Lukasə 8 - Əka yi Fîə

Pəngyě pə́ nə Ńdzoŋ nə́ á Ndzəm Yeso

¹ Ndɛd yitsə̌ ə́ laŋ, Yeso pópə ngaŋə́zoŋə́ndzəm əjí zə̂ ntsɔb pɛ̌ ə́ fɛ́lə á mə́m táʼə aláʼ ńkwú nə́ yətsə́, ńnyinə̂ ə́fɛ̂ nkɨ yi əshîʼnə ńté anuə nəfoonə Əsê.

² Lə́ nə ńkə́ ḿbə́ pópə pəngyě pətsə́ páʼə a kə kəm nə́ əjwi təpɔŋə á mə́m pó ńkə́ ńtsóʼ məghɔ móobə́: Mɛɛlə, (pə́ nə ńkə́ nə̈ ə́fóŋə yi nə́ Magdalɛn lə̂), páʼ pɛ̌sê pɛn asaambɛ̂ ə́ nə ə́fɛ́d nə́ á mbɨ yi lə̂.

³ Jwana, ngwě Chuza páʼə a nə̈ ńnáŋ nə́ apeʼə á ndɛ̂ Ɛlɔdə, Susana pópə pəngyě pətsə́ tə ńnɨ́ páʼ pó nə ńdɔg nə́ ndə̌ əpú əpɔ́b ńkwáalə Yeso ə́wə́.

Atséebə́nə́múʼ Ńté Ŋwu Tsə́ Páʼə ä Pǐ nə́ Əpúmə

⁴ Ndzaŋə ándó ŋwu məsɔŋ páʼə a kə fɛ́d nə́ aliʼə́ aliʼ ńkɔ́ʼ ńtsɛntə̂ á mbi yí tə ńtíʼ mɛ́ ənɔ pɨ lə́, a tséebə atséebə́nə́múʼ zəənə́ á mbô pó:

⁵ “Ŋwu tsə̌ a kə láʼ ńgɛnə̂ apǐəpúmə, Ndzaŋə ä kə pǐ nə́ lə́, yitsə̌ mbi ə́ wukə̂ á alaŋə́ pə́ nəŋtə̂, pəsə́ŋ pə́ tíʼ ńgyǐ ḿbyántə ńkɔ́lə ághóobə́.

⁶ Yitsə̌ ə́ wukə̂ á ndu ngwúb ə́sáʼ mbɨ ńjúmə zɨ́d ńté ńgə́ nkǐ ə́ kě á ndəsê chî pô.

⁷ Yitsə̌ ə́ wukə̂ á mə́m məsɔbsoobə, məsɔbsɔb mə́ kɔ́ʼ ńkwúlə zə́ələ́.

⁸ Yitsə̌ ə́ wǔəə á ndu ndəsê yi əshîʼnə ńkɔ́ʼ ńdzə́m nga nkɛlə́.” Ndzaŋ a kə məgtə̂ nə́ atsáb zɨ lə́ ə́sóŋə á mbô pó ńgə́, “Jwə́ʼtə nə́, ŋwu páʼə a túg nə́ mətôglə á mə́ zóʼ nə́ a zóʼə.”

Anuə á Ghɛd nə́ Yeso a Tséebə Atséebə́nə́múʼə́

⁹ Ngaŋə́zoŋə́ndzəm əjí pó pítə yí nə́ anu páʼ atséebə́nə́múʼ zəənə́ á sóŋ nə́.

¹⁰ A kwěe ńgə́, Pə́ fɛ̂ ajíənu nə́ pɨ mbɔʼ nə́ jî mənu mə́ nəlyaŋnə́ mətsəm ńté anuə nəfoonə Əsê, lə́ ńgɛn nə́ pɨ pə́ ndaʼ á chî lə́ nə́ atséebə́nə́múʼ ńjî ńgə́ mbɔʼ pó náŋə, ḿbə́ ńkě jɨ́ pô, ńjwə́ʼtə, ḿbə́ ńkě zóʼ pô.

¹¹ “Lɛ̌ anu páʼə atséebə́nə́múʼ yəwə́ ä sóŋ nə́: mbǐpú yi wɨ́ lə́ atséebə Əsê.

¹² Yi ə́ wukə̂ nə́ alaŋə́ lə́ pəənə ándó pó zóʼ nə́, Satanə a pə́ ńgyǐ ə́fógə atsáb yəwə́ á ntɨ́ pó ńjî ńgə́ kɔ pó pímə zɨ́d ńchwáalə.

