Матфей 5 - Инжил

5 бетӏер Гӏисал кӏудияб вагӏза

¹ Гӏемераб халкъ жинда хадуб бачӏунеб бихьидал, Гӏиса магӏарде вахана. Гьенив гӏодов чӏун гьев вукӏаго, тӏаде рачӏана гьесул муридал.

² Гьезие вагӏза гьабун, гьадин абуна Гӏисаца:

³ – Гьардарал гурищ гьел, Аллагьасда цере жал мискинго рукӏин лъалел, – гьезие бугелъул Зобалазул Парччахӏлъи.

⁴ Гьардарал гурищ гьел, гӏодулел ругел, – гьел рохизаризе ругелъул.

⁵ Гьардарал гурищ гьел, хӏалимаб гӏамал бугел, – гьезие щвезе бугелъул дуниялалъул кверщел.

⁶ Гьардарал гурищ гьел, ритӏухълъиялъухъ ракъарал-къечарал, – гьел гӏорцӏизе ругелъул.

⁷ Гьардарал гурищ гьел, гурхӏел-рахӏму бугел, – гьездаги гурхӏизе вугелъул.

⁸ Гьардарал гурищ гьел, ракӏ бацӏцӏадго бугел, – гьезда Аллагь вихьизе вугелъул.

⁹ Гьардарал гурищ гьел, ракълие рачел къалел, – гьезда Аллагьасул васалилан цӏар лъезеги бугелъул.

¹⁰ Гьардарал гурищ гьел, ритӏухъго хьвадунилан гӏадамаз гӏакъуба кьолеб бугел, – гьезие бугелъул Зобалазул Парччахӏлъи.

¹¹ Гьардарал гурищ нуж, – дун сабаблъун нужеда рогьо балеб мехалъги, нужее гӏакъуба кьолеб мехалъги, гьечӏеб рагӏи нужеде абулеб мехалъги – рохизе ругел.

¹² Роха-хинлъун рукӏа, разиго рукӏа, Зобалазда кӏудияб шапакъат щвезе бугин нужее. Цересел аварагзабазеги кьедал гӏадамаз гьедин гӏазабги гӏакъубаги.

¹³ Нуж руго гьаб дуниялалъул цӏам. Амма гьелъул цӏамгӏаллъи холеб бугони, гьеб кин кӏиабизе цӏамгӏаллъизабилеб? Халкъалъ хӏатӏикь мерхьине гӏодобе бани гурони, сундуениги къваригӏунаро гьебмехалъ цӏам.

¹⁴ Нуж руго дуниялалъе нур. Борхатаб магӏарда бугеб шагьар кин бахчизе кӏолеб?

¹⁵ Кӏалагъоркье гьабун сахӏ тӏад лъезе гуро чирахъ бакулеб, рокъор ругел киназего канлъи кьезе борхатаб бакӏалда лъезейин.

¹⁶ Гьедин нужер нуралъги канлъи кьеги гӏадамазе, нужер лъикӏал ишал гьезда рихьизе, зобалазда вугев нужер Инсуе гьез реццги гьабизе.

¹⁷ Нужеда ракӏалде ккоге дун Мусал къанунги аварагзабазул динги хвезабизе вачӏарав чийилан. Гьел хвезаризе гурев, гьел щвалде щун тӏуразаризе вачӏун вуго дун.

¹⁸ Хӏакълъун абулеб буго дица нужеда: зобалги ракьалги тӏагӏун инегӏан, къануналдаса цониги хӏучч, цониги тӏанкӏ тӏагӏине гьечӏо, Аллагьасул къадаралда рекъон кинабго тӏубазегӏан тӏагӏинаро гьеб.

¹⁹ Гьединлъидал къануналъул бищунго гьитӏинабгицин амру жинцаго хвезабуравги гьеб хвезабизе гӏадамазда малъаравги бищунго гьитӏинавлъун рикӏкӏине вуго Зобалазул Парччахӏлъиялда. Амма тӏубазабулевги ва тӏубазабеян цогидазда малъулевги бищунго кӏудиявлъун рикӏкӏине вуго.

²⁰ Гьале дица нужеда абулеб буго: фарисеязулалдасаги диниял гӏалимзабазулалдасаги нужер ритӏухълъи цӏикӏкӏинчӏони, Зобалазул Парччахӏлъиялде кин рорчӏилел нуж?

²¹ Нужеда лъала: некӏо рукӏарал гӏадамазеги Аллагьас амру гьабун букӏараблъи: «Чи чӏваге!» – ян ва: «Чи чӏварав чи судалде вачине вуго», – ян.

²² Дицани нужеда абулеб буго: жиндирго вацасда ццин бахъаравги судалде вачине вуго. Жиндирго вацасда: «Рака! (Вахьна!)» – ян абуравги вачине вуго тӏадегӏанаб судалде. «Гӏабдал!» – ан абуравги жужахӏалъул цӏадаве ккезе бегьула.

