Матфей 3 - Инжил

3 бетӏер Яхӏя авараг халкъалда цеве вахъуна

¹ Гьеб заманаялда Ягьудиялъул гӏицӏаб авлахъалде вачӏуна Яхӏя авараг.

² – Нуж кантӏе, Аллагьасде русса, Зобалазул Парччахӏлъиялъул заман тӏаде гӏунтӏун бугебин! – абун лъазабулеб букӏана гьес.

³ «Цо ахӏи буго авлахъалда рагӏулеб: Бетӏергьанасе нух къачӏай, битӏизабе гьесда цебе шагьра!» – Гьединал рагӏаби Аллагьас Ишая аварагасда жиндир хӏакъалъулъ абурав чи вукӏана Яхӏя.

⁴ Яхӏяцайин абуни, варанидул квасул ретӏел ретӏунаан, рачлихъ борчунги букӏана хьвацӏил рачел. Гьес кваналеб жоги букӏана гарцӏги гӏалхул гьоцӏоги.

⁵ Гьесухъе рачӏунел рукӏана Иерусалим шагьаралдаса, Ягьудия улкаялдаса, Иордан гӏурул тӏолабго сверухълъиялдаса гӏадамал.

⁶ Жидерго мунагьал рехсон хадур, Аллагьасде руссун, гьезул мунагьал чуризе, Иордан гӏурул лъадалъ ччун рахъулаан Яхӏяца гӏадамал.

⁷ Лъадалъ ччун рахъизе гӏемерисел фарисеялги саддукеялги жиндихъе рачӏунел рукӏин бихьидал, Яхӏяца гьезда абуна: – Гӏай, нуж чӏегӏераб борхьил наслу! Нужеде гӏагарлъун бугеб Аллагьасул тамихӏалдаса лъутизе лъица малъараб?

⁸ Нужерго мунагьаздаса руссун, кантӏиялъул гъотӏода пихъ барщизабе.

⁹ Ниж Ибрагьимил наслуялъул лъимал ругилан гаргадизеги ракӏалде ккоге. Гьале дица нужеда абулеб буго: жиндие бокьани, гьал ганчӏаздасанги Ибрагьимил наслуялъул лъимал лъугьинаризе кӏола Аллагьасда.

¹⁰ Гъутӏбузда гъоркь гӏащтӏи лъун тун бугеблъи лъай нужеда. Лъикӏаб пихъ тӏад бижичӏеб гъветӏ къотӏун цӏадаб лъезе бугебха!

¹¹ Дица нуж кантӏизелъун, мунагьал чуризе лъадалъ ччун рахъун, рацӏцӏад гьарулел руго. Амма дида хадув вачӏунев вуго гӏемерго дидаса къудрат цӏикӏкӏарав чи. Гьес тӏаса рахъарал хьитал кодоре росизецин мустахӏикъав гьечӏо дун. Лъадаца гуреб, Илагьияб Рухӏалдалъун ва цӏаялдалъун чурун рацӏцӏад гьарила гьес нуж.

¹² Гьес бугьун хъатикь ккун буго, жиндирго гьоцӏиб ролъги бацӏцӏад гьабун, гьеб цагърахъе буссинабизе, наккуги ссвинго гьечӏеб цӏадабе бан бухӏила.

Гӏиса Аллагьасул Вас вукӏин загьирлъула

¹³ Гьеб заманаялда Галилеялдаса вахъун Гӏисаги вачӏана Иорданалде Яхӏяца лъадалъ ччун вахъизе.

¹⁴ Амма Яхӏя разилъулев вукӏинчӏо, гьес Гӏисада абуна: – Лъадалъ ччун вахъизе дун духъе вачӏине кколеб бакӏалда, мун дихъе щай вачӏарав? – ан.

¹⁵ Гьесие жавабалъе Гӏисаца абуна: – Цин гьадин букӏине те. Гьадин щвалде щун тӏубазабизе ккола нилъеца Аллагьас нилъедаса тӏалаб гьабулебщинаб жо. Гӏисаца абухъе гьабизе разилъана гьебмехалъ Яхӏя.

¹⁶ Лъадалъ ччун вахъун гьебсагӏат къватӏиве лъугьун вачӏана Гӏиса. Гьебмехалъ зобги кӏибикьизабун, миккидул сураталда боржун бачӏун, Аллагьасул Рухӏ Гӏисахъе рещтӏунеб бихьана.

¹⁷ Гьале гьаракьги рагӏана зобалаздасан: – Гьав вуго дие вокьулев дир Вас. Гьесдаса вохун вуго дун!