1 Jɔnə 2 - Əka yi Fîə

Klisto lə́ Nkwá Əwɛnə̂

¹ Póonə mə, maŋ ŋwaʼlə̂ aŋwaʼlə zəənə́ á mbô pɨ lə́ ńgə́ kɔ nə́ ghɛlə̂ təpɔŋə. Lə́ mbɔʼ ŋwu tsə̌ ghɛlə̂ təpɔŋ, tə ḿbə́ pɛn túgə ŋwunə ä póʼ nə́ mbô á mbô Tǎ ńté áwɛ̂nə, lə́ Yeso Klisto, yí páʼə a tɨ́ nə́ ndə̌ŋdəŋ lə́.

² Pə́ laŋ lə́ á mə́m Yeso ńdəgnə̂ pətəpɔŋ pɛnə̂, lə́ kě tsɔʼə pətəpɔŋ pɛn pô, lə́ pipə́ ŋwu ntsəmə.

³ Təmbɔʼ pɛn zóʼnə məntəgə́ mə́ Əsê, á pyádnə nɨd ńgə́ pɛn jîə yə́.

⁴ Mbɔʼ ŋwu tsə̌ a sóŋ ńgə́, “Maŋ jîə yí” ḿbə́ ńchî məntəgə́ mí tə́ zoŋə̂ pô, mbô ŋwu zə́ lə́ ngaŋntsəələ, ndə̌ŋdəŋ yitsə̌ á kě mə́m yí chî pô.

⁵ Lə́ ŋwu ntsəmə ándó a zóʼnə nə́ atséebə ají, lə́ ŋwunə ándó a kɔŋ nə́ Əsê ńgɛn ə́fyagə̂. Lɛ̌ anuə á yǐ nə́ nɨd ńgə́ pɛn chîə á mə́m Əsê:

⁶ Ŋwu ntsəmə a sóŋ nə́ ńgə́ a chîə á mə́m Əsê, nchîmbî əjǐ chîə mə́ chî nə́ ándó yi Yeso Klisto.

Ntəgə́ yi Fîə

⁷ Pəshunə́ mə maŋ kɔŋ nə́, ntəgə́ zɨ maŋ ŋwaʼlə̂ nə́ á mbô pɨ lə́ kě yi fî pô, lə́ yi ndɛnə. Lə́ yi páʼ pɨ kə túg nə́ ə́fɛ́lə á nəchwaakənə́ lə́. Ntəgə́ zɨ yi ndɛn lə́ nkɨ pɨ kə pɛ́d nə́ tə ńdzóʼə.

⁸ Lə́, ntəgə́ maŋ ŋwaʼlə̂ nə́ á mbô pɨ lə́ yi fîə, páʼ pə̈ zɨ́ nə́ ndə̌ŋdəŋ əyǐ lə́ á mə́m Klisto, ńkə́ ńdzə́ənə á mə́m pəənə́, ńté ńgə́ ndzəmə zə́ tə́ ńdaŋə̂ yə́, chigə nkyaʼə á pɛ́d ńtə́ ńkɛ́lə.

⁹ Ŋwu ntsəmə a sóŋ nə́ ńgə́ a chîə á mə́m nkyaʼ mbɨ ḿbeenə̂ ndim əyǐ, a pɛ́d lə́ á mə́m ndzəmə́ tə ńkoʼ əghâ nə́.

¹⁰ Ŋwu ntsəm páʼ a kɔŋ nə́ ndim əyǐ a chîə mə́m nkyaʼə, ńdaŋ ə́lɨ́d ajûtsə́ á kě chîə á mə́m yí mbɔʼ á ghɛd a ghɛlə̂ təpɔŋ pô.

¹¹ Lə́ ŋwu páʼ a pa nə́ ndim əyǐ a chîə mə́m ndzəmə́, a nyinə̂ lə́ á mə́m wə́, tə ńkě jîə aliʼə́ a ghɛn nə wɨ́ pô, ńté ńgə́ ndzəmə́ zə́ ə́ ghɛd əmə́g mí mə́ fəgə̂.

