Məfaʼə 15 - Əka yi Fîə

Məntú mə́ Yeso pópə Mətû mə́ Mənkyeetə mə́ Pɔ́ pə́ Əsê Pó Jwánə á Jɛlusalɛmə

¹ Pɨ pətsə́ pó fɛ́lə á Judya ńgyǐəə Antiok ńtíʼə ńdzéʼkə pəlim á ndɛ̂sê ńgə́, “Tə́ ńdéʼtə pə́ póʼə gho ndzaŋ noŋkə Mosisə a nə nɨd nə́, tə ḿbə́ mbɔʼ gho kě chwád pô.”

² Atsáb zəənə́ á nə ńgɛd Pɔl pó Banabasə tíʼ ńchîə á mə́mə azɔŋ pó po, ḿbəənə̂ ńtíʼə soŋ nkɛd pó po ńkǐə ághóobə́ anu yəwə́. Pə́ tíʼ ńtsɔ́ʼə Pɔl pó Banabas ńdzoŋ ḿbá pətsə́ pɨ pə́ wə́ á Antiok ńgə́ pó po ghɛnə̂ Jɛlusalɛm ńjɨ́ məntú mə́ Yeso pópə mətû wɨ́ ńté anu zəənə́.

³ Ndzaŋə ándó nkyeetə pɔ́ pə́ Əsê ə́ nə ńtú nə́ ághɔ́b pó tə́ ńgɛnə̂ lə́, ńdaŋə̂ á mə́m aláʼə Fonisya pó Samalya, ə́fiʼtə̂ ndzaŋə ándó Pətəjǐsê pó kwúblə nə́ ndzoŋ Əsê. Nkɨ yi wɨ́ nə́ ńgɛd pəlim á ndɛ̂sê pó chîə á mə́mə akɔŋtə.

⁴ Əghâ ándó pó nə́ ńgyǐ nə́ á Jɛlusalɛm lə́, nkyeetə pɔ́ pə́ Əsê pópə məntú mə́ Yeso ḿbɨ ḿbə́ nə́ mətû mə́ mənkyeetə mə́ pɔ́ pə́ Əsê, pó nə́ ńkɔŋtə̂ á mə́ zɨ́ nə́ ághóobə́, pó tíʼ fiʼtə̂ anu atsəm páʼ Əsê á kə faʼ nə́ ńdaŋə̂ mə́m pó.

⁵ Lə́ pəlim pətsə́ páʼ pó néŋ nə́ ntɨ́ əghɔ́b nə́ Əsê, páʼ pö zoŋ nə́ pə́ ndzəm Pəfalasi pó tíʼ ńdǒo əsê sóŋ ńgə́, “Pə́ chîə mə́ póʼ nə́ ághóobə́, pó kə́ ńdzóʼnə pənoŋkə pə́ Mosisə.”

⁶ Məntú mə́ Yeso pópə mətû mə́ mənkyeetə mə́ pɔ́ pə́ Əsê tíʼ ńkyeetə̂ táʼ aliʼə́ á mə́ náŋ nə́ anu yə ə́wə́.

⁷ Ndzaŋə ándó pó kə twiʼ nə́ mə́ kəʼlə̂ nə́ atsáb zɨ lə́, Pita a tíʼ ńdǒo əsê ə́sóŋə á mbô pó ńgə́, “Pəlim, nə́ jî ńgə́ ndi sag əghâ nə́ páʼ Əsê a kə tsɔ́ʼ nə́ mə á tətɨ pɨ ńgə́ maŋ ghɛn fiʼtə̂ nkɨ yi əshîʼnə á mbô Pətəjǐsê ńjî ńgə́ pó zóʼ ńkə́ néŋ məntɨ́ mɔ́b nə́ yə́.

⁸ Əsê páʼ a jî nə́ ntɨ́ ŋwu ntsəmə, a nɨd ńgə́ á pímə ághɔ́b ńdaŋ nə́ Ajwǐəsê páʼə á fɛ̂ nə́ nə́ pó, tsɔʼə ndzaŋ páʼ a nə fɛ̂ nə́ nə́ pɛn lə́.

⁹ A nə ńkě nɨd ńgə́ yə́ kɔŋə̂ ŋwu tsə̌ ńtsɛɛlə̂ yitsə̌ a tətɨ pɛ̌npo pô, ńtíʼ ńdəgnə̂ pətəpɔŋ pɔ́b ńté ńgə́ pó nə néŋ ntɨ́ əghɔ́b nə́ yə́.

