Матфей 22 - Инжил

22 бетӏер Бертадул мисал

¹ Мисал бачун, цоги хабар бицана Гӏисаца гьезие:

² – Зобалазул Парччахӏлъи релълъуна жиндирго васасе бертин гьабулев вукӏарав цо парччахӏасда.

³ Берталъе гӏадамал ахӏизе рагьтӏателал ритӏун рукӏун руго гьес, амма гьенире рачӏине бокьун гьечӏо гӏадамазе.

⁴ Нахъеги ритӏун руго гьес цогидал рагьтӏателал, гьезда абейин, квен хӏадурун бугин, мачӏадалъе хьихьарал оцалги бусбиги хъун ругин, кинабго къачӏан бугин, берталъе рачӏаян.

⁵ Амма гьеб ахӏиялъул агъазги гьабичӏого, рахъ-рахъалъ ун руго гьел: цояв жиндирго хуриве ун вуго, цояв даран-базаралъ ун вуго.

⁶ Цогидаз парччахӏасул рагьтӏателал, кквезеги ккун, инжитги гьарун, чӏван руго.

⁷ Гьебмехалъ парччахӏасул кутакалда ццин бахъун буго гьезда. Жиндирго боги битӏун гъурун руго гьес дол рагьтӏателал чӏварал гӏадамал ва гьезул шагьарги бухӏун буго.

⁸ Цинги гьес жиндирго рагьтӏателазда абун буго: – Бертадул тӏутӏ тӏибитӏун буго, амма тӏотӏоде ахӏарал гӏадамал гьелъие мустахӏикъал ратичӏо.

⁹ Гьанже къватӏахъе-нухазде ун, цеве вата-ватарав чи ваче берталъе.

¹⁰ Къватӏахъе-нухазде ун гьел рагьтӏателаз квешалги лъикӏалги – цере рата-ратарал рачун рачӏуна. Гьедин ахӏарал гӏадамазул цӏун буго бертадул рукъ.

¹¹ Берталъе рачӏарал гӏадамазухъ валагьизе парччахӏ жаниве лъугьараб мехалъ, гьесда гьенив вихьун вуго берталъе ретӏунеб хасаб партал ретӏинчӏев цо чи.

¹² Парччахӏас гьесда абун буго: «Ле, гьудул, берталъе ретӏунеб партал ретӏинчӏев мун гьаниве жаниве кин ворчӏарав?» Гьев чи вуцӏцӏун чӏун вуго.

¹³ Парччахӏас гьебмехалъ рагьтӏателазе амру гьабун буго гьев чи, квералги бохдулги рухьун, дове бецӏаб къотӏнове рехеян. Гӏодулел ва цаби къерщезарулел рукӏина дора гӏадамал.

¹⁴ Ахӏарал гӏезегӏан ругониги, тӏаса рищарал дагь гурони гьечӏелъулха!

Гӏисае кьолел суалалги гьесул жавабалги Къайсарасе магъало кьеялъул хӏакъалъулъ

¹⁵ Гьениса къватӏире рахъун фарисеял данделъана Гӏисал кӏал таризабизе щибдай ургъун лъикӏилан.

¹⁶ Гьез жидерго муридалги гьеродилалги ритӏана Гӏисахъе. Гьез абуна: – Я, Мугӏалим! Нижеда лъала мун ритӏухъав чи вукӏин. Аллагьасул хӏакъаб нух буго дур малъиги. Лъилниги мурад цӏунун, гьесие хӏелиги дур пикруялда рекъоларо. Чи вихьун иш гьабулеб гӏамалги дур гьечӏо.

¹⁷ Гьединлъидал, бице нижеда. Дуда кин ракӏалде кколеб: Мусал Къануналда рекъон бегьулебищ къайсарасе магъало кьезе яги бегьуларебищ?

¹⁸ Гьезул хӏилла-макру бичӏчӏун, Гӏисаца абуна: – Гӏай, нуж ххвелал гьарулел чагӏи! Щай нужеца дир хӏалал рихьулел?

¹⁹ Магъалоде кьезе кколеб цо гӏарац босе гьанибе дихъе. Гьез гьесухъе цо динар босун бачӏуна.

²⁰ Гӏисаца абуна: – Лъил суратги хъвай-хъвагӏайги гьалда бугеб?

²¹ Къайсарасул бугилан абуна гьез. – Гьедин батани, къайсарасулаб къайсарасе кье, Аллагьасулаб Аллагьасе кье, – ян абуна Гӏисаца гьезда.

²² Гьеб жавабалъ хӏикмалъизарурал гьел, живго гьевги тун, нахъе ана.

