1 Kɔlintyanə 5 - Əka yi Fîə

Ndzɔʼə́ tə apímnə á mə́m Nkyeetə Pɔ́ pə́ Əsê

¹ Pə́ tə́ ḿbyádnə ə́sóŋə ńgə́ ndzɔʼə́ tə apímnə ə́ chîə tətɨ pɨ tə ḿbə́gə. Alǒ pɨ pə́ tə jîə anǔəsê á péʼ ńkě á mə́m pó ə́lɨ́d chî pô. Ŋwunə a kwáalə ngwě tǎ əyǐə.

² Nə́ tíʼə ńkɔn ndzɔʼ zəənə́: Pɨ pěʼ ńchî mbɔʼ nə́ fɨnə̂ tə ə́fóg ndzaŋ ŋwu zɨ́d zəənə́ á mə́m nkyeetə zəənə́.

³ Pɛn pǎtə ńkě á əshîsaŋ chî pô lə́, maŋ pə́ ńchîə á mə́m pəənə́ á mə́mə ajwiə, ńkə́ ḿbɛ́dtə ə́sáʼ əsáʼ ŋwu páʼ a nə ńgɛd nə́ anu zɨ́d zɨ tsɔʼə ándó maŋ nə ńchîə aliʼ wɨ́d wə̂.

⁴ Təmbɔʼ nə́ kyeetə̂ nə́ əlɛ́n Mmaʼmbî əwɛ̂n Yeso, maŋ chîə á mə́m pɨ nə́ ajwi, mətɨ mə́ Mmaʼmbî əwɛ̂n Yeso mə́ kə́ ńchîə á mə́m pɛn,

⁵ nə́ fɛ̂ a ŋwu wɨ́d ghɛnə́ á mbô Satan ńjî ńgə́ a tsəŋkə̂ na mbɨ əjǐ, ajwiə ajíə á yǒ ńtíʼ ńchwáalə á alě páʼ Tǎ a yǒ nə́ ńgyǐəə.

⁶ Nə́ kɔn ndzɔʼ lə́ a kě pɔŋ pô. Nə́ jîə aliʼə́ atsáb zɨ ńgə́, “Tsɔʼə mɔ́ mbê apéenə məkálə́ á kwúnə á mə́mə atsɛ̂káŋə apéenə məkálə́ ńgɛlə̂ zə́ələ́ á kɔ́ʼə.”

⁷ Fóg nə́ ndɛn mbê apéenə məkálə́ ghɛnə́ á mə́m pɨ páʼ wə́ələ́ á pə́ nə́ təpɔŋ lə́ ńjî ńgə́ nə́ pyádnə ŋ́ŋwaʼə̂. Ńjî ńgə́ nə́ tíʼ ńchîə ándó atsɛ̂káŋə apéenə məkálə́ yə fî tə mbê yi ndaʼə á mə́m wə́, ndzaŋ maŋ jî nə́ ńgə́ nə́ pyádnə ŋ́ŋwaʼ lə̂. Ńté ńgə́ pə́ fyaʼə́nu nə́ Yeso páʼ a pə́ nə́ mɔ́ mbéŋ ndzɛd akɔŋtə Ndzáʼkə.

⁸ Lə́ələ́ á pə́ ńgə́ pɛn jîə alě mbîə akɔŋtə zəənə́, kɔ pɛn jîə zə́ələ́ á pə́ nə́ apéenə məkálə́ páʼ á túg nə́ ndɛn mbê páʼ wə́ələ́ á pə́ nə́ təpɔŋ pópə ntɨ́ təpɔŋə, pɛn jîə á pə́ apéenə məkálə́ páʼ á kě nə́ mbê túg pô, yi páʼ á túg nə́ ntɨ́ yi ŋwaʼ nə́ pó ndə̌ŋdəŋə́.

⁹ Á mə́mə aŋwaʼlə páʼ maŋ nə ŋ́ŋwaʼlə̂ nə ə́fɛ̂ á mbô pɨ, maŋ nə sóŋə á mə́m ə́wɨ́ ńgə́ kɔ nə tə́ ńtsɛntə̂ pɨ pə́ ngaŋə́jîə mə̂ghabə.

¹⁰ Maŋ nə kě sóŋə lə́ ngaŋə́jîə mə̂ghabə páʼ pó kě nə́ Əsê jî pô kɨ pəkad kɨ pəzə̌ kɨ pɨ pə́ ghóʼkə nə́ pɔ́ pə́ pəkɔ́ pô. Maŋ nə ńkě lə́ ághɔ́b sóŋə pô ńté ńgə́ mbɔʼ gho ghə́ lə́ʼə ághɔ́b gho shib ə́fɛ́lə á gho á mə́m mbî zəənə́.

¹¹ Anu páʼ maŋ nə sóŋ nə́ lə́ nə́ ḿbə́ ńgə́ kɔ pɨ kyeetə̂ pɨ pə́ ŋwu páʼ a fóŋ nə́ mbɨ əjǐ ńgə́ yí lə́ ndim əwɨ ḿbə̈ ńjîə mə̂ghabə, kɨ ngǎŋfóʼndé, kɨ ńgóʼkə pɔ́ pə́ pəkóomə́, kɨ ngaŋmənaŋə́, kəənə apɛ̌ləmə́loʼə, kɨ ndzə̌lə. Kɔ nə́ pěʼ ńkwéʼnə ńjî məjî pɨ pə́ ndzaŋ ŋwu zɨ́d zə̂.

¹² Maŋ kě chîə á mə́ tə́ nə́ sáʼ əsáʼ pɨ páʼ pó kě nə́ á mə́m nkyeetə pɔ́ pə́ Yeso chî pô. Nə́ chîə á mə́ sáʼ nə́ lə́ əsáʼ pɨ páʼ pó chî nə́ á mə́m nkyeetə.

¹³ Əsê a sáʼ nə́ məsáʼ mə́ pɨ páʼ pó chî nə́ apeŋə́. “Fɨ́dkə nə́ ŋwu təpɔŋə á mə́m nkyeetə əzəənə́.”