1 Kɔlintyanə 12 - Əka yi Fîə

Məfɛ̂nə mə́ Ajwǐəsê

¹ Əghâ nə́ nə́ pəlimə́ mə, ńdzoŋ mənu pɨ nə ŋ́ŋwaʼlə̂ nə́ ńté məfɛ̂nə mə́ Ajwǐəsê lə́, maŋ loonə̂ ńgə́ pɨ jîə á ndə̌ŋdəŋ ńtə́ mə́ələ́.

² Nə́ jî ńgə́ əghâ páʼ pɨ nə ḿbɛ́d nə́ tə́ jîə Yeso lə́, pə fɨgə̂ áwɨ́ pɨ ghɛnə̂ ńgóʼkə məsê mə́ məfɨg páʼ lə́ əkwû məsê.

³ Maŋ pə́ ńdoonə̂ ńgə́ nə́ jî ńgə́ ŋwu ntsəm páʼ a túg nə́ Ajwǐəsê, təmbɔʼ a kě sóŋ ńgə́, “Ndɔ ə́ chîə atû Yeso pô!” təmbɔʼ ŋwu tsə̌ a kě kə́ ə́sóŋ ńgə́, “Yeso lə́ Mmaʼmbî,” tə ńdéʼtə Ajwǐəsê a chîə á mə́m yə́.

⁴ Əghâ nə́ məfɛ̂nə mə́ Ajwǐəsê mə́ chî lə́ ntê ńtê, lə́ ḿbə́ ńdǒo lə́ á mbô táʼə Ajwiə.

⁵ Məfaʼ mə́ chî lə́ ntê ńtê, lə́ pə́ pə̂ faʼə̂ lə́ á mbô táʼ Mmaʼmbîə.

⁶ Məndú pə̈ faʼ nə́ məfaʼ ə́wɨ́ mə́ chî lə́ á ntê ńtê, lə́ pə́ ḿbə́ tsɔʼə táʼ Əsê páʼ ä fɛ̂ nə́ ndú ńgə́ ŋwu ntsəmə a faʼə̂ anu təmbɔʼ a faʼə̂.

⁷ Ajwiə ä nəələ̂ mətɨ mə́ Əsê ńdaŋə̂ á mə́m táʼ táʼ ŋwunə á mə́ kwá nə́ ŋwu ntsəmə.

⁸ Ajwǐəsê a ghɛlə̂ ńgə́ ŋwu tsə̌ a tséebə atsáb páʼ zə́ələ́ á túg nə́ ayáŋ ńgɛnə̂ á mbô yitsə̌ ŋwu ńgɛd ńgə́ a tséebə atsáb páʼ zə́ələ́ á túg nə́ ajíənuə.

⁹ Tsɔʼə Ajwǐəsê zɨ́d zə̂ á ghɛnə̂ á mbô yitsə̌ ŋwu ə́fɛ̂ mbimə́ ḿbɨ ńgɛnə̂ á mbô ŋwu tsə̌ ə́fɛ̂ mətəənə á mə́ tsóʼ nə́ məghoonə́.

¹⁰ Ńgɛnə̂ á mbô yitsə̌ ŋwu ə́fɛ̂ mətəənə á mə́ ghɛd nə́ əkɨʼnəmə́nu, ńgɛnə̂ á mbô yitsə̌ ńgɛd ńgə́ a chî mbɔʼ a zóʼ nkɨ Əsê ńnáŋkə wə́ələ́, ńkə́ ḿbɨ ńgɛnə̂ á mbô yitsə̌ ŋwu ə́fɛ̂ mətəənə á mbô yə́ á mə́ fiʼtə̂ nə́ mənu páʼ mə́ fɛ́d nə́ á mbô Ajwǐəsê pópə mi páʼ mə́ kě nə́ lə́ á mbô Ajwǐəsê fɛ́d pô. Ńkə́ ḿbɛ́d ńgɛn nə́ yitsə̌ ŋwu ə́fɛ̂ mətəənə á mə́ tsáb nə́ ətsáb pəfîə, ńkə́ ńgɛnə̂ á mbô yitsə̌ ŋwu ə́fɛ̂ mətəənə á mbô yə́ á mə́ fiʼtə̂ nə́ anu páʼ ətsáb pəfî pipə wɨ́ ə́ sóŋ nə́.

