2 Kɔlintyanə 13 - Əka yi Fîə

Ndwigtə Akwantə pó Ndwigtə Achaʼtə

¹ Lɛ̌ lə́ ngǎ teelə́ páʼ maŋ yǐ nə́ á mə́ ghá nə́ áwə́ənə́. “Anuə atsəm pə́ tə́ nə́ ńgwaamə̂ a ŋwu ńgə́ a ghɛd, pɨ pə́ pɛ̌ kɨ pə́ teelə́ pó shib ńchî ə́wɨ́ ḿbí ńgə́ pó nə ńjɨ́ ńgə́ lə́ ndə̌ŋdəŋə́,” ndzaŋə ándó aŋwaʼlə Əsê á sóŋ nə.

² Maŋ kə kwantə̂ pəənə ándó pó kə ghɛd nə́ təpɔŋə a ntsɛɛmbi ńdzoŋ ḿbéenə ŋwu ntsəmə; Maŋ pɛ́lə ńkwantə̂ ághɔ́b əghâ nə́ páʼ maŋ kě nə́ pə̌gpo chî pô lə́. Maŋ kə sóŋ ə́lɨ́d nə ndɛd maŋ kə pɨ nə́ ńgyǐəə á ngǎ yǐ ndzəmə á mbô pəənə́. Lə́, maŋ yǐ pɨ kə́ sóŋə ázɨ́d əghâ nə́ páʼ maŋ kě nə́ pɛn chî pô. Ndzaŋ maŋ yǐ nə́ pɨ yǐ lə́, ŋwu tsə̌ a kě atsáŋ yǐ kə pô.

³ Ndzaŋ nə́ lɔ nə́ á mə́ jɨ́ nə́ akyeʼə́nu páʼ a nɨd nə́ ńgə́ Yeso a nə ńtsáb ńdaŋə̂ á mə́m maŋ lə́, nə́ yǐ zə́ənə zə́ələ́. Yeso kě kɨʼə̂ á mə́ faʼ nə́ anu yitsə̌ á mbô pɨ pô, a pɨ ńtúgə á pə́ mətəənə á mə́ faʼ nə́ á mə́m pəənə́.

⁴ A nə ńkɨʼə̂ əghâ ándó pə́ kə̈ kwumtə̂ nə́ yə́ á atǐə apagləpaglə, lə́ ḿbə́ ńchîə á mbî ńdaŋə̂ á mə́m mətɨ mə́ Əsê. Ndzaŋə ándó pə̌gpo pə́ nə́ táʼ lə́ pəg kə́ ńkɨʼə̂, ndzaŋə ándó pəg jînə nə́ pɛn lə́, pɛn yǒ chîə á mbî pɛ̌npə Klisto ə́laŋə̂ á mə́m mətɨ mə́ Əsê.

⁵ Chaʼ nə́ məmbɨ mə́ənə́ á mə́ zɨ́ nə́ ńgə́ pɨ tɨ́ ńtyantə̂ nə́ mbimə́ əzəənə́? Nə́ kě jî ńgə́ Yeso Klisto a chîə á mə́m pɨ? Təmbɔʼ nə́ chî jí pô, lə́ á pə́ ńgə́ nə́ wǔəə akwaʼlə zə̂!

⁶ Maŋ túgə akwaŋ ńtə́ ḿbyáabə ńgə́ pɨ jî ńgə́ pəg kě akwaʼlə wǔ pô.

⁷ Pəg chaʼtə́sê ńgə́ kɔ nə́ yǒ ńgɛlə̂ anuə təpɔŋ yətsə́, ńkě loonə̂ á pə́ mə́ nɨd nə́ ńgə́ pəg koʼnə̂ tə́shú pô, ńté á pə́ ńgə́ pəg loonə̂ lə́ ńgə́ nə́ faʼə̂ pə́ anuə á koʼnə̂ nə́, páʼ pəg pǎ nə́ tə ńchî azə́gə́ á pə́ ándó pəg wǔəə akwaʼlə lə́.

⁸ Ńté ńgə́ pəg kě mənü ghɛlə̂ páʼ mə́ kě nə́ ndə̌ŋdəŋ pô, pəg ghɛlə̂ lə́ mənu páʼ mə́ pə́ nə́ ndə̌ŋdəŋə́.

⁹ Pəg kɔŋtə̂ əghâ ándó pəg kɨʼ nə́ pɨ pə́ ńtyantə̂. Lɛ̌ anu pəg chaʼtə̂ nə́ Əsê ə́wə́, ńgə́ nə koʼnə̂ ńgɛn ə́fyagə̂.

¹⁰ Lə́ ghɛd ə́lɨ́d maŋ ŋwaʼlə̂ mənu məənə́ á mbô pɨ əghâ ándó maŋ kě nə́ aliʼ yə ə́wɨ́ chî pô, ńjî ńgə́ əghâ maŋ yǐ nə́ ńgyǐ kɔ maŋ lɔg mətəənə ándó Mmaʼmbîə a fɛ̂ nə́ nə́ maŋ ńtsə́gə áwɨ́ əwɨ́ tə́shúnə́. Ńté ńgə́ mətɨ mɨ mə́ chî lə́ á mə́ kwíŋkə nə́ áwə́ənə́, mə́ kě chî lə́ á mə́ shamkə̂ nə́ áwɨ́ pô.

¹¹ Pəlimə́ mə, nə́ pə́ əghâ nə́ mbǒ nə́ əzəənə́! Náŋ nə́ ndú ətsəmə á mə́ koʼnə̂ ghɛn fyagə̂; Jwə́ʼtə nə́ məntəgə́ mə; pímnə nə́ á mə́m pəənə́, chî nə́ nə́ mbwɔ́dnə, ńjî ńgə́ Əsê páʼ ə́ túg nə́ akɔŋnə pópə mbwɔ́dnə ə́ yǐ ńchîə a tətɨ pəənə́.

¹² Chaʼtə̂ nə́ məmbɨ mɨ̈ ńchwegə̂ ŋwu ntsəm nə́ akɔŋnə pɔ́ pə́ Yeso. Pɨ pə́ Əsê pətsəm pó túmə achaʼtə á mbô pəənə́.

¹³ Ńgə́ apɔŋə́ntə́əmə Mmaʼmbî Yeso Klisto, pó akɔŋnə Əsê nə́ Ajwǐəsê páʼ ä kyeetə̂ nə́ áwɛ̂n a chîə á mə́m pɨ pətsəmə.