2 Kɔlintyanə 4 - Əka yi Fîə

Afoʼə Ajwiə á Mə́m Məkəŋ mə́ Atsaʼə́

¹ Á pə́ ńgə́ ndzaŋə ándó pɛn chî nə́ á mə́mə afaʼ zɨ ńdaŋə̂ á pə́ á mə́m akóolə́mə́lə́ŋə Əsê lə́, mbô mɛ́n mə́ kě yǐ pwɔ́dkə pô.

² Pɛn kǐə áwɛ̂n mənu mə́ əsə́ənə ándó páʼ pə́ faʼ nə́ nəlyaŋnə́ ńkə́ ńkǐə áwɛ̂nə á mə́ píʼkə nə́ mənu kɨ kə́ ńkwúblə atséebə Əsê. Ńdaŋ ndzaŋ pɛn tsáb nə́ ndə̌ŋdəŋə́ a əshîsaŋ pɛn ghɛd ńgə́ nchîmbî əzɛ̂nə á mbi Əsê ə́ chî nə́ ndú mbɔʼ pɨ pə́ jɨ́ ńgə́ ntɨ́ əwɛ̂n ə́ ŋwaʼə̂.

³ Mbɔʼ nkɨ yi əshîʼnə wə́ pɛn náŋkə nə́ lə́ ə́ pə́ yi kə́bkə nə́, pə́ kə́bkə lə́ tsɔʼə á mbô pəənə́ ándó pó tə́ nə́ ḿbéŋə.

⁴ Pó kě ntɨ́ nə́ Əsê néŋ lə́ ńté ńgə́ əsê ndu mbî zɨ ə́ fwɔn məntɨ́ móobə́ á mə́m ndzəmə, á mə́ ghɛd nə́ ńgə́ kɔ pó zɨ́ nkyaʼ nkɨ yi əshîʼnə páʼ wɨ̈d nɨd nə́ nəgháʼ Klisto, yí páʼ a pə́ nə́ ajubə Əsê.

⁵ Ńté ńgə́ pəg kě náŋkə lə́ anu ńté mbɨ əzəg pô. Pəg náŋkə lə́ ńgə́ Yeso Klisto lə́ Mmaʼmbîə, Pəg pə́ ḿbə́ əpoʼ pɨ ńté atûə Yeso.

⁶ Əsê páʼ a kə́ sóŋ nə́ ńgə́, “Á mə́m ndzəmə nkyaʼ yǒ kɛ́lə!” Lə́ tsɔʼə Əsê yi wɨ́ páʼ a kə ghɛd nə́ nkyaʼ əjí kɛ́lə á mə́m məntɨ́ pɛnə̂, á mə́ yǐ nə́ nə́ ajîə nəgháʼ Əsê á mbô pɛnə̂, páʼ zə́ələ́ ä kɛ́d nə a əshî Klisto.

⁷ Lə́ pɛn páʼ pɛn túg nə́ afoʼə ajwi zɨ pɛn chî lə́ tsɔʼə ándó pə́pə̌ atsaʼə́ nəkəŋə́. Á mə́ nɨd nə́ ńgə́ mɛ́ tə́kɔʼ mətəənə á chî lə́ á mbô əsê, lə́ kě əwɛ̂n pô.

⁸ Pɛn zá ńtúgə məngə́ʼə, lə́ mə́ pə́ ńkě áwɛ̂n kwéʼnə ńjíʼ pô, əghâ tsə́ məntɨ́ mɛ́n mə́ koʼlə̂, lə́ pəg pə́ ńkě tsɔ́ʼ mbô mə́g ḿmyaʼə̂ afaʼ pô.

⁹ Ngaŋkə́pa yi nɨ́ nə́ ə́ chî ə́wə́, lə́ pə̂gpə ńkě láʼ ńchî tə əshu pô, əghâ tsə̌ pə́ ghɛd ndě əwə́g pyádnə ńdzáŋə, lə́ pó pə́ ńkě áwə́g tsəŋkə̂ pô.

