Матфей 23 - Инжил

23 бетӏер Диниял гӏалимзабиги фарисеялги какараб вагӏза

¹ Гьебмехалъ халкъалдехунги жиндирго муридаздехунги Гӏисаца абуна:

² – Муса аварагасул михӏрабалде рахун кӏалъалел руго гьанже диниял гӏалимзабиги фарисеялги.

³ Гьединлъидал гьезухъ гӏенекке ва гьез абурабщинаб гьабе нужеца. Амма гьез гьабураб гьабуге. Гьез абулебги гьабулебги данде кколарелъулха.

⁴ Гьез раччи бакӏлъизабулеб буго ва гьеб гӏадамазул мугъзада лъолеб буго. Жидецагойин абуни гьелда биччун килищцин хъвалеб гьечӏо.

⁵ Хириял рагӏаби тӏад хъварал чалуялги гӏеблъизарун, гӏабаялъул гӏертелалги халалъизарун, кинабго гьез гьабулеб буго гӏадамазда бихьизелъун.

⁶ Гьезие бокьула гьоболлъухъ кванил тӏотӏода нахъа бищунго хӏурматияб бакӏ кквезе ва синагогабазда жанир киназдасаго церегӏан гӏодор чӏезе,

⁷ базаркъотӏноб халкъалъ жидеего салам кьезе ва гӏадамаз жидеда мугӏалимзабийилан абизе.

⁸ Амма нужедаго мугӏалимзабийилан абизе биччаге нужеца. Щайин абуни, Мугӏалим цо вуго нужер, нуж киналго вацал руго.

⁹ Гьаб ракьалда лъиданиги эмениланги абуге, цо вуго нужер Эмен – зобалазда вугев Эмен.

¹⁰ Нужедаго насихӏатчагӏийилан абизеги биччаге, гӏицӏго Масихӏ вуго нужер Насихӏатчи.

¹¹ Нужер бищунго кӏудияв нужее хъулухъалъе чӏа абе.

¹² Жинцаго живго тӏадегӏанлъизавурав гӏодовегӏанлъизе вуго, гӏодовегӏанлъизавурав тӏадегӏанлъизе вуго.

¹³ Балагьги гӏазабги нужее, диниял гӏалимзаби ва фарисеял! Ххвелал гьаризе бокьула нужее! Зобалазул Парччахӏлъиялъул нуцӏа рахана нужеца гӏадамазда цебе: нужгоги лъугьунел гьечӏо гьенире, лъугьине бокьаралги риччалел гьечӏо.

^14-15 Балагьги гӏазабги нужее, диниял гӏалимзаби ва фарисеял! Ххвелал гьаризе бокьула нужее! Ралъадалги ракьалги тирула нужеца, цогӏаги чи диналде вуссинародайилан. Амма диналде вуссун хадув, нужеца гьев, нуж кӏигогӏан цӏикӏкӏараб даражаялда, жужахӏалъул агьлулъун лъугьинавула.

¹⁶ Балагьги гӏазабги нужее, бецал чагӏи квер ккун хадур цӏалел бецукал! Нужеца абула: «Мукъадасаб Рукъалъул цӏар рехсон бараб гьа бихханиги бегьулилан, амма Мукъадасаб Рокъоб бугеб меседалхӏайин бараб гьа биххизе бегьуларилан».

¹⁷ Бецал гӏабдалзаби руго нуж. Мукъадасаб Рукъищ хирияб бугеб, яги Мукъадасаб Рукъалъ жиб хиралъизабураб меседищ?

¹⁸ Нужеца цоги абула: «Къурбаналъул гьан лъолеб бакӏалъул цӏар рехсон гьедараб гьа бихханиги бегьулилан, амма гьениб лъураб къурбаналхӏаян гьедараб гьа биххизе бегьуларилан».

¹⁹ Бецукал руго нуж! Къурбаналъул гьан лъолеб бакӏищ хирияб, яги гьеб бакӏалъ хиралъизабураб къурбанищ?

²⁰ Хӏакъикъаталдаги къурбаналъул гьан лъолеб бакӏалъул цӏар рехсон гьедулаго, гьев чияс гьелдаго цадахъ гьениб лъун бугебщинабги рехсолеб бугогури.

²¹ Мукъадасаб Рукъалъул цӏар рехсон гьедулаго, гьев чияс гьелдаго цадахъ гьеб рукъалъул Бетӏергьанасул цӏарги рехсолеб бугогури.

²² Зобалхӏайилан гьедулаго, гьев чияс гьелдаго цадахъ зобалазда бугеб тахги тахида вугевги рехсолел ругогури.

