Matéo 5 - Dupade Uruode

Jesús chacate ore iji cototé ójo

¹ Uje Jesús chimo gáguedaté enga cheru cototé ujetiga chacate ore iji dádi. Enga chácariji ta. Enga acadigode ore cháji ejode to.

² Jesús chacate ore enga chojninga:

³ –A ore nína raque jnese jne uje ore chiraja Dupade úringai ore agutíyamáte. Chamáñaje Dupade a urasade u udore ore jnese jne gu.

⁴ Jnusietade a ore nína raque to jne. Chamáñaje Dupade a chaquĩ́ra ore jne iji ore jnusiétigade.

⁵ Áyipie pajnotágode a ore nína raque to jne uje a ore gajneque Dupade ingomei punire jne.

⁶ A ore nína raque jnese jne, udore ore uje que cucha uñeque déji ore ajéode ome Dupade uruode uje ore pésu. Uje Dupade a chátaja dapotigádode cucha aja ore jne ujetiga ore pésu.

⁷ Osõcacade a ore nína raque jne. Chamáñaje Dupade a chosõre ore to jne gu.

⁸ Udore ore uje ore áyipiedie quigode chojmára ome Dupade a ore nína raque jne. Chamáñaje a ore u jne ujetiga ore chimópise Dupade.

⁹ A ore nína raque jne ujetiga ore chaquĩ́ra dojode ayoré ome ore ájningane ome ñane. Uje Dupade a cho dabi iji ore jne gu.

¹⁰ A ore nína raque jne uje ore cho daba Dupade iroquéode. Dupade a cho darása iji ore jne gu.

¹¹ Anínaño uaque ujetiga uacojode ayoréo ore urúrigo gajnarécho aja uaque, ujetiga ore chopo damajóji uaque to rĩ, ujetiga ore chaguhétapo cucha ponáyone uacabai rĩ. Chamáñaje uacoyo uacaba yu gu.

¹² Mu anínaño uágome cucha gajnaréngone unojo ujeta chise uaque. Uje Dupade a tẽrája uaque jne ome uacáringane pumajo iji jnumi uné, ujetiga eso iji gaté. Mu que quene uacate go uté uje uacoyo uacaba Dupade uruode. Uje jecucha Dupade uruode atatasórone jnani bajácho ore cho daba Dupade uruode to nanique.

Jesús chacãra echoi, dírecaringuéi ore aja danguresórone

¹³ Uacajnui u echoi iji erámi unirisórone ore ujade. Ujetiga echoi íjnoque unéningai iji ga e úringai cucha bisideque jogadi u. A jogadi u jne ujetiga ducarãte echoi aja jnumi ga jogadi upo rĩ uje ore chuchiéjna aja jnumone.

¹⁴ Uacajnui u dírecaringuéi iji erámone. Uacajnui upo guidai cuchábi uje déji cucarani ójo uje que toc ujetiga chacose re.

¹⁵ Ujetiga papose ibioguéjnarique enga ca pagoyaque iji cuchárique útique. Mu arei tu ujetiga picháji goningárique enga iguíjnasórone ore tajĩcára jnese.

¹⁶ Uacapesute arégode a chorase dírecaringuéone to. Jecute ajóyorase uágaja. Enga a uacojode ayoréo ore chimo uacapesute arégode jne enga a ore chicota uacai Dupade iji gaté to jne ome.

Jesús chacate ore ome Moisés urusarane quigode

¹⁷ Uacuñéngo uacajoso ati yigaidi tu ujetiga yṍra jnani bajai Moisés urusarane, ujetiga yṍrapo Dupade uruode atatasórone ore acajnaquéode to rĩ. Mu que yigaidi tu go ujetiga yṍra ore. Mu yigaidi tu ujetiga yatatapísa udore ore quigode ome uaque.

¹⁸ Jé ũrepise yu ome unojo: uje jé jogate jnumi, gaté ore enga isocai jé u to ome Moisés, ore urusarane Dupade urúo. A ore jogadípise jnese to, jé aja ujetiga ore chise dáringane tocachucho jnese.

¹⁹ Uñeque ujetiga ca doi Moisés urusarane Dupade iroquéo uñeque enga chacate dojode ayoréo ujetiga ore doi isocai to, a ayoré gajnareque jne iji Dupade idai. Mu uté gosi uje pésu Moisés urusarane Dupade iroquéo jnese enga chacate dojode ayoréo ujetiga ore chirate, a ayoré ataque uté gosi jne iji Dupade idai.

