Матфей 19 - Инжил

19 бетӏер Гӏисаца ригьнал хӏакъалъулъ бицуна

¹ Гьанже гьеб хабар бицун бахъиндал, Галилеялдаса нахъе ана Гӏиса ва Иордан гӏор бахун доб рахъалда ругел Ягьудиялъул бакӏазде щвана.

² Гӏемераб халкъ бачӏунеб букӏана Гӏисада хадуб, унтарал-щокъал сахлъизарулел рукӏана гьес.

³ Рачӏун фарисеяз, Гӏисал хӏалбихьизе, цӏехана: – Бокьараб гӏиллаялъе гӏоло росас чӏужу йиччан тезе бегьулейищ? – ан.

⁴ Гӏисаца абуна: – Нужеца цӏаличӏебищ: Гӏалам Бижарас тӏоцере «рижана бихьинчиги чӏужугӏаданги»?

⁵ Цинги гьес абуна: «Гьединлъидал эбел-эменги рехун тун, бихьинчи чӏела жиндирго чӏужуялде вуссун, ва гьел кӏиялго цолъун, цого лъугьина»

⁶ Гьелдаса хадур кӏиго рукӏунаро гьел, цого рукӏуна. Аллагьас цолъизабураб инсанас батӏалъизабизе бегьуларо.

⁷ Фарисеяз абуна: – Щайха Мусаца изну кьун бугеб цӏар тӏамиялъе нугӏлъи гьабулеб кагъат кодобе кьолеб бугони, чӏужу йиччан тезе?

⁸ Гӏисаца абуна: – Нужер чанкӏкӏи сабаблъун кьуна Мусаца нужее лъудби риччан тезе изну. Амма авалалдасанго гьедин букӏинчӏо.

⁹ Дица нужеда абулеб буго: хъахӏбалъи хутӏун батӏияб гӏиллаялъе гӏоло чӏужуги йиччан тун, цогидай ячарав чи жиндирго йикӏарай чӏужуялда цеве мунагьалъукье ккола. Гьеб мунагьги зиналъун рикӏкӏуна.

¹⁰ Муридаз Гӏисада абуна: – Чӏужуялъул рахъалъ бихьинчиясул иш гьедин бугеб батани, чӏужуго ячинчӏого чӏани лъикӏ букӏина.

¹¹ Гьезда Гӏисаца абуна: – Ригьин гьабичӏого тезе Аллагьас бажари кьураз гурони къабул гьаруларо гьел рагӏаби.

¹² Щаян абуни, цо-цо ругелъулха эбелалъул ургьирго ахтаяллъун рижарал; цогидалал ахтаяллъун гӏадамаз лъугьинарула; Зобалазул Парччахӏлъиялъе гӏоло лъудби рачинчӏого чӏаралги руго. Къабул гьабизе бажарулес къабул гьабе гьеб.

Гӏисаца лъималазе дугӏа гьабула

¹³ Гӏисахъе лъимал рачун рачӏана, гьезда тӏад квер бахъеян ва дугӏа гьабеян гьарун. Муридаз гьел риччалел рукӏинчӏо.

¹⁴ Гӏисаца абуна: – Риччанте лъимал дихъе рачӏине, гьезие квекӏен гьабуге. Гьединазейин Зобалазул Парччахӏлъи щун бугеб!

¹⁵ Цинги, гьел лъималазда тӏад кверги бахъун, Гӏиса гьениса ана.

Зобалазул Парччахӏлъиги инсанасул бечелъиги

¹⁶ Гьале цо гӏолохъанчияс Гӏисада гьикъана: – Я, Мугӏалим! Абадияб рукъалъул бутӏа щвеялъе щиб лъикӏлъи дица гьабизе кколеб?

¹⁷ Гӏисаца гьесда абуна: – Лъикӏлъиялъул хӏакъалъулъ щай дуца дида гьикъулеб? Лъикӏав вуго цохӏо Аллагь. Абадияб рукъалъул бутӏа щвезе бокьани, Аллагьасул амруял тӏуразаре.

¹⁸ – Кинал? – абун гьикъана дос. Гӏисаца абуна: – «Чи чӏваге», «зина гьабуге», «цӏогьодуге», «гьересинугӏлъи гьабуге»,

¹⁹ «эбел-инсул адаб-хъатир гьабе». Цоги: «мунго гӏадин вокьа дуе дуда аскӏов вугевги».

²⁰ Гьев гӏолохъанчияс Гӏисада абуна: – Гьел амруял дица гьанжелъагӏанги тӏуразаруна. Цоги щиб дие камун бугеб?

²¹ Гӏисаца гьесда абуна: – Тӏубанго камиллъизе бокьани, дурго бугеб кинабго боцӏи-рикъзи биче ва мискин-пакъирасе садакъаде кье. Гьелъухъ дуе насиблъила зобалазул хазина. Цинги дихъе вачӏа, дида цадахъ вилълъине.

²² Гьеб рагӏидал, гӏолохъанчи къваридго нахъе ана. Гьев вукӏун вуго кутакалда бечедав чи.

²³ Жиндирго муридазда Гӏисаца абуна: – Хӏакълъун абулеб буго дица нужеда: Зобалазул Парччахӏлъиялде ворчӏизе цӏакъ захӏмалъула бечедав чиясе.

²⁴ Гьале цоги нухалъ абулеб буго дица нужеда: рукӏкӏадул ролъиялъусан лъугьине вараниялъего бигьа букӏина Аллагьасул Парччахӏлъиялде ворчӏизе бечедав чиясеялдаса.

²⁵ Гьеб рагӏидал, гӏажаиблъун-хӏикмалъун хутӏарал муридаз гьикъана: – Гьедин батани, хвасарлъизе кӏолев чигӏаги щивдайха?

²⁶ Гьезухъги валагьун, Гӏисаца абуна: – Гӏадамазда гьеб кӏоларо, амма Аллагь сундуего хӏалкӏолев вуго.

²⁷ Гьебмехалъ Пётрица абуна: – Гьале, кинабго рехун тун, ниж дуда цадахъ рилълъана. Щибха нижее гьелъухъ букӏинеб?

²⁸ Гӏисаца гьезда абуна: – Хӏакълъун абулеб буго дица: гьедин дида хадур рачӏиндал нуж, цӏияб дуниялалда Гӏадамил Лъимер жиндирго къудраталъул тахида гӏодов чӏараб мехалъ, анцӏила кӏиябго тахида дида аскӏор гӏодор чӏезе руго. Исраилил анцӏила кӏиябго наслуялъе суд гьабизе.

²⁹ Дие гӏоло мина-рукъги, вацал-яцалги, эбел-эменги, лъимал-хъизанги, хур-ахги рехун таравщинав чиясе нусго нухалъ цӏикӏкӏун щвела ва абадияб гӏумру насиблъила.

³⁰ Цере рукӏарал чангиял тӏарамагъаде ккела, тӏарамагъада рукӏаразул чангиял цере ккела.