¹³ Yi ə́ wǔ nə́ á ndu ngwúb lə́ pɨ pó zóʼ nə́ atsáb yə wɨ́ ńkə́ ḿbímə zɨ́d nə́ akɔŋtə ḿbə́ ḿbóŋ məŋaŋə́. Pó pí nə́ mɔ́ akəmə ndɛlə́, lə́, akwaʼlə á yǐ pó wǔ ḿbɨ nə́ ndzəmə

¹⁴ Yi páʼ ə́ pěʼ nə́ ńgwǔəə á mə́m məsɔbsɔb, lə́ pɨ páʼ pó zóʼ nə́, lə́ nətáŋ mbîə, afoʼə, pópə əpú mbî ə́ kwúlə ághɔ́b pó zə́mə mənta mə́ kě nə̈ təənə̂ pô.

¹⁵ Yi páʼ ə́ pěʼ nə́ ńgwǔəə á ndu ndəsê yi əshîʼnə, lə́ pəənə ándó pó zóʼ nə́ atsáb yə wɨ́ ḿbímə zɨ́d nə́ ntɨ́ əghɔ́b ətsəm, ńkə́ ńgwam ntɨ́ nə́ zɨ́d ńtíʼ ńdzə́m mənteemə́.”

Lámə a tɨ́ nə́ á ntɛ́n əkwunə́

¹⁶ “Mbɔʼ ŋwunə a kě lám chúʼ ńdɔgə̂ atsɛ̂ akáŋ ńkə́bkə ə́wɨ́ kɨ ńtə́gə wə́ələ́ á ntɛ́n əkwu pô. A tə́gə wə́ələ́ á ndu nəchwɛ́d ńjî ńgə́ ŋwu ntsəm páʼə a tə́ nə́ ńkwúnə á ndɛ̂ a jɨ́ əliʼə́.

¹⁷ Ńté ńgə́ ajûtsə́ á kě ə́wɨ́ chî páʼə á lyáŋ nə́ páʼə á láʼ nə́ kě kyaʼnə̂ pô, kɨ anu yətsə́ páʼ pə́ lɔʼkə̂ nə́ páʼə á láʼ nə́ kě á əshîsaŋ ə́fɛ́d pô.

¹⁸ Maŋ pɛn ńtíʼə ə́sóŋə á mbô pɨ ńgə́ nə́ lɔg ndɛd ndzaŋ páʼ nə́ jwə́ʼtə nə́, ńté ńgə́ ŋwu páʼə a túg nə́ á nə́ənə, pə yǐ pegə̂ á mbô yə́; ŋwu páʼə a kě nə́ ajûtsə́ túg pô, mɔ́ aliʼ páʼə a kwaŋ nə́ ńgə́ a túg, pə́ yǐ ə́ kwáalə á mbô yə́.”

Mǎpə Yeso Pópə Pɔ́pə́mɛ́ Píə

¹⁹ Əghâ yi wɨ́, Mǎpə Yeso pópə pəlim pí ə́ kə yǐəə á mə́ jɨ́ nə́ yə́, ḿbə́ ńkě chî mbɔʼ pó yǐ ḿbáatə yí pô ńté ŋwuməsɔŋə́ a nə ńchî nə́ ə́wə́.

²⁰ Ŋwu tsə̌ a sóŋ nə́ yí ńgə́, “Mǎ gho pópə pəlim pô pó tə́əmə apeŋ ńtə́ ńnáŋə gho.”

²¹ Lə́ a kwěe ághɔ́b ńgə́, “Mǎ mə pópə pəlimə́ mə lə́ pəənə ándó pö zóʼ nə́ atséebə Əsê ńkə̈ ə́faʼə̂ anu páʼ zə́ələ́ á sóŋ nə́.”

Yeso a Pwɔ́dkə Kəfəələ á Mə́m Nkǐə

²² A nə ńdáʼ ḿbə́ alě tsə́ Yeso a sóŋ nə́ ngaŋə́zoŋə́ndzəm əjí ńgə́ pó po túmə əfooghɨ ńgɛnə̂ á ndzɛnə́. Pó po tíʼ ńkwúnə á aŋkənúʼə́ ńchúʼə á mə́ tú nə́.

²³ Ndzaŋ po kə tə́ nə́ ńtúmə lə́, Yeso á wǔəə pəlê, atyǎntə kəfəələ á chúʼə á mə́ kɔ́ʼ nə́ á mə́m əfooghɨ wə̂, nkǐ ə́ tíʼə ńkwúnə á mə́m aŋkənúʼə́ azóobə́, pó nə ńchîə á mə́m ngə́ʼə.

