Lukasə 10 - Əka yi Fîə

Yeso a Tú Ngaŋə́zoŋə́ndzəm əjí Məghə́mə Asaambɛ̂ nə́ Pɨ pɛ́n Pɛ̌

¹ Ndzaŋ pó po kə məgtə̂ nə́ lə́, Mmaʼmbîə a tíʼ ńtsɔ́ʼ pətsə́ pɨ məghə́mə asaambɛ̂ nə́ pɨ pɛ́n pɛ̌ ńtúmə ághɔ́b pə́ pɛ̌ pə́ pɛ̌ ńgə́ pó kwá mbi ńgɛn nə́ əláʼ ətsəm pópə aliʼə́ atsəm páʼə a chî nə́ á mə́ ghɛn nə́ ə́wə́.

² Yeso a sóŋə á mbô pó ńgə́, “Məjî mə́ nə́ənə, lə́ pɨ pə́ foʼ nə́ pə́ pə́ ńkə́gə. Póʼ mbô á mbô ngaŋ məjî ńjî ńgə́ a tú ngaŋə́faʼə á afɔ pə́ ghɛn ə́foʼə̂ mə́ələ́.

³ Ghɛn nə́, mäŋ túmə áwɨ́ lə́ ándó məmbéŋ mə́ ndzɛlə á mə́m əfunə́.

⁴ Kɔ nə́ lɔg nkéebə, kəənə apeemə, kɨ ngwub məkoolə, kɔ nə́ kə́ ńchaʼtə̂ ŋwu tsə̌ alaŋə́.

⁵ Ndɛ̂ ntsəm nə́ kwú nə́ ə́wɨ́ nə́ peg ə́sóŋ ńgə́, mbwɔ́dnə ə́ chîə á ndɛ̂ nə́

⁶ Mbɔʼ ŋwu mbwɔ́dnə a chîə á ndɛ̂ yi wɨ́, mbwɔ́dnə əjǐ ə́ ghɛnə̂ á mbô yə́, ńchî ə́wɨ́ chî, mbwɔ́dnə əzɨ ə́ pɨ ḿbəənə̂ á mbô pəənə́.

⁷ Chî nə́ á ndɛ̂ yi wɨ́ ńjîə ńkə́ ńnô ajúmə atsəm pə̈ fɛ̂ nə́ á mbô pəənə́, ńté ńgə́ ngaŋəfaʼ ntsəmə a chîə á mə́ kwá nə́ ntsɔ́ʼəfaʼ əjǐə. Kɔ nə́ tə́ ə́fɛ́lə nə́ táʼ ndɛ̂ ńkwúnə nə́ yitsə̌.

⁸ Aláʼə atsəm nə́ kwú nə́ ə́wɨ́ pə́ lɔgə̂ áwɨ́ ə́wɨ́ əshîʼnə, nə́ jîə ajúmə atsəm pə́ tə́g nə́ á mbi pəənə́.

⁹ Tsóʼ nə́ pəghɔ pə́ chî nə́ ə́wɨ́ ńkə́ ə́fiʼtə̂ ngaŋə́láʼ yi wɨ́ ńgə́, Anuə Nəfoonə Əsê á yǐ tə ḿbáatə áwə́ənə́.

¹⁰ Lə́ mbɔʼ nə́ ghɛnə̂ aláʼ yitsə̌ pə́ chîə áwɨ́ pí, nə́ ghɛn nə́ əlaŋə́ əpɔ́b ə́sóŋ ńgə́,

¹¹ Tsɔʼə akəpóglə́ aláʼə azɨ́ páʼə á chî nə́ á məko pəg, pəg kɔdtə̂ zɨ́d ńkwɛlə̂, á mə́ nɨd nə́ ńgə́ anu nə ghɛd nə́ á kě koʼnə̂ pô. Lə́, nə́ pə́ ńjî ńgə́ Anuə Nəfoonə Əsê á yǐ tə ḿbáatə áwə́ənə́.