²³ Къурбаналъе жоги бачун, къурбаналъул гьан лъолеб бакӏалде унаго, дуда ракӏалде щвани дуца вацасул ццин бахъинабун букӏараблъи,

²⁴ дурго къурбанги гьеб бакӏалда тун, мун а дов вацасулгун рекъел гьабизе, цинги нахъвуссун вачӏун хадуб хъве дуца къурбан.

²⁵ Дагӏбадулас вачун, судалде унаго, нухдаго рекъел-бакъалдалъун гьев тӏаса вихьизавизе гӏедегӏе. Гурони, гьес мун судиясухъе щвезавила, судияс гӏеласухъе кьела, цинги гвандиниве рехила.

²⁶ Хӏакълъун абулеб буго дица дуда: дур ахирисеб шагьи-пара лъугӏичӏого, гьениса къватӏивеги ворчӏиларо.

²⁷ Нужеда лъала: «зина гьабуге», – ян амру букӏараблъи.

²⁸ Дицани нужеда абулеб буго: чӏужугӏаданалъухъ хъублъи-хъахӏбалъи ракӏалде ккун валагьаравщинав чиясул рекӏелъ гьелдехун зина лъугьанин.

²⁹ Дур кваранаб бералъ мун мунагьалде цӏалев вугони, бахъун рехе гьеб. Цо лага камиго лъикӏ дуе, тӏолабго черх жужахӏалъул цӏадабе рехизегӏан.

³⁰ Дур кваранаб квералъ мун мунагьалде цӏалев вугони, къотӏун рехе гьеб. Цо лага камиго лъикӏ дуе, тӏолабго черх жужахӏалъул цӏадабе ккезегӏан.

³¹ Чӏужу йиччан толев чияс гьелда цӏар тӏамиялъе нугӏлъи гьабулеб кагъат кье гьелъухъеян хъван букӏана.

³² Дицани нужеда абулеб буго: хъахӏбалъи хутӏун, цогидаб гӏиллаялъе гӏоло чӏужу йиччан таравщинав чи ккола зинаялда хьвадизе гьей тӏамулев чилъун. Цогидас йиччан тарай гӏадан ячарав чиги зиначи ккола.

³³ Цоги нужеда лъала некӏо рукӏарал гӏадамазеги: «Бараб гьа биххуге, нагагь мун гьедани, Аллагьасукьа хӏинкъун гьеб гьа тӏубазабе» – ян амру букӏараблъи.

³⁴ Дицани нужеда абулеб буго: киданиги гьедаруге. Зобалхӏаянги гьедуге – зодисанин Аллагьасул амру рещтӏунеб.

³⁵ Ракьалхӏаянги гьедуге – ракьалдайин Аллагьасул кверщел тӏибитӏун бугеб. Иерусалималъул цӏаралдалъунги гьедуге – гьеб буго кӏудияв Парччахӏасул шагьар.

³⁶ «Дир бетӏералхӏа», – янги гьедуге, дурго бетӏералда цониги рас я хъахӏлъизабизе, я чӏегӏерлъизабизе кӏоларо дуда.

³⁷ Бугелда бугин абе, гьечӏелда гьечӏин абе, хутӏарабщинаб рагӏи илбисалдасан бачӏараб буго.

³⁸ Нужеда лъала: «Бералъухъ къисасалъе бер бахъе, гӏусалъухъ гӏус бахъе», – янги амру букӏараблъи.

³⁹ Дицани нужеда абулеб буго: квешлъи гьабурасда дандечӏоге. Дур кваранаб кӏаркьеналда кьабуни, квегӏаб кӏаркьенги ккве гьесда цебе.

⁴⁰ Къадиясухъе вачун, духъа гурде бахъизе бокьарасе, тӏаса бахъун дурго гӏабаги кье.

⁴¹ Цо километралъ мун хӏалица вачарасда цадахъ кӏиго километралъги а.

⁴² Гьарарасе гьарарабги кье, налъуда кьеян вачӏаравги нахъчӏваге.

⁴³ Нужеда лъала: «Дуда аскӏов вугев чи вокьа» – ян ва «дурго тушман риха», – ян амру букӏараблъи.

⁴⁴ Дицани нужеда абулеб буго: нужерго тушбаби рокьа, нужее гӏазаб-гӏакъуба кьолелги дугӏадулъ рехсе.

⁴⁵ Зобалазда вугев нужер Инсул васаллъун лъугьина нуж гьебмехалъ. Щайгурелъул гьес бакъ баккизабула лъикӏазеги квешазеги, гьес цӏад базабула рацӏцӏадазеги хъубазеги.

⁴⁶ Нуж рокьулел гӏадамал нужее рокьиялъул кири кинаб букӏинеб? Гьебго жо гурищ магъало бакӏарулел чагӏазгицин гьабулеб?

⁴⁷ Нужерго вацазе гурони нужеца салам кьолеб гьечӏони, кири кинаб букӏинеб? Гьебго жо гурищ Аллагь лъаларезги гьабулеб?

⁴⁸ Гьединлъидал нужги камилаллъун рукӏа, Зобалазда вугев нужер Эмен камилав вугев гӏадин.