1 Kɔlintyanə 11 - Əka yi Fîə

¹ Nə́ tə́ fiʼnə̂ mənu mäŋ ghɛd nə́ ndzaŋ páʼ maŋ kə́ nə́ ńtə̈ fiʼnə̂ mənu páʼ Klisto a ghɛd nə́.

Kə́bkə Nə́ Atûə Azɨ́ Əghâ Pɨ tə nə́ Ngóʼkə Əsê

² Mäŋ ŋáŋkə áwɨ́ ńté ńgə́ nə́ zá ńkwúmtə mə, ńkə́ ńdzoŋə̂ mənu mətsəm tsɔʼə ndzaŋ mäŋ zéʼkə nə́ áwɨ́ ə́wɨ́ lə́.

³ Maŋ loonə̂ ńgə́ nə́ lánə ńjî əshîʼnə ńgə́ Klisto lə́ nətû nə́ mbyâŋnə ətsəmə, ŋwu mbyâŋnə a kə́ ḿbə́ nətûə á mbô ngwě əyǐə. Əsê a kə́ ḿbə́ nətûə á mbô Klisto.

⁴ Lə́ələ́ á pə́ ńgə́ ŋwu mbyâŋnə ntsəm páʼ ä chaʼtə̂ nə́ Əsê kɨ ńtə́ ə́sóŋə anǔəsê nə́ atûə ají yə kə́bkə nə́ a néŋə lə́ əsə́ənə atû klisto páʼ a pə́ nə́ nətû jí lə́.

⁵ Kɨ məngyě ntsəm páʼ a tə́ nə́ ńchaʼtə́sê kɨ ə́sóŋə anǔəsê á əshîsaŋ tə́ kə́bkə atûə ají a néŋə lə́ əsə́ənə atû ndú əyǐ páʼ a pə́ nə́ nətû jí lə́, a tíʼ ńchî lə́ ándó məngyě páʼ pə́ kɔ́ nə́ atûə ajíə á mə́ néŋ nə́ əsə́ənə á atû yə́.

⁶ Təmbɔʼ məngyě a chî kɔŋə̂ á mə́ tə́ nə́ kə́bkə atûə ají pô, a tíʼ ńkɔ́ mənoŋ mə́ chî nə́ ə́wə́. Ndzaŋ páʼ á pə́ nə́ əsə́ənə á mbô məngyě á mə́ kɔ́ nə́ mənoŋ mə́ atû mi lə́, á pɔŋ ńgə́ məngyě a tə́ ńkə́bkə atûə ajíə.

⁷ Ŋwu mbyâŋnə a kě chîə á mə́ kə́bkə nə́ atûə ají pô ńté ńgə́ a fî lə́ Əsê ńkə́ ḿbə́ nəgháʼ Əsê. Lə́ məngyě a pə́ ḿbə́ lə́ nəgháʼ ŋwu mbyâŋnə.

⁸ Ńté ńgə́ Əsê a nə ńkě lɔg lə́ əlam mbɨ məngyě ńtsoŋkə̂ a ŋwu mbyâŋnə ə́wɨ́ pô, a nə ńdɔg lə́ əlam mbɨ ŋwu mbyâŋnə ńtsoŋkə̂ məngyě ə́wə́.

⁹ Əsê a nə ńkě kə́ ńtsoŋkə̂ a ŋwu mbyâŋnə lə́ á mbô məngyě pô, a nə ńtsoŋkə̂ lə́ a məngyě ńté ŋwu mbyâŋnə.

¹⁰ Lə́ ghɛd ə́lɨ́d məngyě a chîə á mə́ kə́bkə nə́ atûə ajíə á mə́ nɨd nə́ ńgə́ ndu əyǐə a túg mətəənə a ndu yə́, ńkə́ ńté Pətseŋpə́ndɛ́pə́sê.

¹¹ Á mə́m nchîmbî əzɛ̂n nə́ Mmaʼmbî, mbɔʼ məngyě a kě chîə a ngǎ yí tə ŋwu mbyâŋnə pô, ŋwu mbyâŋnə a kě kə́ ńchîə a ngǎ yí tə məngyě pô.

¹² Ndzaŋə ándó pə́ nə ńdɔg nə́ əlam mbɨ ŋwu mbyâŋnə ńtsoŋkə̂ məngyě ə́wɨ́ lə́, lə́ tsɔʼə ndzaŋ páʼ məngyě a tíʼ nə́ ḿbîə ŋwu mbyâŋnə. Nte ńgə́ mənu mətsəm mə́ lǒo lə́ á mbô Əsê.

