Məfaʼə 23 - Əka yi Fîə

¹ Pɔlə a tə́g əmə́g mí ndə̌ŋdəŋ ńnáŋ ngaŋə́sáʼə́məsáʼ ńtíʼ ə́sóŋə á mbô pó ńgə́, “Pəlimə́ mə, ntə́əmə mə ə́ ŋwaʼə̂ á mbi Əsê ńté ndzaŋ nchîmbî mə kə chî nə́ tə ńkoʼ ə́sɛ̂nə̌.”

² Mbêsê yi Ngweŋə́ ándó pə́ nə̈ fóŋ nə́ nə́ Ananyasə a tíʼ ə́sóŋ nə pɨ pó nə ńtɨ́ nə́ a nəpɛnə́ Pɔl ńgə́ pó kə́ʼə apô á əmə́g yə́.

³ Pɔlə a tíʼ ə́sóŋə á mbô yí ńgə́, “Əsê a yǐ kə́ ləbə̂ gho, gho chî lə́ ándó mbɨ ndɛ̂ pə́ zɔ́ʼ nə́ nə́ mbəəmə́ ə́ tə́ fógə! Gho náanə aliʼ wə́ ńdoonə̂ á mə́ sáʼ nə́ əsáʼə mə ə́ zoŋə̂ noŋkə, lə́ gho nə́ nkɔ̌ʼmbɨ əgho, gho pə́ ńgwǔəə noŋkə á mə́ sóŋ nə́ ńgə́ pə́ ləbə̂ mə.”

⁴ Pɨ pó nə ńtɨ́ nə́ ḿbáatə Pɔl pó sóŋ ńgə́, “Gho zoomə̂ lə́ Mbêsê yi Ngweŋ lɛ̌?”

⁵ Pɔlə a kwěe ághɔ́b ńgə́, “Pəlimə́ mə, maŋ pěʼ ńkě jî ńgə́ lə́ Mbêsê yi Ngweŋ pô, ńté ńgə́ aŋwaʼlə Əsê a sóŋ ńgə́, Kɔ gho tséebə á təpɔŋ ńté nətû nə́ pɨ pô.”

⁶ Əghâ ándó Pɔlə a nə ńjî nə́ ńgə́ pɨ pətsə́ lə́ Pəsadusi pətsə́ pópə Pəfalasi lə́, ńtíʼ ə́sóŋə á mbô ngaŋə́sáʼə́məsáʼ ńgə́, “Pəlimə́ mə, maŋ lə́ ŋwu Falasi, ńkə́ ḿbə́ mɔ́ ŋwu Falasi. Maŋ tɨ́ pə́ sáʼ əsáʼə mə lə́ ńté ńgə́ maŋ túgə akwaŋ ńtə́ ḿbyáabə ńgə́ pəkwû pó yǒ júmnə á nəwûə.”

⁷ Əghâ ándó Pɔlə a nə ńtsáb nə́ atsáb zɨ lə́ afyaʼə́ fɛ́lə tətɨ Pəfalasi pó Pəsadusi, nkyeetə yi wɨ́ nə ńtíʼ ńgabnə̂ əliʼ pɛ̌.

⁸ Ńté ńgə́ (Pəsadusi pó sóŋə ńgə́ pɨ pə́ yǒ kě nəwû pɨ júmnə pô, ńkə́ ə́sóŋə ńgə́ pətseŋpə́ndɛ́pə́sê pópə ajwi ə́ kě ə́wɨ́ kə́ chîə pô, lə́ Pəfalasi pó pə́ ńjî ńgə́ mənu mɨ́d mɨ mə́ chî ə́wə́.)

⁹ Chigə mɛ́ tə́kɔʼə ajwaʼlə a nə ńchî ə́wə́, ngaŋə́zéʼkə pənoŋkə pətsə́ ándó pó nə ḿbə́ nə́ pɨ pə́ Falasi pó lǒo ńtɨ́ ə́sóŋ ńgə́, “Pəg kě anu yitsə̌ zə́ənə ándó ŋwu nə a wǔ nə́ pô, əghâ tsə́ lə́ pěʼ ńtsáb ntseŋndɛ̂sê kəənə ajwiə á mbô yə́!”

