Матфей 13 - Инжил

13 бетӏер Аллагьасул Парччахӏлъиялъул мисалал Хуриб хьон хьалев чи

¹ Гьебго къоялъ рокъоса къватӏиве вахъун ралъдал рагӏалде ун гӏодов чӏун вукӏана Гӏиса.

² Гӏадамазул кӏудияб руккел бакӏарун букӏана гьенибе. Гьединлъидал гьев росоде вахине ккана, тӏолабго халкъин абуни ралъдал рагӏалда чӏун букӏана. Батӏи-батӏиял мисалалги рачун, гӏемераб хабар бицана гьезие Гӏисаца:

³ – Хуриб хьон хьазе вахъун вукӏанила цо чи.

⁴ Хьалаго-хьалаго цо-цо мугьал нухде рортанила, роржун рачӏун хӏанчӏаз рищанила гьел.

⁵ Цо-цо мугьал ракьул хъал гурони тӏад гьечӏеб тӏалде кколел рукӏанила. Ракь тӏеренаб букӏиндал, гьел гьенир хехго тӏирщанила ва тӏаде раккизе лъугьанила.

⁶ Амма бакъ тӏад речӏчӏарабго речӏан анила гьел ва, гъваридго ракьулъе кьалбал риччан рукӏинчӏелъул, хеккого ракъванила.

⁷ Цогиги мугьал заз-хъарахъалде гъорлъе кканила, хӏалигъун бижараб чӏахӏицаги зазицаги гьел гъанкъун реханила.

⁸ Цогидал мугьал кканила лъикӏаб ракьалда тӏаде, гьезул цоязда лъугьанила нусго мугь бугеб тӏор, цогидазда – лъабкъого мугь бугеб тӏор, цогидазда – лъеберго мугь бугеб тӏор.

⁹ Гӏундул ругезда рагӏизе биччанте гьеб!

¹⁰ Гӏисада аскӏоре рачӏун муридаз гьикъана щай мун дозда мисал бачун кӏалъалевилан.

¹¹ Гьезие жавабалъе Гӏисаца абуна: – Нуж руго Зобалазул Парччахӏлъиялъул балъголъи лъазе рес щварал гӏадамал, амма гьезие гьеб рес щвечӏо.

¹² Кодолъи бугесе гӏунги тӏокӏлъиледухъ тӏадеги кьезе буго, кодолъи гьечӏесухъа бугебги бахъизе буго.

¹³ Мисалал рачун бицуна дица гьезие, ралагьун ругониги гьезда бихьуларелъул, гӏенеккун ругониги гьезда я рагӏуларелъул, я бичӏчӏуларелъул.

¹⁴ Гьезухъ балагьун ритӏухълъула Ишая аварагасда Аллагьас абураб гьадинаб калима: «Гӏиналда рагӏаниги, нужеда бичӏчӏиларо, бералда бихьаниги, нужеда лъаларо.

¹⁵ Щайгурелъул гьаб халкъалъул ракӏалги согӏлъун руго, гӏундулги гъугълъун руго, бералги къанщун руго гьез. Гьез гьедин гьабулеб буго беразда канлъи бихьунгутӏизе, гӏундузда рагӏи рагӏунгутӏизе, рекӏелъе щибго босунгутӏизе, дица сахлъизаризе дихъе нахъруссунгутӏизеги».

¹⁶ Гьардарал гурищха нужер берал, гьезда бихьулеб бугелъул. Гьардарал гурищха нужер гӏундул, гьезда рагӏулеб бугелъул.

¹⁷ Хӏакълъун абулеб буго дица нужеда: гӏемерал аварагзабазеги вализабазеги бокьун букӏана нужеда бихьулеб бугеб бихьизе, амма гьезда бихьичӏо. Нужеда рагӏулеб бугеб рагӏизеги бокьун букӏана, амма гьезда рагӏичӏо.

¹⁸ Гьанже гӏенекке, хуриб хьон хьалев вукӏарав чиясул хӏакъалъулъ дица бачараб мисалалъул магӏна бицинин нужеего.

¹⁹ Аллагьасул Парччахӏлъиялъул хӏакъалъулъ бицаралъухъ гӏенекканиги, гьеб бичӏчӏичӏев чиясул рекӏелъе лъугьарал рагӏаби бачӏун илбисалъ рикъун ина. Гьеб ккола нухде рортарал мугьазул магӏна.

²⁰ Ракьул хъал гурони тӏад гьечӏеб тӏалде рортарал мугьал – гьел ккола Аллагьасул рагӏи рохун къабул гьабурал гӏадамал.