¹² Póonə mə, maŋ ŋwaʼlə̂ á mbô pɨ ńté ńgə́ pə́ ləgnə̂ pətəpɔŋ pɨ́ ńté əlɛ́n Klisto.

¹³ Pətǎ, maŋ ŋwaʼlə̂ á mbô pɨ ńté ńgə́, pɨ jîə yí páʼ a kə chî nə́ ə́wɨ́ ə́fɛ́lə nəchwaakənə́ lə́. Nkaŋ ŋwu, maŋ ŋwaʼlə̂ á mbô pɨ ńté ńgə́ pɨ tsɛɛlə̂ Ngɛdtəpɔŋ wə́.

¹⁴ Póonə mə, maŋ ŋwaʼlə̂ á mbô pɨ ńté ńgə́ pɨ jîə Tǎ. Pətǎ, maŋ ŋwaʼlə̂ á mbô pɨ ńté ńgə́ pɨ jǐə yí páʼ a kə chî nə́ ə́wɨ́ ə́fɛ́lə nəchwaakənə́. Nkaŋ ŋwu, maŋ ŋwaʼlə̂ á mbô pɨ ńté ńgə́ pɨ tyantə̂, atséebə Əsê á chîə á mə́m pəənə́, pɨ tsɛɛlə̂ Ngɛdtəpɔŋ wə́.

¹⁵ Kɔ nə́ kɔŋ mbîə, kɨ ńkɔŋə̂ ajûtsə́ á pə́ nə́ yə mbîə. Mbɔʼ gho kɔŋ mbî, tə ḿbə́ gho kě akɔŋnə ńté Tǎ túg pô.

¹⁶ Ajúmə atsəmə á pə́ nə́ yə mbîə, mənuə ándó na mbɨ ə́ lwaʼ nə̈ ə́wɨ́, əpú pɨ pə̈ zɨ́ nə́ ńkə́ ńdoonə̂, ḿbɨ ḿbə́ nə ajúmə atsəmə á ndu mbî ghɛn páʼ pɨ pə̈ tɨd nə ńté. Anu zɨ yitsə̌ a kě lə́ á mbô Tǎ fɛ́d pô, pɨ́d ətsəm fɛ́d lə́ á mə́m mbîə.

¹⁷ Mbî pópə ajúmə atsəm a chî nə́ á mə́m wɨ́ pɨ pó lɔ nə́, ə́ laŋə̂ lə́ laŋ nə́; ŋwunə a pə́ nə̈ ə́faʼə̂ anu páʼ Əsê á lɔ nə́ a yǐ chîə á mbî tə mɛdnə̂.

Ngaŋkəpa Klisto

¹⁸ Póonə mə, ndwigtə ə́ páatə! Pə́ kə fiʼtə̂ wɨ́ ńgə́ ngaŋkəpa Klisto a yǐ yǐəə. Nə́ pə əghâ nə́ ngaŋkə́pa Klisto yi nɨ́ nə́ pɛn ḿbɛ́dtə ńgyǐəə. Lɛ̌ anuə a nɨd nə́ ńgə́ ndwigtə ə́ páatə lə́.

¹⁹ Pɨ pɨ pó kə kě pyádnə ḿbə́ lə́ pɨ pə́ nkyeetə əzɛ̂n pô. Lə́ ghɛd ə́lɨ́d pó kə mɛdtə̂ áwɛ̂n lə̂. Mbɔʼ pó kə pyádnə ḿbə́ pɨ pə́ nkyeetə əzɛ̂n, tə ḿbə́ pó kə mɛdnə̂ pɛn po. Lə́ po pə́ mɛdtə̂ áwɛ̂n ńjî ńgə́ á ŋwaʼə̂ á əshîsaŋ ńgə́ ŋwu əghɔb yitsə̌ a kə kě pyádnə ḿbə́ lə́ ŋwu nkyeetə əwɛ̂n pô.

