Provérbios 4 - Dupade Uruode

Udojo júdi tu pisoca arégode quigode uje garani tu payuquetotiguei ome uté gosi

¹ Yababode uaque á, jé ca ajusécho uacayode ojningane cucha ome uaque. Chamáñaje udore cho uacaquigome cuchade ga áyipierãque uágome cuchade jnese.

² E jiei yo quigode ome uac, jecute beyoi enga ca ajusécho udore ome uaque jne.

³ Yiraja to, uje disi yu to nanique. Ga ité cuse nanique ga jecucha ga uaté chijnorapise yu ga que chuseque yu.

⁴ Jecucha ga yapade chojningame yu to nanique: "Yababi á, be yacajnaquéode udojo ga cho ujetiga pajópio aja báyipie ga ca jnoji báyipie ga udore u ujetiga araja cuchade ome ga báringai piquetaque jogadi u.

⁵ Acué pirajatigai, payuquetotiguei ore to ome ua, yababi á, ga jé ca aramurase yacajnaqué casodé ome ua jne.

⁶ Ajnorapise payuquetotiguei ome ua ga ca ayápusu. A uté u jne gu ujetiga chãraque ua ome erámi tudé adode jne jé iji bacuecaringuei jnese.

⁷ O bajágu payuquetotiguei, pirajatigai ore ome bacuetígo ome cucha uñane jnese iji erámi tudé.

⁸ Ajnorapise payuquetotiguei tome ua ga ca ese unerotiguérique ga uté chosi ua iji gaté jne enga a pangarate ua jne ome bojode ayoréo. Be ga asa payuquetotiguei uté uéchai taja ua enga agarupúsu aja ua ga adotápusu ga ca ajuégapó ome dórique rĩ.

⁹ A payuquetotiguei tuté tẽrája ua jne ga guẽrapáidi tu ducayo uerate nanganatátigo ome ua jne ujetiga chajója benochai ga opise baparagádu jne enga bojode ayoré ore toji gai iji benochai uje ore pañaji payuquetotiguei iji ua gu." Yapade acajnaquéode u udojo ome yu nanique.

¹⁰ Mu yababi á, angarami yuru quigode udojo to ome ua. Ga opise bajnéngu yacajnaquéode udojo jnese. Ujetiga be udojo quigode ga bacuecaringuei iji erámi tudé a quérã aja beruénique.

¹¹ Bamo uje jecucha ga yo quique payuquetotiguei jmapiedie ome ua ujetiga be to. Jé adi u to uje yusẽre dajei ome ua uje ayoré ate arégode ore ajnai tu ujetiga ariguiji uté to.

¹² Dajei tuté etéquetí pararinguérique déji enga a ca atodo baquénique ome pararinguérique. A ayóji marínga, que acṍra gotique. Chamáñaje íjnoque pocorodie jé aja ojnaquérodie iji dajei tuté.

¹³ Ujetiga gosi chacate ua ome cuchárique ga ca ajuseque gosi acajnaquéode ome ua, ga cho ujetiga agaru ore acajnaquéode udore gánique iji báyipie. Que gusu ujetiga agaru mu be ga etingare ore acajnaquéode quigode to ome ua. Enga a ore chisi ome pitijínaquéi ome ua jne.

¹⁴ Ca ajína ate gajnaréngone udore ore aja quedéjnane uje ore chiroque ua aja daquigade. Enga ca arate ore jmapiedie to.

¹⁵ Ujetiga ate gajnaréngone udore ore chimáta raja baquénique marínga, acáji udore ore yúrique ga ṍrapóji ore uéchai te rĩ enga jé u uje bacáputaji bajesui.

¹⁶ Bamo uje ate gajnaréngone udore ore tṍraji dedo ome dapesudode dajocaninga ome dojode ayoréo jé aja daboqueréringane. Ore etéquetí ore moji dejátique ome dapesudode dajéo ujetiga ore chãra dojórigo ayoréo ome daringaquérigo iji dire uñeque, enga ore ujórigo ayoré jé doi ore jmapiedie udire to dirome, dáringárique aringácachoquí.

¹⁷ Ayoré ate gajnaréngone ore cho dabose damarániji date gajnaréngone úringane pipesucho enga uneripis ome udore uje ore posode jé u gu.

¹⁸ Mu dajei tuté, jnani parágode ore ajnai tuté, díreca iji jnumi, enga guedé ojodie pajnotáji. Mu uje iyajmaque gosi iji dajei tuté úringai pajnaque ga jogadi u uje gosi chise dírecaringué cuchábi enga gosi nína rome.

¹⁹ Jé basa ga ayoré ate gajnaréngone ore ajnai tuté dajeque judúguejnapísiji jnumi, enga cuchade chucuase ore aja dajnai tuté mu que ore chimo dacuayasórone gotígo uje juduguipise ore ajirigode gu.

²⁰ E mu yababi á, angarami yuru quigode udojo ga ope paraque ga be yuru quitígo jne.

²¹ Be ga acha yacajnaquéode udojo aja benominone ga ca aramurásiji bajénique jne. Enga cho jne ujetiga purusãracho udore iji báyipie.

²² Yacajnaquéode udore chisi ome pucuecaringuei, pijóningai ore ome ore uje ore doi quigode.

²³ Omi tu ujetiga yujucópise yocáyipie guio gatuac, tuac, tuac, enga yedugo yocáyipie omenie gatuaque. Chamáñaje tṍra cuchade udore aja guesode iji yoque jeta yipéco yocate omone, jeoga yocate gajnaréngone.

²⁴ Jé chopome yocuruode rĩ, yujuco quigode guio to ujetiga jé ca yocurupatáringárique tṍraji, jeoga paringaquérique.

²⁵ Be ga báyipie jogadípise baquei gatuaque. Ga jé ca báyipie dépoji baquiga casodé rĩ.

²⁶ Enga ajusípise barichai guio iji báringai tuté urugu. Achiéjna jnumi etotiguéode iji udore, udore.

²⁷ Ca ajna dajere cacachuguedie ome bajnai tuté dajeque caputaque. Bagaidi tu gu jetiga ca áta ua aja ate gajnaréngone udore iji dajere cacachuguedie udire.