¹⁰ Əghâ nə́, lə́ ghɛlə̂ akə̂ nə́ loonə̂ á mə́ jwə́ʼ nə́ Əsê, ńtíʼə ńtə́gə apeʼə á ndu pɨ pó néŋ nə́ ntɨ́ əghɔ́b nə́ Əsê? apeʼ páʼ mbɔʼ pətǎ pə́ pətǎ pɛn kɨ tsɔʼə pɛn kě twá pô?

¹¹ Lə́ pəg pə́ néŋ ntɨ́ ńgə́ pəg yǒ chwád ə́laŋ lə́ nə́ apɔŋə́ntə́əmə Mmaʼmbî Yeso, tsɔʼə ndzaŋ pó yǒ nə́ kə́ chwáalə azóobə́.”

¹² Ŋwu ntsəmə á mə́m nkyeetə a naʼ ńgə́ ńtóʼ, ńtíʼə ńjwə́ʼtə ándó Banabasə pó Pɔl fiʼtə̂ nə́ mbô əkyeʼmə́nu pópə mənu mimə yɛ́d nə́ yɛ́d nə́ páʼ Əsê á kə faʼ nə́ á mbô Pətəjǐsê ńdaŋə̂ á mə́m pó.

¹³ Əghâ ándó pó nə ḿməgtə̂ nə́ á mə́ tsáb nə́ lə́, Jɛmsə a kwěe ńgə́, “Pəlimə́ mə, jwə́ʼtə nə́ á mbô maŋ!

¹⁴ Saamun a pěʼ fiʼtə̂ áwɛ̂n ndzaŋ páʼ Əsê a nə ḿbeg nə́ nəələ̂ akɔŋnə ajíə á mbô Pətəjǐsê, ńté ńgə́ a kə ghɛn lə́ á mə́m pó ə́fóg pɨ wɨ́ ńdɔg ńgɛd pəpí wə́.”

¹⁵ Anu páʼ a nə sóŋ nə́ a nə ńjwánə pópə yi páʼ məntúmə́sê mə́ nə́ ŋ́ŋwaʼlə̂ nə́ á mə́mə aŋwaʼlə Əsê ńgə́:

¹⁶ Mmaʼmbîə á sóŋ ńgə́, “Mbɔʼ zəənə́ á yǒ ńdaŋ maŋ pɨ ńdookə̂ ndɛ̂ Debid páʼ ə́ kə kɔ́ʼ nə́ yə́ afəmə́. Maŋ yǐ pɨ kwúd məndɛ̂ ándó mə́ kə shaʼkə̂ nə́, pɨ ghɛd ndɛ̂ yi wɨ́ ə́ pɨ ńtɨ́ ńtyantə̂ nga yitsə̌.

¹⁷ Ńdaŋ ə́lɨ́d ngwud mɔ́ ŋwu məsɔŋ yǐ zoŋə̂ Mmaʼmbîə. Ḿbá Pətəjǐsê tsɔʼə pətsəm páʼ maŋ fóŋ nə́ ńgə́ pó lə́ pəpéemə.

¹⁸ Lɛ̌ sóŋ Mmaʼmbî páʼ a nə ńgɛd nə́ pə́ jí mənu mɨ ə́fɛ́lə ngoʼ pəchə́.”

¹⁹ Jɛmsə a ghɛn nə́ mbiə á mə́ sóŋ nə́ ńgə́, nə́ azéemə akwaŋ “Kɔ pɛn pɨ ńkə́ ńtə́ ńjwaʼə̂ Pətəjǐsê páʼ pó tə́ nə́ ńgyǐəə á mbô Əsê.

²⁰ Pɛn chî lə́ á pə́ mə́ ŋwaʼlə̂ nə́ aŋwaʼlə fɛ̂ á mbô pó ńgə́ kɔ pó jî məjî páʼ mɨ́d mə́ kě nə́ á mbi Əsê ŋwaʼ pô, ńté ńgə́ pə́ fyaʼə́nu ə́wə́ á mbô məsê mə́ məfɨgə; ə́ pɨ kə́ fiʼtə̂ ághɔ́b ńgə́ kɔ pó zɔ́ʼnə mbǒʼḿbóʼə́, ńkɔ kə́ ńkɔ́d na páʼ pə́ kě nə́ ndě sə́ pô, kɨ ńjîə achǐə.

