Matéo 19 - Dupade Uruode

Jesús cho ore quique ome "divórcio," ujetiga jé ca gosi cha dacotéraque

¹ Unojo quigade uje Jesús chejna dacajnaquéode guesi enga jnoji ore uniri Galiléa. Enga chise ore uniri Judéa to iji tié Jordán uéchai uje déji guedé garani.

² Enga ayoré dipesérigo ore nóna uté to. Jé u uje chiqueta ejnaretade ore aja dajesui.

³ Fariséode uñéngo ore chise Jesús ome daringaquérigo ujetiga pijoque Jesús igajnarétigárique ujetiga chajnai ore. Enga ore chojningame: –¿Ja jé areque a ujetiga uñeque cha dacotéraque enga chapúsaja bárique?–

⁴ Mu Jesús chajnai ore enga chojninga: –¿Ja ajicho Dupade uruode to a ome ipesudode iji erámone taningane? Uje jogadi jé u to uje Dupade pésu jnani bajai, chequé bajé ore ujetiga ore nóna ñane.

⁵ Jecute Dupade uruode chojningápo rĩ: "A jnacari jnoji dayé, daté ore dosadi enga a nóna dacoté jne. Jé u uje a ca ore cãrapome ñane jne rĩ, mu a jé chojmára ore jne iji jnumi."

⁶ Mu ujetiga Dupade ca ajéo ujetiga ore cãra ome ñane, gajnareque ujetiga uñeque qué juéga piyai ome ore ome ñane. Chamáñaje Dupade jé oite ore aja ñane gu, ujetiga chojmára ore iji jnumi.–

⁷ Jé u uje ore chojningame Jesús iji dabotaquéode: –¿Gotique gu a? uje Moisés chojninga nanique: "Ujetiga uacuñeque pota piyátigome dacotéraque enga doi enga chutṍri pangarádejnarique ujetiga chisi ome darusãratígo ome jne enga chisi ome dacoté. Enga úringai ũré jogadi u uje cha dacoté."–

⁸ Jesús chajnai ore enga chojninga: –Moisés churúsãre darusarane unojo nanique gu uje chiraja uacojode jnanío nanique uje que ore tangárapoi Dupade rĩ enga ore chajo rágaja dacoté piyáguedie nanique. Jecute juéga nanique ujetiga uñeque cha dacotéraque. Mu que Dupade áyipie gotique ujetiga jnanírique cha dacotéraque iji taningane.

⁹ Mu yojningame uaque: jnanírique tṍra dacotéraque bisideque jne enga ca bai u jnani quedéjna pimochápasarique, enga a pisijnaringué jne ome uté gosi ujetiga chisa chequé unejángueraque gaté. Enga uñeque ujetiga nóna chequé piyágueraque, jé pisijnaringué to ome uté gosi.–

¹⁰ Jé u uje acadigode ore chudute uruode, enga ore chojningame: –Ujetiga cuchade isocai tu baruode udore, enga omi jé u ome yoque ujetiga ca pijõra chequéraque.–

¹¹ Mu Jesús chojningame ore: –Que togome ayoréode jnese go ujetiga ca pijõra chequéraque. Gusu udore ore uje Dupade jé áyipie ome ore.

¹² Yirajágo uje jnanione déji uje isójna ore, jé iji ore úringane disi caratacho. Jecute que togome ore ujetiga ore nóna chequéraque. Uñane dépoji rĩ uje jnanione ore jnari ore ome ore úringáringo darócho. Jecute ore chijnime ore adode. Jé u uje que ore áyipieraque déji chequé pijõráraque. Mu cho jetiga yojningane u udore uje yojninga: jnanione déji uje que ore pota chequé pijõráraque. Ore u uje ore chejna dáyipie aja ore eduguéjnai Dupade iroquéode. Jé u ujetiga uacuñeque chiraja re eti uñeque cho udore uñeque enga be enga jé o uñeque.–

Jesús changacãre disiode

¹³ Ayoréode uñane ore chijna dabode aja Jesús ujetiga chicha dajmainie aja ore enga catecã́ri Dupade ome ore. Mu Jesús acadigode ore chanire ore enga ore chijócãrirase ore iji dejode.

¹⁴ Mu Jesús chojningame dacadigode: –Jé dóji enga disabode ore chisósi yu to. Enga ca ãracho yejode ome ore. Uje Dupade a chopise darása iji disi parátagabode sudore ore gajnúringo jne.–

¹⁵ Jé u uje chicha dajmainie aja disiode udore ore gáyode. Quigade enga Jesús jnoji ore idáyode iji te.

