Иоанние Аллагьас загьир гьарурал ишал 14 - Инжил

14 бетӏер Кьегӏерги нусиялда кӏикъоялда ункъазарго чиги

¹ Дун валагьана – гьале Сион магӏарда буго Кьегӏер ва гьелда цадахъ вуго гьелъул цӏарги ва гьелъул Инсул цӏарги надалда хъварав нусиялда кӏикъоялда ункъазарго чи.

² Кӏудияб чвахелоялъул гӏадинаб яги зоб гъугъалеб гӏадинаб гьаракь рагӏана дида зодисан. Гьеб гьаракь релълъун букӏана арфаби бачунезул бакъназда.

³ Тахалда цебе, ункъабго рухӏчӏаголъиялдаги хӏакимзабаздаги цебе цӏияб кечӏ ахӏулеб буго гьел гӏадамаз. Дуниялалъухъа ричун росарал гьел нусиялда кӏикъоялда ункъазарго чиясда гурони, цоги лъиданиги кӏвечӏо гьеб кечӏ ахӏизе ругьунлъизе.

⁴ Гьезул цонигияс чӏужу ячинчӏо. Рацӏцӏадал ругелъулха гьел! Гьел руго, кибехун гьеб аниги, доб Кьагӏрида хадур унел гӏадамал. Гьел руго цогидал гӏадамазда гьоркьоса ричун росарал чагӏи. Гьел руго Аллагьасеги Кьагӏриеги назру гьабураб тӏоцебесеб рижилъун лъугьарал гӏадамал.

⁵ Цониги гьереси инчӏо гьезул кӏалдиса къватӏибе. Аллагьасул рацӏцӏадал вализаби руго гьел.

Лъабго малаик

⁶ Ва цоги малаик вихьана дида зоб бакьулъан воржун унев. Гьесухъ букӏана ракьалда бугебщинаб миллаталда, наслуялда, мацӏалда ва халкъалда бицине абадияб Рохалил хабар.

⁷ Кутакаб гьаракьалдалъун ахӏана гьес: «Аллагьасукьа хӏинкъа ва гьесие рецц гьабе, гьес суд гьабулеб сагӏат тӏаде щун бугелъул! Зобги, ракьги, ралъадги ва лъадал иццалги рижарасе сужда гьабе!»

⁸ Гьесдаго хадув цун вачӏунев вукӏана цоги малаик. Гьес ахӏана: «Вавилон шагьар щущан ана! Щущан ана жиндир гьалагаб хъахӏбалъиялъул чогърол лълъар тӏолалго халкъазда гьекъезабураб кӏудияб Вавилон!»

⁹ Гьездаго хадув цун вачӏунев вукӏана лъабабилев малаикги. Кӏудияб гьаракьалдалъун гьес ахӏана: «Жанаваралъе яги гьелъул сураталъе сужда гьабурасги ва надалда яги квералда гӏуж бан бугесги

¹⁰ гьекъезе буго Аллагьасул тамихӏалъул лълъар. Гъорлъе лъим жубачӏеб чагъирлъун гьелда жаниб букӏина Аллагьасул ццин бахъин. Илагьиял малаикзабаздаги Кьагӏридаги цебе, цӏадулъеги чӏабтӏилъеги рехун, гьезие гӏазаб-гӏакъуба гьабила.

¹¹ Абадул абадиялъго эхеде унеб букӏина гьезие бугеб гӏазаб-гӏакъубаялъул кӏкӏуй. Жанаваралъе ва гьелъул сураталъе сужда гьабуразе ва гьелъул цӏаралъул гӏуж лъуравщинасеги я къад, я къаси рахӏат-хӏалхьи букӏине гьечӏо».

¹² Аллагьасул халкъалъул сабру букӏине кколеблъи бичӏчӏулеб буго гьел рагӏабаздасан. Аллагьасул халкъ ккола гьесул амруялги тӏуразарулел ва Гӏисаде иманги лъурал гӏадамал.

¹³ Зодисан гьадин ахӏулеб гьаракь рагӏана дида: «Хъвай: гьардарал гурелдай гьанжеялдаса хадур холеб мехалдаги Тӏадегӏанасде иман лъурал гӏадамал». Хӏакълъунго гьедин бугилан абулеб буго Илагьияб Рухӏалъ. Жидерго захӏматаб хӏалтӏудаса хадуб гьезие хӏалхьи букӏина, – жидеца гьарурал гьунаразухъ шапакъат щвезе бугелъулха гьезие.

Лъилъаризе заман щун буго

¹⁴ Дун валагьана – гьале хъахӏаб накӏкӏул парча. Гьеб накӏкӏул парчаялда тӏад гӏодов чӏарав релълъун вукӏана Гӏадамил Лъимада. Гьесул бетӏералда тӏад букӏана меседил таж, хъатикь букӏана рекӏараб нилъ.

¹⁵ Аллагьасул кӏалгӏаялъуса къватӏиве лъугьун вачӏана цоги малаик. Накӏкӏул парчаялда тӏад вугесде кутакаб гьаракьалдалъун ахӏана гьес: «Босун дурго нилъ хьвагӏе, лъилъаризе заман щун бугин ракьалда».

¹⁶ Накӏкӏул парчаялда тӏад гӏодов чӏарас ракьалда тӏасан нилъ хьвагӏана ва ракьалда бугебщинаб лъилъана.

¹⁷ Зобалазда бугеб Аллагьасул кӏалгӏаялъуса къватӏиве лъугьун вачӏана цоги малаик. Гьесда кодобги букӏана рекӏараб нилъ.

¹⁸ Къурбан хъолеб бакӏалдасахун вачӏана цӏадул кверщел бугев цоги малаик, ва доб рекӏараб нилъ кодоб ккун бугесде кутакаб гьаракьалдалъун ахӏана гьес: «Босун дурго нилъ хьвагӏе, ракьалда рижарал цӏолбол хьопал къотӏе, гьезда цӏибил барщун бугин».

¹⁹ Малаикас ракьалда тӏасан нилъ хьвагӏана, ракьалда бугеб цӏибил къотӏана ва Аллагьасул ццидал кӏудияб чаналъубе бана.

²⁰ Гьеб цӏибил мерхьана шагьаралдаса къватӏибехун. Ва гьеб чаналъуса къватӏибе чвахун бачӏараб бидул цӏуна лъабнусго километралда тӏолабго сверухълъи, чу тӏерхьунеб гӏадаб хӏор лъугьана гьениб.