²¹ Амма рекӏел гъварилъуда кьалбал гьечӏелъул, гьеб халат хутӏуларо. Къабул гьабураб рагӏи сабаблъун хӏинкъабиги къварилъабиги тӏаде ккараб мехалъ, гьединав чияс къо хӏехьоларо.

²² Заз-хъарахъалде гъорлъе рортарал мугьал – гьел руго Аллагьасул рагӏухъ гӏенеккулелал. Амма гьаб дуниялалъул тӏалаб-агъазалъ ва бечелъизе бугеб гъираялъ гъоркькъинарула гьел мугьал, гьезда тӏорги баларо.

²³ Лъикӏаб ракьалде рортарал мугьал – гьел руго гьеб рагӏи рагӏулелал ва бичӏчӏулелал. Гьезул тӏоразда бижила цоязда нусго нухалъ, цогидазда лъабкъого нухалъ ва цогидазда лъеберго нухалъ цӏикӏкӏун мугь.

Ракьулъе рехараб хьодул мугьалъул хӏакъалъулъ

²⁴ Мисал бачун цоги хабар бицана Гӏисаца гьезие: – Зобалазул Парччахӏлъи релълъуна жиндирго хуриб лъикӏаб хьон хьарав цо пуланав чиясда.

²⁵ Амма гӏадамал кьижараб мехалъ вачӏун тушманас гьесул ролъул хурибе чӏахӏил хьон хьан буго ва нахъе ун вуго.

²⁶ Ролъ тӏаде баккун, тӏор балеб мехалъ, хуриб чӏахӏги загьирлъун буго.

²⁷ Рачӏун хурул бетӏергьанасда абун буго гьесул рагьтӏателаз: – Я, бетӏерчӏахъад, лъикӏаб хьон гурищ дуца хуриб хьан букӏараб? Чӏахӏица бацун буго гури доб.

²⁸ Тушманас гьабун батилин гьеб ишилан абун буго хурул бетӏергьанас.

²⁹ Доб чӏахӏ бахъизе инищилан абун буго лагъзадерица.

³⁰ Унгейилан абун буго гьас. Чӏахӏ бахъулаго цадахъ ролъги бахъизе гурин нужеца. Хур лъилъизе заман щвараб мехалъ, дица лъилъарухъабазда абила батӏаго лъилъун, бухӏизе чӏахӏил гулал къайилан, ролъги дир цагърахъе байилан.

Горчицаялъул мугьалъул хӏакъалъулъ

³¹ Мисал бачун, цоги хабар бицана Гӏисаца гьезие: – Зобалазул Парччахӏлъи релълъуна жиндирго хурибе цо пуланав чияс хьараб горчицаялъул хьодул мугьалда.

³² Гьеб буго киналго хурдузул хьоназда гьоркьоб бищунго гьитӏинаб хьодул мугь. Амма гьелдасан лъугьуна хъархъаздасаги кӏудияб гъветӏ. Роржун рачӏун хӏанчӏаз бусаби гьарула гьеб гъотӏол гӏаркьалабазда.

Реччеялъул хӏакъалъулъ

³³ Цогиги мисал бачана Гӏисаца гьезие: – Зобалазул Парччахӏлъи релълъуна цо пуланай чӏужугӏаданалъ ханждал лъабго къалиялда гъорлъе рехараб ва тӏубанго гьеб беччизабураб реччеялда.

³⁴ Гӏисаца гьеб кинабго мисал бачун бицана халкъалъе, мисал гъорлъ гьечӏеб каламго букӏунароан гьесул.

³⁵ Цо аварагасда Аллагьас абураб гьадинаб калима ритӏухъ гьабулеб букӏана гьелъ: «Дунял бижаралдаса балъго хутӏарал ишал, Харбилъ мисалал рачун, рицина дица нужей».

Ракьулъе рехараб хьодул мугьалъул мисал бичӏчӏизабула

³⁶ Цинги, гӏадамалги нахъе ритӏун, рокъове щвана Гӏиса. Аскӏоре рачӏун гьесул муридаз гьарана Гӏисада доб хуриб бижараб чӏахӏил мисалалъул магӏна бицеян.

³⁷ Гьес бицана: – Хуриб лъикӏаб хьон хьалев чи ккола Гӏадамил Лъимер.

³⁸ Хур ккола дуниял. Лъикӏаб хьон ккола Парччахӏлъиялъул агьлу. Чӏахӏ ккола илбисалъул агьлу.

³⁹ Чӏахӏил хьон хуриб хьарав тушман ккола илбис. Лъилъаризе заман щвараб мех ккола ахир къиямасеб къо. Лъилъарухъаби ккола малаикзаби.

