Ésdras 5 - Dupade Uruode

Chise diri nanique uje judíode ore chirópo dangureni Dupade iguíjnai aja gaté rĩ uje i u Témplo

¹ Dupade uruode atatasórone déji nanique uje ore íode u udojo: Hagéo u uñai, enga jnani bajai Ido ujnacari upo uñai rĩ uje uté i tu Zacarías. Uje israélgosode ore angarádejnai Dupápisi catecã́ri jnanione udore nanique enga ore chatata dajnéone Dupade urúo ome darasade ore nanique iji ore uniri Judá údode, jé iji ore idáidatéi Jerusalén údode to nanique.

² Jecute Dupade iroguipísode ore pésapo Dupade iguíjna cuchábi aja gaté rĩ, uje udore ore íode u udojo: jnani bajai Salatiel ujnacari Zorobabel u uñai, enga jnani bajai Josadac ujnacari Jesúa upo uñai nanique rĩ. Ga Dupade uruode atatasórone Hagéo, Zacarías jecucha ore déji ore gari to nanique ujetiga ore cháta cuchade aja ore.

^3-4 Mu eduguéjnane uje ore unirone déji guedé cacadi yui iji tiédaté Éufrates uécha uñai ore chudute uje e ore chirópo Dupade iguíjna cuchábi aja gaté rĩ, enga ore chimáta raja ñane enga ore chicáji Jerusalén. Yojningane udore uñane ore íode u Tatnai, Setar-boznai nanique. Uje ore diji Jerusalén ga jĩraque ore catecã́ri judíode ore angaránone enga ore chojninga: "¿Gosi urúo ome uaque jeta eróyopo Dupade iguíjna cuchábi aja gaté rĩ? ¿Gosi juéga jeta eróyopo uacajuyaquéode aja gaté to rĩ? Atatayo uacarósoningo íode ome yoque enga yurúsãco ore íode jne, jé aja uaquéode to uje uaqueróyo Dupade iguíjnai aja gaté."

⁵ Mu Dupade charanguipise israélgosode ore nanique ome ore, enga que ore cha ore chiro Dupade iguíjna cuchábi aja gaté, aja gaté. Mu ore etesórone udore eduguéjna ore churúsãrapo darusarane rĩ ome pérsiagosode ore eduguéjnai uje i tu Darío. Ga ore chirote eduguéjna cuchábi Darío urusãratígo yui jeta chise ore enga jé u jne jeta ore chaquĩ́rapo israélgosode ome Dupade iguíjna cuchábi úringai poraque rĩ.

^6-8 Enga ore eduguéjna cuchábi Tatnai uté uje gajnepídi tu ore idáyode iji guedé cacadi yui iji tiédaté Éufrates uécha uñai, jé aja eduguéjnai uñai uje i tu Setar-boznai, jé aja jorane eduguéjna uñane uje ore idáyode déji guedé cacadi yui iji tiédaté Éufrates uécha uñai, udore ore cháta dáyipiedie aja ñane jnese iji darusarane ome pérsiagosode ore eduguéjna cuchábi uje i tu Darío. Enga ore urusarane quigode u udojo ome uté nanique: "Yocurusarane gajnengóri tu ua, yoqueduguéjnai, Darío. ¡Yipécopú ga uajate ua iji baniri jõ! Yicagóji judíode ore uniri Judá diríca enga yimóngopise cuchade iji diríca, enga yingongome ua yoquimone cucha diríca. Ga yingongome ua uje yimóngopo Dupa Pujnuéngaisṍri iguíjnai rĩ uje ore chirópo aja gaté diríca rĩ. Enga e ore chimate cutádode aja gaté ga e ore chirópo orotabidode aja gaté rĩ enga ore orapídode e so aja gaté. Ga ore chaquesu cucaranenie péode ga ore chiro aja gatéode ome. Enga e ore chimate cucaranenie aja gaté ga ore pésu ajei ga ore chicha táblade aja cucaranenie yui iji ajei enga ore na táblade aja ñane ajéode enga ore chicháji cucaranenie yui iji ajei. Enga ore chiro enga ibisoguipise ore orapídode aja gatéode. Enga e ore chimánaja gatéode enga ueradéjnapise ore orapídode.

⁹ Enga yicatecãcoi judíode ore angaránone ga yojnijome ore: '¿Ama gosi iroque uágaja Dupade iguíjnai uje e uaqueróyopo aja gaté rĩ a? uje uacajéyo táblade aja cucaranenie gai gaté iji uacorai tuté ajei.'

