Иоанние Аллагьас загьир гьарурал ишал 17 - Инжил

17 бетӏер Жанаваралда тӏад рекӏарай чӏужугӏадан

¹ Анкьго щурун кодоб бугев анкьго малаикасдасан цояс, дида аскӏовеги вачӏун абуна: «Вилълъа, дица дуда бихьизабила чӏахӏиял гӏоразда тӏад гӏодой чӏарай кӏудияй хъахӏбаялъе судалъ къотӏараб хӏукму.

² Дуниялалъул парччахӏзабигун лъугьун хъахӏбалъи гьабулеб букӏана гьелъ, ва гьеб жиндирго хъахӏбалъиялъул чогъроца ракьалда ругелщинал мехтизаруна гьелъ».

³ Илагьияб Рухӏалъ асар гьабидал, дида дунго вихьана малаикас гӏицӏаб авлахъалде щвезавурав гӏадин. Гьений ятана бецӏбагӏараб жанаваралда тӏад рекӏарай чӏужугӏадан. Аллагьасде гӏасилъи загьир гьабулел цӏаразул цӏун букӏана гьеб жанавар; анкьго бетӏерги букӏана гьелъул, анцӏго лълъарги букӏана.

⁴ Гьей чӏужугӏаданалъ ретӏун букӏана бецӏхъахӏилабги бецӏбагӏарабги ретӏел; меседалъ, жавгьар-якъуталъ ва къиматаб маргъалалъ къачӏа-кӏатӏан йикӏана гьей. Гьелда кодоб букӏана гьелъул хъахӏбаял ишазулги хъублъиялъулги цӏураб меседил щурун.

⁵ Гьелъул надалда хъван букӏана балъгояб цӏар – Кӏудияб Вавилон шагьар – хъахӏбабазулги дуниялалъулго хъублъидулги эбел абун.

⁶ Гӏисаде иман лъуразул – гьесие нугӏлъи гьабуразул – биялъ мехтун йихьана гьей гӏадан дида, ва гьей йихьарайго дун кутакалда хӏикмалъана.

⁷ Ва малаикас абуна: «Щай мун хӏикмалъарав? Гьай гӏаданалъулги ва гьай тӏад рекӏараб анкьго бетӏерги анцӏго лълъарги бугеб жанаваралъулги балъголъи рагьила дица дуе.

⁸ Дуда бихьараб жанавар цебе чӏаго букӏана, гьанже гьечӏо. Нахъеги тӏину гьечӏеб кӏкӏалахъа къватӏибе бачӏина гьеб ва жиндирго хвалде данде ина. Дуниял бижараб мехалдаго жидер цӏарал гӏумруялъул тӏехьалда хъван рукӏинчӏел гьаб ракьалда ругелщинал гӏадамал хӏикмалъила гьеб жанавар бихьун, цин гьеб чӏаго букӏиндал, цинги хведал, хадуб цӏидасан чӏаголъидал.

⁹ Гьеб бичӏчӏизе лъай-гӏакълу хӏажалъула. Анкьабго бетӏер ккола гьей чӏужугӏадан тӏад чӏараб анкьго гохӏ.

¹⁰ Гьединго анкьго парччахӏги ккола – гьезул щугояв хвана, цояв чӏаго вуго ва цояв жеги вачӏинчӏо; вачӏараб мехалдаги гьев гӏемер заманалъ хутӏиларо.

¹¹ Дов анкьавго парччахӏасда гьоркьоса цояв вугониги, микьабилев парччахӏ ккола гьев. Хвалде данде ина гьевги.

¹² Дуда бихьараб анцӏабго лълъарги ккола жеги парччахӏлъи щвечӏев, амма жанаваралда цадахъ цо сагӏаталъул болжалалда парччахӏлъи щвезе бугев анцӏго парччахӏ.

¹³ Гьезул букӏина цого мурад-къасд, ва жидерго къуватги къудратги гьез жанаваралъе кьела.

¹⁴ Кьагӏрида данде рагъизе руго гьел, амма Кьегӏер гьездаса бергьина, гьеб Кьегӏер бугелъул тӏадегӏаназулги Тӏадегӏанаб ва парччахӏзабазулги Парччахӏ. Гьелда цадахъ рукӏина ахӏун рачӏаралги, тӏаса рищаралги, рекӏелъ божи бугелги».

¹⁵ Гьев малаикас дида абуна: «Хъахӏба тӏад чӏун дуда рихьарал гӏорал ккола халкъалги, руккелалги, миллаталги, мацӏалги.

¹⁶ Дуда бихьараб жанаваралдаги анцӏабго лълъаралдаги гьей хъахӏба цӏакъ рихине йиго: гьез гьей тӏутӏун яла, тӏад ретӏел гьечӏого гӏицӏго хутӏизайила, гьелъул гьан кванала ва цӏадаеги рехун юхӏила.

¹⁷ Жиндирго хӏукму билълъанхъизабиялъе Аллагьас гьел гӏадамазул рекӏелъе лъугьинабуна киналго цолъун мурад тӏубазабизе нигат. Гьезги жидерго кверщел гьеб жанаваралъухъе кьуна, – Аллагьасул рагӏаби тӏуразегӏан заманалда.

¹⁸ Дуда йихьарай чӏужугӏаданги ккола дуниялалъул парччахӏзабазда тӏад кверщел жиндихъ бугеб кӏудияб шагьар».