Məfaʼə 11 - Əka yi Fîə

Ndzaŋ Pita kə Fiʼtə̂ nə́ Anuə á kə Laŋ nə́ á Ndɛ̂ Kɔneliɔs á Mbô Nkyeetə Pɔ́ pə́ Yeso á Jɛlusalɛmə

¹ Məntú mə́ Yeso pó pətsə́ ngaŋə́zoŋə́ndzəm Yeso á mə́m aláʼ Judya tsɔʼə ətsəm pó zóʼ ńgə́ pətəjǐsê pó kə́ ḿbímə atséebə Əsê.

² Ndzaŋə ándó Pita a nə ńkɔ́ʼ nə́ ńgɛnə̂ á Jɛlusalɛm lə́, pəənə ándó pó kə lɔ nə́ ńgə́ pə́ póʼ pətəjǐsê pó kə tə́ néŋ filə atû Pita, ə́sóŋə ńgə́:

³ “Lə́ nə ńgɛlə̂ akə̂ pɨ ghɛnə̂ á nəghéenə á ndɛ̂ pətəjǐsê pə́ kě nə́ ághɔ́b póʼ pô ńjî məjî pɨ po?”

⁴ Pita a chwáakə á mə́ fiʼtə̂ ághɔ́b nə́ anuə atsəm ndzaŋ á kə laŋ nə́.

⁵ A sóŋ ńgə́, “Maŋ nə ńchîə á mə́mə aláʼə Joppa ńtə́ ńchaʼtə́sê ńdê ndzəəmə atəəmə́tɨ́ ńdzə́ənə ajûtsə́ ándó mɛ́ apagə atsəʼə́ á lǒo nəpó ńtə́ ńtsóolə pə́ wam nə́ məlá mɛ́n nəkwa, á tsó ńtɨ́ ḿbáatə mə.

⁶ Maŋ pyádnə ńdɔg ndɛd ńnáŋ mə́m əjǐ ńjɨ́ ntê məna mətsəmə, məna mə́ akɔb pópə mimə́ nchîndɛ̂, məna mə́ kə́ŋ nə́ ńdzoŋ ḿbá pəsə́ŋ pə́ zag nə́ atǐə.

⁷ Maŋ tíʼ ńdzóʼ ngye yitsə̌ ə́ sóŋ nə́ maŋ ńgə́, Pita, lǒo əsê ńjwítə ńkɔ́lə.”

⁸ Maŋ pə́ ńkǐə mə ə́sóŋ ńgə́! “Ajúmə féŋ nə́ kɨ ńkě ŋwaʼ pô á kě ntso maŋ kə̂ láʼə kwúnə pô.

⁹ Ngye zə́ kə́ ḿbɨ ńtséebə á nəpó ngǎ yitsə̌ ə́sóŋ ńgə́, Kɔ gho fóŋə ajûtsə́ Əsê á ghɛd nə́ á ŋwaʼ ńgə́ zə́ələ́ á féŋə.

¹⁰ Anu zəənə́ á kə laŋ lə́ ngǎ teelə́, ajúmə atsəmə á pɨ ńkɔ́ʼ ńgɛnə̂ zə́ələ́ á nəpóolə.”

¹¹ Tsɔʼə əghâ yi ə́wɨ́ mbyâŋnə teelə́ pə́ kə tú nə́ á mbô maŋ pó lǒo aláʼə Sisalya ńgyǐ ńkwúnə á ndɛ̂ pəg nə́ ńchî nə́ ə́wə́.

¹² Ajwǐəsê á sóŋə á mbô maŋ ńgə́ maŋ ghɛn pə̌gpo tsɔʼə tə ghə́ atûə mə á koʼlə̂. Pəlim pə́ pɛ́n ntogə́ pó kə lǒo nə́ Joppa lə́ pó zoŋə̂ mə pə̌gpo ghɛn tə ńkwúnə ndɛ̂ ŋwu yi wə́,

¹³ a fiʼtə̂ áwə́g ndzaŋ a kə zɨ́ nə́ ntseŋndɛ̂sê a tə́əmə á mə́m ndɛ̂ yə́, ńtíʼ ə́sóŋ nə́ yi ńgə́, “Túmə ŋwu tsə́ á Joppa á ghɛn ə́fóŋə a ŋwu páʼ məlɛ́n mí mə́ pə́ nə́ Saamun Pita lə́.

¹⁴ A yǐ tséebə atséebə Əsê á mbô gho, ə́ laŋ ə́lɨ́d Əsê a chwádkə a gho, ńdzoŋ ḿbeg ngwud əzo wə́.

¹⁵ Tsɔʼə ándó maŋ pěʼ nə́ ńchwáakə á mə́ tsáb nə́ lə́, Ajwǐəsê a tsóolə a mbɨ pó tsɔʼə ndzaŋ a nə ńtsó nə́ a mbɨ pɛnə̂ á nəchwaakənə́ lə́.

¹⁶ Lə́ maŋ tíʼ ńkwúmtə anu páʼ Mmaʼmbîə a nə sóŋ nə́ á mbô pɛn ńgə́, Jɔnə a nə fɛ̂ lə́ nkǐə á mbô pəənə, lə́ pə́ yǐ fɛ̂ á wɨ́ lə́ nə́ nkǐə Ajwǐəsê.

¹⁷ A lánə ńchígə́ ŋ́ŋwaʼ ńgə́, məfɛ̂nə Əsê a kə fɛ̂ nə́ á mbô pətəjǐsê lə́ tsɔʼə məfɛ̂nə páʼ a kə fɛ̂ nə́ á mbô pɛn nə́ ndɛd páʼ pɛn kə néŋ nə́ məntɨ́ mɛn nə́ Mmaʼmbî Yeso Klisto. Maŋ tíʼ ḿbə́ lə́ əwə á mə́ sóŋ nə́ ńgə́ kɔ Əsê á ghɛlə̂ anuə ajíə.”

