Матфей 7 - Инжил

7 бетӏер Чияда гӏайиб чӏваге

¹ Нужеца чияда гӏайиб чӏваге, Аллагьас нужедаги гӏайиб чӏваларо.

² Кигӏанасеб гӏайиб нужеца гӏадамасда чӏваниги, гьедигӏанаб гӏайиб Аллагьас нужедаги чӏвазе буго. Кинаб сахӏалъ нужеца борцаниги, гьединабго сахӏалъ борцине буго нужееги.

³ Дурго бадиб бугеб чӏалу бихьичӏого, дур вацасул бадиб бугеб сум щай дуда бихьулеб?

⁴ Яги дуда кин кӏолеб: «Ворея, вац, дур бадиса сум бахъизе биччай», – ян гьесда абизе, дурго бадиб чӏалу букӏаго?

⁵ Ле, ххвелал гьарун ругьунав чи, цин дуца дурго бадиса чӏалу бахъе, цинги бичӏчӏила дуда вацасул бадиса сум кин бахъилебали.

⁶ Нужерго хирияб-мукъадасаб жо гьабзазе баге, жавгьар-якъут болъоназда цебе рехуге. Болъоназ гьеб малакь мерхьина, тӏаделъун нужги тӏутӏун рала.

Гьари-дугӏаялъул хӏакъалъулъ цоги нухалъ

⁷ Гьаре нужеца – нужее кьечӏого толаро; балагье нужеца – батичӏого хутӏуларо, нужеца нуцӏа бухе – гьеб рагьичӏого толаро.

⁸ Гьарарасе кьола, балагьарасда батула, бухарасе нуцӏаги рагьула.

⁹ Нужеда гъорлъ вугищ цониги чи, васас чед гьарараб мехалъ, гьесухъе гамачӏ кьолев?

¹⁰ Яги ччугӏа гьарани, гьесухъе борохь кьолев?

¹¹ Нужго квешал ругониги, нужеца лъималазе лъикӏабщинаб кьолеб мехалъ, жинда гьарарасе лъикӏабщинаб жо кигӏан цӏикӏкӏундай кьелеб зобалазда вугев нужер Инсуца!

Аллагьасул аслияб амру

¹² Гӏадамаз нужеего гьабизе бокьулеб жо, нужеца гӏадамазеги гьабе. Гьеле гьебин Мусал Къануналдаги аварагзабазул Тӏухьдуздаги бугебщиналъул аслу-кьучӏ.

Кӏиго нух

¹³ Чӏедераб нуцӏихъан лъугьа нуж жанире, – гӏебал кавабазги гӏатӏидаб нухалъги гӏадамал хвалде рачунелъул. Халкъалъул руккелалги гьенисан унел ругелъул.

¹⁴ Абадияб гӏумруялде гӏадамал рачуна чӏедераб нуцӏицаги къваридаб нухалъги, амма дагьазда батула гьеб.

Цӏодорго рукӏа!

¹⁵ Гьересиаварагзабаздаса цӏуне! Гьел нужехъе рачӏуна чахъдал цӏокоги тӏад ххун. Хӏакъикъаталда гьел руго хъантӏарал бацӏал.

¹⁶ Гьезул ишазда тӏад кинаб пихъ бижулеб бугебали халгьабун, лъала нужеда гьел. Зазил хъархъидаса цӏибил бетӏарабищ нужеца, тӏетӏелоялдаса инжирги бетӏарабищ?

¹⁷ Лъикӏаб гъотӏоца лъикӏаб пихъ кьола, турараб гъотӏода бижараб пихъ квешаб букӏуна.

¹⁸ Лъикӏаб гъотӏода квешаб пихъ бижизе рес гьечӏо, турараб гъотӏоца лъикӏаб пихъги кьоларо.

¹⁹ Тӏад лъикӏаб пихъ бижулареб гъветӏ къотӏун цӏадабе рехула.

²⁰ Гьедин, гьезул ишазда тӏад кинаб пихъ бижулеб бугебали халгьабун, лъала нужеда гьел гьересиаварагзаби.

²¹ «Я, Бетӏерчӏахъад! Я, Бетӏерчӏахъад!» – абун дида кӏалъанщинав чи гуро Зобалазул Парччахӏлъиялде ворчӏизе вугев. Гьениве ворчӏила зобалазда вугев дир Инсул амру тӏубазабурав чи.

²² Доб къоялъ гӏемерав чияс абила дида: «Бетӏерчӏахъад! Бетӏерчӏахъад! Дур цӏаралдалъун гурищ нижеца Аллагьасул амру халкъалъе загьир гьабураб? Дур цӏаралдалъун гурищ шайтӏаби рачахъарал? Дур цӏаралдалъун гурищ нижеца гӏемерал хӏикматал ишал гьарурал?»

²³ Гьебмехалъ дица гьезда лъазабила: «Дида рихьарал чагӏицин гуро нуж. Тӏагӏа дида аскӏоса, квешлъиялда хьвадараб уммат!»

Кӏиго кьучӏ

²⁴ Гьединлъидал дир гьал рагӏабазухъ гӏенеккарав ва гьел тӏуразарулевщинав чи релълъуна, тӏалде щвезегӏан кьучӏги бухъун, мина барав цӏодорав чиясда.

²⁵ Цӏадал рана, иххал щвана, гьурал пуна, – доб минаялде тӏаделъана гьел. Амма мина биххичӏо, тӏалда тӏад букӏиндал гьелъул кьучӏ.

²⁶ Амма дир гьел рагӏабазухъ гӏенекканиги, гьел тӏуразаричӏевщинав чи релълъуна салуда тӏад мина барав ахӏмакъав чиясда.

²⁷ Цӏадал рана, иххал щвана, гьурал пуна, – доб минаялде тӏаделъана гьел. Мина биххана, щущан ана, чӏваднал хутӏана.

²⁸ Гьале Гӏисаца жиндирго вагӏза лъугӏизабуна. Халкъ гӏажаиблъун хутӏана, гьес вагӏза гьабулеб куц бихьун.

²⁹ Гьезул диниял гӏалимзабаз гӏадин гуреб, цо хӏалкӏолъи жиндилъ бугев чияс гӏадин малъулеб букӏана гьес.