Lukasə 19 - Əka yi Fîə

Yeso pó Zakyɔsə

¹ Yeso a kwúnə aláʼə Jɛliko ńtə́ ńgwadnə̂ ńdaŋə̂ ə́wə́.

² Əfoʼ yitsə̌ a chî ə́wɨ́ pə́ fóŋə nə́ zakyɔsə a pə́ nətû nə́ ngaŋə́kwáalə́ nchubə aláʼə.

³ A kə tə́ ńdoonə̂ á mə́ jɨ́ nə́ Yeso, ḿbə́ ńté ńgə́ a nə ńkəmkə̂ tə́shúnə́, ŋwu məsɔŋə́ a kɨ́ʼə yí a kě chî təmbɔʼ a zə́ənə Yeso pô,

⁴ Ńtíʼ ńkə ńgɛnə̂ a mbi ńgwaamə̂ atǐ yitsə̌ ńkɔ́ʼ ńnáanə ə́wə́ á mə́ jɨ́ nə́ Yeso ńté ńgə́ a kə chîə á mə́ laŋ nə́ alaŋə́ yi wə́.

⁵ Ndzaŋ Yeso a kə yǐ nə́ ńkoʼə̂ aliʼ yi wɨ́ lə́, ḿbɨgə̂ atûə ajíə atǐ ə́sóŋ nə́ yí ńgə́, “zakyɔsə, ghə́glə ńtsóolə atûə atǐ wə̂ ńté ńgə́ maŋ yǐ shib lê á ndɛ̂ gho ə́sɛ̂nə̌.”

⁶ Zakyɔsə a ghə́glə ńtsóolə atǐ wə́ ńtíʼ ńdɔgə̂ yí nə́ akɔŋtə.

⁷ Ŋwu ntsəm páʼ a nə ńjɨ́ nə́ anu yə́ wɨ́ a chúʼə á mə́ ŋwuntə̂ nə ə́sóŋə ńgə́, “ŋwu nə́ a ghɛnə̂ á mə́ ghá nə́ ngɛdtəpɔŋə.”

⁸ Lə́ Zakyɔsə a pə́ ńdǒ əsê ə́sóŋə á mbô Mmaʼmbî ńgə́, “Jwə́ʼtə Mmaʼmbî! maŋ yǐ gheebə̂ apeʼə mə ndə̌ŋdəŋə́ aliʼə́ nə́ əghâ nə́ ə́fɛ̂ á mbô pəpóŋə. Mbɔʼ maŋ nə ḿbɛ́dtə ə́fɨgə̂ ŋwu ńkwáalə ajúmə ají, tə ḿbə́ maŋ yǐ pɨ fɛ̂ ájɨ́d nə́ yí ə́jábtə ngǎ nəkwa.”

⁹ Yeso a sóŋə á mbô yi ńgə́, “Ə́sɛ̂nə̌, pə́ chwádkə pɨ pə́ ndɛ̂ pɨ, ńté ńgə́ ŋwu nə́ a kə pə́ lə́ Mɔ́ Ablaamə.

¹⁰ Ńté ńgə́ Mɔ́ Ŋwunə a kə yǐ lə́ á mə́ chwa nə́ pɨ páʼ pó péŋ nə́ ə́ kə́ chwádkə ághóobə́.”

Atséebə́nə́múʼ Ńté Nkéebə

¹¹ Ndzaŋ pɨ pə́ nə́ ḿbɛ́d nə̈ ńjwə́ʼtə lə́, Yeso a ghɛn nə́ mbiə á mə́ tsáb nə́ atséebə́nə́múʼə́ a mbô pó, ńté ńgə́ a nə ńtíʼə ḿbáatə Jɛlusalɛm, pɨ pə́ kə́ ńkwaŋ ńgə́ Anuə Nəfoonə Əsê a yǐ əyǐ tsɔʼə əghâ yí wə́.

¹² A tíʼ sóŋə á mbô pó ńgə́, “Mɔ́ ntɔ́ʼə aláʼə atú yitsə́ a nə́ ńdáʼ ńtə́ ńgɛnə̂ aláʼə atú yitsə́ tə ndi sagə̂, ńgə́ pə́ lɔgə̂ yí ńdzɔ́ʼə əfo ə́wə́ a pɨ ḿbəənə̂ aláʼə.

