Марк 3 - Инжил

3 бетӏер Гӏисаца сахлъизавула цо квер бакъварав чи

¹ Цоги нухалъ синагогаялъуве вачӏиндал, Гӏисада гьенив ватана цояб квер бакъварав чи.

² Гӏисада хадуб хал ккурал гӏадамалги рукӏана, гьес гьев чи сахлъизавуни, шамат къоялъ гьабураб хӏалтӏийилан, гьесде гӏайиб гӏунтӏизабизе бокьун.

³ Квер бакъварав чиясда Гӏисаца абуна: – Тӏаде вахъун, рукъ бакьулъе вачӏа! – ян.

⁴ Гьел гӏадамаздехун вуссун, Гӏисаца гьикъана: – Шамат къоялъ лъикӏлъи гьукъун бугебищ, квешлъи гьабизе изну бугебищ? Чиясул рухӏ хвасар гьабизейищ кколеб, яги гьев хвезавизейищ кколев? Гьел руцӏцӏун чӏана.

⁵ Цо ццидалаб берги гьезда речӏчӏизабун, гьезул ракӏазул согӏлъиялдаса пашманлъарав Гӏисаца дов чиясда абуна: – Квер гӏебеде битӏе, – ян. Гьесги квер гӏебеде битӏула, гьебсагӏат гьебги сахлъула.

⁶ Гьебмехалъ синагогаялъуса къватӏире рахъаралго, фарисеялги гьеродилалги данделъула Гӏиса киндай тӏагӏинавилаян тадбиралъе ургъизе.

Гӏисахъе гӏемераб халкъ бакӏарула

^7-8 Гӏиса жиндирго муридалгун цадахъ Галилеялъул ралъдал рагӏалде ана. Гьесда цадахъ добе багъарана Галилеялъул халкъалъул кӏудияб руккел. Ягьудиялдасаги, Иерусалималдасаги, Идумеялдасаги ва Иордан гӏурул доб рахъалдасаги гӏемераб гӏалам бачӏана гьенибе, Гӏисал хӏалкӏолъиялъул хабар рагӏун. Тиралъул ва Сидоналъул ракьалдаса рачӏаразулги чӏахӏиял руккалаби гӏуна гьенир.

⁹ Гьениб муридазда гьес тӏадкъана жив тӏаде вахине раса хӏадур гьабеян: гӏадамазул гӏемерлъиялъ, гьел тӏаде къан рачӏине гурилан хӏинкъун вукӏана гьев.

¹⁰ Гӏемерал унтарал гӏадамал сах гьарун рукӏана Гӏисаца, гьединлъидал черхалда унти-гӏузру бугел чагӏи гӏедегӏулел рукӏана гьесухъе, гьесда цо квергӏаги хъвазе щвелародаян.

¹¹ Гӏиса вихьараб мехалъ, хъубал жундуз ккурал чагӏи гьесда цере накабазда чӏолаан ва ахӏдолаан, мун Аллагьасул Вас кколилан.

¹² Амма Гӏисаца жундузда лъазабулаан жив щивали бицунгейилан.

Гӏисаца анцӏила кӏиго чапар тӏаса вищула

¹³ Гьале Гӏиса магӏарде вахана. Гьес гьенире ахӏана жиндиего рокьарал муридал. Гьелги Гӏисада аскӏоре ана.

¹⁴ Гьес анцӏила кӏигояв чапарзабилъун гьаруна, жиндаго цадахъ рукӏинеги, Рохалил хабар лъазабизе ритӏизеги,

¹⁵ гӏадамазул чорхолъа жундул рачахъулеб къудрат кьезеги.

¹⁶ Гьел рукӏана: Гӏисаца Пётр абун тӏокӏцӏар жиндие кьурав Симон,

¹⁷ Зебедайил вас Якъуб, гьев Якъубилго вац Иоанн (гьев кӏиясего Гӏисаца кьун букӏана Боанергес абураб цӏар – гьебги ккола «Гъугъадиялъул васал» абураб магӏнаялъул рагӏи),

¹⁸ Андрей, Филипп, Бартоломей, Матфей, Фома, Алфейил вас Якъуб, Фаддей, Симон Кӏанъанаъ,

¹⁹ хадув Гӏисае хилиплъарав Ягьуда Искариотги.

Илагьияб Рухӏги жундузул ханги

²⁰ Гӏиса тӏадвуссун рокъове щвана. Нахъеги гьенибе бакӏарараб халкъалъул гӏемерлъиялъ, Гӏисаеги гьесул муридазеги санагӏалъи ккечӏо гӏодорчӏун чадил мочӏу кӏалдиб лъезе.

²¹ Гьев вуссун вукӏин лъан, гьесул бетӏер сверун бугилан абулебги рагӏун, Гӏисал цебесеб гӏагарлъиялъул чагӏи рачӏана гьев нахъе вачине.

²² Иерусалималдаса рачӏарал диниял гӏалимзабазни абулеб букӏана жундузул хан вугин Гӏисал чорхолъе лъугьун, ва гьеле гьев жундузул ханас кумек гьабулеб бугин гьесие жундул рачахъизеян.

²³ Гьебмехалъ аскӏореги ахӏун, Гӏисаца гьезда, мисал бачун, бицана: – Кин кӏолеб илбисалда жибго бачахъизе?

²⁴ Цо пуланаб ханлъиялда жаниб кьал ккани, гьеб ханлъи биххичӏого хутӏуларо.

²⁵ Цо хъизаналда жаниб кьал ккани, гьеб хъизанги биххичӏого хутӏуларо.

²⁶ Гьединго илбисги жибго жиндаго дандечӏун кьалда бугони, гьеб къечӏого хутӏуларо. Гьелъул иш лъугӏулагури гьебмехалъ.

²⁷ Цо къуватав чиясул рокъове лъугьун, гьесул боцӏи-рикъзи бикъизе кӏоларо, цин гьев вухь-вухьун рехун хадуб гурони. Гьебмехалъ кӏвела гьесул рукъ бикъизе.

²⁸ Хӏакълъун абулеб буго дица нужеда: гӏадамазул киналниги мунагьал ва кигӏан кӏудиял рукӏаниги гьесда лъурал бугьтанал тӏасалъугьун тезе руго Бетӏергьанас.

²⁹ Амма Илагьияб Рухӏалда бугьтан лъурав чиясе тӏасалъугьин киданиги букӏине гьечӏо. Абадиялъги тӏаса ккеларо гьесдаса гьеб мунагь.

³⁰ (Гӏисаца гьедин абуна, гьез абулеб букӏиндал гьев жундуз ккун вугилан.)

Гӏисахъе рачӏуна гьесул эбелги вацалги

³¹ Цинги Гӏисахъе рачӏуна гьесул эбелги вацалги. Дора къватӏир жалгоги чӏун, гьев ахӏизе чи витӏула гьез.

³² Гӏемерал гӏадамал рукӏана гьебмехалъ Гӏисада аскӏор. Гьесда абуна: – Доле дора къватӏир духъ ралагьун чӏун руго дур эбелги вацалги. Мун цӏехон рачӏун руго дол.

³³ Гӏисаца гьезда абуна: – Эбеллъун щий дие кколей ва вацаллъунги щал кколел?

³⁴ Цинги жинда сверухъ гӏодор чӏун ругезухъ берги тӏамун, Гӏисаца абуна: – Гьале дир эбелги дир вацалги.

³⁵ Щайгурелъул Аллагьасул амру-нагью тӏубазе гьабулев чи щив вукӏаниги, гьев ккола дие вацги, яцги, эбелги.