Марк 14 - Инжил

14 бетӏер Ягьудиязул кашишзаби ургъула Гӏиса тӏагӏинавизе

¹ Кӏиго къо хутӏун букӏана Пасхаялъул ва Реччичӏел Панкъазул Байрамалъул анкь тӏаде щвезе. Чӏахӏиял кашишзабиги диниял гӏалимзабиги ургъулел рукӏана хӏилла-рекӏкӏалдалъун кквезеги ккун Гӏиса чӏвазавизе рес кколарищали.

² Амма абулеб букӏана байрамалъул къоялъ лъикӏ гурилан, халкъалъул дандечӏей багъаризе бегьулилан.

Цо чӏужугӏаданалъ Гӏисае гьабураб лъикӏлъи

³ Барасалъ унтарав Симон абулев чиясул бакӏалда Бетания росулъ кваназе гӏодов чӏун Гӏиса вугеб мехалъ, тӏаде ячӏуна махӏ гьуинаб цӏакъ къиматаб ва бацӏцӏадаб нахул цӏураб щагӏил сурахӏиги босун, цо пуланай чӏужугӏадан. Сурахӏиги бекун, гьелъ гьеб нах Гӏисал ботӏроде чӏехьола.

⁴ Гьенир рукӏарал цо-цо гӏадамал ццин бахъун лъугьуна. Гьез цоцазда абулеб букӏана: – Щай гьабгощинаб нах гӏадада хвезабулеб?

⁵ Бичун букӏарабани, лъабнусго динаралдаса цӏикӏкӏараб гӏарац щвелаан гьелъухъ, цинги мискинзабазе садакъаде кьезе бегьилаан гьеб. Гьедин гьей чӏужугӏаданалдаса рази гьечӏого гаргадилел рукӏана гӏадамал.

⁶ Гӏисаца гьезда абуна: – Те гьей жийго! Щай нужеца гьей къварид гьаюлей? Дие лъикӏлъи гьабулейлъидал гьей йигей.

⁷ Мискинзаби кидаго ратила нужеда аскӏор, бокьанщинахъе нужеца садакъа кьезе. Дунин абуни кидаго гуро нужгун вукӏунев.

⁸ Гьелъ гьабуна жиндихъа бажарулеб иш; цебеккунго дир черхалда тӏаде махӏ гьуинаб нахги тӏун, хабалъейин гьелъ дун къачӏалев вугев.

⁹ Хӏакълъун абулеб буго дица нужеда: тӏолабго дуниялалда Рохалил хабар лъазабунщинаб бакӏалда бицен букӏине буго гьай гӏаданги ва гьалъ дие гьабураб лъикӏлъиги ракӏалде щвезабун.

Ягьуда Искариот Гӏисае хилиплъула

¹⁰ Анцӏила кӏиявго чапарасда гьоркьов вукӏарав Ягьуда Искариот ана гьебмехалъ чӏахӏиял кашишзабазухъе, Гӏиса гьезда кодове кьезе разилъун.

¹¹ Гьеб хабаралдаса дол цӏакъ рохана, ва Ягьудае гӏарац кьезе къотӏиги гьабуна гьез. Цинги Ягьудаца балагьулеб букӏана Гӏиса гьезул кверде кьезе санагӏалъи бугеб бакӏги заманги.

Пасхаялъул квен

¹² Реччичӏел Панкъазул Байрамалъул тӏоцебесеб къоялъ, Пасхаялъул къурбаналъе кьегӏер хъолеб къоялъ, муридаз Гӏисада абуна: – Пасхаялъул квен киб кваназе дуе бокьилеб? Инеги ун, нижеца хӏадур гьабила гьеб.

¹³ Гьебмехалъ Гӏисаца жиндирго кӏиго муридасда тӏадкъала: – Нуж а гьанже шагьаралде. Лъел гӏеретӏги цӏун вачӏунев цо чи ватила нужеда. Нуж гьесда хадур а.

¹⁴ Цинги гьев жаниве лъугьараб рукъалъул бетӏергьанасда нужеца абе: «Мугӏалимасе лъазе бокьун буго жиндирго муридалгун цадахъ Пасхаялъул квание рукъ киб бугебали».

¹⁵ Гьес нужеда бихьизабила чӏухӏизабун къачӏараб гӏатӏидаб тӏасарукъ. Гьеле гьениб гьабе нужеца нилъеего Пасхаялъул квен.

