1 Kɔlintyanə 2 - Əka yi Fîə

Nkɨ Ńté Yeso pə́ nə Ńkwumtə̂ nə́ á Atǐə Apagləpaglə

¹ Pəlimə́ mə, á nə ḿbə́ nə ndɛd maŋ nə ńgyǐ nə́ á mə́ fiʼtə̂ nə́ nkɨ Əsê yi lyáŋ nə́ wə́ á mbô pɨ lə́, maŋ nə ńkě lɔg lə́ pəmɛ́ pə́ atsáb pópə ayáŋə ndu mbî zɨ ńdɔg fiʼtə̂ áwɨ́ ə́wɨ́ pô.

² Ńté ńgə́ maŋ nə ńgɛd ntə́əmə mə á mə́ ləgnə̂ nə́ anuə atsəmə əghâ maŋ kə chî nə́ á mə́m pɨ, ńtíʼə ə́sóŋə lə́ tsɔʼə anu ńté Yeso Klisto, ə́fiʼtə̂ ándó pə́ nə ńkwumtə̂ nə́ yə́ atǐə apagləpaglə.

³ Əghâ ándó maŋ nə ńgyǐ nə́ á mbi pɨ lə́, mbəəmə mə ə́ nə ḿbóolə, maŋ tíʼ ḿbɛ́nkə nə́ apɔ́gə.

⁴ Maŋ nə ńkě ndzeʼkə́ mə pópə nkəənə mə lə́ nə́ atséebə ŋwu mbî páʼ á túg nə́ ayáŋə ndu mbî ə̈fɛ̂ pô. Maŋ nə ńtséebə lə́ nə́ ajîə á kə̈ nɨd nə́ mətɨ mə́ Ajwǐəsê.

⁵ Lə́ pə́ ńgə́ kɔ nə́ túg mbimə́ á pə́ nə́ ayáŋə ŋwu mbîə, nə́ túg mbimə́ á pə́ nə́ mətɨ mə́ Əsê.

Ayáŋə Əsê

⁶ Maŋ náŋkə nkɨ ə́ túg nə́ ayáŋə á mbô pɨ pó kwéŋ nə́ á mə́mə Ajwiə. Lə́ ayáŋ maŋ tsáb nə́ ə́wɨ́ lə́, lə́ kě ayáŋə á mbî zɨ pô, ńkě kə́ ḿbə́ ayáŋə pɨ páʼ pó túg nə́ mətəənə á mə́ sáʼ nə́ mbî zɨ pô ńté ńgə́ lə́ pəənə ándó mətɨ mɔ́b mə́ yǐ nə́ měe.

⁷ Ayáŋ páʼ maŋ tsáb nə́ ńté lə́ ayáŋə Əsê yə nəlyaŋnə́ ándó pə́ lyáŋ nə́ zə́ələ́ á mbô pɨ pə́ mbîə, Əsê á kə pɛ́dtə ńdɔʼkə̂ ayáŋ zəənə́ mə́ fɛ̂ nə́ nəgháʼ wə́ á mbô pɛn záʼ pə́ pɔŋə̂ yǒ tsoŋkə̂ mbîə.

⁸ Ŋwu tsə̌ páʼ ä sáʼ nə́ mbî zɨ a nə ńkě ayáŋə Əsê zɨ jî pô. Təmbɔʼ pó nə ńjî, tə ḿbə́ pó nə ńkě Mmaʼmbî əwɛ̂n páʼ a túg nə́ nəgháʼ lə́ atǐə apagləpaglə kwumtə̂ pô.

⁹ Lə́ ndzaŋə ándó aŋwaʼlə Əsê a nə sóŋ nə́ ńgə́, “Anu páʼ ŋwunə a nə ńkě nə́ zɨ́ kɨ ńdzóʼ, ḿbɨ́ ḿbə́ nə́ anu páʼ ŋwunə a nə ńkě nə́ kwaŋ ńgə́ təmbɔʼ á láʼ ńdɔgə̂ aliʼ pô, lə́ tsɔʼə zɨ́d páʼ Əsê a tsoŋkə̂ nə́ á mbô pɨ pə́ kɔŋ nə́ yə́.”

¹⁰ Lə́ nə ḿbə́ pɛnə̂ ándó Əsê a nə ńgɛd nə́ ńgə́ pɛn jîə anuə nəlyaŋnə́ ajíə, ńdzoŋə̂ á ndzəmə Ajwiə ajíə. Lə́ Ajwi zə́ páʼ á náŋ nə́ anuə atsəm əshîʼnə, tə ḿbá mənu páʼ Əsê a lyáŋ nə́ á mə́mə akwaŋə ajíə.

¹¹ Lə́, nə́ ŋwu mbî, lə́ ajíə ajwi páʼ á chî nə́ á mə́m yí ándó páʼ á jî nə́ anuə atsəm ńté yə́, tsɔʼə nə́ ndú yi wɨ́, lə́ kə́ ḿbə́ tsɔʼə Ajwi páʼə pə́ nə́ yə Əsê a jî nə́ anuə atsəm ńté Əsê.

¹² Pɛn kě ajwiə mbî zɨ kə́ kwáalə pô, pɛn kwá lə́ Ajwi páʼ Əsê a tú nə́, ńjî ńgə́ pɛn jîə ajúmə atsəmə ándó Əsê a fɛ̂ nə́ á mbô pɛnə̂.

¹³ Ńdaŋ ə́lɨ́d, pə̈g kě tséebə lə́ mənu páʼ lə́ zéʼkə nə́ ayáŋə ŋwu mbî ńdzéʼkə áwɛ̂n ə́wɨ́ pô, lə́ pəg tséebə lə́ mənu páʼ lə́ zéʼkə nə́ Ajwi ńdzéʼkə áwɛ̂n ə́wə́, ńtíʼə ńtyáatə mənu mə́ ajwi páʼ mə́ pə́ nə́ ndə̌ŋdəŋə́ á mbô pɨ pó túg nə́ Ajwiə.

¹⁴ Lə́ ŋwunə ándó a kě nə́ Ajwi túg pô təmbɔʼ a kě kə́ ńtúg əpú páʼ Ajwǐəsê fɛ̂ nə́ pô. Atûə yə́ kě wɨ́ tsɔ́ʼnə pô, á chîə á mbô yí lə́ ándó əkəkóg mənu ńté ńgə́ lə́ tsɔʼə ŋwu páʼə a túg nə Ajwi páʼ a jî nə́ ndzaŋ mənu mə́ Ajwi mə́ pə́ nə́.

¹⁵ Ŋwu páʼ a túg nə́ Ajwiə, a chî təmbɔʼ a jî ndzaŋə anuə atsəmə chî nə́, lə́ ŋwu tsə̌ a pə́ ńkě ə́wɨ́ chî təmbɔʼ a sáʼ əsáʼ əyí pô.

¹⁶ Ndzaŋ páʼ aŋwaʼlə Əsê a sóŋ nə́ ńgə́, “Lə́ jî əwə ńjîə anuə ándó á chî nə́ á ntɨ́ Mmaʼmbîə? Əwə a chî təmbɔʼ á tə́gtə yə́?” Lə́ nə́ pəg, pəg jîə akwaŋə Klisto.