Хварал тӏаде рахъинариялъул хӏакъалъулъ

²³ Гьебго къоялъ Гӏисахъе рачӏана саддукеял абулел, къиямасеб къоялъ хварал тӏаде рахъине рукӏиналда божуларел гӏадамал, ва гьез Гӏисада гьикъана:

²⁴ – Я, Мугӏалим! Мусаца абун буго: «Лъимер-бетӏерги гьечӏого цо пуланав чи хвани, гьесул вацас ячине кколин жиндирго вацасул къоролай, дов хварав вацасул наслу къинчӏого букӏине».

²⁵ Нижер вукӏана анкьго вац. Чӏужу ячун хадув хвана бищун кӏудияв вац. Гьезул лъимер-бетӏер лъугьун букӏинчӏелъул, хадусев вацас ячана гьесул йикӏарай чӏужу.

²⁶ Гьединго ккана иш кӏиабилесулги, лъабабилесулги, анкьабилесде щвезегӏанги.

²⁷ Ахиралда хвана гьей гӏаданги.

²⁸ Къиямасеб къоялъ гьев анкьавго вацасда гьоркьоса лъил чӏужулъун гьей йикӏине йигей? Анкьасулго лъади йикӏиндалха гьей.

²⁹ Гьезие жавабалъе Гӏисаца абуна: – Я Тӏухьдузда бугеб лъангутӏиялъ, я Аллагьасул къудраталда божунгутӏиялъ къосинарун руго нуж.

³⁰ Къиямасеб къоялъ чӏаголъаразул я лъудби, я росал рукӏине гьечӏо, зобалазда ругел малаикзабазул гӏадинаб гӏумру букӏине буго доба гьезулги.

³¹ Хварал чӏаголъизе рукӏиналъул хӏакъалъулъ цӏаличӏебищ нужеца Аллагьас нужеда абураб гьадинаб калима:

³² «Дун вуго Ибрагьимил Аллагь, Исхӏакъил Аллагь, Якъубил Аллагь»? Аллагь – гьев хваразул Аллагь гуро, чӏагоязул Аллагь вуго.

³³ Гьесухъ гӏенеккараб халкъ гӏажаиблъун хутӏана Гӏисал рагӏабазда.

Бищунго аслияб амруялъул хӏакъалъулъ

³⁴ Гӏисаца саддукеял руцӏцӏун чӏезарунилан рагӏидал, фарисеял данделъана.

³⁵ Гьезда гьоркьоса цо динияв гӏалимчияс, Гӏисал хӏалбихьизелъун, гьесда гьикъана:

³⁶ – Я, Мугӏалим! Къануналда бищунго аслияб амру щиб кколеб? – абун.

³⁷ Гӏисаца гьесда абуна: – «Дурго Бетӏергьан Аллагь дуе вокьа дур тӏолабго ракӏалдалъун, дур тӏолабго рухӏалдалъун, дур тӏолабго гӏакълу-пикруялдалъун».

³⁸ Гьеб ккола бищунго аслияб ва тӏоцебесеб амру.

³⁹ Гьелдаго релълъараб буго кӏиабилебги: «Мунго гӏадин вокьа дуе дуда аскӏов вугевги».

⁴⁰ Гьеб кӏиябго амру буго тӏолабго Мусал къануналъулги аварагзабазул Тӏухьдузулги кьучӏ.

«Давудил вас гуро Масихӏ»

⁴¹ Фарисеял гьенире данделъараб мехалда, Гӏисаца гьезда гьикъана:

⁴² – Масихӏил хӏакъалъулъ щиб пикру нужер бугеб? Лъил вас гьев? Давудил василан жаваб кьуна гьез.

⁴³ Гӏисаца гьезда абуна: – Илагьияб Рухӏалъ малъун, Давудица щайха гьев жиндир Бетӏергьанлъун рикӏкӏунев вугев? Давудица абуна:

⁴⁴ «Тӏадегӏанав Аллагьас дир Бетӏергьанасда абуна: „Дир кваранаб рахъалда гӏодов вукӏа, дица дур тушбаби дур хӏатӏазда цере чӏезаризегӏан“».

⁴⁵ Гьедин Давудица жинцаго Масихӏиде жиндир Бетӏергьанилан абулеб бугеб мехалъ, Давудил вас кин гьев кколев?

⁴⁶ Лъиданиги кӏвечӏо Гӏисае жаваб кьезе, ва гьеб къоялдаса нахъе лъилниги бахӏарчилъи гӏечӏо гьесда щибниги гьикъизе.