Lukasə 3 - Əka yi Fîə

Jɔn Əfɛ̂nkǐə a Tsoŋkə̂ Ndúmə

¹ Əfo Tibelusə a nə náanə aləŋ tə ngoʼ ntsɔb tâ ə́ koʼə̂, nə́ ndɛd yi wɨ́ lə́, Pɔŋtus Payilɛlə a pə́ lə́ gɔbnɔ á Judya, Ɛlɔdə a pə́ nətûə á Galiliə, ndim əyǐ Filibə a pə́ ají nətûə á Itolya pó Təlakonitis, Lysanyasə a tíʼ ḿbə́ nətûə nə́ Abilenə,

² Ndɛlə́ ándó Anas pó Kaifasə ə́ kə pə́ nə́ pətə́kɔʼ pə́ pɨ pə́ Əsê lə̂, atséebə Əsê á yǐəə á mbô Jɔn mɔ́ Zakalya á kɔŋ yi njǔbtə.

³ A tíʼ ńnyinə̂ á mə́m əlíʼ ətsəm páʼ ə́ chî nə́ ḿbáatə Nkǐ Jodanə, ə́sóŋə anǔəsê á mbô pó ńgə́, “Mɛdtə̂ nə́ mənu mə́ təpɔŋ pɨ ghɛd nə́ ńkwá nkǐə, ńjî ńgə́ Əsê a ləgnə̂ pətəpɔŋ pə́ənə́.”

⁴ Ndzaŋ pə́ kə ŋwaʼlə̂ nə́ á mə́mə aŋwaʼlə Ntûsê Izaya ńgə́, “Ngye ŋwu tsə̌ ə́ tə́ fóŋnə á kɔŋ yi njǔbtə, ə́sóŋə ńgə́, Tsoŋkə̂ nə́ ndúmə á mbô Mmaʼmbîə, ghɛd nə́ əlaŋə́ ə́ tɨ́ ndə̌ŋdəŋə́ á mbô yə́!

⁵ Pə́ yǐ shib lwɛ́nkə məghaʼtə mə́ nkwəənə mətsəmə, ə́ kə́ kəm məŋnkwəənə mətsəm ə́ kwɛlə̂ á ndəsê. Əlaŋə́ ətsəm ə́ ŋɔ́dtə nə́ ə́ tɨ́ ndə̌ŋdəŋə́, əlaŋə́ páʼ əpɛ́d ə́ chî nə́ ə́wɨ́, pə́ lwɛ́nkə pɨ́d ə́ pɔŋə̂.

⁶ Ŋwu məsɔŋ ntsəmə a yǒ jɨ́ ndzaŋ páʼ Əsê a chwádkə nə́ pəənə.”

⁷ Jɔnə a sóŋə á mbô ənɔ ŋwu məsɔŋ ə́ kə yǐ nə́ á mə́ kwá nə́ nkǐə á mbô yí ńgə́, “Ngwud mənó mə́ təpɔŋ, əwə a kwantə̂ nə́ áwɨ́ ńgə́ təmbɔʼ nə́ kə ngə́ʼ páʼ Əsê a tə́ nə́ ńgyǐəə nə́ zə́ələ́ á mbɨ pəənə́.

⁸ Zə́m nə́ mənteemə́ á mə́ nɨd nə́ ńgə́ nə́ kwúblə á mə́m təpɔŋ əwəənə́. Kɔ nə́ kə́ ńtə́ ə́sóŋə ńgə́ Ablaam lə́ tǎ əwəgə́. Mäŋ ə́sóŋə á mbô pɨ ńgə́ mbɔʼ Əsê a lɔg məngɔʼ mɨ ə́sɛd pɔ́ pə́ Ablaam ə́wə́.

⁹ Ndza ə́ pɛ́dtə ńchîə á nətɛ́n nə́ atǐə, ńtə́ ḿbyáabə ńgə́ atǐə atsəm páʼə á kě nə́ mənta mimə əshîʼnə zə́m pô, pə́ yǐ kə́ʼə ázɨ́d ə́ toonə̂ á mógə́.”

¹⁰ Ənɔ pɨ wə̂ ə́ pítə ńgə́ “Mbɔʼ pəg ghɛd ə́lɛ́ əghâ nə́?”

