Héchos 4 - Dupade Uruode

Pédro, Juan ore déji eduguéjnane gari

¹ Uje jé Pédro, Juan ore chacate ore ga sacerdóteode, Dupade iguíjna cuchábi irodisórone ore eduguéjnai, saducéode uñane ore díji ore.

² Enga ájningarãque ore ome Pédro, Juan ore. Ore chetaque gu uje ore chacate ayoréode enga ore acajnaquéode quigode u uje que potigayaquérique déji uje togode ore ecápo rĩ. Chamáñaje Jesús ecápo rĩ iji dáringai toque quigade gu.

³ Enga jé u uje ore chisa Pédro, Juan ore enga ore jno ore údi aja ore jurúgaisórone iguíjnai. Uje guedé e jno enga ore suru ore gai aja dire uñai.

⁴ Mu jiei ore uje ore tangári Pédro acajnaquéode uje Pédro chacate ore iji Dupade iguíjna cuchábi ajei. Enga jiei ore uje ore changureta Jesús. Gusu jnanione ore isecaranone ga idógosiji 5.000 uje ore changureta.

⁵ Dire uñai enga judíode ore eduguéjnane, ore angaránone, ore acadisórone uje ore chacate ore ome Moisés urusarane ore chamáta ñane iji Jerusalén.

⁶ Enga ore cháta rágaja sacerdóteode ore eduguéjnai uje i tu Anás. Caifás, Juan, Alejándro ore déji ore gari to. Enga sacerdóteode ore eduguéjna cuchábode ore iguiosode jnese déji to.

⁷ Ore chiroque darógode aja Pédro, Juan ore ujetiga ore doi ore. Uje e ore di ore údi enga ore chicha ore aja dajei. Enga ore catecã́ri ore enga ore chojninga: –¿Jé gosi iroque uágaja jnani noñai uje uacaquetáyo diríca? ¿Oyo ringome uje uacaquetáyo a?–

⁸ Espíritu Sánto irágu Pédro ajei enga jĩrique chajnai ore ga chojninga: –Eduguéjnane á, israélgosode angaránone uaque á, angáchoi yuruode.

⁹ Uacacatecãchoi yoque que ome cucha dacate ueradi uje jnani noñátique chise dáringárique piquetaque. Enga a apótayo arajáyo to uté iquetangónique cucha.

¹⁰ Jecute a yingopísa quigode jnese ome uaque jne. Yigaidi u gu ujetiga israélgosode arajáyo jnese uje jnani udé uje déji uacaquei etoque gu Jesús nazarétgosi ujopié. Uté u uje uacajéyo uje uacajóyo aja curesei. Mu Dupade chiquetápo rĩ enga jé ecápo rĩ.

¹¹ Déji Dupade uruode uje guiguíjna cuchábi ipesungórone ore guetegue cucarané nóña enga dequedójnariejna iji quigade enga ore chicháji guiguíjnai jogate obiréjnapisi. Enga Jesús gajnua tu cucarané uaté.

¹² Enga que piquetangore uñeque cuse. Gusu uté. Uje Dupade ojningai chojmára iji erámi unirisórone jnese ujetiga chiqueta ore. Enga Jesús uté u.–

¹³ Uje eduguéjnane ore chimo uje Pédro, Juan ore chacate ore ga que ore chagutu rágome ga ore tijapísa ore. Uje ayoré gajnareque ore, enga que urénga ore doi escuéladie to. Mu ore chirajapise cuchade. Ga quene eduguéjnane jnusina uje Jesús jorane u ore nanique.

¹⁴ Enga ore iquetai jnani noñai déji ore gari iji ore aquíningai uté. Jecute eduguéjnane que ore chiraja daru quitígome Pédro, Juan ore.

¹⁵ Enga eduguéjnane chiroque Juan, Pédro ore aja guesi. Uje gusu ore enga ore botare ñane.

¹⁶ Enga ore chojninga: –¿Jé yoco ringome udore ore jne a? Chamáñaje ore ipesútedatéi ujnomei e chubu Jerusalén údode jnese. Enga ore chiraja jnese ujnomei uté úringai ũré, jecute que togome yoque ujetiga yotigáco iji ore iquei.

¹⁷ Mu yicoi enga yijmongacója ore jne enga ca ore ujnomei jnome erámi. Enga a yãrájome ore jne iji de diri, jec aja dire piqueminórone ujetiga ca ore chacadápo ayoréode jne rĩ ome Jesús adode.–

¹⁸ Eduguéjnane e ore tibidi Juan, Pédro ore ga ore chojningame ore: –Jé ca acachópo ayoréode ore ome Jesús adode jne rĩ.–

¹⁹ Mu Pédro, Juan ore chajnai ore ga ore chojninga: –Beyoi uacajéningo ¿ujetiga omi tu ome Dupade ujetiga yangácoi uaque enga yiyágo yangácoi Dupade?