²⁰ Yingome uaque uje a ca eso uacáringáringo Dupade urása jne ujetiga ca ajnuéño fariséode, Moisés urusarane atatasórone ore gai, ujetiga apéso Dupade ipotigádode cucha.–

Jesús aquĩraquéode u unojo ome ájningarã́tique

²¹ Jesús chojningápome ayorébui ore rĩ: –Uacadúcho jnani bajai Moisés urusãra cásodicáite to uje chojninga: "Jé ca ajé bojórique ayoré." Chojningápo rĩ: "Ujetiga uñeque chujé dojórique ayoré, a docoite uté gosi to jne aja pasutedie iquei, ujetiga ore doi dasocáringome gosi."

²² Mu yojningápome uaque rĩ: ujetiga uñeque ájningaránguipíse ome dojórique ayoré, a jé tiógara to jne ujetiga docoidája pangaránone to. Ujetiga gosi chijnime daru gajnarétigo aja dojórique ayoré enga uté jé tiógara to ujetiga docoidája dacasuté cuchábi, ujode dacasutei ore iquei. Jé chopo rĩ ujetiga uñeque chuca dojórique ayoré, a suse deo ome gajño pioi jne. Socase chicáji.–

²³ Jesús qué chacate ore enga chojninga: –Yocobi jne ujetiga e agúsiji Dupade iguíjnai ajei. Enga e bacharása berani aja gaserani gai ome Dupade. Mu jé u uje báyipie déji uje bajõrai chugua ua.

²⁴ Jé u uje amorase berani iji bajmainie. Enga acháji gaserani gatẽrasui. Jé u uje o búja bajõrai enga ajni uté guetétigai ome ua. Jé u uje bepoi berani cucha rĩ ome Dupade enga asi ome.

²⁵ Ujetiga uñeque chetaque batígo enga pota chayója dacasutedie ome ua enga jĩraque ajia uté gosi yui enga acatecã́ri enga ẽrája. Jé u uje a cha banerai jne. A jé ca basocai uté jne enga a baniresṍri chijna ua aja pangaránone ore ero juez jne. Enga jé u jne ujetiga pangaránone ore ero chorei ua iji soldádode eduguéjnarique jne. Enga a soldádode eduguéjnai suru babai jne.

²⁶ Enga a agúsiji ore iguíjnai ajei jne, jé aja ujetiga o bajõrai oré jnese. Enga a ca ajniápo jne rĩ.–

Jesús chaquĩ́ra ore ome ore ipotiguéode

²⁷ Jesús chojninga: –Uacadúcho Moisés urusãra cásodicáite to uje chojninga: "Ca angarája gapu unejángueraque, jeoga pabai unejátique."

²⁸ Mu yingo uaque ujetiga gosi chichaga dáyipieragaja chequé unejángueraque ujetiga pota iji dáyipie, enga e pisijnaringué ome. Isocai jé urásu ujetiga e morásiji gari.

²⁹ Ujetiga bedo iji bãrachua chorei benominone aja cucha gajnaréngone ujetiga apésu, enga ajnime ¡janipe! enga ṍra. Omitigai u gu ujetiga bedóraque chojmára marínga, ca ducarãte ua aja gajño pioi jnese.

³⁰ Isocai jé u ujetiga bajmanai iji bãrachua upúsu bajurérigui ipesungóri. Enga be enga aquesu enga ṍraja toniñeque. Arei jé u gu ujetiga parãte uñeque atique marínga, jé ca ducarãte uñéngaja gajño pioi jnese.

Jesús acajnaquéode u unojo ome pabai piyágode, pacoté piyáguedie ore rĩ

³¹ Uacadúcho Moisés urusãra cásodicáite to uje chojninga nanique: "Ujetiga uacuñeque pota piyátigome dacotéraque, doi enga chutṍri pangarádejnarique ujetiga chisi ome darusãratígo ome ujetiga chisi ome dacoté. Enga úringai ũrei jogadi u ujetiga cha uaté."

³² Mu yojningame uaque: ujetiga jnanírique cha dacotéraque bisideque, enga ca uaté cho dabai iji jnani unejátique marínga, uaté nóna jnani unejátique enga e pésu pisijnaringuei. Enga chequé piyague abai ejogatei jnani pésapo pisijnaringuei to rĩ. Mu ore isijnaringuéone bai upúsu uaté iyásõri dabai bajaque. Cachi iyague dacoté nanique gu uje bárique que cuse.

