Əghâ ándó pə nə ńgyǐ nə́ nə́ Pɔl lə́, Pəjus pó kə lǒo nə́ Jelusalɛm ńtsó lə́ pó tɨ́ ńdíblə yí ńchúʼə á mə́ néŋ nə́ ətyǎntə mənuə á atû yə́, ḿbə́ ńkě chîə á mə́ nɨd nə́ anu yəwə́ á əshîsaŋ páʼ Pɔlə a ghɛd nə́ pô.

⁸ Pɔlə a chúʼə á mə́ tsáb nə́ á mə́ nɨd nə́ ńgə́ a kě anu yitsə̌ jî pô, ńtíʼə ə́sóŋə ńgə́, “Maŋ kě anuə təpɔŋ ghɛd ńté noŋkə Pəjus kɨ ńté Tə́kɔʼndɛ̂sê kɨ ńté Kasa pô.”

⁹ Lə́ Fɛstusə a pə́ ńtə́ ńdoonə̂ á mə́ ghɛd nə́ Pəjusə pó kɔŋtə̂, ńtíʼ ə́sóŋ nə́ Pɔlə ńgə́, “Gho kɔŋə̂ á mə́ ghɛn nə́ á Jɛlusalɛm maŋ sáʼ əsáʼ əgho ńté ndɛn mənu ghɛn páʼ pə̈ néŋ nə́ atû gho lɛ̌?”

¹⁰ Lə́ Pɔlə a kwěe ə́sóŋ ńgə́, “Maŋ chîə á ndɛ̂ əsáʼməsáʼ Kasa, aliʼə́ ándó pə́ chî nə́ á mə́ sáʼ nə́ əsáʼə mə ə́wə́. Gho chigə ńjî ńgə́ maŋ kě anuə təpɔŋ yətsə́ ghɛd nə́ Pəjus pô.

¹¹ Təmbɔʼ á pə́ ńgə́ maŋ tə́ ńgwǔ ntəgə́ yətsə́ ńkə̈ ńgɛlə̂ anuə təpɔŋ yətsə́ təmbɔʼ á ghɛd ńgə́ pə́ jwítə mə tə ḿbə́ mbɔʼ maŋ kě moomə̂ á mə́ kə nə́ á mbô nəwû pô. Lə́ mbɔʼ maŋ pə́ ńchîə anuə yətsə́ ghɛd, pó pə́ ńtə́ ńtə́m əsóomə atû maŋ, ŋwu tsə́ a kě mə á mbô pó fɛ̂ pô. Maŋ lɔ ńgə́ pə́ chaakə̂ əsáʼə mə á mbô Kasa.”

¹² Əghâ ándó Fɛstusə a nə ńtsáb nə́ pópə ngaŋə́sáʼə́məsáʼ əjí lə́, ńtíʼ ə́sóŋə á mbô Pɔl ńgə́ “Gho sóŋ ńgə́ pə́ chaakə̂ əsáʼ gho á mbô Kasa, gho yǐ ghɛnə̂ á mbô Kasa.”

Fɛstusə a Fiʼtə̂ Əfo Aglɛpa nə́ Anu Ńté Pɔlə

¹³ Ndzaŋə ándó əlěmbî pətsə́ nə ńdaŋ nə́ əfo Aglɛpa pó mɔ́mɛ́ əyǐ yi məngyě əlɛ́n əyí nə ḿbə́ nə́ Bɛnisə ghɛnə̂ á tɔ̂ŋ Sisalya á mə́ chaʼtə̂ nə́ Fɛstusə.

¹⁴ Ndzaŋə ándó pó nə ńchî nə́ ə́wɨ́ əlěmbî pipə nɨ́ nə́ lə́, Fɛstusə fiʼtə̂ anu ńté Pɔlə á mbô pó ə́sóŋ ńgə́, “Ngaŋətsáŋ yətsə́ a chîə aliʼə́ nə́ páʼ Fɛlɛsə a nə mɛdtə̂ nə́.

¹⁵ Əghâ ándó maŋ nə ńchî nə́ Jɛlusalɛm lə́ pətə́kɔʼ pə́ ngaŋə́pêsê pópə mətû mə́ Pəjusə, pó fiʼtə̂ mə nə́ anu ńté Pɔlə ńtíʼ ḿbítə ńgə́ maŋ sáʼ əsáʼ əyí ńtíʼ ńdə́g ńgə́ pə́ jwítə yə́.”

¹⁶ Lə́ maŋ pə́ sóŋə á mbô pó ńgə́, “A kě koʼnə̂ ńdzoŋə̂ a noŋkə pɨ pə́ Loman ńgə́ pə́ fɛ̂ ŋwunə á mbô pɨ pə́ néŋ nə́ anuə atû yí tsɔʼə tə ghə́ pə́ peg ḿmɛdtə̂ yə́ a tə́əmə á əshîsaŋ pó po ńkwěe anu yə wɨ́ pô.

