1 Kɔlintyanə 8 - Əka yi Fîə

Apítə Ńté Məjî pə̈ Fɛ̂ nə́ á Mbô Məsê mə́ Məfɨgə

¹ Nə́ əghâ nə́, maŋ yǐ sóŋə anu ə́ té məjî páʼ pə̈ fɛ̂ nə́ á mbô məsê mə́ məfɨgə. Pəg jî tsɔʼə əshîʼnə nə́ ńgə́, “Pɛn pətsəm túgə ajíənu,” ándó pə́ sóŋ nə́ lə́. Lə́ mbô ajíənu zə́ ə́ pə́ ńgɛlə̂ ŋwunə a kɔ́ʼkə lə́ pə́ mbɨ əjǐə, páʼ akɔŋnə a ghɛd nə́ a kwíŋə lə́ kwíŋ nə́.

² Ŋwu páʼ a kwaŋ nə́ ńgə́ yə́ jîə anu yətsə́, a kě chígə́ ńjî ndzaŋ páʼ a pěʼ nə́ ńchîə á mə́ jî nə́ pô.

³ Lə́ ŋwu páʼ a kɔŋ nə́ Əsê, Əsê jîə yə́.

⁴ Ńgɛn nə́ anuə ajíəmə́jî páʼ pə́ fɛ̂ nə́ nə́ məsê mə́ məfɨg: pɛn jî ńgə́, “Əsê məfɨg lə́ ajú páʼ á kě nə́ á mbî chî pô,” ńkə́ ńjî ńgə́, Lə́ chî tsɔʼə táʼ Əsê á mə́m mbîə.

⁵ Mbɔʼ pə́ pěʼ ə́sóŋ ńgə́ pɨ pə́ fóŋ nə́ nə́ məsê lə́ pó chî wɨ́ kəənə nəpó pó ndəsê, “məsê mə́ məfɨgə” mimə wɨ́ pó “pəmaʼ pə́ mbî” pó pǎtə ńchî wɨ́ lɛ ti lə́,

⁶ lə́ á mbô pɛn lə́ pə́ ńchî tsɔʼə táʼ Əsê, Tǎ, páʼ a tsoŋkə̂ nə́ ajúmə atsəmə, pɛn kə́ ńchîə á mbî ńté lə́ yə́, lə́ kə́ ńchî tsɔʼə táʼ Mmaʼmbîə, Yeso klisto, páʼ pə́ nə́ ńdaŋ nə́ lə́ á ndzəm yí ńtsoŋkə̂ ajúmə atsəmə, pɛn kə́ ńchîə á mbî ńté lə́ yə́.

⁷ Lə́ kě ŋwu ntsəm jî ńjîə anu zɨ pô. Pɨ pətsə́ pó chî ə́wɨ́ páʼ pó nə kwéʼnə nə́ ńchîə á mə́mə anuə məsê mə́ məfɨgə tə́shú tə ńkoʼ əghâ nə́ mbɔʼ pó jî mbô məjî yi wɨ́, pó pɛ́lə ńkwaŋə̂ ńgə́ məjî mimə wɨ́ lə́ məjî pə́ fɛ̂ nə́ nə́ məsê mə́ məfɨgə. Ńté ńgə́ məntɨ́ mɔ́b mə́ kě tyantə̂ pô, pó tíʼ ńkwaŋ ńgə́ lə́ təpɔŋ pó ghɛd nə́, ntɨ́ əghɔ́b ə́ tíʼə ńjwaʼə̂ ághóobə́.

⁸ Məjî mə́ kě yǐ ghɛd ńgə́ pɛn pə́ pɨ pipə əshîʼnə á mbô Əsê pô, pɛn yǒ kě ajûtsə́ péŋ páʼ təmbɔʼ pɛn chî məjî jî pô, ə́ kě kə́ kwáalə áwɛ̂n nə́ ajûtsə́ páʼ təmbɔʼ pɛn jî məjî pô.

⁹ Ndzaŋ nə́ kwaŋ nə́ ńgə́ mbɔʼ nə́ jîə ajúmə atsəm páʼ nə́ kɔŋ nə́ lə́, nə lɔg ndɛd ńgə́ kɔ zə́ələ́ ghɛd ŋwu páʼ ntɨ́ əyí kě nə́ tyantə̂ a ghɛlə̂ təpɔŋə.

¹⁰ Lɔg ńgə́ ŋwu páʼ ntɨ́ əyí kě nə́ á mə́m mbô mənu zɨ tyantə̂ pô, a zəənə́ gho páʼ pə́ sóŋ nə́ ńgə́ gho túgə “ajíənu” gho tə́ ńjîə məjî aliʼə́ fyaʼə̂ məsê mə́ məfɨgə, zəənə́ á kě yǐ kə́ ghɛd ńgə́ a jî məjî páʼ pə́ fɛ̂ nə́ á mbô məsê mə́ məfɨgə?

¹¹ Lə́ələ́ á pə́ ńgə́ ŋwu wə̂ páʼ a túg nə́ ntɨ́ yi pwɔ́d nə́ lə́, lə́ ndim əgho páʼ klisto a nə́ ńkwû nə́ ńté yə́, a yǐ kwû ə́ té “ajíənu” azô!

¹² Təmbɔʼ gho ghɛd ntê təpɔŋ zəənə́ á mbɨ ndim əgho, gho ghɛd lə́ təpɔŋə á mbô Klisto ńté ńgə́ gho tsəŋ ntɨ́ ndim əgho páʼ a pwɔ́d nə́.

¹³ Lə́ələ́ á pə́ ńgə́ mbɔʼ məjî mə́ pə́ ajú páʼ a ghɛd nə́ ndimə́ mə a ghɛlə̂ təpɔŋ, maŋ yǒ ńkě na pɨ ńkɔ́d pô, á mə́ ghɛd nə́ ńgə́ kɔ ndimə́ mə a wǔəə á mə́m təpɔŋə.