Jesús chojninga: –Ayáyo ẽ́cacho cuchade ujetiga pangurete ua ome.–

³³ Ísega adúcho uacayode jnani bajácho ore uruode quigode uje ore chojninga: "Ujetiga ẽ́cacho bangarádejnai Dupade ome baruode ujetiga pangurete ua ome enga ca toque ujetiga ca baruode tocade."

³⁴ Mu yojningame uaque: ca ẽ́cachopise cuchade ujetiga pangurete ua ome. Ca ẽ́cacho gatajnoquei ujetiga pangurete uaque. Chamáñaje yoqueduguéjnai Dupade jogadi u gatajnoquei gu.

³⁵ Jé cho jnumi ujetiga ca ẽ́cacho to ujetiga pangurete uac. Chamáñaje Dupade gajneque gu. Jé cho guidáidatéi Jerusalén, uje Dupade, yoqueduguéjna cuchábi, cho dedaipísi iji uté gu.

³⁶ Ujetiga be ga ẽ́carirase batoi marínga, a ca toque go ujetiga écãre batererodie enochárique gotique. Chamáñaje Dupade ipesute batererodie enochade gu.

³⁷ Ueradi u ujetiga ojnicho: "yipésu jne," jeoga "ca yipésu jne." Enga e gusu. Uje uaquẽcarane udore cucha uñane garani u Satanás gu.

Jesús acajnaquéode ome ayoré jmatágode

³⁸ Uacadúcho to uje Moisés uru cásodicáite chojninga nanique: "A uñeque chusaque dojórique ayoré edóraque jne, enga jé basa pusíga usígasṍri edo to jne. Adi jé upo rĩ ujetiga piberoque uñeque pãtarátique. Enga jé basa piberoque iberosṍri pãtarátique to jne."

³⁹ Mu yojningame uaque: jé ca arungu babai ome ayoré sijnátique. Quigueque uñeque a chujé baré te, enga õre baré uña tiji yui enga chujépo to rĩ.

⁴⁰ Ujetiga uñeque chijna ua aja dacasutedie iquei ujetiga qué chachoque batique enga uté chutápoi baguidé te rĩ enga asi ome. Atapója baguidé nañoré gaté rĩ ujetiga asíapome rĩ.

⁴¹ Ujetiga ore angarátique chijna damenuringuei aja ua enga chiroque ua aja dagúcharigo ujetiga ajnongamája dajei gatócoro chojmaráraque, asa saque. Enga ajnóngaja ojningai iquérique.

⁴² Jé basa bojórique ayoré chutai bagúcharique enga asi ome bu. Jeque uñeque pota ujetiga qué chijnama bagúcharique, enga ca acusu ua ome. Asíapome bu rĩ.

Jesús chacate ayorébui ujetiga ca ore chedu dajnoraquérigo ome dajorane

⁴³ Jnani bajade ore urúo nanique uje ore chojninga: "Ajnóra bajnorangórone, mu ca ese betesórone unétique."

⁴⁴ Mu yósi tome uaque: ca ajusécho uacamajosórone, uacojo ayoréo, enga ajnórañopise udore ore gaté. Ujetiga uñéngo cho damajo uaque enga acatecãchoi Dupade ome udore gosode.

⁴⁵ A apéso yuruode unojo jne enga uacáringáringo Dupade ape pijoque. Uacamóño uje uacai Dupade iji gaté ipesute dírecaringuéi ome sijnángone, parágode ore. Chirógapo guéode aja jnumi te rĩ ome ayoré parágode, sijnángone ore jnese.

⁴⁶ ¿Ja Dupade tẽrarásaja uaque ujetiga eduyo uacajnorasórone uacojo ayoréo ujetiga ajnóraño ore? Uacamóño uje jnani sijnanguipísode que ore changureta Dupade mu jé ore chijnóra dajnorasórone to.

⁴⁷ Ujetiga uacapajnotáringai gusu ome uacajorane, querénga cucha gotique. Uacamóño uje ayoréode jé ore isoca to uje cáma ore chiraja Dupade adode.

⁴⁸ Acãcho uágaja uacai Dupade uje déji guéode uje que iyoguérique cuse.