¹³ A nə́ ńjǐ tə́ ə́fɛ́lə lə́, ə́fóŋ ngaŋə́faʼ əjí zɛ́n nəghə́mə, əfɛ̂ táʼ táʼə apeemə nkéebə á mbô pó pətsəm ə́sóŋ ńgə́, Ghɛn nə́ ńtə́ ńtáŋ nkáb jɨ tə maŋ láʼ ḿbəənə̂.”

¹⁴ “Lə́ pɨ pə́ aláʼ pí pó pə́ ḿbeenə̂ yə́, ńtíʼ ńtú pəənə a ndzəm yí ńgə́ pó ghɛn ə́sóŋ ńgə́, Pəg kě kɔŋ ńgə́ ŋwu nə́ a pə́ əfo əwəg pô.”

¹⁵ “Pə́ nə́ ḿbɛ́d ńdzɔ́ʼə yí nə́ əfo tsɔʼə zɔ́ʼ nə́, a tíʼ ḿbəənə̂ aláʼə. Ä kə́ ńgə́ pəənə̂ lə́ ńtɔ́g ńtú nkɨ nə́ ngaŋə́faʼ əjí zə́ páʼ a nə fɛ̂ nə́ nkáb nə pó lə́ ńgə́ ŋwu ntsəmə a yǐ ə́fiʼtə̂ ndɛnə ape páʼ a jí nə́ nə́ nkáb əjǐ zə̂.”

¹⁶ “Ntsɛɛmbi ŋwunə a yǐ ə́sóŋ ńgə́, Mmaʼmbî, táʼə apeemə nkáb əgho wə́ gho nə fɛ̂ nə́ nə́ maŋ lə́ a faʼ zɛ́n nəghə́mə.”

¹⁷ “A sóŋə a mbô yí ńgə́, ‘Gho faʼ əshîʼnə, gho lə́ ngaŋəfaʼə mə yi əshîʼnə. Ndzaŋ gho faʼ nə́ əshîʼnə nə́ pɔ́ pə́ kə́nyaŋ pə́ mənu lə́, maŋ yǐ ghɛd gho tə́ ńnáŋ əláʼ pɛ́n nəghə́mə.’

¹⁸ Yi páʼ a zoŋkə̂ nə́ a yǐ ə́sóŋ ńgə́, ‘Mmaʼmbî, táʼə apeemə nkáb əgho wê páʼ gho nə fɛ̂ nə nə́ maŋ lə́ a faʼ pɛ́n tênə.’

¹⁹ A sóŋə á mbô wɨ́d ghɛn ŋwu ńgə́, Gho yǐ tə́ náŋ əláʼ pɛ́n tênə.”

²⁰ “Yitsə̌ a pɨ́ ńgyǐəə ají ə́sóŋ ńgə́, ‘Mmaʼmbî, lɛ̌ táʼə apeemə nkáb gho wə́; Maŋ nə ńkwúlə ájɨ́d nə́ ajúmə atsəʼ ńdɔʼkə̂.

²¹ Maŋ nə ńtə́ ḿbɔ́gə gho ńté ńgə́ mbɔ́ gho a tyantə̂ tə́shúnə́; gho kwáalə ajú páʼ a kě nə́ azô pô ńkə́ foʼə̂ aliʼ páʼ gho nə ńkě nə ə́wɨ́ pǐ pô.’

²² Əfo wə́ a sóŋə á mbô yí ńgə́, ‘Gho lə́ ngaŋə afaʼ təpɔŋə! əsáʼ əsáʼ əzo ə́fɛ́d nə́ ətsáb pô! gho jî ńgə́ mbóomə mə a tyantə̂, mäŋ kwáalə ajú páʼ a kě nə́ azá pô, ńkə̈ ə́foʼə̂ alíʼ maŋ kě nə́ wɨ́ pǐ pô.

²³ Lə́ nə ńgɛlə̂ akə̂ gho kě ghɛn ńnéŋ nkéebə mə á nəlɔʼkə nə́ nkáb pô? Tə́ ḿbə́ maŋ pěʼ ńkwə̂ ə́fógə zɨ́d ape á kwú ə́wə́.’