¹² Mäŋ fiʼtə̂ áwɨ́ ńgə́ á yǒ pɔŋə̂ á mbô pɨ pə́ Sodomə Alě asáʼə́məsáʼ ńtsɛ pɨ pə́ aláʼ pɨ́d pə̂.”

Əláʼ páʼ ə́ kě nə́ Əsê pí pô

¹³ “Pɨ pə́ kolazin, ndɔ ə́ chîə atû pəənə́, pɨ pə́ Bɛdsada, ndɔ ə́ kə́ ńchîə atû pəənə́. Ńté ńgə́ pətə́kɔʼ pə́ mənu pə́ kə ghɛd nə́ pə́ələ́ á mbô pɨ lə́ mbɔʼ pə́ kə ghɛlə̂ pɨd lə́ á Tayile kəənə á Sidɔn tə ḿbə́ pó kə kɔ́g ńkwúblə ńgwê pəshíshí pə́ ətsəʼ ə́fuʼə̂ apû ńtíʼ ńnáanə nə́ afɨnə.

¹⁴ A yǒ pə́ Alěsáʼə́məsáʼ, á pɔŋə̂ á mbô Tayile pó Sidɔn ńtsɛɛlə̂ áwə́ənə́.

¹⁵ Pɨ ngaŋ Kapanawum, pɨ loonə̂ lə́ á mə́ ŋáŋkə nə́ mbɨ əzɨ ə́ kɔ́ʼə á nəpó? Ngá, pə́ yǒ tsóokə áwɨ́ ḿmaʼə̂ á ntɛ́n əsê.”

¹⁶ Yeso a sóŋə á mbô ngaŋə́zoŋə́ndzəm əjí ńgə́, “Ŋwu ntsəm páʼə a jwə́ʼtə nə́ á mbô pəənə́ a jwə́ʼtə lə́ á mbô maŋə, ŋwu ntsəm páʼ a kǐ nə́ áwə́ənə́ a kǐ lə́ mə. Lə́ ŋwu ntsəm páʼ a kǐ nə́ mə a kǐ lə́ ŋwu páʼ a tú nə́ mə.”

¹⁷ Pɨ pə́ məghə́mə asaambɛ̂ nə́ pɨ pɛ́n pɛ̌ kə pɨ nə́ akɔŋtə á ntɨ́ pó ńtíʼə ə́sóŋə ńgə́, “Mmaʼmbî, tə pɛ̌sê ə́ kə̈ ńdzóʼnə áwə́g ńdaŋə̂ nə́ əlɛ́n əghô.”

¹⁸ Yeso a kwěe ághɔ́b ńgə́, “Maŋ kə zə́ənə satanə a lǒo á nəpó ńgwǔəə ándó nəfaŋ yi nə́ ŋwaŋkə̂ nə́.

¹⁹ Jɨ́ nə́, maŋ fɛ̂ mətəənə á mbô pɨ mbɔʼ nə́ nyinə̂ á ndu mənó pópə pəmə́ŋgâsê pə́ təpɔŋə anu yitsə̌ á kě áwɨ́ ghɛd pô, mətɨ mɨ́ mə́ kə́ ńtsɛ mimə́ ngaŋkə́peenə́.

²⁰ Lə́ kɔ nə́ pə́ ńkɔŋtə̂ ńgə́ əjwi təpɔŋ ə́ zóʼnə áwə́ənə́, kɔŋtə̂ nə́ pə́ ńgə́ pə́ ŋwaʼlə̂ məlɛ́n mə́ənə́ á nəpóolə.”

Yeso a Kɔŋtə̂

²¹ Nə́ ndɛd yi wɨ́, Ajwǐəsê a ghɛd akɔŋnə á lwɛ́nkə á ntɨ́ Yeso, a sóŋ ńgə́, “Mäŋ ghóʼkə gho Tǎ, Mmaʼmbî pə nəpó pó ndəsê ńté ńgə́ gho lyáŋ mənu məənə́ á mbô pɨ pó yáŋ nə́ ńkə́ ńjî ənuə, ḿbə́ ńnəələ̂ mə́ələ́ á mbô kə́yé ŋwunə. Tǎ, lə́ ndə̌ŋdəŋ ńgə́ gho kə faʼə̂ anuə ntsəm lə́ ndzaŋ páʼ a koʼnə̂ nə́ gho.”

