1 Kɔlintyanə 9 - Əka yi Fîə

Mənu mə́ pə́ nə́ Aliʼə́nuə Ntú Yeso á mə́ Faʼ nə́ pó

¹ Maŋ kě lə́ ŋwunə ngǎ maŋ pô? Maŋ kě lə́ ntú Yeso Klisto pô? Maŋ nə ńkě Yeso páʼ a pə́ nə́ Mmaʼmbî əwɛn lə́ jɨ́? Pɨ kě lə́ apô afaʼə mə ńdaŋə̂ á mbô Mmaʼmbî pô?

² Təmbɔʼ maŋ pěʼ ńchî pə́ ntú Yeso á mbô pɨ pətsə́ pô, tə ḿbə́ maŋ lə́ wə́ələ́ á mbô pəənə́! Ńté ńgə́ pɨ lə́ akyeʼə́nuə á mə́ nɨd nə́ ńgə́ maŋ lə́ ntú Yeso Klisto.

³ Əghâ ándó pɨ pə́ tə́ nə́ ə́sóŋə ńgə́ maŋ faʼə̂ anuə təkoʼ lə́, maŋ kwá mbəəmə mə ńgə́:

⁴ Lə́ kě aliʼə́nuə mə ńgə́ pə́ fɛ̂ məjî pópə məloʼ nə́ maŋ ńté afaʼə mə pô?

⁵ Lə́ kě aliʼə́ azə́gə́ á mə́ túg nə́ pəngyě páʼ pó pí nə́ nə́ Yeso pəg pö nyinə̂ ándó mətsə́ məntú mə́ Yeso mə̈ ghɛd nə́, ńdzoŋ ḿbá pɔ́pə́mɛ́ pə́ Mmaʼmbî ḿbéenə Pita?

⁶ Kɨ nə́ kwaŋ ńgə́ lə́ tsɔʼə pəg Banabasə páʼ pəg yí chî nə́ á mə́ faʼ nə́ pɔŋə̂ jîə ajú?

⁷ Wə́ənə́ ḿmaʼ ntsoolə ä tû mbɨ əjǐə a ngǎ yə́? Lə́ əwə ŋwu páʼ təmbɔʼ a pǐə akoobə́ mətǐ mə́ məloʼ ḿbə́ ńkě chî təmbɔʼ a kyɛ̂ nəta nə́ atǐ ə́wɨ́ ńjîə? Lə́ əwə ŋwu páʼ a tseŋnə̂ nə́ məna ḿbə́ ńkě chî təmbɔʼ a nô mə́lég pô?

⁸ Nə́ kwaŋ ńgə́ mäŋ sóŋə jɨ lə́ nə akwaŋə́nuə ŋwu mbî? Noŋkə a kě lə́ tsɔʼə ə́lɨ́d sóŋə?

⁹ Ńté ńgə́ pə́ ŋwaʼlə̂ á mə́m pənoŋkə pə́ Mosisə ńgə́, “kɔ kwúd ntso na əghâ páʼ gho tə́ nə́ ńdɔgə̂ ájɨ́d ə́ kəblə̂ ngəsáŋ ə́wə́.” Əsê a pěʼ ńchígə́ ńtséebə atsáb jɨ lɛ̌ ńté lə́ məna?

¹⁰ A nə ńkě chígə́ ńtséebə ə́lɨ́d ńté lə́ áwɛ̂n? A nə̈ ńtséebə ńté lə́ áwɛ̂n ńté ńgə́ ŋwu ntsəm páʼ ä líʼ nə́ alíʼə a líʼə lə́ ńtə́ ḿbyáabə ńgə́ a yǐ foʼ məmí məjîə. Ŋwu ntsəm páʼ a kə́ nə́ ńkəblə̂ ngəsáŋə́ a kəblə̂ lə́ ńtə́ ḿbyáb əyǐ ngəsáŋə́

¹¹ Pəg pǐə atséebə Əsê á mə́m pəənə́, nə́ kwaŋ ńgə́ a yǐ pə́ anu yə əshîʼnə mbɔʼ nə́ zə́mə áwə́g nə́ məjî?