²¹ Ńté ńgə́, ə́fɛ́lə á ngoʼ pəchə́ pə́ kə̈ ə́fóŋə pənoŋkə pə́ Mosisə á mə́m məndɛ̂ mə́ Əsê mə́ Pəjus á mə́m əlě əláʼ əsê ətsəmə, ḿbɨ ńkə́ fiʼtə̂ atséebə ajíə á mə́m pətɔ̂ŋ pətsəmə.”

Pə́ Ŋwaʼlə̂ Aŋwaʼlə Ə́fɛ̂ á Mbô Pətəjǐsê Páʼ pó Néŋ nə́ Ntɨ́ Əghɔ́b nə́ Əsê.

²² Məntú mə́ Yeso mə̂ pópə mətû, ḿbeg nkyeetə pɔ́ pə́ Əsê tsɔʼə ntsəm, Pó tíʼ ńkwaŋ ńgə́ mbɔʼ pó tsɔ́ʼ pɨ pətsə́ á mə́m pó ńdzoŋ ḿbéenə Banabasə pó Pɔlə wɨ́ ńtíʼ ńtúmə ághóobə́ Antiokə. Pó kə tsɔ́ʼ lə́ pɨ pɛ́n pɛ̌ páʼ pó pə́ nə́ mətûə á mə́m pɨ pətsəm páʼ pó néŋ nə́ ntɨ́ əghɔ́b nə́ Əsê, ḿbə́ Judas, páʼ pə́ kə fóŋ nə́ yí nə́ Basabas lə́, ḿbɨ́ ḿbə́ nə́ Sayilasə.

²³ Pə́ túmə ághɔ́b nə́ aŋwaʼlə páʼ á sóŋ nə́ ńgə́: “Pəg məntú mə́ Yeso ḿbá mətû mə́ nkyeetə á mə́m Yeso túmə achaʼtə á mbô Pəlim pəg páʼ pó fɛ́d nə́ nə́ əla Pətəjǐsë, ńchîə Antiok, Siliya pó Silisya.

²⁴ Pəg zóʼ ńgə́ pɨ pətsə́ páʼ pó fɛ́d nə́ á mə́m pə̌gpo yǐəə á mbô pɨ nə́ əzɔb ntê ndzeʼkə̈, ńtíʼə ńjwaʼə̂ áwɨ́ ńtûə ńjwaʼlə̂ məntɨ́ mɨ́ páʼ lə́ kě nə́ pəg tú ńtúmə ághɔ́b nə́ atsáb zɨ́d zə́ pô.

²⁵ Ńdaŋ ə́lɨ́d pəg tíʼ ńkyeetə̂ táʼə aliʼ ḿbímnə pəg pətsəm ńgə́ pə́ tsɔ́ʼ məntú mətsə́ ńtúmə á mbô pəənə́. Pó yǐ yǐ lə́ pópə pəlim pɛn páʼ pɛn kɔŋ nə́, Banabas pó Pɔlə.

²⁶ Pó pímə nəwûə á mə́ faʼ nə́ á mbô Mmaʼmbî əwɛ̂n Yeso Klisto.

²⁷ Pə̈g tíʼə ńtúmə Judas pó Sayilasə á mbô pɨ, ńjî ńgə́ pó yǐ nə́ nkɔ̌ʼmbɨ əghɔ́b ə́fiʼtə̂ áwɨ́ nə́ mənu páʼ pəg ŋ́ŋwaʼlə̂ nə́.

²⁸ Pəg pímnə pəg pə́ Ajwǐəsê ńgə́ kɔ pəg pɨ ńtə́gə apeʼ yətsə́ atû pɨ tə ńdéʼtə ńgə́ pɨ zoŋ pənoŋkə pəənə́:

²⁹ Pənoŋkə pipə wɨ́ lə́ ńgə́ kɔ nə́ jîə áwə́ənə́ ajú páʼ pə́ lɔg nə́ ə́fyaʼ məsê mə́ məfɨgə ə́wə́, kɔ nə́ jîə achǐə neemə, kɔ nə́ kɔ́d na páʼ pə́ kě nə́ ndě sə́ pô, kɔ nə́ kə́ ńdzɔ́ʼnə mbǒʼḿbóʼə́. Mbɔʼ nə́ lɔg ndɛlə́ á mə́ kě nə́ ndɛn mənu ghɛn faʼ pô, pɨ yǐ ńdzóʼ əshîʼnə. Chî nə́ əshîʼnə ḿbə́.”