²³ Балагьги гӏазабги нужее, диниял гӏалимзаби ва фарисеял! Ххвелал гьаризе бокьула нужее! Нужеца садакъаде кьола сагӏаналъул, анисалъул ва мучариялъул анцӏил бутӏа, амма Къануналъул бищунго аслиял ритӏухълъиги, рахӏму-хӏелмуги, Аллагьасде иман лъейги нужеца рехун тун руго. Гьебги гьабизе ккола, гьабцоябги рехун тезе бегьуларо.

²⁴ Бецал чагӏи квер ккун хадур цӏалел бецукал руго нуж! Кӏкӏара ургьибе ккелебилан хӏинкъун, лъим цӏцӏула нужеца, амма варанаби къулчӏулел руго.

²⁵ Балагьги гӏазабги нужее, диниял гӏалимзаби ва фарисеял! Ххвелал гьаризе бокьула нужее! Нужеца суркӏа-щуруналъул тӏасахун рахъ бацӏцӏад гьабун чураниги, гьелъул жаниса рахъ цӏун буго зулмуялдалъунги хъантӏиялдалъунги бакӏараралъул.

²⁶ Ле бецав фарисеяв, цин дуца суркӏа-щурун жаниса бацӏцӏад гьабе, гьелъул къватӏисахун рахъги бацӏцӏалъизе.

²⁷ Балагьги-гӏазабги нужее, диниял гӏалимзаби ва фарисеял! Ххвелал гьаризе бокьула нужее! Хъахӏаб лажбар бахараб хобалда релълъуна нуж. Къватӏисахун гьеб берцинго бихьула, амма гьелда жанибин абуни, хварасул ракьа-макъарги цогидаб хъублъиги букӏуна.

²⁸ Тӏасан ралагьун, гӏадамазда ккола нуж вализаби ратилилан, амма жаниса нуж ххвелазул ва пасалъиялъул цӏун руго.

²⁹ Балагьги гӏазабги нужее, диниял гӏалимзаби ва фарисеял! Ххвелал гьаризе бокьула нужее! Цересел аварагзабазул хобазда тӏад мазарал гьарулел руго нужеца, вализабазул хобазда занал чӏвалел руго.

³⁰ Нужеца абулеб буго, дол умумузул заманаялъ ниж рукӏаралани, аварагзабазул би гӏодобе тӏеялъулъ нижеца гӏахьаллъи гьабилароанилан.

³¹ Гьелдалъун нужеца нугӏлъи гьабулеб бугогури дол аварагзаби чӏваразул васал нуж рукӏиналъе.

³² Умумузул мунагьазул къолода тӏаде рикьиги балеб буго нужеца.

³³ Гьай, чӏегӏераб борхьил наслу! Жужахӏалъуре рехизе бугеб хӏукмуялдаса кире нуж рорчӏилел?!

³⁴ Гьале дица нужехъе ритӏулел руго аварагзабиги, гӏакъилзабиги, гӏалимзабиги. Гьезул цоял нужеца чӏвазе ва хъанчида разе руго. Цогидал нужерго синагогабазда жанир цӏалаца рухизе руго, цо шагьаралдаса цогидалде лъутизаризе руго.

³⁵ Дуниял бижаралдаса нахъе гӏодобе тӏураб тӏолабго бацӏцӏадаб бидул хӏакъ нужеда тӏаде ккезе буго. Вацӏцӏадав Гьабилидаса байбихьун, цинги Мукъадасаб Рукъалъул минаялдаги къурбан хъолеб бакӏалдаги гьоркьов шагьидлъарав Барахиял вас Закарияде щвезегӏан нужеца чӏварал аварагзабазул би буго гьеб.

³⁶ Хӏакълъун абулеб буго дица нужеда: гьаб умматалде тӏаде ккезе буго дозул бидул хӏакъ.

Гӏисаца бицунеб буго Иерусалималъул хӏакъалъулъ

³⁷ Вай Иерусалим, Иерусалим! Аварагзаби чӏвалеб ва духъе ритӏарал Аллагьасул илчизабазда ганчӏал речӏчӏулеб шагьар! Чан нухалъха дие бокьун букӏараб, къурщица тӏанчӏи гӏадин, дур гӏадамал дирго кваркьиялда гъоркье рачине, амма нужее гьеб бокьичӏо.

³⁸ Балагьея, нужер Хирияб Рукъ чӏобого хутӏила.

³⁹ «Бетӏергьанас витӏун вачӏунев вугесда баркат лъеги», – ян нужеца абизегӏан вихьиларо нужеда дун гьанжеялдаса хадув.