Jɛmsə 4 - Əka yi Fîə

Kɔ Wam Əshu Pɨ̌pə Mbîə

¹ Məntso pópə məlaʼə́ tətɨ pɨ mə́ lǒo lə́ əfo? Lə́ kě alublə á chî nə́ mbɨ pɨ ńdɔ əpú ndu mbî pɨ ḿbóʼnə məlaʼ pô.

² Nə́ loonə̂ mə́ túg nə́ ajúmə, lə́ təmbɔʼ nə́ chîə zɨ́d túg pô, nə́ jwítə, nə́ loonə̂ mə́ túg nə́ əpú pɨ pə́ ndaʼ pə́ túg nə́, ńchî túg pô nə̈ fyaʼnə̂ ḿbóʼnə məlaʼə́. Pɨ kě ajú pɨ lɔ nə́ túg lə́ ńté ńgə́ nə́ kě Əsê pítə pô.

³ Lə́ təmbɔʼ nə́ pítə pə́ kě nə́ pɨ fɛ̂ pô ńté ńgə́ nə̈ pítə nə́ akwaŋə təpɔŋə, nə́ pítə əpúmə á mə́ faʼ nə́ mənu páʼ pɨ lublə̂ nə́ nə́ mə́ələ́ á mbɨ pəənə́.

⁴ Ngaŋə́jîəmə̂ghabə! Nə́ kě jî ńgə́ pɨ nə́ ghɛd nə́ əshu pɨ pə́ mbî lə́ ngaŋkə́pa Əsê? Pɨ páʼ pó lɔ nə́ á mə́ ghɛd nə́ əshu pópə mbî lə́ ngaŋkə́pa Əsê.

⁵ Kɔ nə́ kwaŋ ńgə́ Aŋwaʼlə Əsê á tsáb lə́ atséebə kətaŋ ńgə́, “Ajwi páʼ Əsê a néŋ nə́ á mə́m pɛn lə́ á túgə ŋwéetə́.”

⁶ Lə́, apɔŋə́ntɨ́ páʼ Əsê a fɛ̂ nə́ nə́ pɛn lə́ á tsɛɛlə̂ zəənə́. Ndzaŋə aŋwaʼlə Əsê a sóŋ nə́ ńgə́, “Əsê a tsóokə pɨ pó kɔ́ʼkə nə́ mbɨ əzɔb lə́ ḿbə́ fɛ̂ apɔŋə́ntɨ́ nə́ pɨ pó tsóokə nə́ mbɨ əzoobə́.”

⁷ Ńdaŋ ə́lɨ́d tsóokə nə́ mbɨ əzəənə́ á mbi Əsê; kǐ nə́ Satanə, a yǐ kəələ̂ áwə́ənə́.

⁸ Yǐ nə́ ḿbáatə Əsê, a yǐ kə́ yǐ páatə áwə́ənə́, ngaŋə́ghɛlə təpɔŋ! Sog nə́ mbô mə́ənə́, ngaŋmə́fɨg! ghɛd nə́ məntɨ́ mɨ́ mə́ ŋwaʼə̂

⁹ Fɨnə̂ nə́, sɔbnə̂ nə́ ńkə́ ńkyéŋ ḿmɨ́ʼə, kwúblə nə́ nəweŋ əwəənə́ a pə́ nəkyéŋə, ńgɛlə̂ akɔŋtə azə́ənə́ á tíʼə pə́ asɔbnə.

¹⁰ Tsóokə nə́ mbɨ əzəənə́ á mbi Mmaʼmbî ńjî ńgə́ á kɔ́ʼkə áwə́ənə́.

Akwantə Ńté mə́ Tsɔ́ʼtə nə́ Əsáʼ Ndim Əgho

¹¹ Pəlimə́ mə, kɔ pɨ tə́ ńtséebə təpɔŋ ńté pəlim pə́ənə́. Ŋwu páʼ ä tsáb nə́ təpɔŋ ńté ndim kɨ əsáʼ əsáʼ ndim, a tséebə təpɔŋ ńté lə́ noŋkə ńkə́ sáʼ əsáʼ ńté lə́ noŋkə, lə́ təmbɔʼ gho tə́ ə́sáʼ əsáʼ ńté noŋkə, gho kě lə́ ŋwu gho zóʼnə nə́ noŋkə pô, ńtíʼ ḿbə́ lə́ əsáʼməsáʼə.

¹² Lə́ tsɔʼə Əsê ḿbə́ ndaʼ ŋwu páʼ a fɛ̂ nə́ noŋkə ḿbə́ əsáʼməsáʼə. Lə́ tsɔʼə ndaʼ yí təmbɔʼ a chwádkə ńkə́ ńtsəŋkə̂. Gho kwaŋ ńgə́ gho lə́ əwə á mə́ tsɔ́ʼtə nə́ əsáʼ ndim əgho?

Akwantə Ńté mə Kɔ́ʼkə nə́ Mbəəmə

¹³ Nə́ əghâ nə́, jwə́ʼtə á mbô maŋə, pɨ nə́ sóŋ nə́ ńgə́, “Ə́sɛ̂n kəənə ngwɛʼə́ pɛn yǒ ghɛnə̂ á tə́kɔʼ tɔ̂ŋ yitsə̌, páʼ pɛn yǒ nə́ chî ə́wɨ́ táʼ ngoʼ ə́ tə́ táŋə məteenə́ ə́ kə́ túgə ape yə nɨ́ nə́.”

¹⁴ Pɨ kě jî ndzaŋ páʼ nchîmbî əzɨ yǒ nə́ chîə á ngwɛʼə́ pô! Nchîmbî əzɨ ə́ chî lə́ ándó akə̂? Ə́ chî lə́ ándó mɔ́ alə́m páʼ á kɔ́ʼ nə́ ḿbɨ́ ḿbéŋ tsɔʼə əghâ yi wə́.

¹⁵ Anu təmbɔʼ pɨ sóŋ lə́ ńgə́, “Təmbɔʼ á pə́ akwaŋə́nuə Mmaʼmbî tə ḿbə́ pɛn yǐ chî ə́wɨ́ tə ə́faʼə̂ anu zɨ kəənə jǐə.”

¹⁶ Lə́ nə́ pə́ əghâ nə́, pɨ tə́ ńtəələ̂ ńkə́ ńkɔ́ʼkə mbəəmə; ntê akɔ́ʼkə mbɨ yi wɨ́ ə́ kě pɔŋ pô.

¹⁷ Lə́ələ́ á pə́ ńgə́ ŋwu páʼ a jî nə́ anu yə əshîʼnə páʼ a pěʼ nə́ ńchîə á mə́ faʼ nə́ ḿbə́ ńkě zɨ́d faʼ pô, a ghɛlə̂ təpɔŋə.