¹⁰ Afyaʼ yəwə́ a nə ńtíʼ ńtyantə̂ lɛ tətə nətû nə́ ngaŋə́maʼə́ntso nə́ tíʼə ḿbɔ́gə ńgə́ pə́ yǐ sɛɛtə̂ Pɔlə apagə apagə. A tíʼ ə́sóŋə á mbô ngaŋə́maʼə́ntso ńgə́ pó tsó ńkwáalə Pɔlə nə́ mətəənə, ńdɔgə̂ yí ńgɛn nə́ yə́ á pə́lə́gə́ pó.

¹¹ A yǐ ḿbə́ nətúʼ, Mmaʼmbiə a tíʼ ńgyǐ ńtə́əmə a nəpɛnə́ Pɔl ə́sóŋ ńgə́, “Wam ntɨ́ əghô! gho tə́əmə aliʼə́ nə́ á Jɛlusalɛm ə́sóŋə anu ńté mə á əshîsaŋə, lə́ kə́ ḿbə́ ndzaŋ gho yǐ nə́ tə́əmə Lom ə́sóŋə anu té mə á əshîsaŋə.”

Pə Tyáŋə Mənaŋə́ á mə́ Jwítə nə́ Pɔlə

¹² Mbî ə́ fóg á məsânə Pəjus pətsə́ pó kyeetə̂ táʼ aliʼə́, ńtíʼ ńtyáŋə mənaŋ ńdzoŋ ńgɛlə̂ atyǎntə ndaʼnə ə́sóŋ ńgə́ pó kě ajú yǐ jî kɨ nô tə ńdéʼtə ńgə́ pó jwítə Pɔlə pô.

¹³ Pɨ pó nə ńkwaŋ nə́ anu zɨ pó nə ńdaŋ məghə́m mɛ́n nəkwa.

¹⁴ Pó tíʼ ńgɛnə̂ á mbô pətə́kɔʼ pə́ ngaŋə́pêsê pópə mətû mə́ aláʼ ə́sóŋ ńgə́, “Pəg chwíʼnə táʼ aliʼ ńgɛlə̂ atyǎntə ndaʼnə ńgə́ pəg yǐ kě ajûtsə́ jî kɨ nô tə ńdéʼtə ńgə́ pəg jwítə Pɔlə pô.

¹⁵ Nə́ pə əghâ nə́ pɨ̌pə ngaŋə́sáʼə́məsáʼ yǐ shib tú nkəənə á mbô nətû nə́ ngaŋə́maʼə́ntsoolə á Lom ńgə́ a lɔgə̂ Pɔl ńgyǐ nə́ yə́ á mbô pəənə́. Nə yǐ tsɨd ntsəələ á mbô yí ńgə́ nə́ loonə̂ lə́ á mə́ pyádnə nə́ zóʼə anuə á mbô yí ndzaŋə á nə́ ńdaŋ nə́. Pəg koʼnə̂ á mə́ jwítə Pɔl záʼ a pɔŋə̂ yǐ kwúnə aliʼə́ nə́.”

¹⁶ Əghâ ándó mɔ́ ndim Pɔl yi məngyě a nə ńdzóʼ nə́ mənaŋ ghɛn ńté yí lə́, ńtíʼ ńgɛn ńkwúnə á pə́lə́gə́ pəsoye ə́fiʼtə̂ Pɔlə.

¹⁷ Pɔlə a tíʼ ə́fóŋə a táʼ nətû nə́ ngaŋə́maʼə́ntso zə́ yi nətsə́ ə́sóŋə á mbô yí ńgə́, “Lɔgə̂ a mɔ́ nkaŋŋwu ghɛn ńgɛn nə́ yə́ á mbô ŋwu əwɨ yi ngweŋə́, a chî nə́ anu á mə́ fiʼtə̂ nə́ yə́.”

