Иоанние Аллагьас загьир гьарурал ишал 22 - Инжил

22 бетӏер Маулхӏаяталъул лъадал гӏор

¹ Гьес дида бихьизабуна маулхӏаяталъул лъадал гӏор. Бацӏцӏадаб цӏер гӏадаб гьеб гӏор чвахун бачӏунеб букӏана Аллагьасулги Кьагӏрилги тахида цебесан.

² Шагьаралъул къватӏ кӏийиде бикьизабун чвахулеб букӏана гьеб. Гӏумруялъул гъотӏол – анцӏила кӏиго нухалъ жинца пихъ кьолеб ва щибаб моцӏалъ тӏад пихъги бижулеб гъотӏол гӏаркьалаби гӏунтӏун ругоан гӏурул кӏиябго рагӏалалде. Гьеб гъотӏол тӏамахги халкъазе дару буго.

³ Гьеб шагьаралда тӏокӏаб киданиги хӏарамаб жо букӏинаро. Гьениб букӏина Аллагьасулги Кьагӏрилги тах, ва жиндирго лагъзадерица гьесие хъулухъги гьабила.

⁴ Гьезда гьесул гьумер бихьила, ва гьезул надалдаги лъугьина гьесул цӏаралъул гӏуж.

⁵ Сордо гьениб тӏокӏаб киданиги букӏине гьечӏо; Бетӏергьан Аллагьас жиндирго нуралдалъун кьела гьезие канлъи, ва абадул абадиялъго парччахӏлъиги гьабила гьез.

⁶ Гьес дида абуна: «Гьал рагӏаби ритӏухъал ва хӏакъал руго. Илагьияб Рухӏ аварагзабазухъе рещтӏинабулев Бетӏергьан Аллагьас чапар витӏана кватӏичӏого ккезе бугебщинаб жиндирго лагъзадерида бихьизабизе».

Масихӏ хехго вачӏина

⁷ «Гьале кватӏичӏого тӏаде щвела!» – ян абуна Масихӏица. Гьардарав гуревдай хадубккун лъугьине бугебилан гьаб тӏехьалда хъварал рагӏаби рехун течӏев чи.

⁸ Дида – Иоаннида – бихьана ва рагӏана гьеб кинабго. Гьеб бихьараб ва рагӏараб мехалда дун кӏалагъоркье ккана дида гьеб бихьизабурав малаикасул хӏатӏазда цеве. Дица гьесие сужда гьабизехъин букӏана.

⁹ Гьес дида абуна: «Гьеб бегьуларебха! Дурги, дур вацал – аварагзабазулги, гьаб тӏехьалъул рагӏаби рехун течӏелщиназулги гьалмагъ вуго дун. Цохӏо Аллагьасе гьабе сужда».

¹⁰ Цинги гьес абуна: «Болжал тӏаде щолеб бугебин, воре, хадубккун лъугьине бугелъул хӏакъалъулъ гьаб тӏехьалда ругел рагӏаби рахчун тоге.

¹¹ Квешав цевего гӏадин квешлъи гьабулев вукӏаян абе, хъубавги хъублъи гьабулев вукӏаян абе, ритӏухъавги ритӏухъабщинаб гьабулев вукӏаян абе ва вацӏцӏадавги цевего гӏадин бацӏцӏадабщинаб гьабулев вукӏаян абе.

¹² Гьале дун кватӏичӏого тӏаде щвела. Дихъ буго щивасул ишазда рекъон кьезе шапакъат.

¹³ Дун вуго Алипги Яги, Тӏоцевесевги Тӏарамагъадисевги, Авалги Ахирги!

¹⁴ Гьардарал гурелдай гӏумруялъул гъотӏодаса пихъ кваназейилан ва шагьаралда жанире кавудухъан лъугьинейилан ретӏел чурун бацӏцӏад гьабурал гӏадамал.

¹⁵ Къватӏирехун руго гьабиги, сихӏручагӏиги, хъахӏбабиги, чӏвадарухъабиги, гьересиаллагьзабазе гӏибадат гьабулелщиналги, гьереси бокьулелщиналги, гьересиябщинаб жидеца гьабулелги.

¹⁶ Дица – Гӏисаца – дирго чапар витӏана нужехъе, – гьалъул хӏакъалъулъ жамагӏатазда лъазабейилан. Дун вуго Давудил кьибилги ва гьесул кьолбол васги. Дун вуго гвангъараб рогьалил цӏва».

¹⁷ Илагьияб Рухӏалъги бахӏаралъги абула: «Вачӏа!» – ян. Вачӏайилан абизе биччанте гьеб рагӏарасги. Гьекъезе бокьарав вачӏайилан абе, ва бокьанщинас маулхӏаяталъул лъим чӏобого босейилан абе.

¹⁸ Хадубккун лъугьине бугелъул хӏакъалъулъ гьаб тӏехьалда ругел рагӏабазухъ гӏенеккун ругезда лъазабун толеб буго – гьел рагӏабазда тӏаде лъицаниги щибниги жубани, гьесда тӏаде Аллагьасги журала гьаб тӏехьалда рехсарал балагьалги гӏазабалги.

¹⁹ Хадубккун лъугьине бугелъул хӏакъалъулъ гьаб тӏехьалда ругел рагӏабазда тӏаса лъицаниги щибниги босани, Аллагьас гьесда тӏасаги босила гӏумруялъул гъветӏалдаги мукъадасаб шагьаралдаги гьесул букӏараб бутӏа, – гьаб тӏехьалда жиндир хӏакъалъулъ рехсон бугеб бутӏа.

²⁰ Гьел рагӏаби ритӏухъ гьарулев Масихӏица абулеб буго: «Битӏараб буго. Дун хехго вачӏина!» – ян. Амин! Вачӏа, Тӏадегӏанав Гӏиса!

²¹ Нилъер Тӏадегӏанав Гӏиса Масихӏил баркат лъеги киназдаго! Амин!