³⁰ Pə́ tíʼ ńtú pɨ pə̂ pó tsó ńgɛnə̂ Antiok ńkyeetə̂ ŋwu ntsəm a nə néŋ nə́ ntɨ́ əyí nə́ Əsê ńtíʼ ə́fɛ̂ aŋwaʼlə yi wə́ á mbô pó.

³¹ Əghâ ándó pó nə́ fóŋ nə́ zɨ́d lə́, ḿbyádnə ńkɔŋtə̂ ńté ńgə́ atséebə á kə chî nə́ á mə́m wə́ á kə néŋ məntɨ́ móobə́.

³² Judas pó Sayilas páʼ pó nə ńkə́ nə́ ḿbə́ məntúmə́sê lə́, pó nə ńdɔg ndɛd ńtséebə á mbô pəlim pə̈, ńnéŋə məntɨ́ mɔ́b ḿbɨ́ ńkə́ ńgɛlə̂ ńgə́ pó tɨ́ ńtyantə̂.

³³ Pó nə ńchî pó po nə́ akəmə ndɛd yitsə̌ lə́, pəlim póobə́ á mə́m Pətəjǐsê pó pɨ ḿbɨnkə̂ ághɔ́b nə́ mbwɔ́dnə ńgə́ pó pəənə̂ á mbô pəənə ándó pó kə tú nə́ ághɔ́b lə́.

³⁵ Lə́ Pɔl pó Banabasə tíʼ ḿbɛ́lə Antiok tə ńkoʼ ndɛd yitsə̌, ńdzoŋ ḿbə́ nə́ pətsɨ́ pɨ tə nɨ́ ńtíʼə ńdzéʼkə ńkə́ náŋkə nkɨ Mmaʼmbîə.

Pɔl Pó Banabasə Zɔŋə̂

³⁶ Əlěmbî pətsɨ́ kə laŋ lə́ Pɔlə a sóŋə á mbô Banabasə ńgə́, “Pɛn pɨ ḿbəənə̂ á mə́m pətə́kɔʼ pə́ tɔ̂ŋ pətsəm pɛn kə náŋkə nə́ nkɨ Mmaʼmbî wɨ́ ńgá pəlim pɛn wɨ́ ńjɨ́ ńgə́ pó lɛ ḿbə́ ə́léenə́?”

³⁷ Banabasə a pə́ ńtə́ ńdoonə̂ á mə́ lɔg nə́ Jɔn páʼ pə́ kə fóŋ nə́ yí ńgə́ Mag lə́, pó po ghɛnə̂,

³⁸ lə́ Pɔlə a pə́ ńkě kwaŋ ńgə́ á koʼnə̂ ńgə́ pó lɔgə̂ Jɔn Mag pó po ghɛn pô, ńté ńgə́ yí Jɔn Mag a kə koʼə̂ á Pamfilya lə́ mbɨ ḿbəənə̂ yə́, ńkě ghɛn pó po tə ḿməgtə̂ afaʼə azɔ́b pô.

³⁹ Chigə tə́kɔʼə azɔŋə á nə ńchîə á tətɨ pó tə pó shamnə̂, ŋwunə ghɛn nə́ əyí ndú ŋwunə a ghɛn nə́ əyí ndúmə. Banabasə a lɔgə̂ Jɔn Mag pó yí nyinə̂ á mə́m nkǐ ńgɛnə̂ á Sayiplusə,

⁴⁰ Lə́ Pɔlə á tsɔ́ʼə Sayilasə pó yí ghɛnə̂, pɨ pó néŋ nə́ ntɨ́ əghɔ́b nə́ Əsê pó tíʼ fɛ̂ Pɔl pó Sayilasə ńgə́ Mmaʼmbîə túg nə́ apɔŋə́ntə́əmə ajíə.

⁴¹ Á tíʼ ńgɛn ńdaŋə̂ á Siliya pó Silisyä, ńgɛlə̂ ńgə́ mənkyeetə mə́ pɔ́ pə́ Əsê mə́ tɨ́ ńtyantə̂.