¹¹ Jɔnə a kwěe ághɔ́b ńgə́ “Ŋwu páʼə a túg nə́ ətsəʼ pɛ̌ a fɛ̂ táʼ nə́ ŋwu páʼ a kě nə́ yətsə́ túg pô. Ŋwu páʼə a kə́ nə́ ńtúg məjîə a fɛ̂ ŋwu páʼ a kě nə́ túg pô.”

¹² Ngaŋə́kwáalə́ nchubə aláʼ pó kə́ ńgyǐəə á mə́ kwá nə́ nkǐə, ḿbítə ńgə́, “Ndzéʼkə, mbɔʼ pəg ghɛd ə́lɛ́?”

¹³ A sóŋə á mbô pó ńgə́, “Kɔ nə́ kwá nchubə aláʼ ńdaŋ ndɛn nə́ pěʼ nə́ ńchîə á mə́ kwá nə́.”

¹⁴ Ngaŋə́maʼə́ntso yitsə̌ ə́ kə́ ḿbítə azɔ́b ńgə́, “Mbɔʼ pəg ghɛd ə́lɛ́?” A kwěe ághɔ́b ńgə́ “Kɔ nə́ kwá nkáb pɨ nə́ mətəənə, kɔ nə́ kə́ ńnéŋ əsóomə á atû ŋwunə, ajú pə̈ tû nə́ áwɨ́ ə́wə́ á koʼnə̂ á mbô pəənə́.”

¹⁵ Ŋwu ntsəmə a kə náanə lə́, ḿbyádnə ḿbyáabə ńgə́ ngǎ pɛ̌ yi páʼ Əsê a Tsəʼ nə́ lə́ a yǐəə. Pó pə́ ńdánə ńtíʼə ńkwaŋə̂ ńgə́, “Mbɔʼ Jɔnə a pə́ pə́ yi páʼ Əsê a Tsəʼ nə́ lə́.”

¹⁶ Jɔnə a kwěe ághɔ́b ńgə́, “Mäŋ fɛ̂ lə́ ndaʼ nkǐ nə́ pəənə́, lə́ ŋwu tsə̌ a pə́ ńtə́ ńgyǐəə páʼ a tsɛ nə́ mə, maŋ pěʼ ńkě koʼə̂ pə́ ŋwu páʼ təmbɔʼ maŋ kyag məŋkɛd mə́ ngwub mí pô. A yǐ fɛ̂ nkǐə Ajwǐəsê á mbô pəənə́ ə́ kə́ ə́fɛ̂ yi mógə́.

¹⁷ A túg əpú pí páʼə a yǐ nə́ lɔg ə́ póʼ ndzǒ ə́wə́, ə́tsɛntə̂ ndzǒ zə́ ə́ ghɛn néŋə á mə́m nkye məjî əjǐə, lə́ pə́ ə́ tɔ əkwub əpíə á mə́m móg páʼ ə́ láʼ nə́ kě pə́gnə pô.”

¹⁸ Jɔnə a kə́ ńtə́gtə pɨ pəwɨ́ nə́ məndú mimə nɨ́ nə́ ə́fɛ̂ nkɨ yi əshîʼnə á mbô pó.

¹⁹ Jɔnə a kə kwantə̂ Ɛlɔd páʼə a nə ḿbə́ nə́ nətû, ńté ńgə́ a kə kwáalə Ɛlɔdyas páʼə a pə́ nə́ ngwě ndim əyǐ ḿbɨ ńkə́ ńté mənu mə́ təpɔŋ mimə nɨ́ nə́ páʼə a kə̈ ghɛd nə́.

²⁰ Ɛlɔdə a kə waamə̂ Jɔn ńnéŋə atsáŋə, ḿbegə̂ təpɔŋ ghɛnə́ á ndu pətəpɔŋ píə.

Akwáalə́nkǐə Yeso

²¹ Ndzaŋ ŋwu ntsəmə a kə kwá nə́ nkǐ lə́, Yeso a kə́ ńkwá əyíə. Əghâ ándó a kə tə́ nə́ ńchaʼtə́sê, nəpó nə́ ŋáʼnə,

²² ajwǐəsê a tsóolə á mbɨ yə́, ńchî lə́ ándó alúʼə, ngye yitsə̌ ə́ fɛ́lə á nəpó ńgə́, “Gho lə́ móonə mə páʼ maŋ kɔŋ nə́, mbəəmə mə ə̈ pɔŋə̂ ńté gho.”