¹¹ Lə́ tsɔʼə Ajwǐəsê zɨ́d zə́ páʼ ä faʼ nə́ ndɛn mənu wɨ́d ghɛnə̂, ńkə́ ə́fɛ̂ á mbô ŋwu ntsəm ndzaŋ páʼ a kɔŋ nə́.

Táʼ Mbɨ nə́ Əlam Pipə Nɨ́ nə́

¹² Mbɨ ŋwu lə́ táʼə, ḿbə́ ńtúg əlam pipə nɨ́ nə́, əlam pɨ ətsəm, ə́ pǎtə ńnɨ́ lə́ ḿbə́ ńnɔd ḿbə́ lə́ táʼə ajúmə, lə́ ndzaŋ páʼ Yeso Klisto a chî nə́.

¹³ Ńté ńgə́ lə́ nə ḿbə́ táʼə Ajwi páʼ a kə fɛ̂ nə́ nkǐ nə́ pɛn ńjî ńgə́ pɛn tíʼ táʼ mbəəmə, kɨ pɛn pə́ pə́ Pəjus kɨ Pətəjǐsê kɨ əpoʼ kɨ pɨ pə́ kě nə́ əpoʼ, pɛn nə ńnô lə́ tsɔʼə táʼə Ajwi wɨ́d wə̂.

¹⁴ Ńté ńgə́ mbɨ ŋwu kě lə́ tsɔʼə táʼə alam túg pô, ə́ túg əlam tə ə́ nə́ənə.

¹⁵ Təmbɔʼ akoolə á sóŋ ńgə́, “Ndzaŋ páʼ maŋ kě nə́ apô pô lə́, maŋ kě lə́ alamə́ mbɨ pô,” zə̂ á yǐ kě zɔŋ ńgə́ kɔ á pɨ ḿbə́ alamə́ mbɨ pô.

¹⁶ Təmbɔʼ nətôglə nə́ kə́ ə́sóŋ ńgə́, “Ndzaŋ páʼ maŋ kě nə́ pə́ nələ́g pô lə́, maŋ kě lə́ alamə́ mbɨ pô,” zə̂ á kě yǐ zɔŋ ńgə́ kɔ á pɨ ḿbə́ alamə́ á mbɨ pô.

¹⁷ Təmbɔʼ mbɨ ntsəm ə́ pěʼ ḿbə́ lə́ tsɔʼə nələ́g, tə ḿbə́ mbɔʼ ə́ pěʼ ńtíʼə ńdzóʼ əliʼ ə́lɛ́? Təmbɔʼ zɨ́d ntsəm ə́ pěʼ ḿbə́ lə́ tsɔʼə nətôglə, tə ḿbə́ ə́ tíʼə ńdəmkə̂ ajú ə́lɛ́?

¹⁸ Ndzaŋə á pɛn ḿbə́ ə́lɨ́d lə́, Əsê a nə ńtyáŋtə əlam mbɨ ətsəm táʼ táʼ ndzaŋ páʼ a kɔŋ nə́.

¹⁹ Mbɔʼ pɨ́d ətsəm ətsəm ə́ nə ḿběʼ ḿbə́ lə́ táʼə alam, tə ḿbə́ mbɨ ə́ chî ə́fó?

²⁰ Ndzaŋ á pɛn ńchî ə́lɨ́d lə́, əlam mbɨ ə́ nə́ənə, ḿbə́ ḿbə́ lə́ tsɔʼə táʼ mbəəmə.

²¹ Lə́ələ́ á pə́ ńgə́ təmbɔʼ nələ́g nə́ kě sóŋ nə́ apô ńgə́, “Maŋ kě gho tə́ ńdoonə̂ pô!,” kəənə atûə á kě kə́ sóŋ nə́ ako ńgə́, “Maŋ kě gho tə́ ńdoonə̂ pô!”

