Apocalípsis 1 - Dupade Uruode

¹ Dupade chingo cucha piqueminórone unojo aja Jesucrísto enga déji darujna aode unojo jnese. Gaidi tu gu ujetiga Jesucrísto chingo cucha dacadode unojo quigode aja danguresórone darócho ujetiga ore chidójninga to uje cuchade unojo a jĩraque tocade jne. Jecute Jesucrísto doi enga chiroque datocaidode uñai aja daroi Juan ujetiga cho quique cuchade udore gaté.

² Enga Juan uyu u uje yatata gojña uréone udore jnese uje yimópiso to ome yedodie. Chamáñaje gojña uréone udore garani tupúsu Jesucrísto ome yu gu, enga gojña uréone udore garani tupúsu Dupade ome Jesucrísto to.

³ Pininaquei a jogadi tu jne ome gosi ujetiga naráraja darujna aode unojo gai. Chamáñaje gojñane unojo garani tupúsu Dupade gu. Mu que gusu ajirisórone ujetiga pininaquei chise ore, mu pininaquei a chise udore ore to jne ujetiga ore tangári quigode iji ajirisórone ore pijnanone enga ore doi udore quigode. Chamáñaje e idógosi diri ujetiga cucha dacadode udore jnese tocade gu.

Juan churúsãre darusarane ome Dupade anguresórone ore uje ore déji idai garitíode iji puniri Ásia ome ore úringanie Dupade iglésia to

⁴ Juan uyu uje yurúsãre yurusarane cárta ome yujode Dupade anguresõre uaque iji uaquedai garitíode iji uacaniri Ásia. Eyúgojma Dupade. Chamáñaje Dupade jé jogate nanique iji erámi taningane, jé aja deréjnane unojo, enga a jé upo jne rĩ ujetiga diapo iji yoque rĩ iji jnumi iji dire piqueminórone. Yajéode u ujetiga uacajneque pajesereringai, pininaquei ore uje udore garani upúsu Dupade uté. Uje garani upo Dupade Ujopié Espíritu Sánto gajnu garitíode udore to ome uaque, uje ore charidi tu Yoqueduguéjna cuchábi iquei tiji gaté.

⁵ Enga pajesereringai, pininaquei ore garani upo Jesucrísto to rĩ ome uaque, uje ũrepise uté ome dojñane iji Dupade adode. Enga uté u bajai nanique uje ecápo rĩ iji datoringai. Jecute uté u uje etotiguei suépise eduguéjna jnutiminórone etotiguéode gáyode jnese iji erámi tuné. Mu Crísto uté jé u to uje chijnorapise yoque enga chinoningasipise yoquisijnaringuéone ome dayoi.

⁶ Enga pésu yoque enga eduguéjna cuchape yoque to ujetiga yicoi dai Dupade iroquéode to. Enga yocajnúone u jnani bajade angaránone sacerdote uje ore chedu Dupade iroquéode nanique iji Dupade iguíjna cuchábi. Jecute beyoi enga yisigopise Jesucrísto uté gai iji deréjnane jnese jne ome úringai ujopíerãque, ome ingoningádatéi to rĩ. Amén.

⁷ ¡Adójnachopísa yuruode! Uje Crísto a di jne, enga gue abujáraque oidája jnumi jne. Enga a ore chimo Crísto uté jne aja jnumi, jé aja udore ore to uje ore ichajuque nanique iji curesei gai. Enga a erámi unirisórone ore jnese iji dedáyode a ore popise jnese jne ujetiga ore chimo. Jé ũrepise yu ome cuchade unojo, enga a tocade jne enga a jé upúsu yuruode unojo quigode jne. Amén.

⁸ Pujnuéngaisṍri u Yocangarádejnai ome cuchade jnese. Jé jogate gu nanique iji erámi taningane, jé aja deréjnane unojo, enga a jé upo jne rĩ ujetiga diapo iji yoque rĩ iji jnumi iji dire piqueminórone. Enga uté chingo dadode ome yoque enga chojninga: "Yajnua tu purusãra bajé uje i tu A. Enga yajnua tupo rĩ purusãra eruemito uje i tu Z. Uje bajaque yu ome cuchade jnese gu. Enga a jé yijogadápo jne rĩ iji erámi eruei iquéode."

