1 Kɔlintyanə 10 - Əka yi Fîə

Akwantə Ńté mə́ Ghóʼkə nə́ Məsê mə́ Məfɨgə

¹ Pəlimə́ mə, maŋ loonə̂ ńgə́ nə́ kwúmtə anu páʼ á nə ńdaŋ nə́ nə́ pətǎ pə́ pətǎ pɛn əghâ pó nə ńdzoŋ nə́ Mosisə lə́. Pó nə́ nyinə̂ lə́ á nətɛ́n nə́ alə́mə, lə́ ŋwu ntsəmə a nə ńkə́ ńtúmə Paŋ Nɨ́ əshîʼnə.

² Á mə́mə alə́m pópə nɨ́ pó pətsəm nə ńkwá nkǐə ándó ngaŋə́zoŋə́ndzəm Mosisə.

³ Pó pətsəm nə ńjîə táʼ ntê məjî mə́ ajwiə.

⁴ Pó pətsəm kə́ ńnô táʼ ntê nkǐə ajwiə. Pó nə nô məloʼ mə́ ajwi páʼ mə́ fɛ́d nə́ á mə́m ngwúbə ajwi wə́ ə́ kə zoŋ nə́ ághɔ́b lə́, ngwúb yi ə́wɨ́ ə́ nə́ ḿbə́ lə́ Klisto.

⁵ Á nə́ ḿbǎtə ḿbə́ ə́lɨ́d lə́, ndě Əsê ə́ nə ńkě nə́ pó pipə nɨ́ nə́ ŋwáʼ pô, lə́ nə ńgɛd ə́lɨ́d pó tíʼ ə́shamnə̂ ńkwúkə á kɔŋ məŋkwâʼlə̌.

⁶ Əghâ nə́, mənu mɨ mətsəm lə́ akwantə á mbô pɛn, ńgə́ kɔ pɛn tə́ ńdoonə̂ mə́ ghɛd nə́ mənu mə́ təpɔŋ pó nə̈ ńgɛd nə́ lə́.

⁷ Kɔ nə tə́ ńgóʼkə məsê mə́ məfɨgə ndzaŋ pó pətsə́ nə ńgóʼkə nə́ lə́. Ndzaŋə ándó aŋwaʼlə Əsê a sóŋ nə́ ńgə́, “Pɨ pipə wɨ́ pó nə náanə á ndəsê á mə́ jî nə́ ə́ kə́ nô, ńtíʼ ńdǒ á ndəsê ḿbɛ́nə.”

⁸ Kɔ pɛn fɛ̂ mbɨ əzɛn nə́ ndzɔʼə́ mbǒʼḿbóʼə́ ándó pó pətsə́ nə̈ faʼ nə lə́, ńdaŋ ə́lɨ́d pó tɔsə məghə́m mɛ́n mə́ mbɛ̌ nə́ tɔsə teelə́ ə́ tíʼ ńkwúkə táʼə alě.

⁹ Kɔ pɛn jwə́ʼ Əsê ándó pó pətsə́ nə ńjwə́ʼ nə́ yí mənó mə́ tíʼ ńjwítə ághɔ́b lə́.

¹⁰ Kɔ nə́ ŋwuntə̂ ándó pó pətsə́ nə́ ŋwuntə̂ nə́ Əsê a túmə á Ntseŋ Ndɛ̂ Nəwûə a yǐ ńjwítə ághóobə́.

¹¹ Ndɛn mənu ghɛn nə ńdɔgə̂ aliʼə́ á mə́m pó lə́ á mə́ pə́ nə́ akwantə á mbô pətsə́ pəənə. Pə́ tíʼ ŋ́ŋwaʼlə̂ mə́ələ́ á mə́ lɔg nə́ tə́gtə áwɛ̂n ə́wɨ́ ńté ńgə́ pɛn chîə á mbî lə́ nə́ ndɛd páʼ ndwegtə tə́ nə́ ḿbáatə.

¹² Lə́ələ́ á pə́ ńgə́ mbɔʼ ŋwu tsə̌ a kwaŋ ńgə́ a tɨ́, a lɔg ndɛlə́, tə ḿbə́ a yǐ wǔəə.