¹⁶ Кӏиявго мурид шагьаралде ана ва гьенире щведал, Гӏисаца абухъе, ишги тӏубана. Цинги Пасхаялъул квенги хӏадур гьабуна.

¹⁷ Дуниял рукӏкӏараб мехалъ анцӏила кӏиявго чапаргун цадахъ Гӏиса гьенив парахалъула.

¹⁸ Гӏодор чӏун кваналел рукӏаго, Гӏисаца абула: – Хӏакълъун абулеб буго дица нужеда: дида цадахъ гьанир кваналел ругел нужер цояв дие хилиплъила.

¹⁹ Цӏакъ пашманлъун лъугьуна гьел. Цин-циял рахъун цӏехола: – Дун гуро гурищ? – абун.

²⁰ Гӏисаца гьезда абула: – Дида цадахъ гьаб гъадриниб чед ччулев вугев анцӏила кӏиявго чапарасда гьоркьов вуго гьев.

²¹ Гӏадамил Лъимадул иш ккезе буго Тӏухьдузда хъван бугеб куцалда. Амма квешаб балагь рещтӏине бугебха Гӏадамил Лъимер тушбабазул кверде кьурав чиясде. Дуниялалда вижичӏевани лъикӏан гьесие.

²² Гьедин кваналел рукӏаго, Гӏисаца, цо чедги кодобе босун, тӏаде дугӏаги гьабун, бек-бекун гьезухъе кьуна: – Босе, кванай. Гьаб буго дир черх!

²³ Цинги, чогърол цӏураб щурунги кодобе босун, Аллагьасе реццги гьабун, гьезухъе кьуна Гӏисаца. Кинацаго иргадал гьекъана гьеб щурумалъуса.

²⁴ Гьес абуна: – Гьаб буго гӏемерав чиясе гӏоло тӏолеб дир би – Цӏияб Къотӏи щулалъиялъе тӏолеб би.

²⁵ Хӏакълъун абулеб буго дица нужеда: Аллагьасул Парччахӏлъиялда цӏияб чагъир гьекъолеб къо тӏаде гӏунтӏизегӏан дица гьаб цӏолбол цӏцӏураб жа тӏокӏаб гьекъезе гьечӏо.

²⁶ Цинги гьез туркаби ахӏана, гьениса рахъун ун, Зайтуналъул магӏарде рахана.

«Дуца дидаса инкар гьабила»

²⁷ Гӏисаца гьезда абула: – Яхӏ рехизе буго нужеца кинацаго, Тӏехьалда хъван бугелъул: «Дица вехь чӏвала, гӏиги рахъ-рахъалде тӏурун ина».

²⁸ Хун хадув чӏаголъараб мехалъ нужедаса цеве щвела дун Галилеялде.

²⁹ Пётрица гьесда абуна: – Киназго яхӏ реханиги, дица яхӏ рехиларо.

³⁰ Гӏисаца гьесда абула: – Хӏакълъун абулеб буго дица дуда: гьанже радакье хӏелеко кӏицӏул гӏегӏедилалде лъабцӏулго инкар гьабизе буго дуца дидаса.

³¹ Амма Пётрица цӏакъ ракӏчӏезабун абулеб букӏана Гӏисада: – Дуда цадахъ хвезе кканиги, дица дудаса инкар гьабизе гьечӏо, – ян. Гьединго абулеб букӏана киналго цогидазги.

Гетсемания ахикь Гӏисал гьари-дугӏа

³² Гьале гьел щвана Гетсемания абулеб бакӏалде. Гӏисаца жиндирго муридазда абуна: – Нуж гьанир гӏодор чӏун рукӏа, дун Аллагьасе гьари-дугӏа гьабун вачӏинегӏан.

³³ Пётрги, Якъубги, Иоаннги рачана Гӏисаца жиндаго цадахъ. Ракӏ хӏинкъараб ва къваридаб ургъалилъе ккана гьев.

³⁴ Гӏисаца гьезда абуна: – Хвалил гӏазаб буго дир рекӏее. Нуж гьанир рукӏа! Рорчӏуда чӏа!

³⁵ Цинги, дагьав довегӏанги ун, кӏалагъоркьеги речӏчӏун, Аллагьасда гьардезе лъугьана, бегьулеб батани гьеб хвалил сагӏат рикӏкӏад гьабейилан.