¹⁸ A tíʼ ńdɔgə̂ yí ńgɛnə̂ á mbô ŋwu əghɔb yi ngweŋ ə́sóŋ ńgə́, “Ngaŋətsáŋ wə́ pə́ fóŋ nə́ nə́ Pɔlə lə́ a túmə mə á mbô gho ńgə́ maŋ lɔgə̂ mɔ́ nkaŋŋwu ghɛn ńgyǐ fɛ̂ nə́ gho ńté ńgə́ a túgə anu yətsə́ á mə́ sóŋ nə́ gho.”

¹⁹ Ŋwu yi ngweŋ əghɔb wə́ á tíʼ ńgwaamə̂ a mɔ́ nkaŋŋwu wə́ apô yí ńdɔgə̂ yí ə́fɛ́lə apeŋ ḿbítə yə́ á ndzəmə ndzəm ńgə́, “Gho túg lə́ akə̂ anuə á mə́ fiʼtə̂ nə́ mə?”

²⁰ A sóŋ ńgə́, “Pəjus pó pímnə ńgə́ pó yǒ yǐ ə́sóŋ nə́ gho ńgə́ gho lɔgə̂ Pɔl ńtsó nə́ yə́ ngwɛʼə́ á mbô ngaŋə́sáʼə́məsáʼ ńjî ńgə́ pó tíʼ ḿbɨ́ʼkə əmə́g ńgə́ pó loonə̂ lə́ á mə́ pyádnə nə́ zóʼə anu Pɔl á kə ghɛd nə́.

²¹ Lə́ kɔ gho pə́ ńjwə́ʼtə á mbô pó ńté ńgə́ pó chî tə ńdaŋ məghə́m mɛ́n nəkwa pó yǒ nə pánə akɔb ə́ tə́ pyáabə yə́ á mə́ jwítə nə́. Pó wad əka ńgə́ mbɔʼ pó kě ajûtsə́ jî kɨ nô pô tə ńdéʼtə ńgə́ pó jwítə yə́. Pó koʼnə̂ əghâ nə́ á mə́ jwítə nə́ yə́ ḿbə́ ńtíʼə ḿbyáabə atséebə á mbô gho.”

²² Lə́ ŋwu yi ngweŋ əghɔb wə̂ a nə́ ńgɛd mɔ́ nkaŋŋwu wə́ a tə ńgɛnə̂ yə́, a pə́ ńkwantə̂ yí ńgə́, “Kɔ gho fiʼtə̂ ŋwu tsə́ ńgə́ gho sóŋə anu zəənə́ á mbô maŋə.”

Pə Túmə Pɔlə á Mbô Əfo Fɛlɛsə

²³ Lə́ ŋwu yi ngweŋ ngaŋə́maʼə́ntso zə́ a tíʼ ə́fóŋ mətû mə́ ngaŋə́maʼə́ntso mɛn mbɛ̌ ə́sóŋ ńgə́, “Lɔg nə́ ngaŋə́maʼə́ntso nkɛd pɛ̌ nə́ ngaŋə́kəələlə́əmə́ məghə́m mɛ́n asaambɛ̂ ḿbɨ ḿbə́ nə́ ngaŋə́maʼənə́kɔŋ nkɛd pɛ̌ pɨ po ghɛnə̂ á Sisalya nə́ pəmə́nu pɛ́n nəpuʼə́ á nətúʼ ə́sɛ̂nə̌.

²⁴ Fɛ̂ nə́ pələəmə́ pətsə́ Pɔlə a kɔ́ʼə á ndu ə́wə́, nə́ lɔg ndɛd nə́ yí kɔ anu yitsə̌ á ghɛlə̂ yə́, nə́ ghɛn ə́fɛ̂ yí nə́ Əfo Fɛlɛsə.”

