Online Bible

1 Jɔnə 5 - Əka yi Fîə

Pɛn Tsɛ Mbîə

¹ Ŋwu ntsəm páʼ a pí nə́ ńgə́ Yeso lə́ Yi Ńtsəʼ nə́ Wə̂, yí lə́ mɔ́ Əsê, Ŋwu ntsəmə ándó a kɔŋ nə́ Tǎ a kə́ ńkɔŋə̂ mɔ́ əyǐə.

² Lɛ̌ ndzaŋ pɛn yǐ nə́ jî ńgə́ pɛn kɔŋ pɔ́ pə́ Əsê; lə́ mə kɔŋ nə́ Əsê ə́ kə́ zóʼnə məntəgə́ míə.

³ Ńté ńgə́ mə́ nɨd nə́ ńgə́ pɛn kɔŋ Əsê lə́ mə zóʼnə nə́ məntəgə́ míə. Məntəgə́ mí mə́ kě kə́ ńtyantə̂ tə́shú ńtsɛɛlə̂ áwɛ̂n pô,

⁴ ńté ńgə́ mɔ́ Əsê ntsəmə a chî təmbɔʼ a tsɛ mbîə. Pɛn yǐ tsɛ mbî ə́laŋ lə́ á mə́m mbimə́ əzɛnə̂.

⁵ Təmbɔʼ əwə a tsɛ mbîə? Lə́ tsɔʼə ŋwunə a pí nə́ ńgə́ Yeso lə́ Mɔ́ Əsê.

Pɨ Pó kə Zɨ́ nə́ Yeso Klisto Ńkə́ Ḿbímə

⁶ Yeso Klisto lə́ ŋwunə a nə ńgyǐ nə́ nə́ nkǐə akwáalə́nkǐ əyí pópə achǐə nəwûə ajíə. A kə kě yǐ lə́ tsɔʼə nə́ nkǐ pô, a kə yǐ lə́ nə́ nkǐ pópə achǐə. Ajwi nə́ nkɔ̌ʼmbɨ yí, a zɨ́ ńkə́ ḿbí ńgə́ lə́ ndə̌ŋdəŋə́, ńté ńgə́ Ajwi lə́ ndə̌ŋdəŋə́.

⁷ Lə́ chî pɨ pɛ́n teelə́ pó zɨ́ nə́ ńkə́ ḿbí ńgə́ lə́ ndə̌ŋdəŋə́.

⁸ Lə́ Ajwi nə nkǐ ḿbɨ ḿbə́ nə́ Achǐə; pó pɛ́n teelə́ kə́ ḿbímnə.

⁹ Pɛn pímə anu pɨ pó sóŋ nə́ ńgə́ pó nə ńdzɨ́ ńkə́ ḿbí ńgə́ lə́ ndə̌ŋdəŋə́, lə́, anu Əsê a zɨ́ nə́ ńkə́ ḿbí ńgə́ lə́ ndə̌ŋdəŋ á chígə́ ńtyantə̂, lɛ̌ kə́ ḿbə́ anu Əsê a zɨ́ nə́ ńkə́ ḿbí ńgə́ lə́ ndə̌ŋdəŋ ńté Mɔ́ əyǐə.

¹⁰ Lə́ələ́ á pə́ ńgə́ ŋwu ntsəm páʼ a néŋ nə́ ntɨ́ nə́ Mɔ́ Əsê a kə́ ḿbí ńgə́ lə́ ndə̌ŋdəŋə́, lə́ ŋwu ntsəm páʼ a kě nə́ néŋ ntɨ́ nə́ anu páʼ Əsê a sóŋ nə́ pô, a lɔg Əsê lə́ ándó ngaŋntsəələ, ńté ńgə́ a kě anu páʼ Əsê a sóŋ nə́ ńté Mɔ́ əyǐ pí pô.

¹¹ Anu pə́ kə zɨ́ nə́ ńkə́ ḿbí ńgə́ lə́ ndə̌ŋdəŋ lə́ ńgə́; Əsê a fɛ̂ nchîmbî páʼ ə́ mɛdnə̂ nə́ ngǎ mɔʼə́ á mbô pɛnə̂, nchîmbî zɨ́d zɨ ə́ chîə á mbô Mɔ́ əyǐə.