Əla pə Yeso

²³ Yeso a kə chúʼə á mə́ faʼ nə́ afaʼə ají páʼə a kə pə́ nə́ ándó ngoʼ məghə́m mɛ́n teelə́. Pə́ kə lɔg ńgə́ Yeso a nə́ ḿbə́ lə́ mɔ́ Jɔsɛfə. Jɔsɛfə a pə́ mɔ́ Eliə.

²⁴ Eliə a pə́ mɔ́ Matalə, Matalə a pə́ mɔ́ Lebi. Lebi a pə́ mɔ́ Melkiə. Melkiə a pə́ mɔ́ Janai. Janai a pə́ mɔ́ Jɔsɛfə,

²⁵ Jɔsɛfə a pə́ mɔ́ Matatyasə, Matatyasə a pə́ mɔ́ Amosə, Amosə a pə́ mɔ́ Naumə, Naumə a pə́ mɔ́ Esli, Esli a pə́ mɔ́ Nagai.

²⁶ Nagai a pə́ mɔ́ Maat, Maat a pə́ mɔ́ Matatyasə, Matatyasə a pə́ mɔ́ Semein, Semein a pə́ mɔ́ Josek, Josek a pə́ mɔ́ Juda,

²⁷ Juda a pə́ mɔ́ Joananə, Joananə a pə́ mɔ́ Lesa, Lesa a pə́ mɔ́ Zelubbabelə, Zelubbabelə a pə́ mɔ́ Shealtielə, Shealtielə a pə́ mɔ́ Neli,

²⁸ Neliə a pə́ mɔ́ Melki, Melkiə a pə́ mɔ́ Adi, Adi a pə́ mɔ́ Kosamə, Kosamə a pə́ mɔ́ Emadamə, Emadamə a pə́ mɔ́ El,

²⁹ Elə a pə́ mɔ́ Joshwa, Joshwa a pə́ mɔ́ Eliezel, Eliezel a pə́ mɔ́ Jolim, Jolimə a pə́ mɔ́ Mattat, Mattatə a pə́ mɔ́ Lebi,

³⁰ Lebiə a pə́ mɔ́ Simeon, Simeonə a pə́ mɔ́ Juda, Juda a pə́ mɔ́ Josebə, Josebə a pə́ mɔ́ Jonamə, Jonamə a pə́ mɔ́ Elyakimə,

³¹ Elyakimə a pə́ mɔ́ Melea, Melea a pə́ mɔ́ Menna, Menna a pə́ mɔ́ Matata, Matata a pə́ mɔ́ Natanə, Natanə a pə́ mɔ́ Debilə,

³² Debilə a pə́ mɔ́ Jese, Jese a pə́ mɔ́ Obelə, Obelə a pə́ mɔ́ Boaz, Boazə a pə́ mɔ́ Sala, Sala a pə́ mɔ́ Nashonə,

³³ Nashonə a pə́ mɔ́ Aminadabə, Aminadabə a pə́ mɔ́ Adminə, Adminə a pə́ mɔ́ Alni, Alniə a pə́ mɔ́ Ezlonə, Ezlonə a pə́ mɔ́ Pelez, Pelezə a pə́ mɔ́ Juda,

³⁴ Juda a pə́ mɔ́ Jekɔbə, Jekɔbə a pə́ mɔ́ Azig, Azigə a pə́ mɔ́ Ablaamə, Ablaamə a pə́ mɔ́ Tela, Tela a pə́ mɔ́ Naol,

³⁵ Naolə a pə́ mɔ́ Selug, Selugə a pə́ mɔ́ Leu, Leu a pə́ mɔ́ Peleg, Pelegə a pə́ mɔ́ Ebel, Ebelə a pə́ mɔ́ Shela,

³⁶ Shela a pə́ mɔ́ Kainanə, Kainanə a pə́ mɔ́ Alfazad, Alfazadə a pə́ mɔ́ Shemə, Shemə a pə́ mɔ́ Nwâ, Nwâ a pə́ mɔ́ Lamek,

³⁷ Lamekə a pə́ mɔ́ Metusela, Metusela a pə́ mɔ́ Enok, Enokə a pə́ mɔ́ Jaled, Jaledə a pə́ mɔ́ Maalalel, Maalalelə a pə́ mɔ́ Kenan,

³⁸ Kenanə a pə́ mɔ́ Enosh, Enoshə a pə́ mɔ́ Set, Setə a pə́ mɔ́ Adamə, Adamə a pə́ mɔ́ Əsê.