²⁵ Ŋwu yi ngweŋ ngaŋə́maʼə́ntso wə́ a nə ńtə́ ńtúmə ághɔ́b lə́ ḿbə́ ŋ́ŋwaʼlə̂ aŋwaʼlə ə́fɛ̂ á mbô pó páʼ á sóŋ nə́ ńgə́:

²⁶ Atsɛ Pəfo Fɛliks, lə́ maŋ Klodiɔsə Lysas páʼ maŋ tú nə́ aŋwaʼlə zəənə́ á mbô gho: Maŋ chaʼtə̂ gho.

²⁷ Pəjusə pó nə ńgwaamə̂ ŋwu ghɛn ńtə́ ńdoonə̂ á mə́ jwítə nə́ yə́, lə́ maŋ yǐ pə̂gpə ngaŋə́maʼə́ntsoolə mə ńkwáalə yə́, ḿbə́ ńtíʼ ńdzóʼ ńgə́ lə́ ŋwu Lomə.

²⁸ Maŋ nə ńtə́ ńdoonə̂ mə́ jî nə́ anu a ghɛd nə́ pó waamə̂ yə́, ńtíʼ ńdɔgə̂ yí ńgyǐəə á mbô ngaŋə́sáʼə́məsáʼ əzóobə́.

²⁹ Maŋ nə ńjɨ́ ńgə́ anu pə́ nə ńgwam nə́ yí ə́wɨ́ lə́, á túg əpítə ńté noŋkə əghoobə́, lə́ a pə́ ńkě anu yətsə́ fankə̂ mbɔʼ pə́ nə ńjwítə yí kɨ ńnéŋə yə́ atsáŋ pô.

³⁰ A nə mbɛn ḿbə́ əghâ maŋ nə ńdzóʼ nə́ ńgə́ pə́ tə́ ńtyáŋə mənaŋ ńté yí lə́, maŋ tíʼ ńtúmə yə́ á mbô gho tsɔʼə əghâ yi ə́wə́. Maŋ nə ńkə́ ńtú pəənə ándó pó nə ńtyáŋ nə́ mənaŋ ńté yí lə́ á mbô gho ńgə́ pó yǐ fiʼtə̂ anu páʼ ŋwu nə a fankə̂ nə́ á mbô pó lə́ nə́ gho.

³¹ Ngaŋə́maʼə́ntso zə̂ tíʼ faʼə̂ afaʼə azɔ́b tsɔʼə ndzaŋ pə́ nə sóŋ nə́ á mbô pó. Pó lɔgə̂ Pɔl tsɔʼə á nətúʼ wə́ ńgɛn nə́ yə́ Antipatilisə

³² Mbî ə́ fóg ngaŋə́maʼə́ntso ə́ nə nyi nə́ məko lə́, pó pəənə́ ághóobə́ á pə́lə́gə́ pó ńtíʼ ḿmɛdtə̂ pətsə́ páʼ pó nə nyi nə́ á ndu pələəmə́ lə́ pó ghɛn pópə Pɔlə.

³³ Əghâ ándó pó nə ńkoʼ nə́ á Sisalya lə́, ə́fɛ̂ aŋwaʼlə zə̂ á mbô əfo Lomə, ńkə́ ḿmɛdtə̂ Pɔlə á mbô yə́.

³⁴ Əfo wə̂ a fóŋə aŋwaʼlə zə̂ ńtíʼ ḿbítə Pɔl nə́ mboʼ páʼ a fɛ́d nə́ ə́wə́. Ndzaŋə a nə ńdzóʼ nə́ ńgə́ a fɛ́d lə́ á mboʼ Sisalya lə́,

³⁵ ə́sóŋ ńgə́, “Maŋ yǐ zóʼ əsáʼ əgho lə́ əghâ ándó pɨ pó néŋ nə́ anuə atû gho lə́ pó chî nə́ ə́wə́, ńtíʼ ə́sóŋ ńgə́ pə́ lɔʼkə̂ Pɔlə á mə́m ntɔ́ʼ əfo Ɛlɔdə ngaŋə́maʼə́ntso ə́ tə́ ḿbyáabə yə́.”