Efésios 2 - Dupade Uruode

Dupade chijnime yóguiji yocúringane toque jmainie ga chicha yógaja diri, enga gose uté cutejmai ijnoraquédaté uté

¹ Ome éfesogosode uaque ga e yáyipie basája uacaquiga cásodicáite uje qué uacagúsoji uacáringane tocho gai ome Dupade uté nanique. Chamáñaje uacoyo jmíti, jmíti ome Dupade uté gu iji deréjnane udore, enga gose uacasijnaringuéone, uacangoninguite paritigade udore ome uté. Enga qui jé upúsu uje cucha toguei uacáyipiedie ome Dupade uté.

² ¡Jé cho ujetiga uacaquecáyo jóroque jõ, chamáñaje que toc ujetiga uacáyipieraque cunguésõri Dupade atique gu! Ga uacajmapié uaté jé chopísome uacojode ayoré amirone udore jnese uje ore chedu dáringane jnutiminóño adode. ¡Irágupúsu uacajéode jnese ome pisijnaringuéone, páyipie gajnarénguenie ore iji deréjnane udore nanique! Enga gose uje pujopié noñánguenie ore asuté cuchábejna upúsu uje jecucha uacangáchoi to nanique. Ga yuruode qui tupúsu Satanás uté. Uté u uje jecucha diguiji gaté yui gatuaque, enga chijocase udore ore áyipiedie jnese uje ore tagu Dupade uruode aja ome dáringane angoninguite paricho.

³ Mu que gusu uágome uacajmapié gajnarengue uaté, yijorane uaque á. Cachi yoquisocabeque jnese uje yajógo yógaja yoquipotigué ayoréode adode to nanique. ¡Que yãrájo yógome yoquipotigué ayoréode gajnetique cucha uñeque arĩa! Uje yichajo yocáyipiedie aja cuchárique, enga jé yicoi yocáyipie gajnarénguenie udire quigode aja guesi to. Ome yocadi uté ga jé yoco udore uñane jnese uje ore basíji datedie ome dáringane ayoré jnutiminóño, enga ore gajnenguírase Dupade ájningadatéi ujetiga tocade ome ore.

^4-5 Jé ũrepise uje Dupade ájningadatéi gajnesórone urásu uyoque jnese arĩa. ¡Mu posongaquei irágupúsu Dupade uté ajei, jõ! Jecute ome cutejmai ijnoraquédaté uté ga Dupade cháta yógaja Crísto enga chisíome pucuecaringué ichai ome yoque. ¡Chimo jóroque re! uje Dupade pésu dasoca pitijabádi uqué ome yoque uje qué yugúcoji yocúringane tocho gai ome uté múñi. Chamáñaje yoquisórone jé u yocate gajnaréngone gu. ¡Adójnachopísa, yijorane uaque á, uje uacáringane piquetacho garani tupúsu Dupade icaniratiguédatéi uté, enga gusúpusu!

⁶ Enga Dupade icaniratiguédatéi pijoguipise to uje Crísto, yitojmárangopísiji jnumi. Chamáñaje Dupade cháta yógaja dajnacari uté uje chiringare uté iji itoringai nanique. Enga que gusu uje yijínango Crísto uté aja ĩrijíningai uté, ujetiga yiquecágopo rĩ ome yocúringai icha. Mu datéringai u uje Dupade chátapó yógaja Crísto uté rĩ iji charidi iji gaté, enga e pésu jeta yácagoji gari iji uté.

⁷ Dupade isocai jé u uté uje chingongara dapararinguei aja dosongaquei gajnesórone uyoque gu uje Crísto, yitojmárangopísiji jnumi. Enga Dupade gaidi tu ujetiga icaniratiguédatéi choqui guesi ome dáringai oreránguejna iji dire piqueminórone jnese jne. ¡Chamáñaje cucha gose Dupade icaniratiguédatéi uté gu, enga que po ome úringai cuchadaté gotique!

