Hebréos 1 - Dupade Uruode

Dupade angúromei u dajnacari Jesucrísto uje catecã́ri yoque

¹ Dupade catecã́ri yocai jnani bajácho gatuaque icaite enga isocade orocoi uje catecã́ri ore. Enga angúroméone u uruode atatasórone uje catecã́ri ore nanique.

² Mu iji ejode unojo enga catecã́ri yoque, enga angúromei u dajnacari ome yoque. Angúromei jé u dajnacari uté to uje Dupade pésu erámone unojo, gaté ore iji taningai nanique. Enga chisi ome cuchade udojo jnese icaite ome dajnacari.

³ Enga Dupade idírecaringuéi pijógapo rĩ iji Ujnacari uté. Chamáñaje Dupade adípisode jé dépisiji Ujnacari enga chojmarápise ore iji jnumi. Enga Dupade Ujnacari u uje chijocase cuchade jnese iji erámone, gaté ore ome darúdatéode. Uté jé upo rĩ uje chise erámone icaite ujetiga churu yoquisijnaringuéone iji jnumi. Quigade enga jnopome gaté rĩ. Enga chácariji dai Dupade ãrachua ome dáringai cuchape.

Dupade Abi sué Dai irógode gai jnese

⁴ Enga uté sué Dai irógode gai jnese iji gaté. Uje ore gajnei tu ujetiga yĩ́caco Dupade utocaidi aja ore, mu Dupade Ujnacari gajnei tu ujetiga yĩ́caco Dupade Abi aja uté.

⁵ Uje Dupade narare icaite enga chojninga nanique: Yape ua. Enga bai tu yu gajneri. Mu que urúo unojo ome darógode uñeque nanique. Mu uruode gajnengóri u Ujnacari. Enga Dupade uru uñane dépoji rĩ uje chojninga: A uté cho dají yu. Jé basa a yo yabi iji uté jne.

⁶ Mu uje Dupade chiroque dape taningui aja erámone nanique enga chojningame darógode gaté jogosóño icaite: Yipota eti yirógode uaque jnese iji gaté asíyo Yujnacari gai.

⁷ Jé basa Dupade uruode déji uje chojninga: Dupade cho darógode gaté jogosóño ore gajnu iji úyujna cuchábedie, acherangórone ore. Enga ore gajnunie jé upo pioque ocarádejnanie rĩ.

⁸ Mu Ujnacaripísi gajnéone urúo sué unojo gai uje chojninga: Dupade á, báringai eduguéjna cuchape que íjnoque to go iji deréjnane jnese. Eduguéjna cuchape ua enga que báyipieraque gajnarengue ome barasade gotique.

⁹ Barasique cucha omone gu. Jé basa betaque pate gajnaréngone jnese. Jecute badupade uyu yajegaidipísi u ua ujetiga baninaquéode suépise bajorane gaté jogosóño ore ininaquéode gáyode jnese.

¹⁰ Dupade chojningápome dabi te rĩ: Pangarádejná, jé bapesute erámone unojo ero jnese iji taningane. Bamaningápo guéode rĩ ome bajmainie.

¹¹ Bapesudode udore a ore chise deruéningo jnese jne. Mu a ca beruénique cuse jne iji deréjnane. Bapesudode udore gajnúone u piguidedie jne uje icha iji taningai, mu jĩraque ijaro.

¹² Jecute a cho jne ujetiga aya bapesute bajade udore jnese, enga apocásu ore aja ñane. Enga a écãre ore jne ome cucha ichade. Mu ua enga a ca écãre batique jne, mu a jé bate te jne iji deréjnane jnese. Uje eyúgojma ua gu.

¹³ Dupade chojningápome dabi te rĩ: Be yãrachua enga ácarabíji, jé aja ujetiga yinoningase bamajosórone ore jnese. Enga que uruode udore gajnengónique u irótique uñeque gotique iji gaté, mu gajnengóri u Ujnacari.

¹⁴ Pimojma Dupade irógode gaté unirísoño jnese, enga que ayoré ore gotique. Mu Dupade utocaidode u ore ujetiga ore chátaja iquetade ayoréo. Yojningane u udore ore jnese uje ore gajmaque panguretigai ome Jesucrísto to.