²⁴ A tíʼ ə́sóŋə á mbô pɨ pə́ nə ńtɨ́ nə́ alíʼ yə wɨ́ ńgə́, ‘kwá nə táʼə apeemə nkáb yi wə́ á mbô yí ə́fɛ̂ á mbô ŋwu páʼ a túg nə́ əpa nəghə́m lə̂.’

²⁵ Pó sóŋə á mbô yí ńgə́, Mmaʼmbî, a pɛ́d tə ńtúg əpa nəghə́mə!”

²⁶ “Yeso a sóŋ ńgə́, ‘Maŋ sóŋə áwɨ́ ńgə́ ŋwu ntsəm páʼ a túg nə́, pə́ yǐ pegə̂ yə nɨ́ nə́ á mbô yə́, lə́ ŋwu páʼ a kě nə́ túg pó, mɔ́ alíʼ páʼ a túg nə́ pə́ yǐ kwáalə áwə́ələ́ á mbô yə́.

²⁷ Lə́, yǐ nə nə́ ngaŋkə́peenə́ mə zə̂ pó nə ńkě nə́ kɔŋ ńgə́ maŋ pə́ əfo pô lə́ ńjwítə ághóobə́ a mbi maŋə.’ ”

Yeso a Kwúnə Jɛlusalɛm Ándó Əfo

²⁸ Yeso a nə ńtsáb ətsáb pɨ lɛ̌ lə́, ńtíʼ ńkwá mbi əzɔb ńtə́ ńkɔ́ʼə ńgɛnə̂ á Jɛlusalɛm.

²⁹ Ndzaŋ a nə́ ńtə́ nə́ ḿbáatə Bɛlfas pó Bɛtani lə́, ńkoʼə̂ á nkwəənə Olif, ńtú ngaŋə́zoŋə́ndzəm əjí zɛ́n pɛ̌

³⁰ ə́sóŋ nə́ pó ńgə́, “Ghɛn nə́ aláʼ páʼ á chî nə́ mbi pɨ lə́; nə́ yǐ kə́ ghə́ kwúnə aláʼ yi wɨ́ lə́, ə́zə́ənə mɔ́ kə́nyaŋ njakasə yitsə̌ páʼ pə́ təŋnə̂ nə́, páʼ ŋwu tsə̌ a nə́ ńkě nə́ á ndú wɨ́ kə́ kɔ́ʼə pô. Kyag nə́ zɨ́d ńgyǐ nə́ zə́ələ́.

³¹ Mbɔʼ ŋwu tsə̌ a pítə wɨ́ ńgə́, ‘Nə́ kyagə̂ zɨ́d lə́ ńgə́ akə̂?’ Nə́ sóŋ ńgə́, ‘Mmaʼmbîə a loonə̂ á zə́ələ́.’ ”

³² Pó ghɛn ńkə́ ńdzə́ənə anuə atsəm tsɔʼə ndzaŋ páʼ Yeso a pěʼ nə́ ə́sóŋ nə́ pó lə́.

³³ Ndzaŋ pó nə ńtə́ nə́ ńkyag njakasə zə́ lə́, ŋwúlə́ apítə ághɔ́b ńgə́, “Nə́ kyagə̂ lə́ ńgə́ akə̂?”

³⁴ Pó kwěe ńgə́, “Mmaʼmbîə a loonə̂ á zə́ələ́,”

³⁵ Pó tíʼ ńdɔgə̂ zɨ́d ńgɛn ə́fɛ̂ nə́ Yeso. Ńtíʼ ḿmaʼ ətsəʼ əpóobə́ á ndu mɔ́ njakasə yi wɨ́ ńtɔ́mtə Yeso a kɔ́ʼ ńnáanə a ndu wə́.

³⁶ Ndzaŋ a nə ńtə́ nə́ ńgɛnə̂ lə́, pɨ pə́ tíʼə ḿmaʼ ətsəʼ əpóobə́ á alaŋə́.

