1 Jɔnə 4 - Əka yi Fîə

Ndə̌ŋdəŋə́ Ajwi pó Ajwiə Məfɨgə

¹ Pəshunə́ mə maŋ kɔŋ nə́, kɔ nə́ néŋ ntɨ́ əwɨ́ nə́ ŋwu ntsəm páʼə ä sóŋ nə́ ńgə́ a túgə Ajwiə, lə́, jwə́ʼ nə́ ághóobə́ á mə́ jî nə́ ńgə́ ajwi pó túg nə́ lə́ a lǒo lə́ á mbô Əsê. Ńté ńgə́ məntúmə́sê mə́ məfɨgə mimə nɨ́ nə́ mə́ fɛ́d ńchîə apeŋ ndú ətsəmə.

² Lɛ̌ ndzaŋ pɨ yǐ nə́ ghɛd pɔŋə̂ jî ńgə́ Ajwi lə́ yə Əsê kɨ lə́ kě yə Əsê pô, ŋwu ntsəm páʼ a pí nə́ ńgə́ Yeso Klisto a kə yǐəə á mə́m na mbɨ, Ajwi páʼ a túg nə́ á lǒo lə́ á mbô Əsê.

³ Ajwiə atsəm á kě nə́ Yeso kə́ ḿbí pô, á kě lǒo lə́ á mbô Əsê pô, á lǒo lə́ mbô Ngaŋkəpa Klisto, pɨ nə ńdzóʼ ńgə́ zə́ələ́ á yǐ yǐəə, á pɛn ḿbɛ́d tə́ chîə á mə́m mbî əghâ nə́.

⁴ Lə́ nə́ póonə mə, pɨ chî lə́ á mbô Əsê, ńkə́ ḿbɛ́d tə ńtsɛ məntúmə́sê mə́ məfɨgə, ńté ńgə́ Ajwi páʼ á chî nə́ á mə́m pɨ á tyantə̂ ńtsɛɛlə̂ ajwi páʼ á chî nə́ á mə́m pɨ pə́ mbîə.

⁵ Məntúmə́sê mə́ məfɨg mɨ lə́ pɨ pə́ mbîə, ńtséebə ńté lə́ mənu mə́ mbîə, mbî ə́ kə́ ńjwə́ʼtə atséebə azóobə́.

⁶ Lə́ pɛn chî lə́ á mbô Əsê, ŋwu ntsəmə a jî nə́ Əsê a zóʼə á mbô pəgə́; ŋwu ntsəmə ándó a kě nə́ á mbô Əsê chî pô, a kě á mbô pəg kə́ ńdzóʼə pô. Lə́ ndzaŋ təmbɔʼ pɛn jîə ajwiə ndə̌ŋdəŋ pó yi páʼ á kě nə́ ndə̌ŋdəŋ pô.

Əsê lə́ Akɔŋnə

⁷ Pəshunə́ mə maŋ kɔŋ nə́, pɛn kɔŋ məmbɨ mɛ́n ńté ńgə́ akɔŋnə a lǒo lə́ á mbô Əsê. Ŋwu ntsəm páʼ a kɔŋ nə́ pɨ lə́ mɔ́ Əsê, ńkə́ ńjî Əsê.

⁸ Ŋwu páʼ a kě nə́ pɨ kɔŋ pô a kě Əsê jî pô, ńté ńgə́ Əsê lə́ akɔŋnə.

⁹ Lɛ̌ ndzaŋ Əsê a nɨd nə́ akɔŋnə ajíə á mbô pɛnə̂, a nə ńtú ndaʼ mɔ́ əyǐə á mə́m mbî ńjî ńgə́ təmbɔʼ pɛn túg nchîmbî ńdaŋ nə́ yə́.

¹⁰ Lɛ̌ lə́ ajú páʼ akɔŋnə á pə́ nə́ zə́ələ́: lə́ kě á pə́ ńgə́ pɛn kɔŋ Əsê pô, lə́ ńté ńgə́ a nə ńkɔŋə̂ áwɛ̂n ńtíʼ ńtúmə Mɔ́ əyǐə ándó ajúmə afyaʼə́nu pə́ kə laŋ nə́ ə́wɨ́ ńdəgnə̂ pətəpɔŋ pɛnə̂.

