Иоанние Аллагьас загьир гьарурал ишал 10 - Инжил

10 бетӏер Малаикасухъ букӏараб гьитӏинабго тӏехь

¹ Цинги дида вихьана цогидав цӏакъ кутакав малаик зобалаздасан рещтӏунев; накӏкӏал рукӏана гьесда тӏад жемун, ботӏрода тӏад нурги чӏун букӏана, гьумер букӏана бакъ гӏадинаб, бохдул рукӏана цӏадул хӏубал гӏадинал.

² Гьес рагьун хъатикь ккун букӏана гьитӏинабго тӏехь. Кваранаб бох гьес ралъдада лъуна, квегӏаб бох ракъдада лъуна.

³ Гъалбацӏалъул гъулгъулиялда релълъараб кутакаб гьаракьалдалъун ахӏдезе лъугьана гьев. Гьев ахӏдолеб мехалда рагӏана анкьго нухалда зоб гъугъараб гӏадинаб гьаракь.

⁴ Анкьго нухалда зоб гъугъараб гӏадинаб гьаракь рагӏидал, гьеб хъвазейилан лъугьана дун. Амма зодисан ахӏулеб рагӏана: «Анкьго нухалда зоб гъугъаялдалъун дуда бицараб жо балъго те, гьеб хъваге дуца».

⁵ Ва ралъдадаги ракъдадаги чӏун дида вихьарав малаикас жиндирго кваранаб квер зодобехун битӏана.

⁶ Жив абадияв-даимасул, зобалги гьениб бугебщинабги, ракьги гьениб бугебщинабги, ралъадги гьениб бугебщинабги жинца бижарасул цӏар рехсон гьев гьедана кватӏичӏого лъугӏизе бугилан.

⁷ Анкьабилев малаикги ссуралъубе пуйзе лъугьина. Гьеб къоялъ лъугьина Аллагьас жиндирго лагъзадерида – аварагзабазда Рохалил хабар бицун лъазабун букӏараб балъгояб иш.

⁸ Зодисан дида рагӏун букӏараб гьаракь гьанжеги дидехун кӏалъана: «Ралъдадаги ракъдадаги чӏарав малаикас рагьун хъатикь ккураб доб тӏехь босизе а», – ян.

⁹ Малаикасда аскӏове ун, дица гьесда абуна гьеб гьитӏинаб тӏехь дихъе кьейилан. Гьес дида абуна: «Босун кванай гьеб. Дур чохьониб гьеб кьогӏлъила, амма дур кӏалдиб гьеб гьоцӏогӏанги гьуинаб букӏина»

¹⁰ Малаикасда кодоса босун, кванана гьеб гьитӏинаб тӏехь. Дир кӏалдиб гьеб гьоцӏогӏанги гьуинаб букӏана, амма чохьониб гьеб кьогӏлъана.

¹¹ Цинги дида абуна: «Гӏемерал халкъазе, миллатазе, мацӏазе ва парччахӏзабазе хадубккун щиб лъугьине бугебали нахъе-нахъеги бицине ккезе буго дуца».