⁴⁰ Хуриса чӏахӏ бецун цӏадабе балеб гӏадин букӏина къиямасеб къоялъги.

⁴¹ Гӏадамил Лъимаца жиндирго малаикзаби ритӏила, ва гьез гьесул Парччахӏлъиялдаса чӏарала жидеца гӏадамал мунагьалъукье ккезаруралги квешлъи гьабуралалги – киналго.

⁴² Цинги гьел цӏадул коронире рехила. Гӏодилел ва цаби къерщезарулел хутӏила гьел гьенир.

⁴³ Ритӏун ккаралал гьебмехалъ рукӏина жидерго Инсул Парччахӏлъиялда бакъ гӏадин кенчӏелел. Рагӏизе гӏундул ругезда гьеб рагӏила!

Бахчараб хазинаялъул хӏакъалъулъ

⁴⁴ Зобалазул Парччахӏлъи релълъуна цо пуланав чиясда чияр хуриб батараб хазинаялда. Гьесги гьенибго бахчун тун буго гьеб. Гьелдаса вохиялъ, инеги ун, кинабго жиндирго боцӏи-рикъзиги бичун, гьеб хур босун буго гьес.

Жавгьаралъул хӏакъалъулъ

⁴⁵ Зобалазул Парччахӏлъи релълъуна бищунго берцинаб жавгьар балагьулев вукӏарав цо базарганасда.

⁴⁶ Батун буго гьесда бищунго къиматаб жавгьар. Инеги ун, кинабго жиндирго букӏанщинаб боцӏи-рикъзиги бичун, босун буго базарганас гьеб жавгьар.

Ччугӏа кколеб гьиналъул хӏакъалъулъ

⁴⁷ Зобалазул Парччахӏлъи релълъуна ччугӏа кквезе ралъдалъе рехараб гьиналда. Гьиналъ гӏемераб батӏи-батӏияб ччугӏа ккун букӏун буго.

⁴⁸ Цӏураб мехалъ ччугӏихъабаз гьин рагӏалде цӏан буго. Гӏодорги чӏун, лъикӏаб ччугӏа батӏа гьабун гьез гьагьинибе бан буго, квешаб нахъе бан буго.

⁴⁹ Гьедин букӏине буго къиямасеб къоялъги. Рачӏун малаикзабаз лъикӏалги квешалги гӏадамал ратӏа гьаризе руго.

⁵⁰ Цинги квешал цӏадул коронире рехила. Гӏодилел ва цаби къерщезарулел хутӏила гьел гьенир.

⁵¹ Бичӏчӏулеб бугищ нужеда? – ян гьикъана гьезда Гӏисаца. Бугилан абуна гьез.

⁵² Цинги гьес абуна: – Гьединлъидал Зобалазул Парччахӏлъиялда муридлъун лъугьанщинав динияв гӏалимчи релълъуна жиндирго гъансиниса цӏиябги басриябги хазина цадахъ къватӏибе бахъулев рукъалъул бетӏергьанасда.

Кӏиабизеги Гӏиса къабул гьавуларо Назареталда

⁵³ Гьел мисалал рачун лъугӏараб мехалъ, Гӏиса гьениса нахъе ана.

⁵⁴ Живго гӏураб шагьаралдеги вачӏун, гьениб гьезул синагогаялъуб Аллагьасул рагӏи малъизе лъугьана Гӏиса. Гӏадамал гӏажаиблъун хутӏун рукӏана, гьадинаб гӏакъиллъи-цӏодорлъи гьесие кисадай щванаян, мугӏжизатал рихьизаризе киндай гьесда кӏолаян.

⁵⁵ – Гьадав цӏулал устарасул вас гурищ гьав? Марям гурищ гьасул эбелалда цӏар? Гьасул вацал гурищ Якъубги, Юсупги, Симонги, Ягьудаги?

⁵⁶ Гьанир нилъеда аскӏор гурищ гьасул киналго яцал ругел? Цинги гьаб гӏакъиллъиги карамалъиги кисаха гьасие щвараб?

⁵⁷ Гьедин, васвасаца ккун, гьесда божичӏо гьел. Гьебмехалъ Гӏисаца гьезда абуна: – Къимат-къадру гьечӏев авараг цониги вукӏунаро, амма жиндирго инсул росдацаги, жиндирго рукъалъул агьлуялъги гьев рикӏкӏунаро.

⁵⁸ Гьел божулел рукӏинчӏелъул, дагьал гурони мугӏжизатал рихьизаричӏо гьенир Гӏисаца.