¹³ Ŋwu ntsəmə a kwaŋ nə́ atûə ají ńgə́; á koʼnə̂ á mbô məngyě á mə́ chaʼtə̂ nə́ Əsê tə kə́bkə atûə ajíə?

¹⁴ Təmbɔʼ nə́ zɨ́ ndzaŋ Əsê a nə ńtsoŋkə̂ nə́ mbî, nə́ zɨ́ ńgə́ lə́ əsə́ənə á mbô ŋwu mbyâŋnə á mə́ mɛdtə̂ nə́ mənoŋ mə́ atû mí mə́ sakə̂.

¹⁵ Lə́ ḿbə́ ḿbə́ lə́ anu yə əshîʼnə á mbô məngyě á mə́ mɛdtə̂ nə́ mənoŋ mə́ atû mí mə sakə̂. Əsê a fɛ̂ mənoŋə á mbô məngyě lə́ ńgə́ a tə́ ńkə́bkə atûə ají ə́wə́.

¹⁶ Lə́ təmbɔʼ ŋwu tsə̌ a tə́ ńdoonə̂ á mə́ kǐ nə́ ndɛn mənu ghɛn, maŋ chî təmbɔʼ maŋ sóŋ lə́ tsɔʼə ńgə́, pɛn, ńdzoŋ ḿbá mənkyeetə mə́ pɔ́ pə́ Əsê tsɔʼə mətsəm kě noŋkə yi ndaʼ túgə á tə́gtə nə́ áwɛ̂n ńté mə chaʼtə̂ nə́ Əsê tə ńdéʼtə ghɛn pô.

Anu Ńté Ntéelə

¹⁷ Ntəgə́ maŋ lɔ nə́ á mə́ fɛ̂ á mbô pɨ lə́, maŋ kě lə́ nəkwíŋ zə́ənə́ atǐ tə́ ŋ́ŋáŋkə pô, ńté ńgə́ nə́ ghɛnə̂ aliʼə́ nkyeetə pɔ́ pə́ Əsê lə́, nə́ ghɛlə̂ mənu mə́ təpɔŋ ńtsɛɛlə̂ mimə əshîʼnə.

¹⁸ Ntsɛɛmbiə anu lə́ ńgə́, maŋ zóʼ ńgə́ əghâ pɨ yǐ nə́ ńkyeetə̂ ándó pɔ́ pə́ Yeso lə́, nə́ ghabtə̂ məmbɨ mə́ənə́, pɨ pə́ chî nə́ əghɔ́b əlá, pɨ pə́ chî nə́ əghóobə́. Maŋ kwaŋ ńgə́ mbɔʼ anu zəənə́ á nyaʼ ḿbə́ ndə̌ŋdəŋə́.

¹⁹ Lə́ ndə̌ŋdəŋ ńgə́ aghabtə á pěʼ ńchîə á mə́ chî nə́ a tətɨ pɨ ńjî ńgə́ pə́ jɨ́ pɨ páʼ pó ghɛd nə́ mənu páʼ mə́ tɨ́ nə́ ndə̌ŋdəŋə́.

²⁰ Əghâ ándó nə́ yǐ nə́ ńkyeetə̂ táʼə aliʼ lə́, nə́ kě yǐ lə́ á ajîə Ntád pô.

²¹ Ńté ńgə́, nə́ yǐəə ńjî mbǒʼḿbóʼə́; ŋwunə a tə́ ńjîə ńkě ngaŋəko əyǐ pyáb pô, nji ə́ tə́ ńdzáŋə ŋwu tsə̌, páʼ yitsə̌ a nô nə́ tə ḿbɛ́ɛlə yə́.

²² Zɨ́d zəənə́ anu á chî lə́ ə́lɛ́, nə́ kě nə́ məngyaʼə́ chîə á mə́ tə́ nə́ jîə ə́wɨ́ ə́ kə́ nô? Kɨ nə́ kwaŋ ńgə́ nkyeetə pɔ́ pə́ əsê lə́ kě ajûtsə́ pô nə́ tíʼə néŋ əsə́ənə á atû pɨ páʼ pó kě nə́ ajú túgə? Nə́ loonə̂ lə́ ńgə́ maŋ sóŋ ńgə́ akə̂ á mbô pɨ ńté anu zəənə́? Nə́ loonə̂ lə́ ńgə́ maŋ pímtə? Ngá! təmbɔʼ maŋ kě mə áwɨ́ ŋáŋkə po!