¹² Mbɔʼ á pə́ aliʼə́nuə pɨ pətsə́ a mə́ kwá nə́ əpúmə á mbô pɨ, tə ḿbə́ lə́ kě kə́ ḿbə́ aliʼə́nuə azə́gə́ á mə́ kwá nə́ əpúmə á mbô pɨ tə ńtsɛɛlə̂ pə́ ághɔ́b? Lə́ pəg nə ḿbɛn ńkě aliʼə́nuə azə́g zɨ nə́ anu néŋ pô. Pəg nə mbɛn ḿbɨ ńgwaamə̂ pə́ ntə́əmə á mə́mə anuə atsəm ńté ńgə́ pəg nə ńtə́ ḿbɔ́gə á mə́ pə nə́ kɨ́ʼ nə́ nkɨ yi əshîʼnə ghɛn ńté Yeso Klisto.

¹³ Nə kě jî ńgə́ pɨ páʼ pö faʼ nə́ á Tə́kɔʼndɛ̂sê, məjî mɔ́b mə́ fɛ́lə lə́ ə́wɨ́, pɨ pó kə́ nə́ ə́faʼə̂ á nəpá pó kə́ ńjîə lə́ əpúmə afyaʼə́sê?

¹⁴ Ńdaŋ ə́lɨ́d, Əsê a sóŋ ńgə́ pɨ pö sóŋ nə́ anǔəsê, məjî mɔ́b mə́ fɛ́lə lə́ á mə́mə anǔəsê.

¹⁵ Lə́ maŋ nə ḿbɛn ńkě aliʼə́nu jɨ lɛ̌ yətsə́ nə́ anu néŋ pô, kɨ ńkě kə́ ŋ́ŋwaʼlə̂ lə́ nə́ akwaŋ ńgə́ mbɔʼ pɨ pěʼ ə́fɛ̂ əpú pɨ nə́ maŋ pô. Mbɔŋə ə́lɨ́d maŋ kwûə, ńdaŋ ndzaŋ mbɔʼ ŋwunə a kwáalə pə́ aliʼə́nuə mə maŋ tɨd nə́ nə́ zə́ələ́.

¹⁶ Ńté ńgə́ mbɔʼ maŋ sóŋə anu ńté nkɨ Əsê, lə́ kě pə́ aliʼə́nuə mə ńgə́ maŋ tə́ ńkɔ́ʼkə mbɨ pô, Lə́ anu páʼ maŋ chî nə́ á mə́ shib nə́ faʼə̂. Ndɔ ə́ tə́əmə atû maŋ páʼ mbɔʼ maŋ chî nkɨ Əsê ghɛn ə́ tə́ náŋkə pô.

¹⁷ Təmbɔʼ maŋ pěʼ ńkɔŋ lə́ ngǎ maŋ á mə́ faʼ nə́ afaʼ zɨ, tə ḿbə́ maŋ pěʼ ńtúg ntsɔ́ʼəfaʼə. Lə́ maŋ pɛn ə́faʼə̂ ńkě faʼə̂ lə́ ándó maŋ kɔŋ nə́ pô, ńté ńgə́ lə́ afaʼə Əsê páʼ a fɛ̂ nə́ á mbô maŋə.

¹⁸ Ntsɔ́ʼə afaʼə mə tíʼ ḿbə́ lə́ akə̂? lə́ tsɔʼə əsa páʼ maŋ túg nə́ á mə́ tə́ nə́ náŋkə nkɨ yi əshîʼnə ghɛnə́ á mbô pɨ, tə pítə ntsɔ́ʼəfaʼə, ńkě kə́ ə́sóŋə ńgə́ lə́ aliʼə́nuə mə mbɔʼ pó pěʼ ńtûə mə pô.

¹⁹ Maŋ pǎtə ḿbə́ ŋwunə a ngǎ maŋ lə́, ḿbə́ ńdɔg mbəəmə mə ńgɛlə̂ apoʼ ə́wə́ á mbô ŋwu ntsəmə, á mə́ soŋtə̂ nə́ ŋwu ntsəmə a yǐəə á mbô Yeso.