²⁰ Lə́, nə́ pə́ ńtúgə Ajwǐəsê páʼ Klisto a kwɛd nə́ á ndu pəənə́, ńdaŋ ə́lɨ́d pɨ pətsəm jîə ndə̌ŋdəŋə́.

²¹ Maŋ ŋwaʼlə̂ aŋwaʼlə zəənə́ á mbô pɨ ńkě ŋwaʼlə̂ ńté lə́ ńgə́ pɨ kě ndə̌ŋdəŋ jî po, maŋ ŋwaʼlə̂ ńté lə́ pə́ ńgə́ pɨ jîə ndə̌ŋdəŋə́. Pɨ kə́ ńjî ńgə́ ntsɨd yitsə̌ kě mə́m ndə̌ŋdəŋ chî pô.

²² Lə́ əwə a pə́ nə́ ngaŋntsɨd yi wə́? Lə́ yí wə́ ä sóŋ nə́ ńgə́ Yeso kě lə́ Yi Ńtsəʼ Nə́ wə́ pô. Ntê ŋwu zə́ lə́ Ngaŋkəpa Klisto. Yi páʼə a kǐ nə́ Tǎ ńkə́ nkǐə Móonə.

²³ Ńté ńgə́ ŋwu ntsəmə a kǐ nə́ Móonə a kə́ ńkǐə Tǎ, ŋwunə ándó a kə́ nə́ ḿbímə Mɔ́, a kə́ ńtúgə Tǎ.

²⁴ Jɨ́ nə́ ńgə́ nkɨ ətsəm pɨ kə zóʼ nə́ ə́fɛ́lə nəchwaakənə́ nə́ lɔʼkə̂ áwə́ələ́ á ntɨ́ pəənə́. Mbɔʼ nə́ lɔʼkə̂ nkɨ wə́, nə jî ńgə́ pɨ yǐ chîə nəkaʼ əghâ ətsəm pɨ pə́ Mɔ́, ńdzoŋ ḿbéenə Tǎ.

²⁵ Lɛ̌ ajú Klisto nə́ nkɔ̌ʼmbɨ əyí a kə laʼnə̂ nə́ ńgə́ á yǐ fɛ̂ nə́ pɛnə̂, á pə́ nə́ nchîmbî páʼ ə́ mɛdnə̂ nə́ ngǎ mɔʼə́.

²⁶ Maŋ ŋwaʼlə̂ zəənə́ á mbô pɨ ńté lə́ pəənə ándó pó lɔ nə́ á mə́ fɨg nə́ áwə́ənə́.

²⁷ Lə́ ńgɛn nə́ pɨ, Klisto a pɛ́dtə ńkwɛlə̂ ajwiə ajíə á ndu pəənə́. Ndzaŋə Ajwiə ajíə a kə́ nə́ ńchî tsɔʼə á mə́m pɨ lə́, ŋwu tsə̌ a kě pɨ ńchî mbɔʼ á zéʼkə wɨ́ pô. Ńté ńgə́ Ajwiə ajíə zéʼkə wɨ́ nə́ anuə atsəmə, mənu a zéʼkə nə́ lə́ ndə̌ŋdəŋə́, ńkě ntsɨd pô. Zóʼnə nə́ ndzeʼkə́ Ajwi ńjî ńgə́ nə mɛdnə̂ a nəkaʼ pɨ̌pə Klisto.

²⁸ Lə́ lə́ələ́ á ḿbə́ póonə mə, mɛdnə̂ nə́ á nəkaʼ pɨ pó ńjî ńgə́ məntɨ́ mə́g mə́ yǐ ńtyantə̂ əghâ páʼ a yǐ nə́ ńgyǐəə, ńkɔ tíʼə ńdyáŋ mbɨ əzəənə́ á mbô yə́ á mə́m əsɨ́ Alě á yǒ nə́ yǐəə.

²⁹ Nə́ jî ńgə́ Klisto a tɨ́ ndə̌ŋdəŋə́; nə́ chîə á mə́ jî nə́ ńgə́ ŋwu ntsəm páʼ ä faʼ nə́ anu páʼ á koʼnə̂ nə́ lə́ mɔ́ Əsê.