Иоанние Аллагьас загьир гьарурал ишал 11 - Инжил

11 бетӏер Кӏиго нугӏ

¹ Гӏансаялда релълъараб тӏилги дихъе кьун, абуна: «Вахъа, дуца борце Аллагьасул кӏалгӏаги къурбан хъолеб бакӏги, чан чияс гьениб гӏибадат гьабурабалиги рикӏкӏе.

² Аллагьасул кӏалгӏаялда сверун бугеб азбар дуца къватӏиб те, гьеб борцунге, цогидал халкъазе кьун бугин гьеб. Гьез гьаб хирияб шагьар кӏикъоялда кӏиго моцӏалъ мерхьина.

³ Дир кӏиго нугӏасе хӏалкӏолъи кьела дица, сугъуралъул ретӏелги ретӏун, гьез азаралда кӏинусиялда лъабкъого къоялъ Аллагьасул рагӏи халкъалда лъазабизе».

⁴ Гьел чагӏи ккола кӏиго зайтуналъул гъветӏлъунги ва зоб-ракьалъул Бетӏергьанасда цебе бугеб кӏиго чирахълъунги.

⁵ Гьезие зарал-зиян гьабизе ракӏалде ккарав чиясде гьезул кӏалдисан цӏа бурун бачӏина ва гьеб цӏадуца рухӏила гьезул тушбаби. Гьеле гьедин хвезе вуго гьезие зарал-зиян гьабизе ракӏалде кканщинав чи.

⁶ Гьев кӏиясдаго кӏвезе буго Аллагьасул рагӏи гьез халкъалда лъазабулеб заманалда цӏад бачӏого букӏиналъе зобал къазе. Лъадада тӏадги ихтияр кьун буго гьезухъе – гьеб биялде сверизабизе; гьединго ихтияр кьун буго гьезие бокьанщинахъе ракьалда балагьалъул цӏал кьабизе.

⁷ Гьев кӏиявго нугӏас Аллагьасул рагӏи халкъалда лъазабун бахъараб мехалда, тӏину гьечӏеб кӏкӏалахъан тӏаде бачӏунеб жанавар гьезда данде багъила; гьелъ гьел къезарила ва чӏвала.

⁸ Содомлъунги Мисрилъунги лъугьараблъун рикӏкӏине бегьулеб гьеб кӏудияб шагьаралъул къватӏазде рехун хутӏила гьезул жаназаби. Гьеб шагьаралдайин гьезул Тӏадегӏанав хъанчида вигъун вукӏарав.

⁹ Лъабгогун бащдаб сордо-къоялъ гьезул жаназабазухъ ралагьун рукӏина батӏи-батӏиял халкъазул, наслабазул, мацӏазул ва миллатазул цо-цо гӏадамал, ва гьез гьел жаназаби хабалъ лъезе риччазе гьечӏо.

¹⁰ Ракьалда ругелал гьелдаса разилъила, гьез цоцазе рохел гьабила, цоцазе сайигъатал ритӏила, щайгурелъул гьев кӏиявго аварагас ракьалда ругелазе гӏазаб кьолеб букӏиндал.

¹¹ Лъабгогун бащдаб сордо-къо индал, Аллагьасдасан чӏаголъиялъул рухӏ лъугьана гьев кӏиясулъего. Тӏаде рорхун рачӏун, рахъун чӏана гьел, ва гьезухъ ралагьун рукӏаразул рекӏелъе кутакаб хӏинкъи лъугьана.

¹² Зодосан кутакаб гьаракьалъ гьадин ахӏулеб рагӏана гьев кӏиясдаго. «Гьанире тӏаде раха!» Жидерго тушбабиги хадур ралагьун, накӏкӏуда гъорлъан зодире рачун ана гьел.

¹³ Гьебсагӏатго кутакалда ракь багъарана. Шагьаралъул анцӏил бутӏа щущан ана, ракь багъариялдалъун хвана анкьазарго чи; чӏаго хутӏаразги, кутакалда хӏинкъун, зобалазул Аллагьасе рецц гьабулеб букӏана.

¹⁴ Кӏиабилеб балагь тӏаса ана, гьале кватӏичӏого тӏаде щолеб буго лъабабилеб балагь.

Анкьабилев малаикасги ссуралъубе пула

¹⁵ Ва анкьабилев малаикас ссуралъубе пуна; ва зобалазда кутакал гьаркьал рахъана, гьадин абулеб букӏана гьез: «Нилъер Бетӏергьанас ва гьесул Масихӏица дуниялалдаго парччахӏлъи гьабулеб буго гьанже. Масихӏица парччахӏлъи гьабила абадул абадиялъго».

¹⁶ Ва Аллагьасда цеве жидерго тахазда гӏодов чӏарав къоло ункъавго хӏакимас, кӏалагъоркье речӏчӏун, Аллагьасе сужда гьабуна.

¹⁷ Гьез абулеб букӏана: «Хӏакъав, абадияв ва къудратав Бетӏергьан, дуе рецц, дуца дурго кӏудияб хӏалкӏолъи бихьизабидал ва парччахӏлъи гьабулеб бугелъул.

¹⁸ Халкъазул дуде ццин бахъиндал, дурги ццин гьалаглъана. Хваразеги суд гьабизе заман щун буго: дур лагъзадерие – аварагзабазе ва киналго дур цӏаралъукьа хӏинкъулезе – гӏисиназеги чӏахӏиязеги – кириги хъвазе, ракьалде балагь бачӏинабуразде балагьги рещтӏинабизе».

¹⁹ Гьебмехалда зобалазда бугеб Аллагьасул кӏалгӏа загьирлъана ва гьениб жаниб бихьулеб букӏана къотӏиялъул гъамас. Ва пири пирхизе лъугьана, хъуй бахъана, зоб гъугъадана, ракь багъарана ва ракьалде гӏемераб горо-цӏер бана.