¹⁰ Nə́ əghâ ətsəm pɛn twáamə á nəwû Yeso á mə́m məmbɨ mɛ́n páʼ mə́ pə́ nə́ yí kwûə. Ńjî ńgə́ mbɔʼ pə́ kə́ ńjɨ́ nchîmbî əjǐ á mə́m mbɨ pɛnə̂.

¹¹ Á mə́m nchîmbî əzɛ̂n pɛn tə́əmə lə́ á ntso nəwû əghâ ntsəm ńté atûə Yeso. Ńjî ńgə́ mbɔʼ pə́ zɨ́ nchîmbî əjíə á mə́m mbɨ əzɛn yi ə̈ kwû nə́ zəənə́.

¹² Zəənə́ á nəələ̂ lə́ ńgə́ pəg chîə ntso nəwûə, nchîmbî pə́ ńchîə á mə́m pəənə́.

¹³ Aŋwaʼlə əsê a sóŋ ńgə́, “Maŋ kə tsáb lə́ ńté ńgə́ maŋ néŋ ntə́əmə mə nə́ Əsê.” Tsɔʼə nə́ táʼə Ajwiə á mə́m táʼ mbimə́ pəg kə́ ńtsáb ńté ńgə́ pəg néŋ ntɨ́ əwə́g nə́ yə́.

¹⁴ Pɛn jî ńgə́ Əsê páʼ a kə júmkə nə́ a Mmaʼmbî Yeso ə́fɛ̂ nchîmbî nə́ yí, a yǐ kə́ júmkə áwə́g pə̂gpə Yeso ə́ lɔgə̂ áwə́g ə́ zoŋ pegə̂ áwɨ́ ə́wɨ́ pɛn ghɛn ńchîə á nəpɛnə́ yə́.

¹⁵ Mənu mɨ mətsəm mə́ chî ńté lə́ atûə azə́ənə́, ńjî ńgə́ ndzaŋə ándó apɔŋə́ntə́əmə Əsê a ghɛn nə́ á mbô pɨ pipə nɨ́ nə́ lə́, pó yǐ ghɛn nə́ mbiə á mə́ ghɛd nə́ əchaʼtə́sê ndǎmbôsê, á mə́ ghɛd nə́ Əsê a túgə nəgháʼə.

Pɛn Chîə Mbî Ńté lə́ Mbimə́

¹⁶ Lɛ̌ anu páʼ a ghɛd nə́ mbô mɛn mə́ kě póolə lə́, na mbɨ əzɛn pǎtə ńkwûə ńgɛnə̂ lə́, ajwiə azɛ̂nə á pə́ ńtə́ ə́sɛlə̂ yə fî əlě ətsəmə.

¹⁷ Mɔ́ kə́nyaŋ ngə́ʼ ghɛn pɛn zɨ́ nə́ nə́ akəmə ndɛd zɨ lə́ a yǐ fɛ̂ mɛ́ tə́kɔʼ nəgháʼ yətsə́ á mbô pɛn páʼ a yǐ nə́ kě měe po, wə́ələ́ a yǐ pyádnə gháʼ tsɛ ngə́ʼ yi wə́.

¹⁸ Ńté ńgə́ pɛn kě əmə́g mɛ́n tə́g lə́ nə́ mənu páʼ pə́ tə́ nə́ ńdzə́ənə mɨ́d pô, pɛn tə́g əmə́g mɛn lə́ nə́ mənu páʼ pə́ kě nə́ mɨ́d tə́ ńdzə́ənə pô. Anu páʼ pə́ zɨ́ nə́ ä chîə lə́ tsɔʼə nə́ mɔ́ akəmə ndɛlə́, lə́ anu páʼ pə́ kě nə́ zə́ənə pô a yǐ chî mɛdnə̂.