³⁶ Гьес абулеб букӏана: – Абба! Я дир Эмен! Мун сундуего хӏалкӏолев вугелъул, гьеб хвалил лълъар гьекъезабуге дида. Амма дие бокьухъе гуреб, дуего бокьухъе букӏине биччанте!

³⁷ Тӏадвуссун вачӏиндал, Гӏисада гьел кьижун ратана. Гьес Пётрида абуна: – Симон! Кьижунищ мун вугев? Цо сагӏаталъ кьижичӏого яхӏ гьабизе кӏвечӏеб къагӏидаха дуда?

³⁸ Воре, нуж рорчӏуда чӏа! Гьари-дугӏаялде русса, нужго къосинарунгутӏизе. Инсанасул рухӏ – лебалаб, черх – загӏипаб.

³⁹ Нахъеги довегӏанги ун, додинго Аллагьасда гьардезе лъугьана Гӏиса.

⁴⁰ Гьанжеги тӏадвуссун щведал, Гӏисада гьел ратула, беразул тӏелхал бакӏлъун, кьижун ккун. Щиб жаваб кьелебали лъаларого хутӏана гьел.

⁴¹ Лъабабизеги додинго тӏадвуссун щведал, Гӏисаца гьезда абула: – Нуж жеги рахӏаталда кьижунищ ругел? Гьале, тӏубанагури кинабго! Тӏаде гӏунтӏана доб Гӏадамил Лъимер мунапикъзабазул кверде кьолеб сагӏат.

⁴² Гьа, рахъа! Доле хиянатчи тӏаде щолев вугин!

Гӏиса ккун вачун уна

⁴³ Гӏисаца гьедин абулаго, тӏаде щвана Ягьуда, дол анцӏила кӏигояздасан цояв. Гьесда цадахъ хвалчабигун ва тӏилалгун тӏаде бачӏунеб букӏана чӏахӏиял кашишзабазги, диниял гӏалимзабазги, чӏухӏби-хӏакимзабазги битӏараб гӏемераб халкъ.

⁴⁴ Хиянатчияс гьезда лъазабун букӏана: «Дица убач гьабурав чи Гӏиса вукӏина. Цинги ккве нужеца гьев. Вореха, хъаравуллъи кутакаб чӏезабе!»

⁴⁵ Ягьуда битӏун Гӏисада аскӏове уна, «Рабби!» – янги абун, гьесда убач гьабула.

⁴⁶ Гьебсагӏат тӏад речӏчӏун гӏадамаз Гӏиса къан ккола.

⁴⁷ Гьебмехалъ Гӏисал цо муридас бахъун хьвагӏараб хвалчаца цо чиясул (гьев вукӏана кӏудияв кашишасул рагьтӏател) гӏин къотӏун рехула.

⁴⁸ Гьездехун вуссун Гӏисаца абула: – Хвалчабигун, тӏилалгун хъачагъасде гӏадин кӏанцӏанагури нуж дун кквезе.

⁴⁹ Щибаб къоялъ нужее вагӏза-насихӏат гьабулев Мукъадасаб Рокъов вукӏунаангури дун. Гьениб нужеца диде квер борхичӏо. Амма Тӏехьалда хъвараб ритӏухълъизе биччанте!

⁵⁰ Гьебмехалъ Гӏисал киналго муридал, вукӏаралъув гьевги тун, лъутун уна.

⁵¹ Гӏицӏаб черхалда тӏад шаршавги жемун, цо гӏолохъанчи вукӏана гьесда хадув вачӏунев. Амма рагъухъабаз гьев къан ккуна.

⁵² Шаршавги гъоркьго тун, толохӏочго лъутун ворчӏана гьев.

Гӏиса тӏадегӏанаб судалда цеве чӏезавула

⁵³ Гӏиса вачана бищунго кӏудияв кашишасухъе. Гьенир данделъун рукӏана чӏахӏиял кашишзаби, чӏухӏби-хӏакимзаби ва диниял гӏалимзаби.

⁵⁴ Пётрги вукӏана нахъа-нахъа чӏун вачӏунев. Бищунго кӏудияв кашишасул азбаралъувеги лъугьана гьездаго хадув цун. Цинги рагъухъабазда аскӏов кӏусун, цӏадухъ хинлъулев вукӏана.