²⁴ Ngaŋə́zoŋə́ndzəm əjí ə́ ghɛn ńjimkə̂ yí ńtíʼə ə́sóŋə ńgə́, “Tǎ, Tǎ, pɛn yǐ kwúkə!” A lǒo á əsê ńkwantə̂ kəfɨd wə̂ pópə nkǐ wə̂ ə́ kə kɔ́ʼ nə́ lə̂, kəfɨd wə̂ a lə́gnə, əliʼ ə́ kə mbwɔ́dnə.

²⁵ A pítə ngǎŋndzəm əjí ńgə́, “Mbimə́ əjɨ ə́ ə́fó?” Lə́ nə ḿbə́ nkɨʼnənuə, pó tíʼə ḿbɔ́gə ḿbítə məmbɨ mɔ́b ńgə́, “Lɛ̌ əwə ŋwunə a ghɛn, ńtséebə tə nkǐ pópə kəfɨd zóʼnə yə́?”

Yeso a Tsóʼə Ŋwu Pɛ̌sê a Chî nə́ á Mbɨ yə́

²⁶ Pó kə ghɛn tə ńkwúnə á əlá ndu Gelasinə, páʼə a chî nə́ á ndzɛnə́ nkǐə á ndú ə́ lǒo nə́ á Galili lə́.

²⁷ Ndzaŋ Yeso a kə fɛ́d nə́ á nkǎŋkǐ lə́, ŋwu tsə̌ á mə́mə aláʼ yə wɨ́ páʼ pɛ̌sê á kə chî nə́ á mbɨ yə́ á zə́ənə yə́. Ndi ə́ chî wɨ́ ŋwu nə́ a kě nə́ atsəʼ wê pô, ńkě ndɛ̂ kə́ ńdê pô, ńdê yə́ pə́ á mə́m məse.

²⁸ A kə zə́ənə Yeso lə́ ńkyéŋ ngye əjǐ ə́ kɔ́ʼə atǐə, a wǔəə á məko yí ńtíʼə ńkyéŋə ə́sóŋə ńgə́, “Yeso Mɔ́ Əsê, páʼə a tsɛ nə́ ajúmə atsəm, ghö kwáalə lə́ akə̂ á mbô maŋə? Maŋ póʼ mbô, kɔ gho ghɛd maŋ jɨ ngə́ʼə!”

²⁹ A kə sóŋ ə́lɨ́d lə́ ńté ńgə́ Yeso a kə sóŋ nə́ əjwi təpɔŋ pə́ ńgə́ ə́ laŋ ə́fɛ́lə á mbɨ ŋwu wə̂. Əghâ pi nɨ́ nə́, əjwi təpɔŋ pə̂ ə́ tsɔ́ʼə yí ḿmáʼə̂ á ndəsê. Pə́ tíʼə ńtseŋnə̂ yí, ńkwúd mbô mí nə́ məŋkɛd mə́ atəənə́, mbɨ ńtô akəʼlə́ ńnéŋə á məko yə́. Lə́, a pə́ ńdzá ńdə́gtə pɨ́d, əjwi təpɔŋ pi wɨ́ ə́ tíʼə ńdɔgə̂ yí ńgɛnə̂ nə́ yə́ á kɔŋ yi njǔbtə.

³⁰ Yeso a pítə yí ńgə́, “əlɛ́n əgho lə́ əwə?” A kwěe yí ńgə́, “Apoŋə azóobə́,” ńté ńgə́ pɛ̌sê pi nɨ́ nə́ pə́ kə kwúnə á mbɨ yə́.

³¹ Pó póʼ mbô á mbô yí tə ḿbégnə ńgə́ kɔ á kəmə̂ ághɔ́b ńnéŋə á mə́m atéemə́təndwegtə zə̂.

³² Akwɛlə kwúna yətsə́ á kə chîə á ndu kɔŋ ńtə́ ńjîə məjî, pɛ̌sê pi wɨ́ pó póʼ mbô nə́ Yeso ńgə́ a mɛdtə̂ ághɔ́b pó ghɛn ńkwúnə á mə́m pəkwúna pi wə́, Yeso a pímə.