²² “Tǎ mə a fɛ̂ ajúmə atsəmə á mbô maŋə. Ŋwu tsə̌ a kě jîə ŋwu páʼ móonə a pə́ nə́ wɨ́d pô tə ńdéʼtə Tǎ. Ŋwu tsə̌ a kě kə́ ńjîə ŋwu páʼ Tǎ a pə́ nə́ wɨ́d pô tə ńdéʼtə Móonə, ḿbɨ ḿbə́ nə́ pɨ páʼ Móonə a tsɔʼ nə́ á mə́ nɨd nə́ yə́ á mbô pó.”

²³ Yeso a sɛdnə̂ ə́sóŋ nə́ ngaŋə́zoŋə́ndzəm əjíə á ndzəmə ndzəm ńgə́, “Mbɔŋə́ azɨ́ nə́ zɨ́ mənu páʼ nə́ zɨ́ nə́ lɛ̌.

²⁴ Mäŋ fiʼtə̂ áwɨ́ ńgə́ məntúmə́sê mimə nɨ́ nə́ pópə pəfo pi nɨ́ nə́ pó kə loonə̂ á mə́ zɨ́ nə́ mənu páʼ nə́ zɨ́ nə́, ḿbə́ ńkě zɨ́ pô, ńdoonə̂ á mə́ zóʼ nə́ mənu páʼ nə́ zóʼ nə́ ḿbə́ ńkě zóʼ pô.”

Atséebə́nə́múʼ ńté Ngɛd Əshîʼnə Samalitan yitsə̌

²⁵ A nə ńdáʼ ḿbə́ alě tsə́ táʼ ŋwu tsə̌ á mə́m ngaŋə́zéʼkə pənoŋkə a yǐəə á mə́ mɔ nə́ Yeso. Ḿbítə ńgə́, “Ndzéʼkə, mbɔʼ maŋ ghɛd ə́lɛ́ ḿbɔŋə́ jî nchîntɨ páʼ ə́ mɛdnə̂ nə́ ngǎ mɔʼə́?”

²⁶ Yeso á kwěe yí ńgə́, “Aŋwaʼlə Əsê á sóŋ ńgə́ akə̂, pɨ̈ zóʼə azə́ənə́ pə́ ə́lɛ́?”

²⁷ Ŋwu wə̂ a kwěe ńgə́, “Kɔŋə̂ Mmaʼmbî páʼ a pə́ nə́ Əsê əzo nə́ ntɨ́ əghô ətsəmə, nə́ ajwiə azô atsəmə, nə́ mətɨ mô mətsəmə nə́ akwaŋə azô atsəmə; ńkə́ ńkɔŋə̂ ngaŋ nəpad əgho ándó mbɨ əzo.”

²⁸ Yeso a kwěe yi ńgə́, “Gho koʼnə̂, Faʼ ə́lə́ələ́, gho yǐ chîə á mbîə.”

²⁹ Lə́, ndzéʼkə pənoŋkə wə̂ a pə́ ńtə́ ńdoonə̂ á mə́ nɨd nə́ ńgə́ yə́ a koʼnə̂, ńtíʼ ḿbítə Yeso ńgə́, “Ngaŋ nəpeelə mə lə́ əwə?”

³⁰ Yeso a kwěe yí ńgə́, “Ŋwu tsə̌ a kə láʼ ə́fɛ́lə á Jɛlusalɛm ńtə́ ńtsóolə ńgɛnə̂ á Jɛliko, pəzə̌ pə́ waamə̂ yí ńtsɔ́ʼtə ətsəʼ pí, ḿbóʼə yí tə a tíʼə ńdoonə̂ á mə́ kwû nə́, pó mɛdtə̂ yí ńgɛnə̂ ághóobə́.