²⁰ Əghâ ándó maŋ tə́ nə́ ə́faʼə̂ pə́g Pəjus lə́, maŋ chîə ándó ŋwu Jusə, ńjî ńgə́ maŋ soŋə̂ ághɔ́b ńgyǐəə á mbô Yeso Klisto, lə́ maŋ nə́ nkɔ̌ʼmbəəmə mə maŋ kě á mə́m noŋkə Mosisə chî pô, lə́ ḿbə́ ńchî pə̂gpə pɨ pó zoŋ nə́ noŋkə Mosisə, maŋ chîə ándó táʼə, á mə́ soŋ nə́ pɨ pipə nɨ́ nə́ pó yǐəə á mbô Yeso Klisto.

²¹ Tsɔʼə nə́ ndú wɨ́d wə́, təmbɔʼ maŋ chî pə̂gpə pɨ páʼ pó kě nə́ noŋkə Mosisə zoŋə̂ pô, maŋ kə́ ńchîə á mə́m pó ándó ŋwunə a kě nə́ noŋkə zoŋə̂ pô. Ńjî ńgə́ təmbɔʼ maŋ soŋtə̂ ághɔ́b pó yǐəə á mbô Yeso klisto. Á kě pə́ lə́ ńgə́ maŋ kě noŋkə Əsê tə́ ńdzoŋə̂ pô, maŋ tə́ ḿbyádnə ńdzoŋə̂ noŋkə Yeso klisto.

²² Təmbɔʼ maŋ tég pɨ páʼ mbimə́ əzɔb pwɔ́d nə́ maŋ kə́ ḿbóolə azéemə ándó táʼ ŋwu əghɔb yitsə̌, ńjî ńgə́ təmbɔʼ maŋ soŋtə̂ ághóobə́. Maŋ tíʼ ḿbímə ajúmə atsəmə á mbô ŋwu ntsəmə, ńjî ńgə́ mbɔʼ á tíʼ ḿbə́ pə́ ə́lɛ́ maŋ chwádkə ághɔ́b pətsə́.

²³ Mäŋ ghɛd ndɛn mənu ghɛn ətsəm lə́ ńté lə́ nkɨ yi əshîʼnə ńjî ńgə́ mbɔʼ maŋ yǐ ńkə́ ńtúgə afoʼə ajíə.

²⁴ Nə́ kě jî ńgə́ təmbɔʼ pə́ tə́ ńkə ndə̌, ŋwu ntsəmə a mɨtə̂, lə́ pə́ ńkwá tsɔʼə táʼ ŋwu ńkwá ntsɔ́ʼəfaʼə. Lə́ələ́ pə́ ńgə́ kə ndə̌ pə́ nə́ ndú páʼ gho yǐ nə́ kwá ntsɔ́ʼəfaʼə.

²⁵ Ŋwu ntsəm páʼ a tə́ nə́ ńdzéʼə á mə́ kə nə́ ndə̌ a mɛdkə̂ mbɨ əjǐ ńgə́ mbɔʼ a zɨ́ ndzaŋ ngə́ʼ ntsəmə. Ŋwunə a ghɛlə̂ ə́lɨ́d lə́ ńté ńgə́ a loonə̂ lə́ á mə́ kə nə́ ə́ kwá ntsɔ́ʼəfaʼ, páʼ jɨ́d yǐ nə́ kě mɛdnə̂ pô; lə́ pɛn pə́ ńkəələ̂ azɛ̂n lə́ á mə́ kwá nə́ ntsɔ́ʼəfaʼ páʼ jɨ́d yǐ nə́ mɛdnə̂.

²⁶ Lə́ ghɛd ə́lɨ́d maŋ kě akəkógə́ ndə̌ kəələ̂ pô, maŋ kə́ ńchî lə́ ándó ḿbóʼnə məlaʼ páʼ a kě nə́ ngag əjǐ kətaŋ maʼə̂ pô.

²⁷ Lə́ maŋ nuʼ mbəəmə mə á mə́ ghɛd nə́ jɨ́d ə́ tyantə̂, ńjî ńgə́ kɔ maŋ yǒ ńtə́ ə́sóŋə anǔəsê pə́ pɨ ə́fógə mə á mə́m əwɨ́ tə əgha lɛ nəfoonə.