³³ Pɛ̌sê pə wɨ́ pó tíʼ ə́fɛ́lə á mbɨ ŋwu wə́ ńkwúnə á mə́m pəkwúna pə̂, akwɛlə zə̂ atsəmə a tíʼ ńtsó məndə̌ á ḿbá ńkwúnə á əfooghɨ ə́fə́mnə ńkwúkə.

³⁴ Ndzaŋ pɨ pə́ kə̈ tseŋnə̂ nə́ pəkwúna pɨ pó kə zɨ́ nə́ anu páʼə á laŋ nə́ lə́ ńkə ńgɛn ə́fiʼtə̂ á mə́mə aláʼ pópə mbɛnə́ mə́ aláʼə,

³⁵ Pɨ pə́ tíʼ ə́fɛ́d ńgɛnə̂ á mə́ zɨ́ nə́ anu páʼə á laŋ nə́. Ndzaŋ pó kə yí nə́ á mbi Yeso lə́, ńdzə́ənə ŋwu wə̂ páʼ pɛ̌sê pə́ pěʼ nə́ ə́fɛ́lə á mbɨ yí lə́ a náanə á məko yí ńgwê ətsəʼ pí əshîʼnə ńkə́ ńtə́ ńdzóʼ əliʼə́. Pó pɔ́gə.

³⁶ Pɨ páʼ pó nə ńjɨ́ nə́ anu páʼə á laŋ nə́, pó tíʼə ə́fiʼtə̂ pɨ pə́ ndzaŋ pə́ pěʼ nə́ ńdǎa ḿbɔŋə́ tsóʼə ŋwu wə̂ pɛ̌sê pə́ pěʼ nə́ ńchîə mbɨ yí lə̂.

³⁷ Ŋwu ntsəmə á mə́m əláʼ ə́ líblə nə́ Gelasin tíʼ ə́sóŋ ńgə́ Yeso a ghɛnə̂ yí ńté ńgə́ ntɨ́ əghɔ́b ə́ kə lwɛ́nkə nə́ apɔ́gə. A tíʼ ńkwúnə á mə́mə aŋkənúʼə́ ńgɛnə̂ yə́.

³⁸ Ŋwu pɛ̌sê pə́ pěʼ nə́ ə́fɛ́lə mbɨ yí lə́ a póʼ mbô ńgə́ pó Yeso ghɛnə̂, Yeso a pə́ ńkəmə̂ yí ə́sóŋ ńgə́,

³⁹ “Kwə̂ á nchîndɛ̂ gho, ə́fiʼtə̂ ndɛn mənu Əsê a ghɛd nə́ á mbɨ gho.” Ŋwu wə̂ a tíʼ ńkwə̂ ə́fiʼtə̂ aláʼə atsəm nə́ ndɛn mənu Yeso a ghɛd nə́ á mbɨ yə́.

Anu Ńté Mɔ́ Jaliɔs yi Məngyě pó məngyě Yitsə̌ Páʼə a nə Ńkwum nə́ Atsəʼə́ Yeso

⁴⁰ Ndzaŋə ándó Yeso a nə ḿbɨ nə ḿbəənə̂ á ndzɛnə́ nkǐ lə́, ənɔ pɨ ə́ kwáalə yí əshîʼnə ńté ńgə́ pó pətsəm nə ńtə́ ḿbyáabə yə́.

⁴¹ Tsɔʼə əghâ yi wɨ, ŋwu tsə̌ páʼ pə nə̈ fóŋ nə́ yí nə́ Jaliɔs páʼə a pə́ nə́ nətû nə́ ndɛ̂sê Pəjusə, a yǐ ńgwǔəə á məko Yeso ḿbóʼmbô nə́ yí ńgə́ a yǐəə á ndɛ̂ yə́,

⁴² Ńté ńgə́ ndaʼ mɔ́ yǐ yi məngyě páʼə a nə ḿbə́ nə́ ándó ngoʼ ntsɔb pɛ̌ a nə ńtə́ ńkwûə. Ndzaŋ Yeso a nə ńtə́ nə́ ńgɛnə̂ lə́, pɨ pə́ jwíʼnə á mbɨ yə́

⁴³ Məngyě yitsə̌ a nə ńchî ə́wɨ́ páʼə a nə̈ ńgɔ nə́ nə́ mə́sɔ́ nə́ ngoʼ ntsɔb pɛ̌, ńtsəŋə̂ ajúmə atsəm páʼə a nə ńtúg nə́ á mbô ngaŋə́ghɛlə məfǔə, lə́ ŋwu tsə̌ a pə́ ńkě ə́wɨ́ chî təmbɔʼ a tsóʼə yí pô.

