Матфей 16 - Инжил

16 бетӏер Гьаб умматалъе гӏаламат букӏине гьечӏо

¹ Гӏисахъе рачӏана фарисеялги саддукеялги. Гьесул хӏалбихьизелъун гьез тӏалаб гьабуна зодисан гӏаламат бихьизабеян.

² Жавабалъе гьес абуна: – Къаси нужеца абула зоб багӏарлъун бугин, метер роцӏараб къо букӏинин.

³ Радал нужеца абула жакъа кьерхараб къо букӏинин, багӏарсияб ва накӏкӏуяб кьер лъугьун бугин зодил. Зобалазул хиса-басиязда хадур гӏунтӏула нуж, амма гьаб тӏаде гӏунтӏун бугеб заманаялъул гӏаламатал щайха нужеда лъаларел?

⁴ Квешлъиги хъахӏбалъиги гӏемерлъараб гьаб умматалъе къваригӏун буго зодисан гӏаламат бихьизе. Амма Юнус аварагасул гӏаламат гурони, цогидаб гӏаламат гьазие букӏине гьечӏо. Цинги, гьелги жалго тун, Гӏиса нахъе ана.

Фарисеязулги саддукеязулги реччеялъул хӏакъалъулъ

⁵ Ралъдал добцояб рагӏалде унаго, чед цадахъ босизе кӏочон тун батана муридазда.

⁶ Гӏисаца гьезда абуна: – Вореха, фарисеязулги саддукеязулги реччеялдаса цӏунун чӏа нуж. Жидедаго гьоркьоб хабар ккана гьезул:

⁷ «Нилъеца чед цадахъ босичӏилан абураб магӏна букӏине ккола гьел рагӏабазул».

⁸ Гьезул пикру бичӏчӏун, Гӏисаца абуна: – Чед гьечӏилан гаргадизе бегьилищ нуж? Нужго кинал гьединал иманги дагьал,

⁹ бичӏчӏиги гьечӏел! Щуазарго чиясе щуго чед гӏураблъи ракӏалда гьечӏищ нужеда? Хутӏарал чадил мочӏабазул чан гьегь нужеца цӏезабураб?

¹⁰ Яги ункъазарго чиясе анкьго чед гӏураблъи ракӏалда гьечӏищ? Хутӏарал чадил мочӏабазул чан гьегь нужеца цӏезабураб?

¹¹ Чадил бицунеб гьечӏеблъи щай нужеда бичӏчӏулареб? Амма фарисеязул реччеялдасаги саддукеязул реччеялдасаги цӏунун чӏа нуж!

¹² Гьанже гьезда бичӏчӏана фарисеязулги саддукеязулги реччеялдаса гуреб, гьезул малъа-хъваяздаса цӏунеян абулеб бугеблъи.

Пётрица иман лъуна Гӏиса Масихӏ вукӏиналде

¹³ Филиппил Къайсарияталъул ракьалде щведал, Гӏисаца муридазда гьикъана: – Гӏадамил Лъимер щивлъун рикӏкӏунев вугев гӏадамаз?

¹⁴ Гьез абуна: – Цояз абулеб буго Яхӏя авараг вугилан. Цояз абулеб буго Иляс авараг вугилан, Иеремия яги цогидав авараг вугилан абулел чагӏиги руго.

¹⁵ – Нужеца щивлъунха дун рикӏкӏунев? – ан абуна Гӏисаца.

¹⁶ Пётр абун тӏокӏцӏар бугев Симоница жаваб кьуна: – Мун вуго хӏакъав Аллагьасул Вас Масихӏ!

¹⁷ Гьесдехун вуссун Гӏисаца абуна: – Гьардарав гурищ мун, Юнусил вас Симон. Инсанас гуро мун гьелде кантӏизавурав, зобалазда вугев дир Инсуца кантӏизавуна.

¹⁸ Цоги дица дуда абулеб буго мун Пётр (Кьуру) вугилан, гьеб кьурда тӏад бала дица дирго Килиса, ва хвалил къуваталъе къуркьиларо гьеб.

¹⁹ Дица духъе кьела Зобалазул Парччахӏлъиялъул кӏул, ракьалда дуца гьукъарабщинаб зобалаздаги гьукъила, ракьалда дуца изну кьурабщиналъе зобалаздаги изну кьела.

²⁰ Цинги Гӏисаца жиндирго муридазда лъазабуна жив Гӏиса Масихӏ вугилан лъиданиги бицунгеян.

Гӏисае букӏине бугеб гӏазаб-гӏакъуба

²¹ Гьелдаса хадуб Гӏисаца гьезда бицине байбихьана жив Иерусалималде ине вугин, чӏухӏби-хӏакимзабазги, чӏахӏиял кашишзабазги, диниял гӏалимзабазги жиндие гӏазаб-гӏакъуба кьезе бугин, чӏвазе вугин ва лъабабилеб къоялъ Аллагьас чӏаголъизавизеги вугин.

²² Довегӏанги вачун Пётр лъугьана гьедин абугейилан гьесда дандечӏун кӏалъазе: – Аллагьас цӏунаги, Бетӏерчӏахъад! Дуе гьеб лъугьине рес гьечӏо!

²³ Кьурун вуссун, Пётрида абуна гьес: – Тӏагӏа дида аскӏоса, илбис! Дуца дун къосинавулев вуго! Аллагьасулаб тун инсанасулаб лъугьун буго дур рекӏелъе.

²⁴ Цинги жиндирго муридазда Гӏисаца абуна: – Дида цадахъ вилълъине бокьарав чи ватани, гьес жиндирго напсалдаса инкар гьабе, жиндаго тӏаде ккараб хъанчил гӏазабги бачче ва дида хадув вачӏа.

²⁵ Щаян абуни, жиндирго гӏумру цӏунизе бокьулев чи гьелдаса махӏрумлъила, дие гӏоло гӏумруялдаса махӏрумлъизе разилъарасда гьеб цӏидасан батила.

²⁶ Жиндирго рухӏги рецӏалие кьун, тӏолабго дуниялалъул кверщел хъатикье щвеялъул щиб пайда бугеб инсанасе? Жиндирго рухӏалъухъ хисун кьезе щиб бугеб инсанасул?

²⁷ Жиндирго Инсул къудраталдалъун, Гӏадамил Лъимер дуниялалде вачӏине вуго жиндирго малаикзабигун цадахъ. Щивасул амру-ишалда рекъон кьела Гьес гьебмехалъ.

²⁸ Хӏакълъун абулеб буго дица нужеда: Гӏадамил Лъимер Парччахӏлъун вачӏун вихьичӏого жидеца хвалил лълъар гьекъезе гьечӏел гӏадамалги ругелха гьанир эхетаразда гьоркьор.