Juan enomicho ome Crísto ingoningájnai u unojo

⁹ Yijorane uaque á, uacojo Dupade anguresõre yu, enga yoquibaya ñane ome pijmongaquéode iji deréjnane unojo, enga Dupade urása uyoque jnese rĩ. Mu Jesucrísto átapi u yoque jnese to rĩ ujetiga yidotágo yóguiji yocanguretigai iji pequetingaquéode jmainie. Ore chisa yu diríca enga ore jno yúdi aja yote quedéjnai abué uje i tu Pátmos. Enga que ore juéga guetique ome yu. Yibai tu yatatagode Dupade urúo uje Jesucrísto chacate yógome ica.

¹⁰ Yocangarádejnai gajnei tuté dire pujnusinamate u uje Dupade Ujopié Espíritu Sánto chingo yenominone aja yu. Enga yudute pibijna dosógode iji yiquigade. Enga cho pubuchugode jocarane.

¹¹ Enga yicatecãraisṍri chojningame yu: –Yajnua tu purusãra bajé uje i u A. Enga yajnua jé upo purusãra eruemito rĩ uje i tu Z. Chamáñaje bajaque yu gu iji erámi taningane nanique. Enga a erámone íjnongapo jne rĩ, mu jé yijogate jne. Jecute arúsãre bamone cucha enga aroque barusarane aja puáguedie udire uje Dupade cho da-iglésia iji ore, iji ore idai garitíode uje déji puniri Ásia uté. Guidáidatéode udore ore íode u: Éfeso, Esmírna, Pérgamo, Tiatíra, Sárdis, Filadélfia, Laodicéa ore.–

¹² Enga jĩraque yajire yiquigade ujetiga yimo cuchai uté uje catecã́ri yu. Mu yimo papósode píode iji uje pipesucho iji óro enga nanganatácho. Enga yimone udore gare iji ti.

¹³ Enga yimo jnacánique iji papósode píode gatócoro uje chopise ayorépisode. Enga chigui daguidé uje chise jnumi, enga igarubi óro nanganatague uje chadíja re, enga chise arobé eruéode.

¹⁴ Enga uté acãrai póroropise enga gajnúone u ébedíe, áyasadie ojode ome úringane póroropiso. Enga edodie cho pioque ocaraidie.

¹⁵ Guebecho uté guídade enga gajnui tu bronce nanganatai uje ore chijnimi pioi enga ore charose gai ujeta nanganatápise. Enga uté uruode etócho enga cho yote uode uje cho uoooooo.

¹⁶ Guédo garitidie déji uté jmanai ãrachua. Enga quesé asicoi tõrapóji uté pijnani rĩ uje uo jnese. Enga uté edodie cho guedé ojo dotárenie uje tagu jnumi.

¹⁷ Mu uje yimo uté enga jĩraque yicṍraja jnumi iji iquei. Enga yo togode iji jnumi. Mu uté doi yu, enga chicha dajmanai ãrachua aja yibai. Enga catecã́ri yu enga chojningame yu: –Jé ca atodo yu go. Bamo uje bajaque yu iji taningane nanique uje cuchade qué íjnoque. E mu a erámone íjnongapo jne rĩ, mu a jé yijogate jne.

¹⁸ Bamo uje toque yu nanique. Mu quigade enga yiquecápo rĩ, enga a e ca yitopoi jne rĩ iji deréjnane jnese. Enga yujopié etotiguei déji ome pitoringai, jnaropié ore jnese. Chamáñaje lláveode déji yu gu ome cuchade udore.

¹⁹ Enga yipotigádi tu ujetiga arúsãre bamone cucha jnese. Arúsãrape cucha dacadode uje déji iji dirode unojo, enga arúsãrapo cucha piqueminórone quigode to jne rĩ.

²⁰ A yingo papósode pi garitíode quigode ome ua jne uje óro nanganatáguei. Uje papósode udore gajnúone u Dupade anguresórone iji guidai garitíode uje barusarane gajnengórone u ore. A yingopo guédo garitidie quigode jne ome ua to rĩ uje bamo ore que iji yijmanai ãrachua. Ore gajnúone u Dupade anguresórone angaránone ore iji guidai garitíode udore.–