²² Lə́ a pɛn ḿbɨ́ ńchî lə́ ńgə́, əlam mbɨ páʼ ə́ chî nə́ ándó ə́ pwɔ́d lə́, mbɔʼ pɛn kě chî tə pɨ́d pô;

²³ pi páʼ pɛ̈n kwaŋ nə́ ńgə́ ə́ kě nə́ anu chígə́ ńchî pô, lə́ pi pɛn chígə́ nə́ ńdɔg ndɛd ə́wə́; əlam mbɨ páʼ pɛn náŋ nə́ ńgə́ pɨ́d kě pɔŋ pô, lə́ pi pɛn pyádnə nə́ ńdɔg ndɛd ə́wɨ́,

²⁴ ńtsɛ pi páʼ pɛn kwaŋ nə́ ńgə́ pɨ́d pɔŋə̂. Lə́ Əsê a pɛn ḿbə́ ńtsoŋkə̂ mbɨ nə́ əsêndú ńgə́ tə́kɔʼ ngóʼkə ə́ ghɛnə̂ á mbô əlam mbɨ páʼ ə́ kě nə́ nə́ anu chígə́ ńchî pô.

²⁵ Ńjî ńgə́ kɔ mbɨ ə́ ghabnə̂, lə́ alamə́ mbəəmə atsəm á pyádnə mɔ́mɛ́ əyǐə.

²⁶ Təmbɔʼ táʼə alamə́ mbəəmə á tə́ ńjɨ́ ngə́ʼ, əlam mbɨ ətsəm ə́ chîə á mə́m ngə́ʼə. Təmbɔʼ pə́ ŋáŋkə táʼə alamə́ mbɨ, apuʼə atsəmə á kɔŋtə̂ pó pô.

²⁷ Əghâ nə́ pɨ pətsəm lə́ nkɔ̌ʼmbɨ Yeso, táʼ táʼ ŋwunə a pə́ alamə́ mbəəmə ajíə.

²⁸ Əsê a pɛn ńgɛnə̂ á mə́m nkyeetə pɔ́ pə́ Yeso lə́ ḿbeg ńtsɔ́ʼ məntú mə́ Yeso, ńdzoŋkə̂ ńtsɔ́ʼ məntú mə Əsê, ḿbɨ ńkə́ ńtsɔ́ʼ pəzéʼkə, ńtíʼ ńtsɔ́ʼ ngaŋə́ghɛlə əkɨʼnəmə́nuə ńkə́ ńtsɔ́ʼ ngaŋə́tsóʼə məghoonə́, ńkə́ ńtsɔ́ʼ pɨ ńgə́ mbɔʼ pó kwáatə pətsə́, ńkə́ ńtsɔ́ʼ mətûə, ḿbɨ́ ńkə́ ńtsɔ́ʼ pətsə́ pɨ mbɔʼ pó tsáb ətsáb pəfîə.

²⁹ Ŋwu ntsəm lə́ kě ntú Yeso pô. Ŋwu ntsəmə a kě ntú Əsê pô; ŋwu ntsəmə a kě ndzéʼkə pô. Ŋwu ntsəmə a kě mətɨ túgə á mə́ ghɛd nə́ əkɨʼnəmə́nu pô.

³⁰ Ŋwu ntsəmə a kě mətɨ kə́ ńtúgə á mə́ tsóʼ nə́ məghɔ pô, kəənə á mə́ tsáb nə́ ətsáb pəfî kəənə á mə́ fiʼtə̂ nə́ anu páʼ ətsáb pəfî ə̈ sóŋ nə́ pô.

³¹ Tə́g nə́ atûə azə́ənə́ á mə́ túg nə́ pətə́kɔʼ pə́ məfɛ̂nə Ajwǐəsê ä fɛ̂ nə́. Maŋ yi nəələ̂ áwɨ́ nə́ yitsə̌ ndú páʼ ə́ pɔŋ nə́ ńtsɛ məndú mətsəmə.