¹³ Akwaʼlə yətsə́ a kě á mbô pɨ kə́ yǐəə tə ghə́ á nə ḿbɛ́d tə ńgyǐəə á mbô ŋwu pô. Əsê a pə̈ ńdɔʼkə̂ ndaʼnə əjǐə, a yǐ kě mɛdtə̂ akwaʼlə a yǐəə á mbô pɨ páʼ á tsɛ nə́ mətɨ mɨ́ pô, lə́ mbɔʼ akwaʼlə á yǐəə á mbô pɨ Əsê a kə́ ə́fɛ̂ ndúmə á mə́ fɛ́d nə́ á mə́m ə́wə́, ńkə́ ə́fɛ̂ mətəənə á mbô pəənə́ á mə́ wam nə́ ntə́əmə á mə́m ə́wə́.

¹⁴ Lə́ələ́ á pə́ ńgə́, pəlimə́ mə páʼ maŋ kɔŋ nə́, lə́ʼ nə́ áwə́ənə́ á mə́ ghóʼkə nə́ məsê mə́ məfɨgə.

¹⁵ Maŋ tséebə á mbô pɨ lə́ ándó pɨ pó jî nə́ ənuə; lɔg nə́ ndɛd ńkwaŋə anu páʼ maŋ sóŋ nə́ lə́ əshîʼnə.

¹⁶ Ndɔ́ŋ páʼ ə́ fɛ̂ nə́ mbwɔ́dnə páʼ pɛn nô nə́ ńdáʼkə Əsê: mbɔʼ pɛn nô ájɨ́d ə́ kě lə́ áwɛ̂n á mə́m achǐə Klisto tsɛntə̂? Apéenə məkálə́ páʼ pɛn kə́ nə́ ḿbagə̂ ázɨ́d, tə mbɔʼ pɛn kɔ́lə ázɨ́d, á kě áwɛ̂n á mə́m mbɨ Yeso Klisto tsɛntə̂?

¹⁷ ndzaŋə apá zə̂ á pə́ nə́ tsɔʼə táʼ mbə́ʼ lə́, pɛn pǎtə nɨ́ lə́ ḿbə́ ḿbə́ táʼə á mə́m na mbəəmə, ńté ńgə́ pɛn tsɛntə̂ lə́ táʼ mbə́ʼə apéenə məkálə́.

¹⁸ Kwaŋ nə́ pɨ pə́ Islɛl, pɨ páʼ pó jî nə́ əpúmə afyaʼə́nu, pó tsɛntə̂ ḿbə́ lə́ táʼ ŋwunə á mə́mə afyaʼə́nu pó ghɛd nə́ zə́ələ́ á nəpéenə á mbô Əsê.

¹⁹ Maŋ sóŋ ə́lɛ́ ńjî ńgə́ maŋ tíʼ sóŋ lə́ ńgə́ akə̂? ńgə́ Əsê məfɨgə kɨ məjî páʼ pə́ fɛ̂ nə́ mə́ələ́ á mbô məsê mə́ məfɨgə, lə́ ajûtsə́?

²⁰ Ngá! anu maŋ lɔ nə́ á mə́ sóŋ nə́ lə́ ńgə́, Ajú pətəjǐsê pó lɔg nə́ ə́fyaʼə́nu ə́wɨ́, pó fɛ̂ lə́ á mbô pɛ̌sê, pó kě lə́ á mbô Əsê fɛ̂ pô. Maŋ tíʼ ńkě kɔŋ ńgə́ nə́ túgə anu yitsə̌ pɨ̌pə pɛ̌sê pô.

²¹ Təmbɔʼ nə kě ndɔ́ŋ Mmaʼmbî nô ńkə́ ḿbɨ ńnô yi pɛ̌sê pô. Təmbɔʼ nə́ kě məjîə á ndumə atə́gtə məjîə Mmaʼmbî jî ńkə́ ḿbɨ ńjîə mimə́ chî nə́ á ndumə atə́gtə məjîə pɛ̌sê pô.

²² Pɛn loonə̂ á mə́ twáb nə́ ndě Mmaʼmbîə a túgə ŋwéetə́? Pɛn kwaŋ ńgə́ pɛn tyantə̂ ńtsɛɛlə̂ yí?