³⁷ Əghâ a nə ńgyǐ nə́ ḿbáatə Jɛlusalɛm, nə́ alaŋə́ á nə ńdǒ nə́ á nkwəənə Olif ńtə́ ńtsóolə lə́, apoŋə ngaŋə́zoŋə́ndzəm ajíə a chúʼə mə́ kɔŋtə̂ nə́, ə́ ghóʼkə Əsê nə́ pətə́kɔʼ pə́ məngye ńté pətə́kɔʼ pə́ mənu páʼ pó jɨ́ nə́.

³⁸ Ə́sóŋ ńgə́, “Mbwɔ́dnə ə́ chîə á mbô əfo páʼ a yǐ nə́ nə́ əlɛ́n Mmaʼmbîə! Mbwɔ́dnə á nəpóolə, ngóʼkə ə́ chî nə́ əlɛ́n Əsê páʼ a tsɛ nə́ ajúmə atsəmə!”

³⁹ Pɨ pə́ Falasi pətsə́ páʼ pə́ nə ńchî nə́ á mə́m ənɔ pó sóŋə a mbô Yeso ńgə́, “Ndzéʼkə, sáʼ ngaŋə́zoŋə́ndzəm əzô jɨ pó naʼə̂.”

⁴⁰ Yeso a kwěe ńgə́, “Mäŋ fiʼtə̂ áwɨ́ ńgə́ mbɔʼ pó naʼ, á pə́ pə́ məngɔʼ, mə́ chúʼə á mə́ jwáglə nə́.”

Yeso a Kyéŋ Ńté Jɛlusalɛm

⁴¹ Ndzaŋ Yeso a nə́ ńjáʼ nə́ ńdzə́ənə Jɛlusalɛm lə́, ńkyéŋ ńté aláʼ yəwə́.

⁴² Ə́sóŋ ńgə́ “á pěʼ ḿbɔŋ ńgə́ nə́ jî mənu páʼ mə̈ yǐ nə́ nə́ mbwɔ́dnə á mbô pɨ ə́sɛ̂nə̌, lə́ nə́ pə əghâ nə́, pə́ pɛn ńdyáŋə mə́ələ́ á əmə́g pəənə́.

⁴³ Ndɛd tə́ ńgyǐəə páʼ ngaŋkə́pa əzɨ́ ə́ yǒ nə́ kwúd nkáʼ líblə áwɨ́ ə́wə́, ə́ kə́ tsélə áwɨ́ məlá mətsəmə.

⁴⁴ Pó yǒ kwíʼnə ghɔʼə̂ áwɨ́ pə pɔ́ pɨ pətsəmə, tsɔʼə táʼ ngɔʼə á yǒ kě pɛ́d ńnoŋnə̂ á ndú yitsə̌ pô, ńté ńgə́ pɨ nə ńkě jî chigə ndɛd páʼ Əsê a nə ńgyǐ nə́ á mə́ chwádkə nə́ áwɨ́ pô!”

Yeso a Ghɛnə̂ á Tə́kɔʼndɛ̂sê

⁴⁵ Yeso kwúnə á mə́m tə́kɔʼndɛ̂sê ńkəm ngaŋə́táŋə́mə́tá ə́wə́,

⁴⁶ Ńtíʼ ə́sóŋə á mbô pó ńgə́, “Pə́ ŋwaʼlə̂ á mə́mə aŋwaʼlə Əsê ńgə́, ‘Ndɛ̂ Mə ə́ yǒ pə́ lə́ aliʼə́ achaʼtə́sê.’ Nə́ pɛn ńtíʼ ńdɔgə̂ ázɨ́d ńgɛlə̂ pə́ alíʼə nəlyaŋnə́ pəzə̌ ə́wə́.”

⁴⁷ Yeso a nə̈ ńdzéʼkə á tə́kɔʼndɛ̂sê lə́ əlě ətsəmə, lə́, pətə́kɔʼ pə́ ngaŋə́pêsê, ngaŋə́zéʼkə pənoŋkə, ḿbɨ́ ḿbə́ nə́ mətû mə́ aláʼ pó nə ńtə́ ńdɔ ndúmə a mə́ jwítə nə yə́,

⁴⁸ ḿbə́ ńkě əsa jɨ́ pô ńté ńgə́ ŋwu ntsəmə a nə fɛ̂ mətôglə mí nə́ yí ńtə́ ńjwə́ʼtə anuə atsəm páʼə ä sóŋ nə́.