²⁰ Que toguipis ome yoque ujetiga yiyágo yacaco ore ome yocududigode, yoquimone cucha ore.–

²¹ Enga jé u uje eduguéjnane e jmongarapísaja Pédro, Juan ore mu quigade enga ore chiroque ore aja doi. Que ore chiraja dasocáringome ore ujetiga ore cho dajuñame ore uje socaseti ayorébui chetaque. Chamáñaje ayorébui chicota Dupade gu ome ore ipesudi uté uje cuchadaté.

²² Ore iquetai jnani noñaque sequeredie 40 iji yui uje base, mu e etoque gu ore ipesútedatéi uté.

Jesús anguretasórone que ore chagutu re ome Jesús adode

²³ Uje ore chiroque ore aja doi ga Pédro, Juan ore tibágui dajorane. Ore chingo sacerdóteode eduguéjnane, judíode angaránone ore uruode aja ore.

²⁴ Uje Juan, Pédro ore jorane ore chudute ore ojñane ga ore catecã́ri Dupade enga ore chojninga: –Yoque Dupade á, cuchade ipesungóri tu ua iji gaté, iji jnumi to, jé iji yote quedéjnane rĩ. Jé bapesute cuchade jnese.

²⁵ Batṍri Bajopié Espíritu Sánto ome baroi David nanique ujetiga churúsãre baruode enga chojninga: ¿Gotinguiringuipise uje purása quedéjnane ore chiboráta? ¿Gotinguiringuipise to uje israélgosode ore cho jóroque dáyipie bisidéguedie ome yu?

²⁶ Eduguéjnane ore chingo dáyipiedie aja erámi, Dacasutedie iji guidáyode ore chamáta ñane to, Uje ore chetaque yocangaráni Dupade enga ore chetágapo Dupade utocaidi Crísto rĩ.

²⁷ Yoque Dupade, ore adi u icaite uje Heródes, Piláto, purása quedéjnane, israélgosode ore chamáta rágaja guidai udé ujetiga ore chimate dáyipie gajnarénguenie ujetiga ore chujé bajnacari Jesús. Ueque uté ome pisijnaringuéone múñi. Enga bajegaidi tu ome batoquéode.

²⁸ Mu uje ore chujé bajnacari ga báyipiedie ojningane cucha e tocade.

²⁹ Yocangaráni á, bamo uje ore jmongarája yoque. Mu atapísaja barógode uyoque enga ca yitodógo ore enga ca yagutúgo yógome ujeta yatatago baruode.

³⁰ Aqueta ayoré ejnaretade ome Bajopié. Enga apésu bapesútedatérigo, cucha pitijátigo ujetiga yĩ́caco bajnacari Jesús i jne uje ueguipis uté ome pisijnaringuéone.–

³¹ Uje e ore cha catecã́ri Dupade enga jĩrique ore charidi guijnatajé tãrara. Enga Espíritu Sánto irágu ore ajéode jnese. Enga que ore chagutu re ome uje ore chacate ore ome Dupade uruode.

Jesús anguretasórone que ore cãra dagúcharingome ñane

³² Jesús anguretasórone jiépisi ore mu ore áyipiedie, ore ajéode jé chojmára. Que uñeque iji ore chojningame dagúcharique: yugúchapise. Mu ore péro dagúchade gáyode.

³³ Dupade Ujopié dépisi Jesús irógode uje ore chatata yocangaráni Jesús ujnomei uje e ecápo rĩ. Ga Dupade chatapísaja danguretasórone.

^34-35 Que cuchárique chona Jesús anguretasónique gu uje ore chisi ñane iji deranone dagúcha oredie. Ore tẽra dajnepídode jnupe, daguíjnane ore enga ore chisi ome udore oredie ome Jesús irógode apóstol udore. Enga Jesús irógode chajuguína ore uje cuchade qué chona ore.

³⁶ Enga jé uje Jesús anguretasórone uñai uje i tu José doi ore jmapié uaté to. José uté gãrapi tu jnani bajai Leví. Uniri u yote quedéjnai ajã́ro uje i u Chipre. Mu Jesús irógode ore pésu José uté i uñai ga ore chĩ́care Bernabé aja to. Chamáñaje i qui tu Posõrasṍri gu.

³⁷ Enga jnani uté doi oré tome dajnepídi jnupe enga chisi ome oredie ome Jesús irógode apóstoles ore to.