Jnacare ugúcharã́i catecã́ri Jesús

¹⁶ Udojo quigade ga jnacánique tibágui Jesús nanique. Enga catecã́ri enga chojningame: –Jesús á, areguipise ua. Enga baraja cuchade. Ango cucha arétigome yu ujetiga yipésu enga yiqueca iji deréjnane jnese.–

¹⁷ Mu Jesús chajnai uté uruode enga chojningame: –¿Jé gotique gu a uje bacota yu ome yúringárique ayoré areque? Uje gusu Dupade uje ujñapetaque. Mu ujetiga apota eca iji deréjnane jnese, jé be Moisés iroquéode quigode.–

¹⁸ Jnacari chojningame Jesús: –¿Déji rique a gotígo?– Jé u uje Jesús chajnai uruode enga chojningame: –U unojo: ca ajé bojórique ayoré. Jé ca apotapo bojórique ayoré acotéraque rĩ. Jé ca ori. Jé ca o barupatáringa ome bojórique ayoré rĩ.

¹⁹ Mu angári bayé, baté ore acajnaquérigo ome ua. Ajusípise bojode ayoré guio. Enga gajnui jé u uje bajuse beo.–

²⁰ Enga jnacari uté chojningame Jesús: –Cachi que yiyó Moisés urusarane cucha puyaque uñeque gánique erĩ́e, jé aja yúringai tuné jnacare. ¿Jé yipesute cucha uñeque ujetiga eca yu iji deréjnane jnese to?–

²¹ Mu Jesús chojningame: –Qué cucha amiri déji ome ua ujetiga ese báringárique ujñapetaque. Be jne enga ẽra bagúchade jnese enga asi ome oredie ome ayoré jmatágode. Enga jogadi jé u jne ujetiga ese báringárique piquetaque iji Dupade idai to iji gaté. Enga a Dupade tẽrája ua jne ome bacaniratiguérique iji gaté. Ujetiga ejna badode unojo guesi enga be enga ajína yu to.–

²² Mu jnacari chopise dáyugu re. Chijnóra dagúcha dipeséode gu. Jecute que togome ujetiga doi Jesús uru quigode.

²³ Mu Jesús chojningame dacadigode: –Angachopísi yu. Piraguipise ujetiga ayoré atátique chise dáringárique Dupade urása to.

²⁴ Qué yigota yuruode iji jnumi ome uaque. Uacarajáyo uje que togome cuchiso cuchátique ujetiga chacája ojnatique edóraque. Enga jé adi tu ome ayoré atátique to ujetiga uñeque chise dáringárique Dupade urása. Jé ore cho ñane ome dáringane cucha ibiracho gu.–

²⁵ Uje Jesús acadigode ore chudute Jesús acajnaquéode unojo, enga ore cho dáyugu re enga ore chojninga: –¿Chimo jóroque re daquetade gosoderase?–

²⁶ Jecute Jesús chajire ore enga chojningame ore: –Jé ũré uaque uje cucha ibirade cuse uje que togome jnanírique ujetiga pésu, mu que cucha ibiratique cuse ome Dupade.–

²⁷ Enga Pédro chojningame Jesús: –Yocangaráni á, uyoque u uje yijíñongome cuchade jnese ica uje yijínango ua. ¿Jé yocajnetique jne a ome Dupade?–

²⁸ Jesús chajnai enga chojningápome ore rĩ: –Ajichopise yuruode unojo uje Dupade a chinoningase cuchade jnese jne. Enga Dupade utocaidi uyu a yácariji yiyaripi nanganataguipísirique gai te jne ujetiga yajire cuchade aja quigode jnese. Yacadigode uaque, a ayáyoji piyaripi uñéngo gáningo jne uje a gare iji yirídai jne iji yirosadode. Enga uacajnei a u jne ujetiga ajicho israélgosode adode aja quigode jnese uje ore uáguedie gare iji yirídai.–

²⁹ Enga Jesús chojningápome ore rĩ: –Ujetiga uacuñeque noñome daguíjnarique iji te ujetiga uñeque jno yujnomei údi, jeoga dajõrárique, jeoga danique, datéraque, jeoga dacotéraque, jeoga datígo, jeoga dejnatique. Mu a Dupade chatire uaque gosi gai jne, enga gueranone a suépise uacañomone cucha gai gaté jne. Mu que gusu cuchade udore gotique, mu a nóna pucuecaringuei jne iji deréjnane ome uté gosi.–

³⁰ Mu Jesús chojningame ore: –A uacuñéngo déji jne ujetiga ibijoque uacuñéngo iji erámone unojo, mu a uacuñéngo ca pijoque to jne iji Dupade idai. Jé basa uñéngo ore déji jne ujetiga ca ibijoque ore to iji erámone unojo. Mu a ibijoque ore jne jeta ore chise Dupade idai.