¹⁰ Enga yicatecãcoi ore enga yojnijome ore: 'Beyoi ga angoño uacarósorone íode aja yoque, jé aja uaquéode rĩ. Uje a yingongo uaquéode udore ome yoqueduguéjna cuchábi pérsiagosode ore eduguéjnai Darío jne.'

¹¹ Mu udore ore chajnai yocuruode ga ore chósi tome yoque: 'Yoqueduguéjnane uñai ipesute israélgosode yocangureni Dupade iguíjnai udé aja gaté nanique. Enga ujnomeranguipise yocojningai uté eduguéjna nanique. Enga uacamóño uje yocangureni Dupa u uje pésu jnumi, gaté ore nanique. Ga yijnórango uté enga yipéco ajegaidode cucha jnese. Uje pajnangarañaque Dupade iguíjnai udé nanique, enga yirógopo rĩ aja gaté.'

¹² Enga jé u uje ore chatata dáqui gatéode isocade ome yoque. Enga ore chósi tome yoque: 'Yocangureni uté Dupa u uje idai déji gatajnoquei. Uje Dupade uté chimo yocáquiode ore ate gajnaréngone nanique enga ore ijnimique ájningai nanique. Ga jé u uje chijnime ore iji ore uniri nanique ga chicha ore aja babilóniagosode ore eduguéjna cuchábi jmainie nanique eti ore sué ore gai nanique. Ga babilóniagosode ore eduguéjnai uté i tu Nabucodonosor nanique, uje uté urasapísode u caldéagosode nanique. Ga uté u nanique uje ajnangarañaque Dupade iguíjna cuchábi taja dejode nanique. Ga jé upo nanique rĩ uje oite yocáquiode udore aja daniri Babilónia nanique.

¹³ Uje siqueredie jiei iji cucha dacadode quigade nanique enga babilóniagosode ore eduguéjna cuchábi déji nanique uje i tu Círo. Uje uté guejna siqueré qué chojmara nanique iji dáringai eduguéjna, enga chirógapo judíode uyógaja yocuniri nanique rĩ ujetiga yajníngopója rĩ. Ga uté gaidi u nanique gu jeta yirógopo Dupade iguíjnai cuchábi aja gaté rĩ.

¹⁴ Enga Círo uté chijnime Dupade gajnéone cucha oreránguejna nanique uje ore pésu iji óro, pláta ore nanique. Uje yoqueduguéjna cuchábi Nabucodonosor casicaite oicho udore aja daniri nanique enga chicha dangurenone dupa quedéjna iquéode nanique. Círo uté ipesute yoqueduguéjnai Sesbasar úringai eduguéjna nanique ome yoque, enga chisi ome Dupade gajnéone cucha oreránguejna udore ome uté jeta jno údi aja yocuniri ga chicháji Dupade iguíjna cuchábi ajei.'

¹⁵ Enga judíode udore ore chojningame yoque diríca: 'Ga eduguéjna cuchábi Círo casicaite catecã́ri yoqueduguéjna Sesbasar nanique ujetiga chise yocuniri casica jne enga chirópo Dupade iguíjna casicaite aja gaté jne rĩ iji jogadi casicaite. Ujetiga chimánapo aja gaté jne rĩ, enga jĩraque chichapo Dupade gajnéone cucha oreránguejna aja jogadi cásodicáite jne rĩ.'

¹⁶ Ga yoqueduguéjnai Sesbasar u uje nóna yógaja yocuniri udé nanique, ga jĩraque chiro Dupade iguíjna cutádode aja gaté nanique iji Jerusalén udé. Ga qué u uje uaqueso yóguiji gai uje qué yirógo Dupade iguíjna cuchábi aja gaté enga cáma yimáco.'

¹⁷ Uje yudúco judíode udore ore uruode udojo diríca enga jĩraque yirójo cucha dacadode aja ua jeta araja yocurusarane quigode to. Uje yijóchago bajei údi, yoqueduguéjná, ujetiga bajéo enga be yocuruode jne. Ujetiga acué yoqueduguéjna casicaite uje i tu Círo nanique, uté áyipie cásidicáite iji begode darujna ao uje purúsãra áyipiedie iji darujna aode nanique eti ca Círo áyipiedie déji begode darujna ao ome judíode ore jne uje chiese iroque ore aja Dupade iguíjna cuchábi úringai poraque nanique, enga be ga arángome ore jne jeta ca ore chiro aja gaté. Mu be báyipiedie quitígome cuchade udore enga arúsãre báyipie quitígo to jeta jĩraque yirajágo cuchade iji udire quitígo. E gusu yocurusarane ome ua."