³¹ Mbêsê yitsə̌ a kə tə́ ńdaŋə̂ alaŋə́ yi wɨ́ ńdzə́ənə yí páʼə a noŋnə̂ nə́, ńdə́ʼ ńdaŋə̂ yə́ á əlá alaŋə́ yi ndaʼə.

³² Ŋwu Lebi yitsə̌ a kə ńtə́ ńdaŋə̂ ají ńdzə́ənə yi páʼə a noŋnə̂ nə́ ńdə́ʼ ńdaŋə̂ yə́ á əlá alaŋə́ yi ndaʼə.

³³ Lə́ Samalitan yitsə̌ a pə́ ńtə́ ńdaŋə̂ ńdzə́ənə yí páʼə a noŋnə̂ nə́ ńkó mələ́ŋ míə.

³⁴ Ńgɛn ḿbáatə yí ńdzɔ́ʼ məghɔ́d pó afǔ nə́ məfəŋ mí ńkwúlə mə́ələ́, ńnáakə yə́ á ndu njakasə əjǐ ńdɔgə̂ yi ńgɛnə̂ á ndɛ̂ pəghɨ ńdɔʼkə̂ yí ə́wɨ́ ńtə́ ḿbyádnə yə́.

³⁵ Mbî ə́ fógə a tə́ ńgɛnə̂ yí ə́fɛ̂ nkéebə atəənə́ ntáʼ pɛ̌ á mbô ngaŋ ndɛ̂ ə́sóŋ nə́ yí ńgə́, ‘Tíʼ ńtə́ ńnáŋə yə́, maŋ yǐ tə́ pəənə̂ ə́ tûə ajúmə atsəm páʼ gho pɨ nə́ ńtsəŋə̂.’ ”

³⁶ “Gho kwaŋ ńgə́ á mə́m pɨ pɨ pɛ́n pə́ teelə́, ngaŋ nəpad ŋwunə ándó pəzə̌ pə́ nə ńgwam nə́ yí lə́ nə ḿbə́ əwə?”

³⁷ Ndzéʼkə pənoŋkə wə̂ a kwěe ńgə́, “Yə ándó a kə kó nə́ mələ́ŋ mí lə̂.” Yeso a sóŋə á mbô yí ńgə́, “Ghɛn ńkə́ ə́faʼə̂ azô ə́lə́ələ́.”

Yeso a Ghéenə Mɛɛlə pó Mata

³⁸ Ndzaŋ Yeso pópə ngaŋə́zoŋə́ndzəm əjí ə́ kə tə́ nə̈ ńnyinə̂ lə́, ńgyǐ ńkwúnə aláʼ yitsə̌, məngyě yitsə̌ pə́ fóŋ nə́ yi nə́ Mata a lɔgə̂ yí əshîʼnə á ndɛ̂ yə́.

³⁹ A kə túgə mɔ́mɛ́ əyǐ yitsə̌ pə́ fóŋə nə́ Mɛɛlə. Mɛɛlə a kə náanə á məko Mmaʼmbî ńtə́ ńjwə́ʼtə anu páʼə ä kə sóŋ nə́.

⁴⁰ Lə́ Mata a pə́ ə́fɛ̂ ntɨ́ əyí nə́ mənu páʼ pə́ nə ńchî nə́ á mə́ ghɛd nə́ ə́ pyáabə yí ə́wə́, ńtíʼ ńgyǐ ə́sóŋə á mbô Yeso ńgə́, “Gho zə́ənə azô lə́ á pɔŋ ndzaŋ Mɔ́mɛ́ mə a mɛdtə̂ nə́ məfaʼ mətsəmə á mbô maŋ lɛ? Sóŋ nə́ yí ńgə́ a yǐ ńkwáalə mə.”

⁴¹ Mmaʼmbîə a kwěe yí ńgə́, “Mata, Mata, gho jwaʼ mbɨ əzo nə́ mənu mimə nɨ́ nə́ lə́ kətaŋə

⁴² Chigə ntəənə anuə á pə́ ḿbə́ lə́ tsɔʼə táʼə. Mɛɛlə a lɔg lə́ zə́ələ́, mbɔʼ pə kě á mbô yí kə́ ńkwá pô.”