⁴⁴ A kɔ́ʼə á mə́m mboŋ pəənə á ndzəm Yeso ńtíʼ nkwum nəlwî nə́ atsəʼ jí, tsɔʼə əghâ yí wɨ́, mə́sɔ́ əyǐ wə̂ á lə́gnə.

⁴⁵ Yeso a pítə ńgə́, “Əwə a kwum nə́ mə?” Ŋwu ntsəmə a kǐəə yə́. Pita a sóŋ ńgə́, “Tǎ, ŋwu məsɔŋə́ a ghɛn ńjíʼnə á mbɨ gho!”

⁴⁶ Lə́, Yeso a pə́ ə́sóŋ ńgə́, “Ŋwu tsə̌ a kwumə̂ mə. Maŋ jî lə́ ńté ńgə́ mətɨ mə́ fɛ́lə á mbɨ maŋə.”

⁴⁷ Məngyě wə̂ a tíʼ ńjɨ́ ńgə́ ndú yitsə̌ ə́ kě ə́wɨ́ chî təmbɔʼ a lyáŋ pô, ńtíʼ ə́fɛ̈d ńnyinə̂ ḿbɛ́nkə nə́ apɔ́g ńgyǐ ńgwǔəə məko Yeso, ə́fiʼtə̂ anu páʼ á ghɛd nə́ a kwumə̂ yə́ á mbi ŋwu ntsəmə. Ḿbɨ ḿbə́ nə́ ndzaŋ páʼə a yáŋ nə́ tsɔʼə əghâ yi wə́.

⁴⁸ Yeso a tíʼ ə́sóŋə á mbô yí ńgə́, “Móonə mə, mbimə́ əzo ə́ tsóʼə gho. Ghɛn nə́ mbwɔ́dnə.”

⁴⁹ Ndzaŋ Yeso a nə ńtə́ nə́ ḿbɛ́lə ńtséebə lə́, ŋwu tsə̌ a lǒo á ndɛ̂ Jaliɔs páʼə a nə ḿbə́ nə́ nətû nə́ ndɛ̂sê Pəjus lə̂ ńgyǐ ə́sóŋ ńgə́, “Mɔ́ gho a kwûə yə́, kɔ gho pɨ ńjwaʼə̂ a Ndzéʼkə.”

⁵⁰ Ndzaŋə ándó Yeso a nə ńdzóʼ nə́ anu jɨ lə́, ńtíʼ ə́sóŋə á mbô Jaliɔsə ńgə́, “Kɔ gho pɔ́gə, pí tsɔʼə pí nə́, mɔ́ gho a yǐ yáŋə.”

⁵¹ Əghâ ándó Yeso a nə ńgyǐ nə́ ńkwúnə á ndɛ̂ Jaliɔsə lə́, ńkě pí ńgə́ ŋwu tsə̌ a zoŋə̂ yí ńkwúnə á mə́m ndɛ̂ pô tə ńdéʼtə Pita pó Jɔn nə́ Jɛmsə ḿbɨ ḿbə́ nə́ tǎpə mɔ́ yi wɨ pó mǎ əyǐ.

⁵² Ŋwu ntsəmə a nə ńchî nə́ aliʼ yi wɨ́ a nə ńtə́ ńkyéŋə ə́fɨnə̂ ńté mɔ́ yi wə́. Yeso a sóŋ ńgə́, “Naʼ nə́ nəkyéŋə, mɔ́ yi wə́ a kě kwú pô, a lê yi lə́ lê nə́.”

⁵³ Pó pətsəm weŋə̂ yi ńté ńgə́ pó nə ńjî ńgə́ mɔ́ yi wə́ a kwûə.

⁵⁴ Lə́ Yeso a pə́ ńgwaamə̂ apô ají ńtíʼ ə́sóŋ ńgə́, “Móonə mə, lǒo á əsê!”

⁵⁵ Nchîmbî əji ə́ pəənə̂, a tɔ́g ńdǒo á əsê. Yeso a tíʼ ə́sóŋ nə́ pó ńgə́, “Fɛ̂ nə́ ajúmə a jîə.”

⁵⁶ Anu yəwə́ á nə ńkɨʼnə̂ tǎ əyǐ pó mǎ əyǐə. Lə́ Yeso a pə́ ə́sóŋ ńgə́ kɔ pó fiʼtə̂ ŋwu tsə̌ nə́ anu páʼə á laŋ nə́.