¹² Ŋwu ntsəm páʼ a túg nə́ Mɔ́ a túg nchîmbî zɨ́d zəənə́, ŋwu ntsəm páʼ a kě nə́ Mɔ́ Əsê túg pô a kě nchîmbî túg pô.

Nchîmbî Páʼ ə́ Mɛdnə̂ nə́ Ngǎ Mɔʼə́

¹³ Maŋ ŋwaʼlə̂ aŋwaʼlə zəənə́ á mbô pɨ lə́ ńjî ńgə́ pɨ jî ńgə́ pɨ túg nchîmbî páʼ ə́ mɛdnə̂ nə́ ngǎ mɔʼə́, pɨ páʼ pɨ néŋ nə́ ntɨ́ nə́ əlɛ́n Mɔ́ Əsê.

¹⁴ Pɛn pyádnə ḿbî Əsê lə́ ńté ńgə́ pɛn jî ńgə́ ä zóʼə anuə atsəm páʼ pɛ̈n pítə nə́ yí nə́ zɨ́d, páʼ mbɔʼ pɛn pítə ńdzoŋ ndzaŋ a lɔ nə́.

¹⁵ A zóʼə áwɛ̂n əghâ ətsəm páʼ pɛn pítə nə́ yə́; ndzaŋ pɛn jî nə́ ńgə́ zɨ lə́ ndə̌ŋdəŋə́ lə́, pɛn kə́ ńjî ńgə́ a fɛ̂ ajúmə atsəm pɛn pítə nə́ á mbô yə́.

¹⁶ Təmbɔʼ ŋwunə a zɨ́ mɔ́mɛ́ əyǐə a tə́ ńgɛlə̂ təpɔŋ páʼ təmbɔʼ wɨ́d wə́ á kě nə́ nəwû yǐ, a chaʼtə́sê á mbô Əsê páʼ a yǐ nə́ fɛ̂ nchîmbî nə́ yə́. Zəənə́ á ghɛnə̂ lə́ á mbô pɨ páʼ təpɔŋ əghoobə́ á kě nə́ chîə á mə́ ghɛd nə́ pó kwû pô. Lə́ təpɔŋ yitsə̌ á chî ə́wɨ́ páʼ a yǐ nə́ nə́ nəwûə, maŋ kě sóŋə lə́ ńgə́ nə́ chaʼtə́sê ńté ntê təpɔŋ zɨ́d zə́ pô.

¹⁷ Afankə́nuə atsəm lə́ təpɔŋə, lə́ təpɔŋə á chî əwɨ́ páʼ á kě nə́ nəwû yǐəə pô.

¹⁸ Pɛn jî ńgə́ mɔ́ Əsê a kě chîə á mə́ tə́ nə́ ghɛnə̂ nə́ mbiə á mə́ ghɛd nə́ təpɔŋ pô, ńté ńgə́ Mɔ́ Əsê a tə́ ńkɨ́ʼtə yí, ńdaŋ ə́lɨ́d təmbɔʼ Yí wə́ a pə́ nə́ Ngɛdtəpɔŋ lə́ a kě anu yətsə́ nə́ yí ghɛd pô.

¹⁹ Pɛn jî ńgə́ pɛn chî lə́ á mbô Əsê, páʼ pɛn pǎ nə́ tə ńjî ńgə́ Yi wə́ a pə́ nə́ Ngɛdtəpɔŋ lə́ a chîə nətû nə́ mbî ntsəm lə.

²⁰ Pɛn jî ńgə́ Mɔ́ Əsê a nə ńgyǐ ńgɛd atûə azɛ̂nə á léenə, ńjî ńgə́ pɛn jî Əsê ə́ pə́ nə́ ndə̌ŋdəŋə́. Pɛn chîə mbî lə́ á mə́m Əsê páʼə a pə́ nə́ ndə̌ŋdəŋə́ ńkə́ ńchî lə́ á mə́m mɔ́ əyǐ Yeso Klisto. Lɛ̌ ndə̌ŋdəŋ Əsê, lɛ̌ kə́ ḿbə́ nchîmbî ə́ mɛdnə̂ nə́ ngǎ mɔʼə́.

²¹ Póonə mə, lə́ʼ nə́ wɨ́ məsê mə́ məfɨgə.

2018

Následuj nás:

Sponzorované odkazy

Reklamy