⁵⁵ Гьебмехалъ чӏахӏиял кашишзабазги тӏолабго тӏадегӏанаб судалъги балагьулеб букӏана Гӏиса чӏвазе къотӏиялъе гӏураб гӏайиб гьесде гӏунтӏизабизе цогӏаги нугӏлъи. Амма гьеб гьезухъе щолеб букӏинчӏо.

⁵⁶ Гӏемер рукӏана гьересинугӏлъи гьабулел чагӏи, амма гьез бицараб жо данде кколеб букӏинчӏо.

⁵⁷ Цере рахъун цо-цо гьересинугӏзаз гьадин абулеб букӏана:

⁵⁸ – Нижеда рагӏана гьес абулеб гьаб инсанасул квераз гьабураб Мукъадасаб Рукъ щущазабила дица ва лъабго къоялде, лъицаниги квер хъвачӏого, цӏидасан банги кьелаян.

⁵⁹ Амма гьелъие нугӏлъи гьабулел гӏадамаз бицунебгицин данде кколеб букӏинчӏо.

⁶⁰ Гьебмехалъ тӏаде вахъун бакьулъ эхетун бищунго кӏудияв кашишас Гӏисада гьикъана: – Дуда данде нугӏлъи гьабун гьаз бицунеб бугеб жоялъе жаваб кьезе рагӏигойищ дур гьечӏеб?

⁶¹ Гӏиса, микъан кӏалъачӏого, вуцӏцӏун чӏун вукӏана. Бищунго кӏудияв кашишас цоги суал кьуна гьесие: – Бице, мунищ кколев Рахӏманасул Вас Масихӏ?

⁶² – У, – ян абуна Гӏисаца. – Нужеда вихьила Гӏадамил Лъимер, Къудратав Аллагьасул кваранаб рахъалда гӏодов чӏунги ва зобалазул накӏкӏул парчабазда тӏад вачӏуневги.

⁶³ Гьебмехалъ бищунго кӏудияв кашишас, жиндаго тӏад букӏараб ретӏелги тӏу-тӏун балаго, абуна: – Тӏокӏалги сундуе нилъее нугӏзал къваригӏарал?

⁶⁴ Нужеда рагӏанагури гьасул гӏасиял-пасикъал рагӏаби. Щиб пикру нужер бугеб? Киназго абуна гьев чӏвазе къотӏизе кколилан.

⁶⁵ Рахъун цо-цоял гьесде тударулел рукӏана. Беразда чӏортоги бухьун, кьабулеб букӏана гьесда: – Ле, авараг, лъица кьабурабали бице! – янги абулаго. Цинги рагъухъабиги лъугьана гьев вухизе.

Пётрица Гӏисадаса инкар гьабула

⁶⁶ Азбаралъув гъоркьа вукӏарав Пётрида аскӏое ячӏана бищунго кӏудияв кашишасул цо гъараваш.

⁶⁷ Цӏадухъ гӏодов чӏарав гьесухъги ялагьун, гьелъ абуна: – Мунги вукӏанагури Назареталдаса Гӏисада цадахъ.

⁶⁸ Нагӏадала ккун инкар гьабуна Пётрица. Дуца бицунеб жо щибилан, гьеб жинда бичӏчӏуларилан чӏана гьев. Цинги Пётрица къватӏибехун нух босана. Гьебмехалъ бахъана хӏелеко гӏегӏедулеб гьаракь.

⁶⁹ Нахъеги гьев вихьун, гъаравашалъ гьенир рукӏаразда бицана гьавги дозул чи вугилан.

⁷⁰ Гьанжеги нагӏадала ккуна Пётрица. Цо заманаялдасан нахъеги тӏаделъана гьесде дол гӏадамал хӏакъикъаталдаги мун дозул чи вугин, мунги Галилеялдаса вукӏине кколин.

⁷¹ Амма Пётр Аллагьасул цӏар бахъун гьедаризе лъугьана гьев нужеца бицунев чи жинда лъаларилан.

⁷² Гьебмехалъ кӏиабизеги гӏегӏедана хӏелеко. Пётрида ракӏалде щвана Гӏисаца жинда абун рукӏарал рагӏаби: радакье бахъун хӏелеко кӏицӏул гӏегӏедилалде лъабцӏулго инкар гьабилин дуца дидасайилан. Гӏек-гӏекиялда гӏодана гьебмехалъ Пётр.