Títo 3 - Dupade Uruode

Jesús anguresórone ore gajnei tu ujetiga ore dopísi Dupade ipotigádode cucha

¹ Angopome ore rĩ ujetiga ore tangaripísi deduguéjnane iji danirone. Ujetiga ore chóji gatéode ome ore ojningáringo cucha jnese. Ujetiga ore chójiapoi gaté rĩ ome dapesutígo cucha omío gatuaque to.

² Ujetiga ca ore dojnóngaja dojórique ayoré, mu ore ucuei tupúsu pajesereringane ome ore jnese. Omi tupo rĩ ujetiga caniraque ore ome ñane, enga paraque ore rĩ ome dojode ayoréo jnese.

³ Uacarajáyo uje que yirajágo cuchárique to nanique. Enga angoninguite parique yógome Dupade enga jecucha ga yicagóji quedéjnane ome. Enga cho ujetiga yoquipotigué ayoréode sué yoquibáyode, enga yocáyipiedie chejna rángaja erámone jogonórone cucha gatuaque. Uje chiese pininaquei garanone u cucha ponáyone udore iji erámi tuné ome yoque. Sijnanguipise yoque rĩ enga jecucha ga yaratáyingome cuchade ome yocujode ayoréo. Jecute yocujode ayoréo ore chetaque yoque gatuaque, mu yetájopo ore gatuaque rĩ.

⁴ Unojo quigade u uje yoquiquetangóri Dupade chingo dajnoraquei, dacaniratiguei ore aja yoque.

⁵ Enga doi enga chiqueta yoque to. Mu que chiqueta yoque gu yoquipesutique cucha arécho go, mu chiqueta yoque gu dosongaquéode ome yoque. Dupade chĩro yoquisijnaringuéone iji jnumi, enga yocúringai icha jogadi u. Jogadi u uté to uje Ujopié Espíritu Sánto chinoningase yoque enga Dupade ape icha yoque. Enga doi enga chisi ome pucuecaringué ichárique to ome yoque.

⁶ Enga chisi ome Dajopié Espíritu Sánto ome yoque uje yanguretágo Yoquiquetangóri Jesucrísto. Enga Ujopié tuaté chise yoqueruéode jnese.

⁷ Gaidi u gu ujetiga chosõre yoque enga yico yocúringane imeserãcho to. Enga u to ujetiga yico pucuecaringué eyúgojmai ome yoque to uje qué yiroco pucuecaringuei tuté yui.

⁸ Títo á, jé ũrepise yacajnaquéode udore ome ua. Jecute yipota jeta ajo ua aja udore to uje bacate barasade ore, ujetiga Dupade anguresórone ore jnese ore chejna rángaja dapesudode cucha omío gatuaque. Ueracho pisocade udore gu. Chamáñaje ujetiga gosi chejna raja dapesudode cucha omío enga yagutíñangome ore átegoningáne udore jnese.

⁹ Mu ayome ore ibotaqué bisidégode. Yojningai u uje ore botare ñane ome jnani bajade íode, jeoga ore botare ñane ome Moisés urusarane quique ponáyone uje jecucha ga ore chucué udore quiguipísode. Uje que cuchárique tõrapísiji pibotaquéode udore gotique. Mu cachi pajei dotáningane, pipojnaquéode garani u pibotaqué bisidégode udore ome yoque.

¹⁰ Ujetiga gosi iji Dupade anguresórone ujade pota chajuque uáguiji ñane ome dabotaquéode, enga be enga oyo uté quique enga gare. Mu ujetiga ca tangári uaque enga beyoi enga etácho uté ome uacáguedie.

¹¹ Baraja gu uje jnani uté gosi que suse dáyipiedie guio gotique. Sijnaque enga chirajapise dáringai máraque, mu qué jno dasijnaringuéone údi.

Páblo chingo dáyipiedie aja Títo ujetiga pésu aja quigode

¹² Ujetiga yiroque Artémas, Tíquico ore uñéngaja ua, enga acuepise basocárique jeta jĩraque abágui yu jne iji ore idai uje i u Nicópolis. Chamáñaje a yejna esoi iji uté jne gu.

¹³ Atapísaja eduguéjnane iroquéode ajnerámesṍri Zénas, jé aja Apólos rĩ aja ore quigode erámio. Asi ore imeserane cucha ome ore, enga jé ca cuchárique chona ore iji dajei.

¹⁴ Enga yocujode Dupade anguresóño iji uté ore doi dacátegoningáne to, enga ore chátaja dojode ayoréo gatuaque ujetiga cuchárique qué chona ore. Dupade que pota gu ujetiga danguresónique cháji erámi tuné bisideque, mu pota ujetiga yocujode ayoréo ore chagutíñame yoque.

Páblo chingo darasitigade ome Títo, urasade ore iji darusarane eruei

¹⁵ Yijorane ore jnese uje ore déji yari iji ne ore irasique bei. Yoquirasique yoquijorane yui iji bari to. Chamáñaje yijnórangopise ore gu. ¡Yipésupú ga Dupade chátaja uaque jnese jne, jõ! E gusu yuruode. Amén.