²³ Anuə atsəm páʼ Mmaʼmbîə a nə ńdzéʼkə nə́ mə ə́wɨ́ lə́ zɨ́d mäŋ sóŋ nə́ á mbô pəənə́, ńgə́ á nətúʼə ándó pə nə fi nə́ Yeso á mbô pɨ pə́ təpɔŋ lə́, a lɔgə̂ apéenə məkálə́,

²⁴ ə́fɛ̂ ndǎ á mbô Əsê, ńtíʼ ḿbagtə̂ zɨ́d, ə́sóŋ ńgə́, “Lɛ̌ mbəəmə mə páʼ maŋ fɛ̂ nə́ ńté atûə azə́ənə́. Nə́ tə́ ńgɛlə̂ ə́lɛ̌ á mə kwúmtə nə́ mə.”

²⁵ A nə ńkə́ ńtwám ndɔ́ŋ tsɔʼə ə́lɨ́d əghâ ándó pó nə məgtə̂ nə́ á mə́ jî nə məjî lə́ ńtíʼ ə́sóŋ ńgə́, “Ndɔ́ŋ zɨ lə́ əka yi fî páʼ Əsê a wad nə́ pɨ po nə́ achǐə mbəəmə mə. Əghâ ətsəm pɨ nô nə́ ázɨ́d pɨ kwúmtə mə.”

²⁶ Zɨ́d zəənə́ á nəələ̂ ńgə́ əghâ ətsəm pɨ jî nə́ apá jɨ́d jɨ, ńkə́ ńnô ndɔ́ŋ jɨ́d jɨ nə́ sóŋə anu ńté nəwû Mmaʼmbî tə ńkoʼ nə́ ndɛd páʼ a yǒ nə́ yǐəə.

²⁷ Lə́, ŋwu páʼ a jî nə́ apá ńkə́ ńnô ndɔ́ŋ nə́ əsêndú ə́ kě nə́ koʼnə̂ pô, a ghɛd lə́ təpɔŋ nə́ na mbɨ Mmaʼmbî pó achǐə ajíə.

²⁸ Lə́ələ́ á pə́ ńgə́ ŋwu ntsəmə a peg ńchaʼ mbɨ əjǐ záʼ ḿbɔŋə́ jîə apá ə́ kə́ nô ndɔ́ŋ zə̂.

²⁹ Ńté ńgə́ ŋwu ntsəm páʼ a jî nə́ ńkə́ ńnô ḿbə́ ńkě jîə anu mbɨ Klisto tɨ́ nə́ nə́ zɨ́d pô, ä twáamə lə́ ndɔ əjǐə.

³⁰ Lə́ ghɛd ə́lɨ́d pɨ pipə nɨ́ nə́ á mə́m pɨ pó tə́ ńgoonə̂, pipə nɨ́ nə́ pó pwɔ́d, pətsə́ pó kwúkə.

³¹ Lə́ mbɔʼ pɛn peg ńchaʼ mbɨ əzɛ̂n, Mmaʼmbîə a yǐ ńkě áwɛ̂n tsəŋkə̂ pô.

³² Lə́, Mmaʼmbîə ä sáʼ əsáʼ əwɛ̂n ńkə̈ ə́fɛ̂ atsáŋə azɛ̂n ńjî ńgə́ kɔ a yǒ ńkyeetə̂ áwɛ̂n pə pɨ pə́ mbî pɨ ńtsəŋkə̂.

³³ Pəlimə́ mə, lə́ pə́ ńgə́ əghâ nə́ kyeetə̂ nə́ á mə́ jî nə́ ntád, nə́ pyáabə a ŋwu ntsəmə.

³⁴ Lə́ təmbɔʼ nji pěʼ ńtə́ ńdzáŋə ŋwu tsə̌ á pɔŋ ńgə́ a peg ńjî məjîə á ndɛ̂ yə́, ńjî ńgə́ əghâ pɨ kyeetə̂ nə́ táʼə aliʼ kɔ ŋwunə a ghɛlə̂ anu páʼ təmbɔʼ a twá ndɔ ə́wə́ á mbi Əsê. Ńgɛn nə́ mətsɨ́ mənu mə́, maŋ yǐ tə́gtə áwɨ́ əghâ maŋ yǐ nə́.