²³ Noŋkə á sóŋ ńgə́ mbɔʼ pɛn faʼə̂ anuə atsəmə, lə́ anuə atsəmə á pə́ ńkě á mbô pɛn pɔŋ pô. Noŋkə á sóŋ ńgə́ mbɔʼ pɛn faʼə̂ anuə atsəmə lə́ pə́ ńkě anuə atsəm páʼ á kwá nə́ áwɛ̂n ńgə́ pɛn kwéŋə á mə́mə ajwi pô.

²⁴ Kɔ ŋwunə a tə́ ńnáŋə ńgə́ a pɔŋ yə́, a náŋə pə́ ńgə́ a pɔŋ pɨ pipə́ ndaʼə.

²⁵ Jî nə́ ajúmə atsəm páʼ pə́ fi nə́ á məta tsɔʼə tə pítə anu yətsə́ ńjî ńgə́ kɔ məntɨ́ mɨ́ mə́ tə́ ńjwaʼə̂ áwə́ənə́.

²⁶ Ńté ńgə́, “Ndu ndəsê lə́ yi Mmaʼmbî pópə ajúmə atsəm páʼ á chî nə́ á mə́m ə́wə́.”

²⁷ Mbɔʼ ŋwu páʼ a kě nə́ nə́ Yeso pí pô a wúnə áwɨ́ ńgə́ nə́ yǐ ńjî məjî á ndɛ̂ yí, nə́ ghɛn əwɨ́, nə́ jîə ajúmə atsəm pə́ tə́g nə́ mbi pɨ tsɔʼə tə pítə anu yətsə́ ńjî ńgə́ kɔ məntɨ́ mɨ́ mə́ tə́ ńjwaʼə̂ áwə́ənə́.

²⁸ Lə́ mbɔʼ ŋwu tsə̌ a pə́ ə́sóŋə á mbô pɨ ńgə́, “Lɛ̌ əpú pə́ pěʼ nə́ ə́fyaʼ məsê ə́wə́,” kɔ nə́ jîə áwə́ənə́, ńté atûə ŋwu páʼ a pěʼ nə́ fiʼtə̂ áwɨ́ lə́, ńkə́ ńté akwaŋə ntə́əmə.

²⁹ Maŋ kě ə́sóŋə lə́ azə́ənə́ akwaŋə ntə́əmə á yǐ nə́ jwaʼə̂ áwɨ́ pô, maŋ ə́sóŋə lə́ yə ŋwu páʼ a fiʼtə̂ nə́ lə́. Kɔ nə́ jîə áwə́ənə́. Ŋwu tsə̌ a yǐ tə́ ə́sóŋə ńgə́, “Akə̂ á yǐ ghɛd ńgə́ kɔ maŋ ghɛlə̂ anuə atsəm ndzaŋ maŋ kɔŋ nə́ ńté pə́ ńgə́ təmbɔʼ á jwaʼ ntɨ́ ŋwu tsə̌?

³⁰ Təmbɔʼ maŋ láʼkə Əsê nə́ məjîə mə, lə́ ghɛlə̂ akə̂ ŋwu tsə̌ a tíʼə ə́sóŋə ńgə́ maŋ kě əshîʼnə ghɛlə̂ á mə́ jî nə́ məjî páʼ maŋ láʼkə nə́ Əsê wə̂?”

³¹ Lə́ələ́ pə́ ńgə́ kɨ gho jî məjî kɨ nô məloʼ kəənə anu atsəmə páʼ gho ghɛd nə́, ghɛlə̂ zə́ələ́ pə́ á mə́ fɛ̂ nə́ nəgháʼə á mbô Əsê.

³² Chî nə́ nə́ ndú páʼ təmbɔʼ wɨ́d kě ngə́ʼə á mbô Pəjus kɨ pətəjǐsê kəənə á mbô nkyeetə pɔ́ pə́ Yeso Klisto fɛ̂ pô.

³³ Lə́, faʼ tsɔʼə ndzaŋ páʼ mäŋ faʼ nə́, maŋ lɔ ndú ətsəmə á mə́ ghɛd nə́ mbɨ ŋwu ntsəm ə́ pɔŋə̂ á mə́mə anuə atsəm páʼ mäŋ ghɛd nə́, ńkě tə́ ńkwaŋə̂ a pə́ ńgə́ ape anuə a pə́ azá pô, ńkwaŋə̂ pə́ ńgə́ ape anuə a pə́ yə ŋwu ntsəmə. Ńjî ńgə́ mbɔʼ pó ghɛd ńchwáalə.