Иоанние Аллагьас загьир гьарурал ишал 9 - Инжил

9 бетӏер

¹ Ва щуабилев малаикас ссуралъубе пуна, ва дида бихьана цо цӏва зодиса ракьалде бортулеб. Гьелъухъе кьун букӏана тӏину гьечӏеб кӏкӏалахъе нух бугеб гъуялъул нуцӏил кӏул.

² Ва гьеб цӏваялъ ричӏана нуцӏа. Ва кӏудияб корохъа гӏадинаб кӏкӏуй бачӏана гъуялъуса къватӏибе. Ва гьеб кӏкӏуялъ бакъги гьаваги бецӏлъизабуна.

³ Ва кӏкӏуялда гъорлъан ракьалде бачӏана ракъул гарцӏазул кӏудияб бо. Гьаб ракьалда ругел ичӏкӏалаз гӏадин хечизе ихтияр кьун букӏана гьезие.

⁴ Ва гьезда лъазабун букӏана, Аллагьасул мугьру надалда гьечӏел гӏадамазе гурони, я ракьалда бижараб харие, я кинаб букӏаниги гӏурччинлъиялъе, я кинаб букӏаниги гъотӏое зарал гьабугеян.

⁵ Гьел гарцӏазе ихтияр кьун букӏана гьел гӏадамал чӏвачӏого тун, щуго моцӏалъ гьезие гӏазаб-гӏакъуба гьабизе. Ичӏкӏалалъ хеч къазабидал инсанасе лъугьунеб гӏадинаб гӏазаб-гӏакъуба букӏана гьеб.

⁶ Гьел къоязда гӏадамал жидеего хвел балагьизе лъугьина, амма гьезда гьеб батиларо. Хвезе бокьун рукӏина гьел, амма хвел гьездаса лъутила.

⁷ Рагъуе къачӏарал чуязда релълъун рукӏана гьел гарцӏал. Меседил тажазда релълъарал жалги рукӏана гьезул бутӏрузда. Гьезул гьурмал инсанасулалда релълъарал рукӏана.

⁸ Руччабазул гӏадинаб расги букӏана гьезул, гъалбацӏалъул гӏадинал гажалги рукӏана.

⁹ Маххул гӏадинал къолдабиги рукӏана гьезда тӏад, гьезул куркьбазул гьаракьги релълъунаан рагъде гӏедегӏун унел гӏемерал чолгьаказул гьаракьалда.

¹⁰ Ичӏкӏалалъул гӏадинаб рачӏги букӏана гарцӏил, гьеб рачӏалдасан хечги къазабулаан гьелъ. Гьел жидерго рачӏаз гӏадамазе щуго моцӏалъ зарал гьабизе ихтияр кьун букӏана гьезухъе.

¹¹ Гьезул парччахӏлъун букӏана гьеб кӏкӏалалъул шайтӏан; жугьутӏ мацӏалда гьелда цӏар буго Абаддон, грек мацӏалда – Аполлион («Хвел босун бачӏунеб»).

¹² Цо балагь тӏаса ана. Гьале гьелдаго хадуб цун бачӏунеб буго жеги кӏиго балагь.

¹³ Ва анлъабилев малаикас ссуралъубе пуна, ва дида рагӏана тахида цебе къурбан тӏад хъолеб меседил къанил ункъабго бокӏнилъ рекъезабураб ункъо лълъаралъул гьаракь.

¹⁴ Ссур кодоб ккурав анлъабилев малаикасда гьеб гьаракьалъ абулеб букӏана: «Кӏудияб Пурат гӏурул рагӏалда бухьун бугеб ункъо жен бичун биччай».

¹⁵ Ва гӏадамазул лъабил бутӏа хвезабизе гьел риччалеб заман – сагӏат, къо, моцӏ ва лъагӏел – тӏаде щвезегӏан чӏезабун букӏараб гьеб ункъабго жен бичун биччана.

¹⁶ Ва дида бицана анцӏазарго кӏиго нухалъ анцӏазарилъ кьабурабгӏан къадаралда рекӏаралги ругин гьезул бодулъ.

¹⁷ Гьедин балъголъи загьирлъун дида рихьана чуялги чуязда рекӏарал рагъухъабиги. Гьезда рукӏана цӏабагӏараб, бецӏхъахӏилаб ва чӏабтӏил гӏадинаб тӏогьилаб кьералъул къолдаби. Гъалбацӏалъулазда релълъарал рукӏана гьел чуязул бутӏрул. Ва гьезул кӏалдисан бурулеб букӏана цӏаги, кӏкӏуйги, чӏабатӏги.

¹⁸ Гьеб лъабабго балагь рещтӏиналъ – гьезул кӏалдисан бурулеб цӏадуцаги, кӏкӏуйдуцаги, чӏабтӏицаги – гӏадамазул лъабил бутӏа гъурана.

¹⁹ Гьел чуязул къуват лъун букӏана гьезул кӏалдибги рачӏалдаги, гьезул рачӏалги рукӏиндалха загьруял борхьал гӏадинал. Гьез хӏанчӏиялдалъун кколаан гӏадамазе зарал.

²⁰ Жидеца гьабурабщиналда – жундузе гӏибадат гьабиялда, ва меседил, гӏарцул, мазгарул, ганчӏил, цӏулал гьарурал, жидеда я щибниги бихьуларел, я щибниги рагӏуларел, я хьвадизе кӏоларел гьересиаллагьзабазе гӏибадат гьабиялда – рекӏекълъичӏо гьел балагьал рещтӏиндал хвечӏого хутӏарал цогидал гӏадамал, ва кингоги тавбу гьабичӏо гьез.

²¹ Я жидеца гӏадамал чӏваялда, я сихӏру гьабиялда, я хъахӏбалъи гьабиялда, яги цӏогь гьабиялда рекӏекълъичӏо гьел, тавбуги гьабичӏо гьез.