⁸ Jecute adójnacho uje Dupade e chiqueta uaque gu dacaniratiguédatéi ome uacanguretigai iji uté. Enga que garani u uacadode uñeque go. Mu Dupade guẽrate bisideque uacáringane piquetaque ome uaque.

⁹ Que toguírase arĩa ujetiga ayorérique ipesutique cucha uñeque chiborátarásaja uté gosi úringárique piquetaque. Enga qui tu gu jetiga jé ca uñeque chosi riji gaté ga chojningárasa ome dajoyaquéode: "Dupade chiqueta yu gu yátegoningáne udore."

¹⁰ A jé ca uñeque chisírase dabánique arĩa, uje Dupade u uje chiqueta yoque. Ga uté cho dapesute cucha ichai iji yoque, enga chisíome pucuecaringué ichai, páyipie ichadie udire ore ome yoque gu uje Jesucrísto, yitojmárangopísiji jnumi. Uje Dupade ajequigode ome uyoque jé iji piquéode u ujetiga jecucha yocátegoningáne cusirase gatuaque iji yocucuecaringué ichai udé. Enga jé u uje Dupade e pésu dáyipie ome pátegoningáne quigode udore ujetiga dimane udore ome yoqui. Gaidi tu gu ujetiga jecucha ga yipécorásu udore ome uté.

Páblo uté júdi tu Crísto átedatéi uje pésu ome judíode, purása quedéjnane uyoque jnese ujetiga yitojmárango iji jnumi

^11-12 Jecute ome yujnusinamáinone cucha ucode, Jesús acho ome uaque, yijorane uaque á, yipota jetiga jé ca acadíchoi deréjnane udore iji uacaquiga cásodicáite uje cáma agúsoji uacáringane Crísto gajnecho. Uje uacabasóji uacáringane purása quedéjna nanique, enga qui tupúsu uje que judío uaque go. Enga cuchiyi tu uje que beyoi judíode ore isocabei "circuncisión" uté to uje ore chica dabáyode. Jecute judíode jé icotaque re uje picaque ore gai. Ga ore dojnóngaja uaque enga ore chojninga: "Que ore chica dabáyode go." Jé ũré uje picaque judíode ore, mu gajnarétigai u uje ore áyipiedie chedu pisoca guesíminóri uté iji daoi gai, uje a pipesute ome ore jmainie múñi. ¡Que pecãra ore áyipiedie, jecute que cuchárique tṍraji uté! Mu ¿uacáyipiedie chorási ringome uacasocade nanique a? Ajnusináño uje uacagúsoji quedéjnarique ome judíode ore ijnati Crísto uté. Enga uacagúsoji guesi to ome israélgosode ore uáguedie ome uacáringane purása quedéjna, jecute que pujuegádome uaque ujetiga átayo uágaja ore. Que gusu uté, mu Dupade ichagájade darúo uje israélgosode udore ore cho dajnéngu, enga unejaque uágome to. ¡Enga que toguírase ujetiga anguretáyo cuchárique yui ome uaque nanique! Jecute que uacaquetangónique cusipise ome uaque iji erámi tudé, uje que arajáyopise Pangureni Dupade uté gu.

¹³ Mu e cuchade chécãre re ome uaque. Iji deréjna cásodicáite iji uacaquigade udore ga jé ũrepise uje idájapise uáguiji Dupade. Mu uje e uacatojmárañoji Crísto uté ica, enga quene jogadi tu uje Dupade chorei uáguiji dei. ¡Jecute e idógosipise uáguiji Dupade uté, enga gose Crísto uté iyoi úringai pojneque! Chamáñaje Crísto chojne ome dayoi ome uacasijnaringuéone úringane pĩrocho gu.

