Jɛmsə 3 - Əka yi Fîə

Lɔg nə́ Ndɛd nə́ Alə́əmə

¹ Pəlimə́ mə! Á kě pɔŋ ńgə́ pɨ pipə nɨ́ nə́ á mə́m pɨ pó náŋə á mə́ pə́ nə́ pəzéʼkə pô, ńté ńgə́ nə́ jî ńgə́ pəgə́ ándó pəg pə́ nə́ pəzéʼkə lə́, pə́ yǒ tə́ tsɔ́ʼtə əsáʼ əwə́g lə́ ə́ pyádnə lɔg ndɛd ə́wɨ́ tsɛɛlə̂ yi ŋwu ntsəmə.

² Ńté ńgə́ pɛn pətsəm ghɛd əfankəmə́nu pi nɨ́ nə́, təmbɔʼ ŋwunə a chîə afankə yitsə̈ ghɛlə̂ nə́ atséebə ají pô, tə ḿbə́ lə́ ŋwu páʼ a koʼnə̂ nə́ ńgɛn ə́fyagə̂, ńkə́ ńchî təmbɔʼ a wam mbɨ əjǐ nə́ ndú ətsəmə.

³ Pɛ̈n néŋə atəənə́ a ntso ləəmə́ lə́ ńgə́ a zóʼnə áwɛ̂nə, pɛn kə́ ńchî təmbɔʼ pɛn ghɛd a ghɛn ndú ətsəm pɛn kɔŋ nə́.

⁴ Kwaŋ nə́ ndzaŋ páʼ apáŋə́nkǐə a fáŋ nə́ ńchîə, chigə tə́kɔʼ sə́mə ä chǐə ázə́ələ́ á mə́m nkǐə, pə̈ lɔgə̂ lə́ tsɔʼə mɔ́ luda ə́ sɛdkə̂ atûə ají ə́wə́, zə́ələ́ á tíʼə̈ ńgɛn ndú ətsəm páʼ ŋwunə a soŋ nə́ á lɔ nə́ ńgə́ a ghɛn ə́wə́.

⁵ Lə́ tsɔʼə ə́lɨ́d ndzaŋ alə́əmə á pǎ nə́ tə ḿbə́ mɔ́ kə́nyaŋə́ alamə́ a mbɨ lə́, ḿbə́ ńtəələ̂ nə́ pətə́kɔʼ pə́ mənuə; kwaŋ nə́ ndzaŋ páʼ mɔ́ alə́əmə móg lyǎ ä tɔ nə́ á mɛ́ akoobə́!

⁶ Alə́əmə chî lə́ ándó mógə́, lə́ aliʼ təpɔŋə á lwɛ́nkə nə́ ə́wə́ á mə́m əlam mbɨ əpɛ́nə, ńtíʼə ńgeebə̂ təpɔŋ wə́ á mə́m mbɨ əzɛn ntsəmə. Ä tɔ nchîmbî əzɛn ntsəm ə́fɛ́lə nəchwaakənə́ tə ńgɛn ḿməg, nə́ móg páʼ ə́ fɛ́d nə́ lə́ á mə́m móg Satanə.

⁷ Ŋwu məsɔŋə́ a jîə á mə́ tsóokə nə́ ntɨ́ məneemə, ńkə́ ńtsóokə ntɨ́ məna mimə nɨ́ nə́ Əsê kə tsoŋkə̂ nə́, məna mimə akɔb pópə pəsə́ŋ ḿbá mbô mənó ntsəm pópə məshûə;

⁸ Lə́ ŋwu mbîə á pə́ ńkě chî təmbɔʼ a lɔg ndɛd nə́ alɨ́ pô. Alə́əmə á túgə təpɔŋə, ńkě chî təmbɔʼ pə́ ghɛd zə́ələ́ zóʼnə pô, ḿbɨ ńtúg ndíʼ təpɔŋ tə ńdúnə.

⁹ Pɛn lɔgə̂ lə́ alɨ̈ ŋ́ŋáŋkə Mmaʼmbî əwɛ̂n ə́wə́, á pə́ nə́ Tǎ, ńkə̈ ńdɔgə̂ zɨ́d ə́fóŋ ndɔ ə́wə́ á mbɨ pɨ pə́ ghɛd nə́ ághɔ́b pó fî Əsê.

¹⁰ Atsáb páʼ á ŋáŋkə nə́ Əsê pópə yi páʼ á fóŋ nə́ ndoonə á mbɨ pɨ ä ə́fɛ́lə lə́ tsɔʼə nə́ táʼ ntsoolə. Pəlimə́ mə, kɔ á pə́ ə́lə́ələ́.

¹¹ Təmbɔʼ nkǐ yi féŋtə nə́ pó yi tsə́g nə́ ə́fɛ́lə á mə́m táʼ nələ́g nə́ nkǐə?

¹² Pəlimə́ mə! Təmbɔʼ atǐə figə á kě mənta mə́ olifə zə́m pô, kɨ təmbɔʼ atǐə glebə á kě mənta mə́ fig zə́m pô? Kɨ təmbɔʼ nələ́g nə́ nkǐ yi nə́ tsə́g nə́ ə́ fɛ̂ nkǐ yi féŋtə nə́?

Ajíənuə á Lǒo nə́ Nəpóolə

¹³ Ŋwu tsə̌ a chîə tətɨ pɨ páʼ a túg nə́ ayáŋ, atûə yə́ á kə́ ńtsɔ́ʼnə? A chîə á mə́ nɨd nə́ zɨ lə́ nə́ nchîmbî yi əshîʼnə pó ngɛdmə́nu yi əshîʼnə páʼ a faʼ nə́ nə́ atsóokə́mbɨ pó ayáŋə.

¹⁴ Lə́ təmbɔʼ gho túgə ŋwéetə́, ńkə̈ náŋə tsɔʼə ńgə́ ape pə́ azô, ńtúgə achánə pópə əkeelə́ á mə́m ntɨ́ gho, kɔ tə́ ńkɔ́ʼkə mbɨ əzo ńtíʼə ńtsɨ́d ntsɨd nə́ anu páʼ á pə́ nə́ ndə̌ŋdəŋə́.

¹⁵ Mbô ajíənu zɨ ə́ kě lə́ á nəpó lǒo ńtsó pô, lə́ yə́ mbîə, Ajwiə á kě ə́wɨ́ chî pô, á lǒo lə́ á pə́ á mbô dɛbəələ.

¹⁶ Aliʼə́ atsəm páʼ ŋwéetə́ á chî nə́ ə́wɨ́ pópə ndzaŋ ŋwunə a náŋ nə́ tsɔʼə ape ají, ajwaʼlə pópə ntê təpɔŋ ntsəm ə́ kə́ ńchî ə́wə́.

¹⁷ Lə́ ajíənu páʼ ä lǒo nə́ á nəpó á pěʼ ḿbeg ŋ́ŋwaʼə̂ (ńkě ndɔtí túg pô), á túg mbwɔ́dnə, ńtúgə atsóokə́mbəəmə, ńkɔŋ əghəənə, ńdwɛ́nkə nə́ akóolə́mə́lə́ŋ ńkə́ ńdzə́mə mənta mə́ atǐ mimə əshîʼnə. Ńkě atóŋə́mbî pó məfɨg túg pô.

¹⁸ Mə tɨ́ nə́ ndə̌ŋdəŋ lə́ mənta mə́ atǐ ngaŋə́kwɛlə̂ mbwɔ́dnə ə́ pǐ nə́ nə́ mbwɔ́dnə.