¹¹ Pəshunə́ mə maŋ kɔŋ nə́, təmbɔʼ lɛ̌ pə́ ndzaŋ Əsê a kɔŋ nə́ áwɛ̂n, lə́ á pə́ ńgə́ pɛn chîə á mə́ kɔŋ nə́ məmbɨ mɛ́nə.

¹² Ŋwu tsə̌ a kě Əsê kə láʼə zə́ənə pô; təmbɔʼ pɛn kɔŋ məmbɨ mɛ́n, Əsê a chîə á mə́m pɛn, akɔŋnə ajíə á kə́ ŋwaʼ ńgɛn ə́fyagə̂ á mə́m pɛnə̂.

¹³ Lɛ̌ ndzaŋ pɛn jî nə́ ńgə́ pɛn chîə á mə́m Əsê a kə́ ńchîə á mə́m pɛnə̂; a fɛ̂ Ajwiə ajíə á mbô pɛnə̂.

¹⁴ Lə́ pɛn zɨ́ ńkə́ fiʼtə̂ pətsə́ pɨ ńgə́ Tǎ a nə ńtúmə Mɔ́ əyǐ ńgə́ a yǐ ḿbə́ Nchwádkə mbîə.

¹⁵ Ŋwu ntsəm páʼ a sóŋ nə́ ńgə́ Yeso lə́ Mɔ́ Əsê, Əsê a chî pó yə́, a kə́ ńchî pó Əsê.

¹⁶ Pɛn nə́ nkɔ̌ʼmbɨ əwɛ̂n ə́ jî ńkə́ ḿbí mbô akɔŋnə páʼ Əsê a túg nə́ á mbô pɛnə̂. Əsê lə́ akɔŋnə, lə́ ŋwu ntsəm páʼ a chî nə́ á mə́mə akɔŋnə a chî lə́ á mə́m Əsê, Əsê a kə́ ńchîə á mə́m yə́.

¹⁷ Pə́ ghɛd akɔŋnə á koʼnə̂ ńgɛn ə́fyagə̂ á mə́m pɛn ńjî ńgə́ pɛn yǒ ńtúg ntə́əmə á Alě Asáʼə́məsáʼə, pɛn yǒ túgə zɨ́d ńté ńgə́ nchîmbî əzɛnə̂ á ndu mbî ghɛn ə́ chî lə́ ándó yi Klisto.

¹⁸ Apɔ́g yətsə́ á kě á mə́mə akɔŋnə chî pô; akɔŋnə páʼ á koʼnə̂ ńgɛn ə́fyag ä kəmə̂ apɔ́gə. Lə́ á pə́ ńgə́ akɔŋnə á kë koʼnə̂ ńgɛnə̂ ə́fyagə̂ á mbô ŋwu páʼ a túg nə́ apɔ́g pô, ńté ńgə́ ŋwunə apɔ́gə lə́ ngə́ʼə.

¹⁹ Pɛ̈n kɔŋə̂ lə́ ńté ńgə́ Əsê a nə ḿbeg ńkɔŋə̂ áwɛ̂nə.

²⁰ Təmbɔʼ ŋwu tsə̌ a sóŋ ńgə́, “Maŋ kɔŋ Əsê,” lə́ ḿbə́ ḿbeenə̂ ndim əyǐ, a pə́ lə́ ngaŋntsəələ. Lə́ pə́ ńgə́ təmbɔʼ a chîə ndim əyǐ páʼ a tə́ nə́ ńdzə́ənə kɔŋ pô, a pə́ ńtíʼ ńkɔŋ Əsê páʼ a kě nə́ tə́ ńdzə́ənə lə́ ə́lɛ́.

²¹ Lɛ̌ tíʼ ntəgə́ páʼ Klisto ä fɛ̂ nə́ nə́ pɛnə̂; ŋwu ntsəm páʼ a kɔŋ nə́ Əsê a chîə mə́ shib nə́ ə́ kɔŋə̂ á ndim əyǐə.