¹⁷ Lə́ ndɛd pó nə ńgyǐ nə́ aliʼə́ nə́, maŋ nə ńkě lɛ́ɛlə pô, lə́ mbî ə́ fóg maŋ náanə á ndumə aləŋə́ asáʼə́məsáʼə mə, ńtíʼ ə́sóŋ ńgə́ ngaŋə́maʼə́ntso yǐ nə́ yə́.

¹⁸ Əghâ ándó pɨ pó nə néŋ nə́ anuə atû yí pó nə ńdǒ nə́ əsê lə́, pó kě sóŋə anuə təpɔŋ yətsə́ ńté Pɔlə ándó maŋ nə ńkwaŋ nə́ ńgə́ pó yǐ sóŋ ńgə́ a ghɛd pô.

¹⁹ Pó pɨ ńtíʼ ńchúʼə á pə́ mə́ zɔŋ nə́ pópə Pɔlə nə́ mənu mətsə́ ńté anǔəsê azóobə́, ńkə́ ńté ŋwu tsə́ páʼ əlɛ́n yí pə́ nə́ Yeso Klisto páʼ a nə ńkwû nə́, lə́ Pɔlə a pə́ ńtə́ ə́sóŋə ńgə́ a chîə mbîə.

²⁰ Maŋ nə ńkě jî ndúmə á mə́ náŋ nə́ anu páʼ pó nə sóŋ nə́ pô, ńtíʼ ḿbítə Pɔl ńgə́ kəənə a lɛ yǐ kɔŋə̂ á mə́ ghɛn nə́ Jɛlusalɛm pə́ sáʼ əsáʼ əyí ə́wə́?

²¹ Lə́ Pɔlə a pə́ ə́sóŋ ńgə́ pə́ néŋə yə́ atsáŋ ńtə́ ḿbyáabə tə ńgɛd ńkoʼ nə́ ndɛd páʼ əfo Lomə a yǒ nə́ ńdə́g əsáʼ əyə́. Maŋ tíʼ sóŋ ńgə́ pə́ mɛdtə̂ yə́ á atsáŋ tə ńkoʼ nə́ ndɛd maŋ yǒ nə́ ńtúmə yə́ á mbô Kasa.”

²² Aglɛpa a sóŋə á mbô Fɛstusə ńgə́ “Maŋ nə́ nkɔ̌ʼmbəəmə mə yǐ kɔŋə̂ á mə́ jwə́ʼtə nə́ á mbô ŋwu nə́.” Fɛstusə a kwěe yí ńgə́ gho yǒ zóʼə atséebə ají á ngwɛʼə́.

²³ Mbî ə́ fóg, əfo Aglɛpa pó mɔ́mɛ́ əyǐ yi məngyě Bɛnisə pó yǐ nə́ tə́kɔʼ ńgóʼkə ńkwúnə á ndɛ̂ asáʼə́məsáʼə pópə mətû mə́ ngaŋə́maʼə́ntso mbɨ ḿbə́ nə́ chigə pəənə á mə́mə aláʼə. Fɛstusə a tíʼ ə́sóŋ ńgə́ pə́ yǐ nə́ Pɔlə.

²⁴ Pə́ yǐ nə́ yə́ a sóŋ ńgə́, Əfo Aglɛpa pópə pɨ pətsəm pə́ chî nə́ aliʼə́ nə́! Jɨ́ nə́ a ŋwu páʼ Pəjusə pətsəm pó chî nə́ a Jɛlusalɛm pó aláʼə Sisalya zɨ pó yǐ nə́ á mbô maŋ ńgyɛ́ɛlə ə́sóŋə ńgə́, “Lə́ kě ŋwu təmbɔʼ a chîə á mbî pô.”

²⁵ Lə́ maŋ pə́ ńkě zə́ənə anuə təpɔŋ yətsə́ ándó a ghɛd nə́ təmbɔʼ pə́ jwítə yí pô, ndzaŋə ándó a sóŋ nə́ ńgə́ pə́ chaakə̂ əsáʼ yə́ á mbô Kasa lə́, maŋ tíʼ ńtsɔ́ʼ ńtúmə á mbô Kasa.

²⁶ Lə́ ḿbə́ ńkě jîə anu maŋ yǐ nə́ ŋwaʼlə̂ ə́fɛ̂ á mbô Kasa pô, ńdaŋ ə́lɨ́d maŋ tíʼ ńdɔgə̂ yí ńgyǐəə á mbi pɨ, ḿbə́ pə́ nə́ á mbi gho əfo Aglɛpa ńjî ńgə́ əghâ ándó pɛn chígə́ nə́ ńnáŋə anu páʼ a ghɛd nə́, əghâ tsə́ maŋ jîə anu təmbɔʼ maŋ ŋwaʼlə̂.

²⁷ Ńté ńgə́ á chîə á mbô maŋ ándó á kě koʼnə̂ á mə́ tú nə́ ngaŋətsáŋə á mbô Kasa tə́ ŋwaʼlə̂ chigə anu páʼ pə́ sóŋ nə́ ńgə́ a ghɛd pô.