¹⁸ Ndzaŋə ándó pó nə ńdzóʼ nə́ atsáb zɨ lə́, ńkě nə́ anu yitsə̌ pɨ chî mbɔʼ pó sóŋ pô, pó tíʼ fɛ̂ nəgháʼə á mbô Əsê ə́sóŋ ńgə́: “Lə́ pə́ ńgə́ Əsê a kə́ fɛ̂ əseenə á mbô pətəjǐsê ńgə́ pó kwúblə məntɨ́ mɔ́b ńkə́ ńjî nchîntɨ páʼ zɨ́d mɛdnə̂ nə́ ngǎ mɔʼə́.”

Nkyeetə Pɔ́ pə́ Yeso á Antiokə

¹⁹ Pɨ pó kə shamnə̂ ńté ńgə́ pə́ kə tə́ ńtsaŋkə̂ ághɔ́b nə́ ndɛlə́ ándó pə́ kə jwítə nə́ Stifən lə́, pó kə ghɛnkə̂ nə́ ətú mbîə ándó Fonisya, Sayiplus mbɨ ḿbə́ nə́ Antiok ńnáŋkə nkɨ yi əshîʼnə wɨ́ tsɔʼə á mbô Pəjusə.

²⁰ Lə́, á mə́m pó mbyâŋnə yitsə́ kə chî wɨ́ páʼ pó kə lǒ nə́ Sayiplus pó Sayileen, ndzaŋ pó kə ghɛn nə́ Antiok lə́ ńnáŋkə nkɨ yi əshîʼnə wə́ á mbô Pətəjǐsê, ə́fiʼtə̂ ághɔ́b nə́ anu ńté Mmaʼmbî Yeso.

²¹ Mətɨ mə́ Əsê mə́ nə ńchîə a mbɨ pó, ńgɛd pɨ pipə nɨ́ nə́ pó néŋ ntɨ́ əghɔ́b nə́ Əsê ńtíʼ ńdzoŋə̂ Mmaʼmbîə.

²² Nkɨ ńté anu zɨ́d zɨ ə́ nə ńnyi tə ńkwúnə á mbô nkyeetə pɔ́ pə́ Yeso á Jɛlusalɛm, pó tíʼ ńtúmə Banabas ńgə́ a ghɛnə̂ Antiok.

²³ Əghâ ándó páʼ Banabas a nə́ ńkwú nə́ Antiok ńjɨ́ ndzaŋ Əsê kə fɛ̂ nə́ afoʼə á mbô pó lə́, á nə ńkɔŋtə̂ ńtə́gtə ághɔ́b pətsəm ə́sóŋ ńgə́ pó tə́gə atûə azɔ́b nə́ anǔəsê ńkə́ ńdzoŋ ndzəm Mmaʼmbî nə́ ntɨ́ əghɔ́b ətsəmə.

²⁴ Banabasə a nə ḿbə́ lə́ ŋwu yí əshîʼnə, ńdwɛ́nkə nə́ Ajwǐəsê mbɨ ńtúg mbimə́, pɨ pipə nɨ́ nə́ pó kə néŋ ntɨ́ əghɔ́b nə́ Mmaʼmbî ńtíʼ ńdzoŋə̂ yə́.

²⁵ Banabasə a tíʼ ńgɛnə̂ á Tasusə á mə́ náŋ nə́ Sɔlə.

²⁶ Ndzaŋə a nə ńdzɨ́ nə́ yí lə́, ńdɔg a yí ńgyǐ nə́ yə́ á Antiokə. Á mə́m táʼ ngoʼ pó Banabasə tíʼ ńtsɛntə̂ pópə nkyeetə pɔ́ pə́ Yesö, ńdzéʼkə pɨ pipə nɨ́ nə́. Lə́ nə́ ḿbə́ Antiok páʼ pə́ nə́ ḿbeg nə́ ńchúʼə mə́ fóŋ nə́ ngaŋə́zoŋə́ndzəm Yeso nə́ Pɔ́ pə́ Yeso.

²⁷ Nə ndɛd zɨ məntúmə́sê mətsə́ mə́ fɛ́lə á Jɛlusalɛm ńtsó ńgɛnə̂ Antiok.

²⁸ Ńdaŋ nə́ mətɨ mə́ Ajwǐəsê táʼ ŋwu əghɔb yitsə̌ páʼ pə́ nə fóŋ nə́ nə́ Agabus, a tíʼ ńdǒo ndəsê Ajwǐəsê á sóŋ nə́ yí ńgə́ á ə́sóŋ nə́ ŋwu ntsəm ńgə́ tə́kɔʼ njiə á yǐ kwúnə á mə́m mbî ntsəmə. (Anu zəənə́ á kə lɔgə̂ aliʼ lə́ nə́ ndɛd páʼ Klodiɔsə a nə ḿbə́ nə́ əfo əláʼ Lom ətsəmə).

²⁹ Ngaŋə́zoŋə́ndzəm Yeso pímnə ńgə́ ŋwu ntsəmə a yǐ fɛ̂ ajúmə atsəm páʼ mbɔʼ á fɛ̂ pə́ lɔg ńkwá pəlim pɔ́b ə́wɨ́ páʼ pó chî nə́ á Judya.

³⁰ Ndzaŋə ándó pó nə faʼ nə́ ə́lɨ́d lə́, ńtíʼ ńtú nkáb yi ə́wə́ á mbô Pɔl pó Banabasə ńgə́ pó ghɛn ə́fɛ̂ á mbô mətû mə́ nkyeetə pɔ́ pə́ Yeso á Judya.