¹⁴ Jecute adójnachopísa uje Crísto jé upúsu yocajesereringai guẽrasṍri uté. Chamáñaje uté úringai pẽrapaite ome yoquisijnaringuéone iborátajai tu ujetiga judíode, purása quedéjnane yocajéode cho sere ome ñane jnese. Ome Crísto isocai uté ga e chimate puague gáredie uyoque aja ñane enga pésu ujetiga chojmarápise yóguiji jnumi. Jé ũrépise uje jiépisi yoquetétigade ome ñane nanique, purása quedéjnane, judíode uyoque. Enga cho ujetiga pujuyaquérique suru yocujai. Mu gosi déji nanique ga chajnangarase pujuyaquei uté uje chãraque yocujai. Enga ajnangarañasṍri jé u Jesucrísto. Enga cuchade udojo quigode upúsu uje uté doi ga chinoningase yoquetétigade jnese ome datoringai uté.

¹⁵ Yoquetétigade ome ñane ero jé u Moisés urusarane cucha puyácho udore quigode, uje léyode udore gaisõripísode u judíode. Mu Crísto chĩropise léyode udore jnese iji jnumi ome datoringai uté. Gaidi tu gu ujetiga pésu puague chojmaráraque iji puague gáredie uyoque enga qui tu ujetiga yocaoi chojmara uje Crísto, yitojmárangopísiji jnumi; enga uté isocai uté jé chiborátaja uje quene pajesereringai jogadi u.

¹⁶ Enga Crísto gaidi tu ujetiga chimanirase judíode, purása quedéjnane ore jnese aja Dupade ome ore aoi uté uje chojmara; chamáñaje e íjnoque ore etétigade ome ñane gu uje e Crísto chinoningase enga gose uté úringai chuque iji curesei gai nanique.

¹⁷ Uje Crísto di iji erámi nanique enga chatata pujnomé ueradi uté uje júdi u pajesereringai adode. Enga Crísto chapuse yógaja jnese ome dacajnaquéode. Uté chacate purása quedéjnane uaque uje idája uáguiji Dupade nanique. Jé basa ga acajnaquéode gajnesórone jé upo judíode uyoque rĩ uje idógosi yóguiji Dupade uté, uje Dupade cho darása iji judíode uyoque gu.

¹⁸ Jecute ome Crísto adode ga e guesája Dupade yui ome uyoque jnese - ujetiga judíode u, jeoga purása quedéjnane u, mu yoquisocai jé chojmara ujetiga yico Yocai Dupade uté. Chamáñaje chojmara Dupade Ujopié uaté gu, enga uaté u uje déji uyoque jnese.

¹⁹ Jecute e que unejácapo uágome Dupade rĩ. Que purása quedéjna upo uágome Dupade rĩ. Mu e uacaguiose ñane, chamáñaje e uacoyo uacarása iji Dupade abode udore gu. Jé ũré uje e uacátayo uágaja uacojode Dupade anguresõre jnese ome uacáringane Dupade jogasúo.

²⁰ Jecute yacãra uágaja guiguíjnarique uje porágaja gaté iji cucaranenie gai. Enga Jesucrísto utocaidode apóstoles ore jé aja Dupade uruode júsorone profétas udore gajnunie jé u cucaranenie udire. Chamáñaje bajaque ore uje ore chiro guiguíjna porai uté aja gaté ome dajúdode Dupade urúo. Mu guiguíjnai tuté ero tupúsu Jesucrísto uté, ome úringai cucha gosípise.

²¹ Jecute uje pajnerame aja gaté enga guiguíjnai uté uajádaja gaté, enga gose uje ero ueradé gu. Enga guiguíjnai uté jnese cháta raja ñane, ga Jesucrísto, ore chojmarápise iji jnumi; jecute quérã, quérã, enga cáputapísiji jnumi ome dáringai ueradája gaté. Enga qui tu uje e pimanique aja gaté ome úringai ujñapetaguipise, enga jé tiógara ujetiga Yocangarádejnai Dupade cho daguíjna puyai iji uaque jne.

²² Ga adi jé u uté ome purása quedéjnane uaque to. Uje e uacatojmárañoji Crísto uté, enga qui jé u to uje e uacátayo uágaja Crísto anguresórone uñane ore jnese. Enga Dupade uté cháta uágaja ñane jnese ome uacáringane uté iguíjna. Chamáñaje Dupade uté cho dayaridi iji uaque ome Dajopíe Espíritu Sánto uaté uje chacája uaque.