Матфей 2 - Инжил

2 бетӏер Цӏвабзазул гӏелму лъалел гӏадамал рачӏуна Лъимер бихьизе

¹ Ягьудиялъул Бетлегьем шагьаралда Гӏиса гьавуна Гьерод ханлъун вугеб заманалда. Гьебмехалъ бакъбаккул рахъалдасан Иерусалималде рачӏана цӏвабзазул гӏелму лъалел гӏадамал. Гьез абуна:

² – Жугьутӏазул Парччахӏлъун вукӏине гьавурав дов вас кив вугев? Зобалазул бакъбаккул рахъалда баккун бихьана нижеда гьев гьавунилан бицунеб цӏва. Гьесие сужда гьабизе рачӏун руго ниж.

³ Гьерод ханги, гьесдаго цадахъ Иерусалималъул тӏолабго халкъги бихха-хочун лъугьана гьеб хабар рагӏидал.

⁴ Гьеб халкъалъул киналго чӏахӏиял кашишзабиги диниял гӏалимзабиги данде ракӏарун, Гьеродица гьезда гьикъана Масихӏилан абулев парччахӏ кив гьавизе кколевилан.

⁵ Гьез абуна Масихӏ Ягьудиялъул Бетлегьем шагьаралда гьавизе кколилан, цо аварагас Аллагьасул калима гьадин хъван бугилан:

⁶ «Мунги, Бетлегьем, Ягьудал наслуялъул ракьалдайин бугеб, Ягьудал наслуялъул ракьалда ругел аслиял шагьараздаса къураб жо щибниги гьечӏебин дур. Дур гьенив вахъина Дир хирияб Исраилил халкъалъул тӏалаб гьабулев Цевехъан».

⁷ Гьебмехалъ Гьеродица, цӏвабзазул гӏелму лъалел гӏадамал балъго жиндихъего ахӏун, гьезда цӏехон, мухӏканго лъазабуна доб цӏва кида баккун бихьарабали.

⁸ Цинги гьел Бетлегьемалде ритӏана, гьеб лъимадул хӏакъалъулъ кинабго хӏакъикъат лъазабеян. Гьеб Лъимер батараб мехалъ жинда лъазабизе рачӏайиланги абуна Гьеродица. Жиндиеги бокьун бугила гьеб Лъимералъе сужда гьабизе.

^9-10 Ханасулгун хабар-накъит лъугӏидал, рахъун ана цӏвабзазул гӏелму лъалел гӏадамал. Бакъбаккуда доб мехалъ бихьараб цӏваги унеб букӏана зодисан гьезда цебе-цебе. Кутакаб рохел лъугьана гьезул рекӏелъе гьебмехалъ. Ахирги доб лъимер бугеб бакӏалда тӏад чӏана гьеб цӏва.

¹¹ Рокъоре жанире лъугьиндал, лъимерги батана, лъимадул эбел Марямги ятана. Нодо гӏодоб цун сужда гьабуна гьесие цӏвабзазул гӏелму лъалел гӏадамаз. Цере рахъун, гьесие цӏакъго хириял сайигъаталги кьуна: меседги, мирраги, кьеккен гьабулеб гьуинаб махӏалъул пицӏги.

¹² Гьезда макьилъ лъазабуна Гьеродихъе унгейилан. Гьелги батӏияб нухалъ тӏадруссун ана жидерго улкаялде.

Лъимерги бачун, Мисриялде лъутула Юсупги Марямги

¹³ Гьел нахъе индал, гьале Бичасул малаик вачӏун вуго Юсупихъе макьилъ. – Гьеб лъимерги бачун, гьесул эбелги ячун, мун вахъун Мисриялде лъуте, – ян абуна малаикас. – Тӏадвуссайилан дица абизегӏан гьенив чӏа. Гьеродида ракӏалда буго гьеб Лъимер балагьизе ва чӏвазе.

¹⁴ Гьебсагӏат тӏаде вахъана Юсуп; васги вачун, гьесул эбелги ячун, сардилъго Мисриялде ана.

¹⁵ Гьерод хвезегӏан Мисриялда чӏана. Гьеб гьедин ккана, цо аварагасда Аллагьас абураб гьадинаб калима ритӏухълъизе: «Мисриялдаса нахъе айилан амру гьабуна дица дирго васасда».

Гьеродица лъимал чӏваян амру гьабула

¹⁶ Дол цӏвабзазул гӏелму лъалел гӏадамаз живго гуккаравлъи лъайдал, Гьеродил ццин гьалаглъана. Бетлегьем шагьаралдаги ва гьелда сверухъ ругел бакӏаздаги кӏиго соналде бахинчӏеб бихьинабщинаб лъимер цо течӏого чӏвазе чагӏи ритӏана. Цӏвабзазул гӏелму лъалел гӏадамаз бицун, мухӏканго лъан букӏиндалха гьесда доб Лъимер гьабураб заман.

¹⁷ Гьедин ритӏухълъана Иеремия аварагасда Аллагьас абураб гьадинаб калима:

¹⁸ «Рамаялдасан рагӏулеб буго кутакаб магӏил гьаракь. Ракел гӏодилей йиго жиндирго лъималазухъ, ракӏ-макӏ гьабуниги, гӏенеккулей гьечӏо гьей. Тӏокӏал гьечӏелъулха гьел!»

Юсуп Мисриялдаса тӏадруссуна

¹⁹ Гьерод хвараб мехалъ, Мисриялда вукӏарав Юсупихъе Бичасул малаик вачӏана макьилъ.

²⁰ Гьес Юсупида абуна: – Васги вачун, гьесул эбелги ячун, вахъун Гӏизраилалъул ракьалде а. Гьеб Лъимер чӏвазе къасд гьабулел рукӏарал чагӏи хун руго.

²¹ Васги вачун, гьесул эбелги ячун, Гӏизраилалъул ракьалде ана Юсуп.

²² Амма Гьеродил бакӏалда Ягьудиялъул ханлъун гьесул вас Архелай вугин рагӏидал, гьениве ине хӏинкъунги вукӏана Юсуп. Макьилъ лъазабун хадуб,

²³ Галилея улкаялде вачӏун, Назарет абулеб шагьаралда чӏана. Гьедин ритӏухълъана назареталдасевилан абилин хадуб гьесдаян аварагзабазда Аллагьас бицун букӏараб калимаги.